Genesis 24

Abɨ̀làhâm ɨ tum ghɨ kɨŋ wi sɨ̂ Yisàk

¹Abɨ̀làhâm nà n-sɨ ghɨ ma wù lema meyn nô sɨ a ŋaŋ, Bôbo fî bòysɨ ŋweyn kɨ̀ dzɨ sɨ̀ jɨ̀m. ²A læ nà ghɨ achi a li-a wu jàŋ wul vzɨ̀ a wu nà n-tisɨ ghelɨ ghɨ felɨnɨ nɨ̀ ŋweyn ɨ bè sɨ̂ ŋweyn na, “Lèm awu à kya a ma abì ɨ chfɨ̀nɨ̀ ìwo sɨ̂ mà. ³Mɨ n-kɨŋ na wà chfɨnɨ sɨ izɨyn nɨ̀ Bôbo Fɨyini fìfɨ̀ a fɨ fàytɨ iyvɨ nɨ̀ nse na, wa ndû wì wi sɨ̂ wayn wom Yisàk ilaʼ i Kenàn afêyn a mɨ n-chi ateyn tèyn. ⁴Chfɨ̀nɨ sɨ̂ mà na wa n-kasî ndû kɨ a ghès ilaʼ ɨ̀ kɨ̀ŋ wul ɨ wi sɨ̂ wâyn wom afu kɨ̀ ɨntweŋ ɨ ndo nɨ̀ ghès.”

⁵Ta wù bè tî, wul ɨ̀ felɨnɨ àteyn ɨ bɨf sɨ̂ ŋweyn na, “Mà ti kæ ndù yèyn wul ɨ wi, wù na kôŋ wì sɨ gvì ilaʼ afêyn ma kasi gvì ɨ li ndù nɨ̀ wâyn vâ afu ma?”

⁶Abɨ̀làhâm ɨ bè sɨ̂ ŋweyn na, “Ka wa n-læ̀ mòm sɨ lì sɨ ndù nɨ̀ wâyn wom ilaʼ afu.” ⁷“Bôbo Fɨyini fìfɨ̀ a fɨ n-ghɨ iyvɨ nɨ̀n læ meyn jàŋ ɨ fvɨ̀sɨ mà sɨ a ghès ilaʼ ɨ fi fvɨ̀sɨ̀ mà sɨ a antêynɨ̀ nɨ̀ ghelɨ̀ ghem ɨ chfɨ̀nɨ̀ na wù læ̀ fu ìlaʼ yèynì sɨ̂ wôyn ghem. Fɨyini nâ fèynfɨ̀ nɨn tum nchì ŋweyn a yì tisɨ vâ a wà yeyn wul ɨ wi sɨ̂ wâyn wom ilaʼ afu.” ⁸Wà kæ ndù yèyn wul ɨ wi àteyn wù leʼ na yi n-gvì wì zɨ̂ ŋweyn, a wà na kelɨ wi ngeʼ. Mɨtì iwo i ɨ ghɨ kɨ ìmòʼ na ka wa n-læ̀ mòm sɨ lì sɨ ndù nɨ̀ wâyn wom ilaʼ afu. ⁹Wu n-tàŋi tî wul ɨ̀ felɨnɨ nɨ̀ ŋweyn nâ vzɨ̀ ɨ lèm àwu a ŋweyn abì ɨ chfɨ̀nɨ̀ na, yì læ̀ li ndû wì nɨ̀ wâyn ŋweyn ilaʼ afu.

¹⁰A nà ghɨ ta wù chfɨ̀nɨ̀ tî, Abɨ̀làhâm ɨ fu ɨfwo ɨ jûŋ sɨ̂ wul ɨ̀ felɨnɨ nɨ̀ ŋweyn wu kul atû kàmêlsɨ̀ ìvɨm, ŋêyn ghelɨ ghɨ felɨnɨ ghɨli ɨ lù. Àŋena nɨn lù tî ɨ nà ndû dzɨ abàs a Mèsòbòtemìyà, a ntèʼ ghê a Nahò nà n-chi ateyn. ¹¹A nà ghɨ ta wù jèl ndù chèm a ibɨ i mu ɨchfɨ ntèʼ nâ ghè, ma à sɨ ghɨ a mbol àbè, aleŋ ɨlvɨ ghê a ghɨ̀ki nà n-fvɨ̂ gvî tu mu ateyn. Wu nì kàmêl sɨ ŋweynsɨ nyìŋì sɨ a ngùŋ ìbɨ̀ i mu nâ ghê.

¹²Wu timi sɨ afu ɨ nà sɨ jemà bê na, “O Bôbo Fɨyini fɨ bò ìfèl nɨ̀ mà dyèyn atem a juŋà sɨ̂ bò ìfèl nɨ̀ mà ɨ Abɨ̀làhâm ɨ gàmtɨ̀ ɨ nì mà yeyn wul ɨ wi sɨ̂ wâyn ŋweyn layn. ¹³Mɨ n-ti a ngùŋ ìbɨ̀ i mu afêyn, woyn ghɨ̂ki ntèʼ nâ ghèyn ɨ ghɨ sɨ nà fvɨ̂ gvî tu mu ateyn. ¹⁴Ni a Bô na à fvɨ̂ gvì nô mɨ waynda ngòyn ɨ̀kfà ma bê sɨ̂ ŋweyn na, ‘Mɨ n-chwotɨ-à a nì fu ma nɨ̀ mû mà nyvɨtɨ,’ wù kæ bè na, ‘Nyvɨ a bô mà fu ɨ̀n lì sɨ̂ kàmêl shyasɨ,’ a nà ghɨ kɨ ɨvzɨ̂ a wà chòʼ meyn sɨ a wi sɨ̂ wùl ɨ̀ felɨnɨ nɨ̀ và Yisàk. Yi kæ gàyn têyn, a mà keli samoʼ na wà dyeyn meyn àtem a juŋà sɨ̂ bò ìfèl nɨ̀ mà.”

¹⁵Wù nà n-jêm mesì gvî kɨ tèyn, Làbikà ɨ gvî nɨ̀ àtem a mu-a sɨ a mbèʼ. Làbikà nà n-ghɨ wâyn Betwèl, Betwèl ɨ ghɨ wâyn Milkà ɨ wî Nahò ma à ti wâynà Abɨ̀làhâm. ¹⁶Làbikà nâ wèyn nà n-ghɨ kɨ nô àtu a ngòyn, bu duʼ tɨ nà kya wul ɨ̀ lûmnɨ̀, bula wul ɨ̀ lûmnɨ̀ timi chi nɨ̀ ŋweyn. Wu zɨ kàli ɨ tu mu mɨ̀ ŋweyn ɨ kasi ɨ fvɨ koʼ.

¹⁷Wul ɨ̀ felɨnɨ nɨ̀ Abɨ̀làhâm vzɨ̀ ɨ nyàŋsɨ ndu bè sɨ̂ ŋweyn na, “Mɨ n-chwotɨ̂ và a nì fu ma nɨ̀ àlêʼ a mu-a a wa atem mà nyvɨtɨ.” ¹⁸Wu bè na, “Ku nyvɨ a bô,” ɨ nyàŋsɨ̀ ɨ suʼsɨ kɨ suʼsɨ atem a mû nɨ̀ ŋweyn ɨ fu mu wu nyvɨ.

¹⁹A nà sɨ ghɨ ta wù nyvɨ mèsì, Làbikà ɨ bè na, “Mɨ n-tu fu kɨmɨ ɨ̀n lì sɨ̂ kàmêl shyasɨ a sɨ nyvɨ kfeyn kɨ̀ ta sɨ n-kɨŋ.” ²⁰Ta wù tàŋi tî ɨ̀ kàsi kɨ̀ kasi mu mzɨ̀ a mɨ̀ fàŋ a ŋweyn atem a fɨ̂kɨ̀ ghê a nyamsɨ nà n-yvɨ mu ateyn ɨ fi nyɨŋ ndu tu kfeynsɨ ɨ̀n lì ɨ nà sɨ tu kɨ tu nô ta ka kàmêl sɨ ateynsɨ nî nyvɨ ɨ̀ kfeyn. ²¹Wu nà n-nî tì wul ɨ̀ felɨnɨ nâ vzɨ̀ ɨ ki kɨ àtsɨ̀-atsɨ, kayn nâ a Bôbo ti bû nì ijêl i ŋweyni jôf a?

²²A nà ghɨ ta kàmêlsɨ̀ nyvɨ mèsì mu mɨ̀ àteyn, wùl ɨ̀ felɨnɨ vzɨ̀ ɨ tuŋ fvɨ̀sɨ̀ fɨ̀nchaʼ fɨ azue fɨ lifɨ nɨ̀ nchaʼ sɨ lisɨ sɨ̀ bò a ŋweyn a bò, sɨ dɨ̂ytɨ̀ kɨ tèyn, ma ghɨ fàytɨ nɨ̀ àso ɨkwo a baŋnɨ-a ɨ fu sɨ̂ Làbikà. ²³Wu n-fu tî ɨ kæ bɨf sɨ̂ Làbikà na, “Wà n-ghɨ wâyn ndà? Aleʼ à ti kàʼ a kɨ na ghɨ a yi abe ta ka ghesɨ̀ ghelɨ̀ ghem chi ateyn a?”

²⁴Làbikà ɨ bè na, “Mɨ n-ghɨ wâyn Betwèl, nà bò wom ɨ ghɨ Milkà, bò bò wom ɨ ghɨ Nahò.” ²⁵Wu taŋi tì ɨ fi bè na, “Aleʼ à nɨn ghɨ a ghès abe ma yì kàʼ a yì chi ateyn, nô ɨ̀fwo ɨ yɨnɨ ɨ boŋ ghɨ sɨ̂ nyamsɨ, dvɨ̂ kɨ tèyn.”

²⁶Wul ɨ̀ felɨnɨ nâ vzɨ̀ ɨ tfɨŋsɨ àtu a ŋweyn a nse ɨ nà sɨ fu àyòŋnɨ̀ sɨ̂ Bôbo, ²⁷bê na, “Ibemsɨ-i nɨn ndû sɨ̂ Bôbo ɨ Fɨyini fɨ bò ìfèl nɨ̀ mà. Fɨ dyêyn meyn àtem a juŋà ɨ̀ lùynsɨ ìchfɨ̂nɨ̀ zɨ̀-ì a fɨ tî lèm sɨ̂ ŋweyn. Fɨ gamtɨ meyn mà ma jêl gvì zɨ̀ kɨ̀ a ndo nɨ̀ wùl isas i ndo nɨ̀ bò ìfèl nɨ̀ mà.”

²⁸Làbikà ɨ kasi nyɨŋ ɨ ndù fèʼtɨ̀ ìwo zɨ̀-ì a yi gàyn sɨ̂ ghelɨ a ndo nɨ̀ nà ŋweyn. ^29-30Làbikà nà n-kelɨ wâynà ŋweyn ɨ̀lvì izɨyn i ŋweyni ghɨ Labàn. Wu yvɨ iwo ateyn ɨ fi yeyn fɨ̀nchaʼ fìfɨ̀ azue nɨ̀ Làbikà nɨ̀ nchaʼ sìsɨ̀ a ŋweyn ɨkœ ɨ nyɨŋ fvɨ̀ ɨ ndù sɨ yeyn wul ɨ̀ felɨnɨ nɨ̀ Abɨ̀làhâm vzɨ̀ a ngùŋ ìbɨ̀ i mu nâ ghè wu bu ti kɨ a ngùŋ nyàmsɨ̀ nɨ̀ ŋweyn. ³¹Ta wù yèyn tî ɨ bè sɨ̂ ŋweyn na, “Bôbo Fɨyini boysɨ meyn và. Gvi ghesɨ̀và ndu a ghès abe. Wà n-ti nî ghà afêyn a? Ma faytɨ meyn àlêʼ sɨ̂ và, fì fàytɨ a li-a sɨ̂ nyâm shyasɨ.”

³²Labàn nɨn tàŋi tî nô mɨ ɨlvɨ gha ŋêyn wùl ɨ̀ felɨnɨ vzɨ̀ ɨ lù ɨ kfa. Labàn ɨ yàytɨ̀ ɨ suʼsɨ ɨ̀fwo sɨ a atu nyàmsɨ̀ ɨ yɨsɨ nyamsɨ ateyn ɨ fu mu sɨ̂ wul ɨ̀ felɨnɨ nɨ̀ Abɨ̀làhâm vzɨ̀ ŋêyn ghelɨ ŋweyn, àŋena sù ɨ̀vɨ ateyn. ³³Ghɨ gvì nɨ̀ ɨ̀fwo ɨ yɨnɨ ɨ tom asɨ nɨ̀ wul ɨ̀ felɨnɨ nâ vzɨ̀ mɨtì wu bè na yi n-yɨ wi bula yi fêʼtɨ̀ ìwo zɨ̀ a yì gvi ìnyeyni. Ta wù bè tî Labàn ɨ bè na, “Fèʼtɨ læ̂ ìwo ateyn sɨ̂ ghès.”

³⁴Wu bè na, “Mɨ n-ghɨ wul ɨ̀ felɨnɨ nɨ̀ Abɨ̀làhâm. ³⁵Bôbo Fɨyini boysɨ meyn bò ìfèl nɨ̀ mà nô a jûŋ ɨ̀ nì wù na kelɨ ɨ̀fwo wu dvɨ̂ kɨ tèyn. Wù ni meyn wù na kelɨ àso ɨkwo a baŋnɨ-a nɨ a fɨfâ, kelɨ njɨ̀sɨ̀ nɨ̀ nyamsɨ mbòloʼsɨ, nɨ̀ kàmêlsɨ̀ kɨ̀mɨ nɨ̀ njàkâysɨ̀. Wù n-kelɨ kɨmɨ ghelɨ ghɨ felɨnɨ ghɨki nɨ woyn ghɨ lûmnɨ̀. ³⁶Wî ŋweyn Sèla ti meyn bzɨ wayn ɨ̀ lûmnɨ̀ ŋêyn ŋweyn kɨ̀ nô ɨdvɨyn nɨ̀ ŋweyn, bò ìfèl nɨ̀ ma na sɨ ghɨ ma wù fu meyn nô mɨ ghà ta wù n-kelɨ sɨ̂ wàyn nâ wèyn. ³⁷Bò ìfèl nɨ̀ mà ti meyn bè ma chfɨ̂nɨ̀ sɨ̂ ŋweyn na, mà læ̀ ndû wì wul ɨ wi sɨ̂ wâyn ŋweyn nâ wèyn antêynɨ̀ nɨ̀ woyn ghɨ̂kì ilaʼ i Kenàn afî a wù n-chi ateyn. ³⁸Wù tî bè na mà kasi ndù kɨ̀ŋ wi sɨ̂ wâyn ŋweyn kɨ̀ a àŋena ilaʼ kɨ̀ nô ɨntweŋ ndo nɨ̀ àŋena.

³⁹“Ma bɨf sɨ̂ ŋweyn na, ‘Mà ti kæ ndù yèyn wul ɨ wi wù leʼ na yi n-gvî wì ghesɨ̀ ŋweyn a mà ni gha?’

⁴⁰“Wù bê sɨ̂ mà na, ‘Bôbo Fɨyini fìfɨ̀ a mɨ n-koʼsɨ, yvɨnɨ̂ ɨ̀nfeynfɨ nɨn tum nchì ŋweyn a yì tisɨ vâ ta ka wà yeyn wul ɨ wi sɨ̂ wayn wom ɨntwèŋ ndo nɨ̀ bò wom kɨ̀ nô a ɨchfɨ̀ ɨ ndo nɨ̀ ghès. ⁴¹Wà ti kæ ndù yèyn wul ɨ wi àteyn ghelɨ̀ ghem leʼ na wu n-gvî wì zɨ̂ ŋweyn a wà na kelɨ wi ngeʼ kûm ìwo zɨ̀-ì a wà chfɨ̀nɨ̀.’

⁴²“Ma nî gvì chèm ibɨ i mu afêyn layn nà sɨ jêm sɨ̂ Bôbo ɨ Fɨyini fɨ bò ìfèl nɨ̀ mà Abɨ̀làhâm na, ‘Wà kæ sɨ nà koŋà a Bô, wa nì iwo zɨ̀-ì a mà gvì sɨ nì afêyn jel kɨ̀ nô a jûŋ. ⁴³Ta mɨ n-ti a ngùŋ ìbɨ̀ i mu afêyn a Bô, mɨ n-chwotɨ̂ na wà ni waynda ngòyn fvɨ gvì sɨ tu mu afêyn, mà loyn mu sɨ̂ ŋweyn. ⁴⁴Ma kæ loyn wù fu ɨ̀ fì fu ɨ̀n lì sɨ̂ nyâm semsɨ, a à na ghɨ ɨvzɨ̂ a wà chòʼ meyn sɨ a wi sɨ̂ wâyn bò ìfèl nɨ̀ mà.’

⁴⁵“Ta mà nyàʼtɨ jèm mèsì gvì kɨ̀ têyn, Làbikà fvɨ̂ gvì nɨ̀ àtem a mu-a sɨ a mbèʼ ɨ̀ zɨ tù mu, ma bê sɨ̂ ŋweyn na, ‘Fu ma nɨ̀ mû a nì mà nyvɨtɨ.’

⁴⁶“Wù suʼsɨ kɨ̀ suʼsɨ atem a mu nɨ̀ ŋweyn ɨ̀ bè na, ‘Nyvɨ a bô, mà tu ɨ̀ fu ɨ̀n lì sɨ̂ nyâm shyasɨ.’ Ma nyvɨ mèsì, wù bôŋ fu ɨ̀n lì sɨ̂ nyâm semsɨ. ⁴⁷Ma bɨf sɨ̂ ŋweyn na, ‘Bò vâ nɨ̀n ghɨ ndà?’

“Wù bê na, ‘Mɨ n-ghɨ wâyn Betwèl, nà bò wom ɨ ghɨ Milkà, bò bò wom ɨ ghɨ Nahò.’”

“Ma yvɨ tì nô mɨ ɨlvɨ gha ɨ̀ kæ tuŋ fɨ̀nchaʼ a ŋweyn azue sɨ we nchaʼsɨ a ŋweyn ɨkœ. ⁴⁸Ma nî tì nô mɨ ɨlvɨ gha ɨ tfɨ̀ŋsɨ àtu à kema a nse ɨ nà sɨ fu àyòŋnɨ̀ sɨ̂ Bôbo ɨ Fɨyini fìfɨ̀ a bò ìfèl nɨ̀ mà ɨ Abɨ̀làhâm nɨn koʼsɨ. Ma fu tì bòm ta wù tìsɨ meyn mà, ma jêl kɨ àtì-ati ɨ̀ kɨŋ wî wâyn Abɨ̀làhâm a ghɨ wâyn waynà ŋweyn Nahò. ⁴⁹Wu taŋi tì ɨ bè sɨ̂ àŋena na yi na ghɨ sɨ dyèyn ikôŋ sɨ̂ bò ìfèl nɨ̀ mà kɨ̀ nô samoʼ, yi fèʼtɨ̀ sɨ̂ mà. Yi na ghɨ wi sɨ dyèyn yi fèʼtɨ̀ ta ka mà keli iwo zɨ̀-ì a ka mà ni.”

⁵⁰Ta wù tàŋi tî Labàn ŋêyn Betwèl ɨ be kɨ na, “Iwo nâ yèynì nɨn ghɨ tèyn ma à nì kɨ̀ nô Bôbo Fɨyini. Ghès bu fì kelɨ wi iwo ili sɨ bè. ⁵¹À n-ghɨ Làbikà tèyn, lì a zɨ̂ ŋweyn lu wù ndû màla wâyn bò ìfèl nɨ̀ và kɨ̀ ighel ta Bôbo dyeyn meyn.”

⁵²A nà ghɨ ta wul ɨ̀ felɨnɨ nɨ̀ Abɨ̀làhâm yvɨ iwo zɨ̀-ì a àŋena bè nô mɨ ɨlvɨ gha ɨ tfɨŋsɨ àtu a ŋweyn a nse ɨ fu àyòŋnɨ̀ sɨ̂ Bôbo. ⁵³Wu n-nì tî ɨ fvɨ̀sɨ̀ fu nchaʼsɨ sɨ̂ Làbikà ma ghɨ fàytɨ nɨ̀ àso ɨkwo a baŋnɨ-a nɨ sɨ lisɨ ma ghɨ fàytɨ nɨ̀ àso ɨkwo a fɨfâ baʼsɨ̂ nɨ̀ ndzɨsɨ. Wù n-fu meyn kɨmɨ ɨ̀fwo ɨlvɨ sɨ̂ wâynà Làbikà ŋêyn nà ŋweyn ma ghɨ yuyn kɨ̀ nô sɨ ɨkwo ɨ two. ⁵⁴Ta wù tàŋi mèsì tî ŋêyn ghelɨ ŋweyn ɨ kæ yɨ. Ɨtuʼ layn wu bè sɨ̂ ghelɨ Làbikà na, “Yì visi ghèsɨ̀ kfa ndù yeyn bò ìfèl nɨ̀ mà.”

⁵⁵Nà Làbikà ŋêyn wâynà ŋweyn ɨ bè na, “Visi wù chitɨ kfèynsɨ ghesɨ̀ àŋena sɨ a mɨchi ìvɨm jæ ta ka wù lu.”

⁵⁶Wùl ɨ̀ felɨnɨ nɨ̀ Abɨ̀làhâm vzɨ̀ ɨ bè na, “Ta Bôbo nì meyn ijêl ì yemi jôf tèyn, ka yi n-fì làysɨ mà. Yì visi mà kfa ndù yeyn bò ìfèl nɨ̀ mà.”

⁵⁷Wu n-tàŋi tî àŋena bè na, “Visi læ̂ ghèsɨ̀ jaŋ Làbikà yvɨ na wù n-kfâʼtɨ̀ na gha kûm ìwo nâ yèynì a.” ⁵⁸Àŋena jàŋ Làbikà ɨ bɨf sɨ̂ ŋweyn na, “Wa n-lù zɨ̂ wùl ɨ̀ wèyn lvɨyn a?” Wu bè na, “Mɨ n-lù-à.”

⁵⁹A nà sɨ ghɨ ta Làbikà bɨ̀mi, àŋena kæ tsɨynsɨ ŋweyn ŋêyn wùl ɨ̀ felɨnɨ nɨ̀ Abɨ̀làhâm nâ vzɨ̀ nɨ̀ ghelɨ ŋweyn na àŋena lu. Làbikà ɨ se sɨ lu tî ŋêyn wùl ɨ̀ vzɨ̀ a wu nà n-kini ŋweyn sɨ a wâyn mbol ɨ lù amoʼ. ⁶⁰Wu n-se sɨ lù tî ghelɨ ŋweyn ɨ nà sɨ jèm sɨ̂ ŋweyn bê na,

“Ghès nɨn jêm na Fɨyini fɨ boysɨ vâ a jèmtɨ̀, ɨ̀ fù woyn sɨ̂ và kɨ̀ sɨ idvɨ̀,

jêm na wôyn ghya læ̂ tɨm yɨ mbàynɨ̀sɨ àŋena.”

⁶¹Làbikà ŋêyn woyn ghɨ̂kì ghɨ felɨnɨ nɨ̀ ŋweyn ɨ baʼtɨ ɨ̀fwo ɨ kul atû kàmêlsɨ̀ ŋêyn wùl ɨ̀ felɨnɨ nɨ̀ Abɨ̀làhâm vzɨ̀ ɨ lù.

⁶²À nà n-ghɨ tì ma Yisàk kasi meyn gvì sɨ a Bæ-Làhày-Luwà, alèʼ ghè a wu nà n-chi ateyn a Negèf. ⁶³A nà ghɨ aleŋ ɨlvɨ ikfa achi a li-a wu fvɨ̀ ɨ nà ghaynɨ̂ ɨtwaʼ ɨ nyâmsɨ̀ ɨ se sɨ ki sɨ ndùsɨ̀ ɨ yeyn ta kàmêlsɨ̀ nɨn gvî. ⁶⁴Làbikà ɨ se sɨ boŋ sɨ ki sɨ ndùsɨ̀ ɨ yeyn Yisàk nô mɨ ɨlvɨ gha ɨ suʼi kɨ suʼi sɨ atû nyàm. ⁶⁵Tà wù sùʼi tî ɨ bɨf sɨ̂ wul ɨ̀ felɨnɨ nɨ̀ Abɨ̀làhâm na, “Ɨvzɨ nɨn ghɨ ndà a wù n-gvî ti-a?” Wu bè na, “À n-ghɨ bò ìfèl nɨ̀ mà.” Làbikà ɨ lì ndzɨsɨ ɨ chɨytɨ ìkêʼ i ŋweyn ateyn.

⁶⁶Wùl ɨ̀ felɨnɨ nɨ̀ Abɨ̀làhâm vzɨ̀ ɨ fèʼtɨ̀ nô mɨ ghà sɨ̂ Yisàk ta yi gàyn. ⁶⁷Yisàk ɨ li zɨ nɨ̀ Làbikà ɨtwò nɨ̀ nà ŋweyn Sèla ɨ lì ŋweyn sɨ a ŋweyn a wi ɨ nà kôŋ ŋweyn nô a jûŋ. Yisàk nɨn læ mala Làbikà tì ɨ nà bu fì kayn wi mbzɨ ikfɨ nɨ̀ nà ŋweyn.