Genesis 20

Abɨ̀làhâm ɨ lɨsɨ Abimelèk

¹Abɨ̀làhâm chitɨ kɨ têyn ɨ fi lù sɨ a alèʼ ghè a wu nà n-chi ateyn ɨ kàli ndù dzɨ abàs a Negèf ɨ ndu chem alèʼ ghè a Kadèsh nɨ̀ Shû nà n-lêm ighami ateyn ɨ kas mɨtwo ɨ nà chi afu. Wù n-fi meyn chitɨ ɨ koʼ a Gelà, ²bê kɨ sɨ̂ ghelɨ afu na, wî ŋweyn Sèla nɨn ghɨ jêmtɨ̀ zɨ. Abimelèk ɨ fòyn Gelà ɨ tum jàŋ Sèla ɨ lì sɨ a ŋweyn a wi.

³Mɨtì a læ kfa nà ghɨ nɨ̀ntuʼ achi a li-a Fɨyini fɨ ɨ taŋi sɨ̂ Abimelèk a jem ɨ bè na, “Wà n-ghɨ tèyn ma wà sɨ ghɨ kɨ àkfɨ afo bòm ta wul ɨ wi vzɨ̀ a wà lì tî nɨ̀n ghɨ wî wùl.”

⁴À nà n-ghɨ mɨ tì Abimelèk ɨ bu duʼ tɨ̀ chi nɨ̀ Sèla. Wu kæ bè sɨ̂ Bôbo Fɨyini na, “A ti bè na wa n-bebsɨ̂ ghesɨ̀ ghelɨ ghem kɨ̀ nô salû tèyn a? ⁵Ba à tî bè kɨ̀ nô Abɨ̀làhâm sɨ̂ mà na Sèla nɨn ghɨ jêmtɨ̀ zɨ, nô sèla nɨ ngeŋ ŋweyn bɨmi? Mà tî nì ìwo nâ yèynì kɨ nô nɨ̀ atem a laynɨ-a. Ma bû bèbsɨ ìwo.”

⁶Fɨyini fɨ ɨ bèynsɨ̀ sɨ̂ ŋweyn a jem nâ ghè na, “Mɨ n-kya samoʼ na wà tî nì ìwo nâ yèynì nɨ̀ àtem a layna. À ti iwo zɨ̀ a mà tî bùʼsɨ na ka wà kum ŋweyn ɨ nì mbɨ a ma asɨ. ⁷Kasi læ̂ fu wî wùl sɨ̂ ŋweyn bòm ta wùl àteyn nɨ̀n ghɨ nfèʼtɨ̀ ìghaʼnɨ. Fu wù jem sɨ̂ và ta ka wà faŋ tɨ̀ fì tɨ̀ kfɨ. Ma wà faŋ tɨ̀ fu a zɨ̂ ghelɨ̀ ghya kfɨtɨ kɨ ghɨ̀ jɨ̀m.”

⁸Ɨtuʼ nà bɨsɨ layn gvî kɨ tèyn Abimelèk ɨ jàŋtɨ̀ chyeʼsɨ ŋweyn nô sɨ̀ jɨ̀m ɨ fèʼtɨ̀ nô mɨ ghà ta yi tî gàyn. Àŋena nà fâyn nô sɨ a ŋaŋ. ⁹Abimelèk ɨ tum jàŋ Abɨ̀làhâm ɨ bɨf sɨ̂ ŋweyn na, “Wà mòm ghà sɨ̂ ghèsɨ̀ ghelɨ ghem teyn a? Mà bèbsɨ nô ghà sɨ̂ và wà mâʼ ìwumi ighaʼnɨ-i atu nɨ̀ ghès teyn a? Wà mom meyn ìwo sɨ̂ mà wùl ɨ kelɨ wi sɨ mom sɨ̂ wùl nô sakos.” ¹⁰Ta wù tàŋi tî ɨ fi bɨf sɨ̂ Abɨ̀làhâm na, “Wà tî nì nô ìwo nâ yèynì têyn bòm ghà?”

¹¹Abɨ̀làhâm ɨ bèynsɨ̀ na, “Mà tî kfàʼtɨ̀ kɨ̀ sɨ a ma ngeŋ na nô wùl nɨ̀n fâyn wì Fɨyini afêyn ma ghɨ kàʼ a ghɨ zue ma bòm wî wom. ¹²Nô mɨ tì, wù n-ghɨ kɨ nô jêmtɨ̀ yem a ghɨ wi sɨ a nì. À n-ghɨ wâyn bò wom ta mà tî lì sɨ a wi. ¹³A nà sɨ ghɨ ta Fɨyini fɨ bè ma lû vìsi ghelɨ̀ ghem nà ndû kɨ àlêʼ nɨ̀ àleʼ à, ma bè sɨ̂ Sèla na wù na kôŋ kɨ nô mà, ghesɨ̀ ŋweyn ndû nô mɨ wo wu be kɨ na mɨ n-ghɨ waynà ŋweyn.”

¹⁴Abɨ̀làhâm ɨ taŋi tì Abimelèk ɨ fu nyamsɨ mbòloʼ nɨ̀ bzɨsɨ nɨ̀ ghelɨ ghɨ felɨnɨ ghɨki nɨ woyn ghɨ lûmnɨ̀ sɨ̂ ŋweyn ɨ kasi fu wî ŋweyn. ¹⁵Ta wù fù tî ɨ bè sɨ̂ Abɨ̀làhâm na, “Ɨyêyn nɨ̀n ghɨ nse yem. Wà kôŋ mɨ àlêʼ à kà ateyn wa ndu nà chi-à.”

¹⁶Ta wù tàŋi tî ɨ bè sɨ̂ Sèla na, “Mɨ n-fèʼ fu ɨ̀kfaŋ aso ɨkwo a fɨfâ sɨ̂ waynà vâ nkam sɨ dyeyn sɨ̂ ghelɨ ghì a zɨ̂ àŋena nɨn ghɨ amoʼ nô ghɨ̀ jɨ̀m na wà bû bèbsɨ ìwo.”

¹⁷Abɨ̀làhâm ɨ jèm, Fɨyini fɨ nì Abimelèk ŋêyn wî ŋweyn nɨ̀ ghelɨ ghɨ felɨnɨ nɨ̀ ŋweyn ghɨki ɨ nà sɨ fì bzɨ-à. ¹⁸À nà n-ghɨ tì ma Bôbo Fɨyini ni meyn ghɨ̀ki na bu bzɨ wì sɨ̂ Abimelèk kɨ bòm Sèla.