Genesis 23

Sèla ɨ kfɨ

¹Sèla nɨn læ lema ɨ nà ghɨ bèŋ ɨvɨ nɨ̀ bèŋsɨ̀ mɨ̀vɨ̂m mbò njvàsɨ̀ nsòmbo ɨ kfɨ. ²Wù n-læ kfɨ a Heblòn ilaʼ i Kenàn. Abɨ̀làhâm ɨ dzɨ̀ ìkfɨ i ŋweyn.

³À nà n-ghɨ kɨ ta wù kfɨ, Abɨ̀làhâm ɨ dzɨ chem aleŋ a li-a ɨ làlì sɨ a ngùŋ nɨ̀ wul ɨ̀ kfɨnɨ ɨ fvɨ ndu bè sɨ̂ ghelɨ Hêt na, ⁴“Mɨ n-ghɨ tèyn ghɨ kɨ wul àtum, chwô chwo. Yì beyʼlɨ læ̂ àlêʼ a nse sɨ̂ mà afêyn, mà gvɨmi wî wom ateyn.”

⁵Àŋena bè sɨ̂ Abɨ̀làhâm na, ⁶“Yvɨtɨ a bòbè, wà n-ghɨ tèyn ghɨ kɨ nô wul ɨ two a ghès antêynɨ̀. A n-choʼnɨ̂ kɨ va ngvɨ̀mi sìsɨ̀ a wà n-kôŋ afêyn ɨ̀ gvɨ̀mì wî vâ ateyn. Wùl sɨ̂ ghès nɨn ghɨ wi a wù kàʼ a wù na leʼ na ka wà gvimi wul ɨ̀ vâ a ŋweyn alèʼ.”

⁷Àŋena nɨn tàŋi tî Abɨ̀làhâm ɨ làlì ɨ ndu ngvɨmtɨ a àŋena asɨ. ⁸Ta wù n-ngvɨ̀mtɨ tî ɨ kæ bè na, “Ta yì bɨ̀mi meyn na mà gvɨmi wî wom a yi ilaʼ, yì chwotɨ læ̂ Eflòn ɨ wâyn Zohà sɨ̂ mà. ⁹Yì chwotɨ ŋweyn wù beyʼlɨ alêʼ iwu kì a kɨ n-ghɨ ighami i gvêyn nɨ̀ ŋweyn a Makbelà tì sɨ̂ mà. Yì chwotɨ wù beyʼlɨ sɨ̂ mà kɨ̀ nô sɨ ɨkwo ateyn mà laʼ kɨ̀ nô a yi asɨ ɨ̀ lì sɨ a ma ngvɨ̀misɨ.”

¹⁰Abɨ̀làhâm nà n-taŋî tì Eflòn ɨ duʼ kɨmɨ ɨchfɨ̀ ayisi afu ŋêyn ghelɨ ŋweyn. Wu bèynsɨ̀ Abɨ̀làhâm kɨ̀ antêynɨ̀ nɨ̀ ghelɨ Hêt nâ ghì na, ¹¹“Ɨ̀ngaŋ yvɨtɨ a bô, mɨ n-fu àlêʼ ateyn sɨ̂ và baʼsɨ̂ kɨ nɨ̀ gvèyn nâ zɨ̀. Mɨ n-fu kɨ nô sɨ̂ và asɨ nɨ̀ ghelɨ̀ ghem a wà gvɨmi wî vâ ateyn.”

¹²Wu n-tàŋi tî Abɨ̀làhâm ɨ fi ngvɨmtɨ asɨ nɨ̀ àŋena ¹³ɨ bè sɨ̂ Eflòn kɨ̀ asɨ nɨ̀ àŋena ghɨ̀ jɨ̀m na, “Mɨ n-chwotɨ̂ và, visi kɨ visi mà laʼ ɨkwo alèʼ nâ wèyn sɨ̂ và ɨ̀ gvɨ̀mì wî wom ateyn.”

¹⁴Eflòn ɨ bè sɨ̂ Abɨ̀làhâm na, ¹⁵“Yvɨtɨ a bòbè, mɨ n-ghɨ sɨ beyʼlɨ alêʼ a gvêyn nâ kèynà a mà fu sɨ a kilùsɨ aso ɨkwo a fɨfâ sɨ̀ kæ̀ nɨ̀ àbeʼa, mɨtì ɨkwo nâ wèyn ɨ ghɨ wi nô mɨ àfo a li-a sɨ̂ ghesɨ̀và. Li ndu kɨ ndû nɨ̀ àlêʼ ateyn a ɨ gvɨ̀mì wî vâ ateyn.”

¹⁶Abɨ̀làhâm ɨ bɨmi ɨ làʼ kɨ afo kì a Eflòn nì fèʼtɨ̀ nô ghelɨ Hêt ghɨ̀ jɨ̀m ɨ yvɨ. Wù n-læ fèʼ aso ɨkwo nâ kì kɨ̀ ta ghɨ nà n-lum se sɨ yuyn alêʼ ghɨ fèʼ.

¹⁷À ti ta Abɨ̀làhâm nɨ̀n læ yuyn gvêyn Eflòn zɨ̀ a yi nà n-ghɨ a Makbelà a ngùŋ Mamlè, baʼsɨ̂ nɨ̀ ìwu zɨ̀ a yi nà n-ghɨ ateyn kɨ̀mɨ nɨ̀ ɨ̀nkàʼ mzɨ̀ a mɨ̀ nà n-ghɨ a mbæ̀ sɨ ateyn nô ɨ̀n jɨ̀m. ¹⁸Wu n-yuyn gveyn nâ zɨ̀ sɨ̂ Eflòn kɨ̀ nô asɨ nɨ̀ ghelɨ Hêt ghì a ghɨ nà n-ghɨ ɨchfɨ ayisi. ¹⁹A nà ghɨ ta Abɨ̀làhâm yùyn alêʼ ateyn ɨ gvɨ̀mi wî ŋweyn alèʼ iwu ghè a yi nà n-ghɨ ateyn. Iwu nâ zɨ̀ nà n-ghɨ a Makbelà a ngùŋ Mamlè, ilaʼ i Kenàn. ²⁰Ghelɨ Hêt nɨn læ beyʼlɨ alêʼ nâ kì sɨ̂ Abɨ̀làhâm baʼsɨ̂ kɨ nɨ̀ ìwu zɨ̀ a yi nà n-ghɨ ateyn sɨ a ngvɨ̀misɨ.