Genesis 21

Sèla bzɨ Yisàk

¹Bôbo Fɨyini nɨ̀n dyeyn meyn àtem a juŋà sɨ̂ Sèla ɨ ni kɨ ta wu n-læ bè ɨ luynsɨ ìchfɨ̂nɨ̀ i ŋweyn. ²Sèla ɨ timi ɨlvâ ɨ bzɨ wayn ɨ̀ lûmnɨ̀ sɨ̂ Abɨ̀làhâm kɨ̀ ɨlvɨ afî a Bôbo nɨn læ chfɨ̀nɨ ateyn. A nà n-ghɨ tì ma Abɨ̀làhâm sɨ ghɨ mà wù dvɨyn meyn. ³Abɨ̀làhâm ɨ chfɨ̀ ìzɨyn i wayn àteyn na Yisàk. ⁴A nà ghɨ ibàm i mɨchi nfama Abɨ̀làhâm ɨ sɨ anam a Yisàk kɨ̀ ta Fɨyini fɨ nɨn læ bè. ⁵Ghɨ n-læ se sɨ bzɨ Yisàk ma Abɨ̀làhâm sɨ ghɨ bèŋ ɨvɨ.

⁶Sèla ɨ kæ bè na, “Fɨyini fɨ fu meyn ìsaŋlɨ ighaʼnɨ-i sɨ̂ mà, nô mɨ ndà ɨ ghɨ sɨ nà yvɨ iwo nâ yèynì wu nà boŋ saŋlɨ-à.” ⁷Sèla nɨ̀n fi meyn bè na, “Nô wùl nà n-kaʼ wu bû fì bè sɨ̂ Abɨ̀làhâm na mà læ̀ nà nyoŋsɨ̂ wayn, wù bɨmi. Mɨtì mà wêyn nɨ̀ wàyn ŋweyn a ma awu kɨ̀ nô a ŋweyn ɨdvɨyn.”

Abɨ̀làhâm ɨ sàŋ Hagày ŋêyn Ishmàyêl

⁸Yisàk nɨ̀n lema meyn kfeyn Sèla teyn sɨ a igheyn. A nà ghɨ achi nâ ghè a wu n-teyn ŋweyn sɨ a igheyn, Abɨ̀làhâm ɨ jàŋ nô àyɨ a ghaʼnɨ-a. ⁹Sèla ɨ yeyn ta wayn ɨ̀lvì vzɨ̂ a Abɨ̀làhâm bzɨ ŋêyn Hagày ɨ wâyn wul ɨ̀ Ijìb vzɨ̀ nɨ̀n ndɨm ŋêyn Yisàk, lûʼsɨ̀ ŋweyn. ¹⁰Sèla ɨ yeyn tî ɨ kæ be sɨ̂ Abɨ̀làhâm na, “Sàŋ akôs a wul ɨ wi kèyn ŋêyn wâyn ŋweyn, bòm ta wâyn ŋweyn nâ wèyn læ̀ gwô wì afo à kya ŋêyn wayn wom Yisàk.” ¹¹Ta wù tàŋi tî iwo ateyn i nà sɨ fu ngeʼ sɨ̂ Abɨ̀làhâm nô sɨ a ŋaŋ bòm ta Ishmàyêl nà n-ghɨ kɨmɨ wâyn ŋweyn. ¹²Fɨyini fɨ ɨ bè sɨ̂ Abɨ̀làhâm na, ka wa n-vìsi iwo i wayn nâ yèynì ŋêyn nà ŋweyn yi na fu ngeʼ sɨ̂ và. Ni kɨ iwo zɨ̀ a Sèla bè sɨ̂ và. Woyn ghì a mà chfɨ̀nɨ̀ sɨ̂ và læ̀ fvɨ̂ ɨntweŋ nɨ̀ Yisàk. ¹³Mà læ̀ ni-à a wâyn wùl ɨ̀ felɨnɨ nɨ̀ và nâ wèyn bzɨ woyn a ghɨ koʼ kɨ̀mɨ sɨ a ghelɨ ilaʼ ighaʼnɨ-i, bòm ta wù n-ghɨ kɨmɨ wâyn vâ.

¹⁴Ɨtuʼ ɨ bɨsɨ layn, Abɨ̀làhâm ɨ lì ɨ̀fwo ɨ yɨnɨ nɨ̀ mu atem ɨ koʼsɨ a mbèʼ nɨ̀ Hagày ɨ tsɨynsɨ ŋweyn ŋêyn Ishmàyêl àŋena lù. Hagày ɨ lù tì ɨ nà sɨ bɨm jèlɨ̀ kɨ jelɨ a nse ìyum a Beshebà. ¹⁵Àŋena ni nyvɨ mèsì mu mzɨ̀ a dzɨ nô mɨ ɨlvɨ gha Hagày ɨ tom wayn isas i fɨ̂kàʼ fɨlifɨ. ¹⁶Ta wù tòm tî ɨ kɨŋtɨ ndu dùʼì kɨ sɨ a aghaf têyn ɨ nà sɨ dzɨ-à bê na, “Wàyn kàʼ wu bû nà kfɨ ndû kɨ nô a ma awu tèyn ma yeyna.” ¹⁷Fɨyini fɨ̀ ɨ yvɨ ta wâyn Hagày nɨn dzɨ̂ isas i fɨ̂kàʼ afu ɨ nì nchì ŋweyn ɨ bɨf sɨ̂ Hagày na, “À n-gâyn ghà sɨ̂ và a Hagày? Ka wa n-fì fàyn, Fɨyini fɨ yvɨ meyn ta wâyn vâ nɨ̀n dzɨ̂ isas i fɨ̂kàʼ afi. ¹⁸Làli ɨ ndu chàʼsɨ̀ wayn àteyn ɨ kfɨmtɨ ŋweyn. Mɨ n-nì-à a ngœ̀ ndo nɨ̀ ŋweyn læ̂ kòʼ sɨ a ilaʼ i ghaʼnɨ-i.” ¹⁹Ta Fɨyini fɨ tàŋi tî ɨ yàsì àsɨ a Hagày. Wu yeyn ibɨ i mu ili ɨ ndu tu luynsɨ àtem a mu nɨ̀ ŋweyn kì ɨ ndu fu ɨ̀n lì sɨ̂ wàyn wu nyvɨ. ²⁰Wayn àteyn ɨ nà lemâ Fɨyini fɨ tôʼnɨ̀ nɨ̀ ŋweyn. Wu chitɨ koʼ a nse ìyum ɨ yeʼi ɨ nà sɨ kya sɨ byem nɨ̀ fɨ̀nchya fɨ nô a jûŋ. ²¹À nà n-ghɨ ta Ishmàyêl nɨ̀n chi a nse ìyum a Balàn, nà ŋweyn ɨ ndù wi sɨ̂ ŋweyn, a ghɨ wayn wùl ɨ̀ Ijìb.

Abɨ̀làhâm ɨ yɨ mɨkâyn ŋêyn fòyn Abimelèk

²²À n-læ meyn nà ghɨ achi a li-a, fòyn Abimelèk ŋêyn Fìkôl, atu a ndo ìwoŋ nɨ̀ ŋweyn ɨ ndu yeyn Abɨ̀làhâm ɨ bè sɨ̂ ŋweyn na, “Ma yeyn meyn na Fɨyini fɨ nɨn ghɨ zɨ̂ ŋweyn nô mɨ a gha ta wà n-nî. ²³Ma ti meyn dyèyn àtem a juŋà sɨ̂ và. Boŋ læ dyèyn atem a juŋà sɨ̂ mà ɨ dyeyn kɨmɨ sɨ̂ ghelɨ ilaʼ ghèyn a wà n-chi ateyn sɨ a wul ɨ̀ gvinɨ têyn. Chfɨ̀nɨ læ̂ sɨ̂ mà lvɨ̂yn asɨ nɨ̀ Fɨyini fɨ na wà læ̀ lɨsɨ̂ wì ma kèsa wul ɨ̀ wayn nɨ̀ mà.”

²⁴Abɨ̀làhâm ɨ bè na, “Ma chfɨnɨ meyn.”

²⁵Ta wù chfɨ̀nɨ̀ tî ɨ kæ dzɨ̀ ngeʼ ŋweyn sɨ̂ Abimelèk ɨ bè na, “Ghelɨ ghɨ felɨnɨ nɨ̀ và ti meyn ghal fsɨ ibɨ i mu nɨ̀ mà ili nà visî wì na ghelɨ̀ ghem na tu mu ateyn.” ²⁶Abimelèk ɨ bè sɨ̂ Abɨ̀làhâm na, “Mɨ n-kya wi na à tî mòm ndà ìnkì iwo tèyn a. Bòm ghà ta wà tî faŋ tɨ̀ fèʼtɨ sɨ̂ mà a? Mɨ n-yvɨ kɨ lvɨ̂yn.”

²⁷Ta wù tàŋi tî Abɨ̀làhâm ɨ li gvì nɨ̀ bzɨsɨ nɨ̀ nyamsɨ mbòloʼsɨ ɨ fu sɨ̂ Abimelèk, ŋêyn ŋweyn ɨ yɨ mɨkâyn. ²⁸Abɨ̀làhâm ɨ teytɨ fvɨ̀sɨ̀ woyn njɨ̀sɨ̀ ghɨki ghɨli nsòmbo antêynɨ̀ nyàmsɨ̀ nɨ̀ ŋweyn ɨ lèm sɨ a nyɨŋ. ²⁹Abimelèk ɨ bɨf sɨ̂ ŋweyn na, “Wà ti chòʼtɨ ɨ̀ lèm ɨsêynsɨ̀ sɨ a nyɨŋ tèyn yi dyêyn na gha?”

³⁰Abɨ̀làhâm ɨ bèynsɨ̀ ɨ bè na, “Lì ɨ njɨ̀ nâ sèynsɨ̀ nsòmbo ɨ na ghɨ nchwò nsaʼ na à n-kelɨ mà ibɨ i mu nâ yèynì bòm ta à n-læ tɨm ma.”

³¹Ghɨ nà sɨ toŋtɨ̂ àlêʼ nâ kì-à na Beshebà bòm ta Abɨ̀làhâm ŋêyn Abimelèk nɨn læ yɨ mɨkâyn afu.

³²À nà n-ghɨ ta àŋena yɨ̀ mɨkâyn nâ mzɨ̀ a Beshebà, Abimelèk ŋêyn Fìkôl, atu a ndo ìwoŋ nɨ̀ ŋweyn ɨ kasi kfa a Fìlisìyà. ³³Abɨ̀làhâm ɨ yel fɨkâʼ fɨ Tamalìs a Beshebà ɨ nà sɨ koʼsɨ̂ Bôbo Fɨyini fìfɨ̀ a fɨ fàŋ meyn samoʼ afu. ³⁴Abɨ̀làhâm nɨ̀n fi meyn chi ilaʼ i Fìlisìyà nô sɨ a ndyèyn ìdyà.