Genesis 34

Dinà ŋêyn ghelɨ Shekèm

¹À n-læ meyn nà ghɨ achi a li-a, Dinà ɨ wayn ɨ wi nɨ̀ Liyà vzɨ̀ a wù n-bzɨ ŋêyn Jàkôb ɨ fvɨ̀ ndù sɨ mùtɨ ghɨ̀ki Kenàn. ²Shekèm ɨ wâyn Hamò ma à ti bò ntèʼ Hîv ɨ yeyn Dinà ɨ ghal chi nɨ̀ ŋweyn sɨ a adyaʼ. ³Ta wù chi tî ɨ nà sɨ kôŋ ŋweyn ɨ zɨ̀tɨ̀ sɨ be mɨwôlɨ̀ ɨnfomnɨ̂ sɨ̂ Dinà ta ka wù na boŋ kôŋ ŋweyn. ⁴Shekèm ɨ bè sɨ̂ bò ŋweyn na, “Bè wâyn wi wèyn sɨ̂ mà.”

⁵Jàkôb nɨn læ meyn yvɨ na ghɨ wumsɨ meyn wâyn ŋweyn Dinà, a ghɨ tì woyn ŋweyn ghɨ lûmnɨ̀ ɨ kinî nyamsɨ ɨtwaʼ. Wu faŋ tɨ̀ bè iwo nô ta ka àŋena ni kfa.

⁶Hamò ma à ti bò Shekèm ɨ ndù sɨ bèsɨ iwo ateyn sɨ̂ Jàkôb. ⁷Àŋena nà bu bêsɨ̀ kɨ besɨ, woyn Jàkôb ghɨ lûmnɨ̀ ɨ kasi kfa sɨ a ɨtwaʼ ma àŋena yvɨ meyn ìwo iwuminɨ-i zɨ̀ a yi gàyn sɨ̂ jêmtɨ àŋena. À nà n-ghɨ tì ma àŋena yvɨ meyn na ghɨ chi meyn nɨ̀ jêmtɨ̀ àŋena sɨ adyaʼ, iwo ateyn i na fu n-geʼ sɨ̂ àŋena, àŋena nyôʼsɨ̀ ɨ̀toŋ nô sɨ a ŋaŋ bòm ìwo nâ zɨ̀-ì a Shekèm nì bula wùl timi mòm sɨ̂ wùl ɨ wi a Isìlæ̀.

⁸Hamò ɨ bè sɨ̂ àŋena na, “Wâyn wom Shekèm nɨn faytɨ̂ kôŋ kɨ nô koŋ Dinà. Mɨ n-chwotɨ̂ na yì visi wù li ŋweyn sɨ a wi. ⁹Ghesɨ̀nà lem ichfɨ̂nɨ̀ na, wôyn ghes na lî wôyn ghi sɨ a ghɨ̂kì, woyn ghi lî ɨ ghesɨ sɨ a ghɨ̂kì. ¹⁰Yì kàʼ a yì duʼi afêyn a ghesɨ̀nà na chi-à. Ɨlwêʼ nɨn ghɨ ta ka yì na chî ateyn, ma yì kòŋ a yì na nî mbêyʼlɨ̀ ateyn kɨ̀ ta yi n-kôŋ, kelɨ ɨvzɨ ɨfwo.”

¹¹À nà n-ghɨ tì ma Shekèm nì gvì ŋêyn bò ŋweyn, ɨ bè sɨ̂ bò Dinà ŋêyn woyn ŋweyn na, “Yì kæ bɨmi sɨ nì iwo zɨ̀-ì a mɨ n-bè, a mà fu nô mɨ ghà ta yi n-kɨŋ. ¹²Yì feʼtɨ nô mɨ ghà ta yi n-kɨŋ na mà fu atu nɨ̀ wàyn nâ wèyn baʼsɨ̂ nô mɨ nɨ̀ gha. Mɨ n-kɨŋ kɨ na yì fu ŋweyn sɨ̂ mà sɨ a wi.”

¹³Wu n-bè nô mɨ tì, woyn Jàkôb ɨ nà saŋlɨ̂ wì bòm ta Shekèm wùmsɨ jêmtɨ̀ àŋena ɨ lɨsɨ Shekèm ŋêyn bò ŋweyn, ¹⁴ɨ bè sɨ̂ àŋena na, “Ghès kàʼ ghɨ bû fù jêmtɨ̀ yes sɨ̂ wùl bula ghɨ sɨ ànam a ŋweyn. Ghèsɨ̀ kæ mòm ìnkì iwo tèyn a à na ghɨ ìwumi ighaʼnɨ-i sɨ̂ ghès. ¹⁵Iwo i nɨn ghɨ kɨ ìmòʼ ta yì kæ sɨ nì a ghèsɨ̀ bɨmi iwo ì zɨ-i. Yì sɨ ɨnwam vzɨ nô ghɨ̀ jɨ̀m ta ka yì na ghɨ kɨ ta ghes. ¹⁶Yì kæ sɨ ɨnwam ɨ̀vzɨ, a ghès fù woyn ghɨ̂kì nɨ̀ ghès sɨ̂ zɨ̀ sɨ a ghɨ̂kì ɨ̀ boŋ lì ɨghi, a ghesɨ̀nà na chî kɨ sɨ afo àmòʼ. ¹⁷Mɨtì ma yì kæ faŋ tɨ̀ bɨ̀mi na ghɨ sɨ ɨnwam ɨ̀vzɨ, a ghès li jêmtɨ̀ yes ɨ̀ lù.”

¹⁸Àŋena nɨn bè tî, iwo ateyn i nà jôf sɨ̂ Hamò ŋêyn wâyn ŋweyn Shekèm nô a jûŋ. ¹⁹Ghɨ nà n-ngvɨmlɨ̂ Shekèm a àŋena abe nô a jûŋ. A nà sɨ ghɨ ta wù yvɨ iwo nâ zɨ̀-ì a woyn Jàkôb bè tî, wu nyaŋsɨ bɨmi kɨ bɨmi bòm ta wu nà n-kôŋ wâyn Jàkôb nâ vzɨ̀ nô a jûŋ. ²⁰Hamò ŋêyn Shekèm ɨ fvɨ̀ ɨ ndù ɨchfɨ ayisi a ntèʼ nɨ̀ àŋena ɨ taŋi sɨ̂ chyeʼsɨ ntèʼ sɨ lisɨ ɨ bè na, ²¹“Ghelɨ nâ ghèyn nɨn ghɨ ki nô ghelɨ ghɨ jûŋ. Ghesɨ̀nà visi àŋena na chi-à nî mbêyʼlɨ̀ ghesɨ̀na nɨ̀ àŋena ilaʼ afêyn. Ilaʼ nâ yèynì nɨn ghaʼ kfeynɨ̂ sɨ̂ ghesɨ̀nà nô ghɨ̀ jɨ̀m. Ghesɨ̀nà kàʼ a ghɨ na ndû woyn àŋena sɨ a ghɨ̂kì, àŋena boŋ ndû ɨ ghɨ ghesɨ̀nà. ²²Mɨtì iwo i nɨn ghɨ kɨ ìmòʼ, na ghesɨ̀nà sɨ ɨnwam ghesɨ̀nà nà ghɨ ta àŋena, a àŋena kæ bɨmi na ghesɨ̀na nɨ̀ àŋena na chî sɨ afo àmòʼ. ²³Ghesɨ̀nà kæ bɨmi iwo zɨ̀-ì a àŋena bè, a nyamsɨ àŋena nô sɨ̀ jɨ̀m baʼsɨ̂ nô mɨ nɨ̀ gha ta àŋena nɨn kelɨ na sɨ kelɨ kɨ ghesɨ̀nà. Ghesɨ̀nà bɨmi læ̂ ìwo zɨ̀-ì a àŋena nɨn kɨŋ ta ka àŋena na chî ghesɨ̀nà amoʼ.”

²⁴Nô ghɨ̀lûmnɨ̀ ghɨ̀ jɨ̀m ta ghɨ nà n-ghɨ ɨchfɨ ayisi ɨ bɨmi ìwo zɨ̀-ì a àŋena bè, ghɨ sɨ ɨnwam ɨ ghêl a ntèʼ afu nô ghɨ̀ jɨ̀m. ²⁵Ghɨ n-sɨ̀ tî, a nà ghɨ ibàm i mɨchi ɨ̀n tal, ɨlwêʼ ateyn bu duʼ tɨ̀ yum, woyn Jàkôb ghɨli ghɨ̀bò a ghɨ woyn ghɨ̂nì sɨ̂ Dinà ma à ti Simìyòn ŋêyn Levì ɨ zɨ a ntèʼ Shekèm nɨ̀ mɨ̀nyuè ɨ zuetɨ ghɨ̀lûmnɨ̀ nô ghɨ̀ jɨ̀m. A ghɨ tì bula wùl nî nà kya na à ti iwo zɨ̀-ì a àŋena bàʼtɨ. ²⁶Ghɨ n-zuetɨ tî ɨ zue kɨmɨ Hamò ŋêyn wâyn ŋweyn Shekèm ɨ kasi lì ɨ lù nɨ̀ Dinà. ²⁷Àŋena nɨn lù tî woynà àŋena ghɨli ɨ kæ zɨ a ntèʼ nâ ghè sɨ yaʼi atû ɨ̀kfɨ ghêl sɨ kumtɨ ɨfwo ghelɨ ateyn nô ɨ̀ jɨ̀m bòm ta Shekèm wùmsɨ Dinà. ²⁸Àŋena nɨn li meyn ìnôyn i bzɨsɨ nɨ̀ ìnôyn i nyâmsɨ mbòloʼ ɨ fi lì njàkâysɨ̀ nô sɨ̀ jɨ̀m nô mɨ nɨ̀ gha ta àŋena yeyn nà koŋà antêynɨ̀ ntèʼ nɨ ɨvzɨ̂ a wu n-ghɨ ɨtwaʼ. ²⁹Àŋena nɨn læ meyn lì nô mɨ ìghaʼ ì kà ta àŋena nɨ̂n yèyn a ndosɨ nô ì jɨ̀m baʼsɨ̂ nɨ̀ ghɨ̀kì nɨ̀ woynda ɨ lù.

³⁰Jàkôb ɨ kæ be sɨ̂ Simìyòn ŋêyn Levì na, “Yi kwo meyn nkfɨm ɨ̀ nì ma na sɨ ghɨ wul ɨ̀ bɨ sɨ̂ ghelɨ Kenàn nɨ̀ ghelɨ Belìz ghì a ghɨ n-chi ilaʼ afêyn. Ghesɨ̀nà nɨn dvɨ̂ wì ma àŋena kæ chɨ̀yntɨ sɨ nu ghesɨ̀nà, a ghɨ zuetɨ ghesɨ̀nà nô ghɨ̀ jɨ̀m.”

³¹Mɨtì Simìyòn ŋêyn Levì ɨ bè sɨ̂ Jàkôb na, “Shekèm bu tî nà kelɨ sɨ ni iwo nâ zɨ̀-ì sɨ̂ jêmtɨ̀ yes ta wù nì sɨ̂ wul ɨ wi ɨ̀ jelɨnɨ.”