Genesis 25

Ŋwàʼlɨ̀ Nzɨ̀tɨ

Abɨ̀làhâm ɨ kfɨ

¹Sèla nɨ̀n kfɨ, Abɨ̀làhâm ɨ fi ndù wul ɨ wi ɨlvɨ̀ izɨyn i ŋweyni ɨ ghɨ Kètulà, ²ŋêyn ŋweyn ɨ bzɨ Zimlàn nɨ̀ Jokshàn nɨ̀ Medàn nɨ̀ Midìyàn baʼsɨ̂ nɨ̀ Ishbàk ŋêyn Shuwà. ³Jokshàn nà n-ghɨ bò Shebà fî ghɨ kɨmɨ bò Dedàn. Dedàn ɨ ghɨ bò ghelɨ Ashù nɨ̀ ghelɨ Letùs kɨ̀mɨ nɨ̀ ghelɨ Lêm. ⁴Midìyàn nɨn læ meyn bzɨ woyn woyn ghɨ lûmnɨ̀ a ghɨ Efà ŋêyn Efè nɨ̀ Hanòk nɨ̀ Abidà ŋêyn Eldà. Nô àŋena ghɨ̀ jɨ̀m nà n-chɨ̂yntɨ̀ ghɨ kɨ woyn Kètulà.

⁵Abɨ̀làhâm nɨ̀n læ meyn tef nô mɨ ghà sɨ̂ Yisàk ta wu nà n-kelɨ. ⁶À nà n-ghɨ jæ ta ka wù kfɨ, ma wù fu meyn ɨ̀fwo sɨ̂ woyn woyn ghɨ lûmnɨ̀ nɨ̀ ŋweyn ghì a wù n-læ bzɨ ŋêyn ghɨ̀kì ghɨli tî. Wù n-læ fu tî ɨ bè na àŋena lu vìsi Yisàk ndù nà chî dzɨ abàs ghè a ɨchfɨ̂-iyvɨ i nɨn sal ateyn.

⁷Abɨ̀làhâm nɨn læ chi bèŋ ɨvɨ nɨ̀ bèŋsɨ̀ mɨ̀vɨm nsòmbo njvàsɨ̀ tâyn ɨ kfɨ. ⁸Abɨ̀làhâm nɨn læ se sɨ kfɨ ma wù lema meyn nô a jûŋ, bèŋsɨ ŋweynsɨ na dvɨ̂ kɨ tèyn jæ ta ka wù kfa sɨ yeyn ghɨ̀bo ŋweyn. ⁹Wù n-læ kfɨ tî, woyn ŋweyn ɨ Yisàk ŋêyn Ishmàyêl ɨ gvɨ̀mì ŋweyn ifò ghè a yi nà n-ghɨ a Makbelà a ngùŋ Mamlè tì a gvêyn nɨ̀ Eflòn ɨ wâyn Zohà ɨ wul ɨ̀ Hêt. ¹⁰Ghɨ n-læ gvɨ̀mi ŋweyn ŋêyn wî ŋweyn Sèla alèʼ a gvêyn ghè a wù n-læ yuyn sɨ̂ ghelɨ Hêt tî. ¹¹A nà ghɨ ta Abɨ̀làhâm kfɨ, Fɨyini fɨ boysɨ wâyn ŋweyn Yisàk wu chî a ngùŋ Bæ-Làhày-Luwà.

Woyn Ishmàyêl

¹²Akeynà nɨn ghɨ àzɨyn a woyn Ishmàyêl. Wù nà n-ghɨ wâyn Abɨ̀làhâm vzɨ̀ a wu n-læ bzɨ ŋêyn Hagày ɨ wâyn wul ɨ̀ Ijìb vzɨ̀ a wu nà n-felɨ sɨ̂ Sèla tî.

¹³Akeynà nɨn ghɨ àzɨyn a woyn woyn ghɨ lûmnɨ̀ nɨ̀ Ishmàyêl tèyn kɨ̀ a mbaŋi a mbaŋi ta ghɨ n-læ bzɨ. Wayn ɨwû àsɨ nɨ̀ ŋweyn nà n-ghɨ Nebayòt ghɨli ghɨ Kedà nɨ̀ Adbìl nɨ̀ Mibsàm, ¹⁴nɨ̀ Mishmà ŋêyn Dumà nɨ̀ Masà, ¹⁵nɨ̀ Hadàd, nɨ̀ Temà nɨ̀ Jetù nɨ̀ Nafìsh baʼsɨ̂ nɨ̀ Kedemà. ¹⁶Woyn Ishmàyêl nâ ghèyn nà n-ghɨ ghɨ̀bo ntèʼsɨ njvàsɨ̀ bò ma ghɨ chfɨ̀ ntèʼsɨ ateyn nɨ̀ àzɨyn a àŋena. Nô mɨ ndà nà n-ku àlêʼ toŋtɨ̂ kɨ nɨ̀ ìzɨyn i ŋweyni. ¹⁷Ishmàyêl nɨ̀n læ chi bèŋ ɨvɨ nɨ̀ bèŋsɨ̀ mɨ̀vɨm ɨ̀n tal njvàsɨ̀ nsòmbo ɨ kfɨ ndu yeyn ghɨ̀bo ŋweyn. ¹⁸Woyn Ishmàyêl nɨn læ ku ɨlwêʼ kɨ̀ sɨ zɨ̀tɨ̀ a Hàvilà sɨ ndù sɨ chem a Shû ighami nɨ̀ Ijìb ŋêyn Ashù ɨ nà sɨ chî nû kɨ nu ngeŋsɨ àŋena.

Jàkôb ŋêyn Esò

¹⁹Ɨfêyn fɨ̀ nɨn ghɨ fɨ̀tɨtɨ̂ fɨ woyn Yisàk ɨ wâyn Abɨ̀làhâm. Abɨ̀làhâm nɨn læ nà ghɨ bò Yisàk. ²⁰Yisàk nɨn læ mala Làbikà ghɨ bèŋsɨ̀ mɨ̀vɨm ɨ̀n kæ̀. Làbikà nà n-ghɨ jêmtɨ̀ Labàn, bò àŋena ɨ ghɨ Betwèl ɨ wul ɨ̀ Alàm chî a Badan Alàm.

²¹Làbikà nà n-ghɨ tì bzɨ̂ wì. Yisàk ɨ jèm na Bôbo fu wayn sɨ̂ ŋweyn. Bôbo bèynsɨ̀ ìjêm i ŋweyn, Làbikà ɨ timi ɨlvâ nɨ̀ ɨ̀mbwâʼsɨ̀. ²²Wu n-tìmi ɨlvâ tì woyn ateyn ɨ nà nû kɨ nu a ŋweyn ɨlvà. Wu nà sɨ kayn na à n-gâyn ghà sɨ̂ zɨ̀-a ɨ jèm sɨ̂ Bôbo.

²³Bôbo Fɨyini ɨ bè sɨ̂ ŋweyn na,

“Woyn woyn ghɨ lûmnɨ̀ nɨn ghɨ a wa ɨlvà ghɨ̀bò ghɨ sɨ lema sɨ a tɨ̂laʼ tɨ totɨ tɨ̀ bò.

Nô mɨ ìlaʼ ì kà læ̀ nà kɨŋ kɨ sɨ nà yeʼtɨ̂ ili. Ilaʼ ili læ̀ nà to chwò ili a wayn ɨlwema læ nà ghɨ àkôs sɨ̂ wâynà ŋweyn ɨ̀twelâ.”

²⁴Ɨlvɨ kfeyn ta ka Làbikà bzɨ, wu bzɨ ɨ̀mbwâʼsɨ̀, a ghɨ kɨ ghɨ̀lûmnɨ̀. ²⁵Wàyn ɨwû àsɨ nɨn læ gvì bâŋ kɨ tèyn ma nyuŋsɨ lomi meyn a ŋweyn ɨwuyn kɨ̀ ta ndzɨsɨ. Ghɨ chfɨ̀ ìzɨyn i ŋweyn na Esò. ²⁶Ànkùmtɨ̀-à ɨ se sɨ gvì ma wù ghalɨ meyn ìchɨŋlɨ avɨ̀ nɨ̀ Esò, ghɨ chfɨ̀ ìzɨyn i ŋweyn na Jàkôb. Làbikà nɨn læ bzɨ woyn nâ ghèyn Yisàk ɨ ghɨ bèŋsɨ̀ mɨ̀vɨm ntufa.

²⁷Woyn ateyn nɨn læ meyn lema, Esò ɨ yeʼi ɨ nà byem nô a jûŋ, kôŋ kɨ sɨ nà jelɨ̀ chwô ɨtwaʼ, mɨtì Jàkôb ɨ ghɨ wul tsɨ kɨ tèyn moŋ kôŋ kɨ sɨ nà yisî a ndo. ²⁸Yisàk nà n-kôŋ Esò bòm nyamsɨ ɨtwaʼ sìsɨ̀ a wù nà n-ku kfâ nɨ̀ nseynsɨ wu kfɨla mɨtì Làbikà ɨ kôŋ Jàkôb.

²⁹A læ nà ghɨ achi a li-a Jàkôb ɨ nà kfê ɨ̀fwo ɨ yɨnɨ ɨlvɨ, Esò ɨ kfa ɨ gvì ɨtwaʼ ma wù bolɨ meyn nô sɨ a ŋaŋ jeŋ na ndû kɨ sɨ zue ŋweyn. ³⁰Wu bè sɨ̂ Jàkôb na, “Fu gvi nɨ̀ àlêʼ afo a yɨnɨ-a nɨ̀ và a li-a sɨ̂ mà tî mà yɨ. Jèŋ nɨn ndû kɨ sɨ zue ma.” Ghɨ nà n-toŋtɨ̂ kɨmɨ Esò na Edòm.

³¹Jàkôb ɨ bè na, “Mɨ n-fu kɨ ɨlvɨ ta wà bɨ̀mi na mà li alêʼ à kya ta wul ɨ̀lwema sɨ̂ mà.”

³²Esò ɨ bè sɨ̂ ŋweyn na, “Alêʼ a wul ɨlwema nɨn ghɨ ghà sɨ̂ mà na mà kfɨ jeŋ bòm ànkeyna a?”

³³Jàkôb ɨ fi be kɨ na, “Chfɨ̀nɨ sɨ̂ mà meyn na wa n-fu ɨ̀lwema vâ sɨ̂ mà jæ ta ka mà fu afo a yɨnɨ-a sɨ̂ và.” Esò ɨ chfɨ̀nɨ ndù ɨ beyʼlɨ ɨ̀lwema ɨ ŋweyn sɨ̂ Jàkôb.

³⁴Jàkôb ɨ kæ fu ɨfwo ɨ yɨnɨ sɨ̂ Esò. Wu yɨ ɨ fi nyvɨ ɨ làlì ɨ lù, Jàkôb ɨ nà bu lì wì na wù n-ghɨ wul ɨlwema nɨ̀ ŋweyn. À ti ta Esò nɨn læ beyʼlɨ ɨlwema ɨ ŋweyn kɨ̀ sɨ a nkàyn àfo a yɨnɨ-a.