Genesis 35

Jàkôb ɨ kasi ndù a Betèl

¹À n-læ meyn nà ghɨ achi a li-a Fɨyini fɨ ɨ bè sɨ̂ Jàkôb na, “Lu ndu a ntèʼ Betèl ɨ bɨ̀ afu ɨ bàʼlɨ̀ àbaŋ ifu sɨ̂ Fɨyini fìfɨ̀ a fɨ n-læ fvɨ̀ a wa ikèʼ ta wà nà n-leʼ wâynà vâ Esò tì.”

²Jàkôb ɨ kæ be sɨ̂ ghelɨ ndo nɨ̀ ŋweyn nɨ̀ ghelɨ ghì a ŋêyn àŋena nà n-ghɨ amoʼ nô ghɨ̀ jɨ̀m na, “Yì maʼi mɨyini mɨ̀ ɨ̀tum nɨ̀ zɨ̀ mzɨ̂ ɨ̀ kfɨ̀nɨ ndzɨ sisɨ ɨ̀ lèm ngêŋ sisɨ nɨ̀ ìlayni. ³Yì maʼi ghesɨ̀nà lu ɨ̀ ndù a Betèl alèʼ ghè a ka mà baʼlɨ abaŋ ifu afu sɨ̂ Fɨyini fîfɨ̀ a fɨ n-yvɨ ijêm ì yemi ɨ bèynsɨ̀ mà ta mɨ nà n-ghɨ a ngeʼ, ghɨ ghesɨ̀ ŋweyn nô mɨ wo ta mɨ n-ndû.” ⁴Wu n-tàŋi tî àŋena kæ fu mɨyini mɨ̀ ɨ̀tum nâ mzɨ̀ a àŋena nà n-kelɨ tî sɨ̂ Jàkôb nô ɨ̀n jɨ̀m nɨ̀ mɨ̀nchaʼ mzɨ̀ a àŋena nà n-we ɨtùŋlɨ nô ɨ̀n jɨ̀m. Wu gvɨ̀mì isas i fɨ̂kàʼ fɨ ôksɨ̀ a ngùŋ Shekèm. ⁵Wu n-ngvɨ̀mi tî ŋêyn ghelɨ ŋweyn ɨ se sɨ lù sɨ a Shekèm, Fɨyini fɨ nì ìfayn ì ɨ ku ghelɨ a ntèʼsɨ ghê a sɨ nà n-baʼsɨ sɨ̂ àŋena, ghɨ faŋ tɨ̀ nyɨ̀ŋ ibam nɨ̀ Jàkôb ŋêyn ghelɨ ŋweyn.

⁶Àŋena ɨ ndu chem a Lûz alèʼ ghè a ghɨ n-toŋtɨ layn na Betèl a ghɨ kɨmɨ a Kenàn, ⁷wu bàʼlɨ̀ àbaŋ ifu afu ɨ fu izɨyn alèʼ nâ zɨ̀-ì na, El-Betèl. Jàkôb nɨ̀n fu tî bòm ta Fɨyini fɨ nɨn dyêyn meyn ngêŋ ŋweyn sɨ̂ Jàkôb afu ɨtuʼ ghê a wu nà n-leʼ wâynà ŋweyn Esò.

⁸À nà n-ghɨ ta àŋena nɨn chi a Betèl tì, Dèbolà ma à ti wul vzɨ̀ a wu nà n-tôʼnɨ nɨ̀ Làbikà sɨ a wayndà ɨ kfɨ. Wu n-kfɨ ghɨ gvɨ̀mì isas i fɨ̂kàʼ fɨ ôksɨ̀ a ntèʼ Betèl dzɨ abàs itsɨyn ɨ fu izɨyn alèʼ nâ zɨ̀-ì na Alon-Bakùt.

⁹A nà ghɨ ta Jàkôb kasi kfa sɨ a Badan Alàm, Fɨyini fɨ ɨ fi fvɨ̀ a ŋweyn ikèʼ ɨ boysɨ ŋweyn, ¹⁰ɨ bè na, “Izɨyn ì zæ nɨn ghɨ Jàkôb. Mɨtì ghɨ na bu fì toŋtɨ̂ wì vâ na Jàkôb, ghɨ na sɨ toŋtɨ̂ và lvɨ̂yn na Isìlæ̀.” Fɨyini fɨ nɨ̂n bè tî ɨ kæ fu izɨyn i ŋweyn na Isìlæ̀.

¹¹Fɨyini fɨ nɨn fi meyn bè sɨ̂ ŋweyn na, “Mɨ n-ghɨ Fɨyini ɨ Bò Ɨ̀dwaʼ Ɨ̀ jɨ̀m. Mɨ n-fu woyn sɨ̂ và kɨ̀ sɨ a idvɨ̀ a ghɨ lema ɨ̀ ndù sɨ a tɨ̂laʼ tɨ dvɨ̂ kɨ tèyn, a tɨfôyntɨ̀ fvɨ a àŋena antêynɨ̀ nà saʼa. ¹²Mɨ n-fu nse zɨ̀ a mɨ n-læ fu sɨ̂ Abɨ̀làhâm ŋêyn Yisàk sɨ̂ và nɨ̀ wôyn ghya nɨ ɨghî a ghɨ læ̀ koʼ ibàm.” ¹³Fɨyini fɨ nɨn tàŋi mèsi sɨ̂ Jàkôb tì ɨ lù.

¹⁴Jàkôb ɨ tom ngòʼ alèʼ nâ ghè sɨ a nchwæ sɨ dyèyn na Fɨyini fɨ nɨn læ meyn taŋi sɨ̂ ŋweyn afu ɨ fi sfɨ̀ytɨ̀ mɨ̀lûʼ nɨ̀ mɨ̀vɨ̂l mɨ̀ olìf atû ateyn sɨ koʼsɨ Fɨyini. ¹⁵Wu n-nì tî ɨ fu izɨyn alèʼ nâ zɨ̀-ì na Betèl.

Lashèl ɨ kfɨ

¹⁶A nà n-ghɨ ta Jàkôb ŋêyn ghelɨ ndo nɨ̀ ŋweyn lù sɨ a Betèl ɨ nà bu duʼ tɨ̀ ndù tɨ̀ chem a Eflàt wàyn ɨ zɨ̀tɨ̀ sɨ lum Lashèl ɨ nà sɨ lum nô sɨ a ŋaŋ. ¹⁷Wàyn ɨ se sɨ lum sɨ chwòsɨ ŋweyn tì, wùl vzɨ̀ a wù n-bzɨsɨ ghɨ̀kì ɨ nà sɨ kfɨmtɨ̂ ŋweyn bê na, “Ka wa n-fàyn, à n-ghɨ kɨmɨ wayn ɨ̀ lûmnɨ̀.” ¹⁸Wù nà n-bê tì ma Lashèl sɨ sɨtɨ̂ kɨ nɨ̀ ìkfɨ-i ɨ se sɨ kfɨ sɨ mèsì ɨ chfɨ̀ ìzɨyn i wayn na Ben-Onì. Wu n-chfɨ̀ tî Jàkôb ɨ læ fi kfɨnɨ ìzɨyn ateyn ɨ kasi chfɨ̀ na, Benjamìn.

¹⁹Lashèl nɨn kfɨ ghɨ gvɨ̀mì ŋweyn a dzɨ ta yì ndû a ntèʼ Eflàt, a ntèʼ ghê a ghɨ n-toŋtɨ̂ layn na Betɨ̀lèhêm. ²⁰Jàkôb ɨ tom ngòʼ ìsè nɨ̀ Lashèl. Sɨ chem layn, ngòʼ àteyn bu ghɨ kɨ afu sɨ a nchwæ.

²¹Jàkôb nɨ̀n tòm tî ɨ jelɨ kɨ têyn ɨ ndu chwò Migdal Edà ɨ kas ɨtwo ŋweyn afu. ²²A nà ghɨ ta àŋena nɨn chi afu, Lubèn ɨ wâyn Jàkôb ɨ chi nɨ̀ Bilhà ɨ wî bò ŋweyn. Jàkôb ɨ yvɨ iwo ateyn yi yaf ŋweyn nô sɨ a ŋaŋ.

Woyn Jàkôb

Jàkôb nà n-kelɨ woyn ghɨ lûmnɨ̀ njvasɨ̀ bò.

²³Woyn ghɨ lûmnɨ̀ ghì a Jàkôb nɨ̀n bzɨ ŋêyn Liyà nà n-ghɨ Lubèn ɨ wayn ɨwû àsɨ nɨ̀ Simìyòn nɨ̀ Levì kɨ̀mɨ nɨ̀ Judà baʼsɨ̂ nɨ̀ Isakà ŋêyn Zebulùn.

²⁴Woyn ghɨ lûmnɨ̀ nɨ̀ Lashèl ɨ ghɨ Josèf ŋêyn Benjamìn.

²⁵Woyn ghɨ lûmnɨ̀ nì Bilhà ɨ wul ɨ̀ felɨnɨ nɨ̀ Lashèl ɨ ghɨ Dan nɨ̀ Naftalì. ²⁶Ɨghɨ Zilbà ɨ wul ɨ̀ felɨnɨ nɨ̀ Liyà ɨ ghɨ Gâd nɨ̀ Ashà.

Ɨgheyn nâ ghèyn nɨn chɨ̂yntɨ̀ ghɨ woyn ghɨ lûmnɨ̀ ghì a Jàkôb nɨn læ bzɨ a Badan Alàm.

²⁷Jàkôb ɨ kasi kfa ɨ yeyn bò ŋweyn Yisàk a mamlè a ngùŋ Kiliyat Abà ma à ti ntèʼ Heblòn a ghɨ kɨmɨ àlêʼ ma Abɨ̀làhâm ŋêyn Yisàk nɨn læ meyn chi ateyn. ²⁸Yisàk nɨ̀n læ se sɨ kfɨ ma wù lema meyn nô a jûŋ nà ghɨ bèŋ ɨvɨ nɨ̀ bèŋsɨ̀ mɨ̀vɨ̂m nfama (180). ²⁹Wù n-læ kfɨ ma wù lema meyn nô a jûŋ ɨ kfa ndu yeyn ghɨ̀bo ŋweyn. Woyn ŋweyn ma à ti Esò ŋêyn Jàkôb ɨ gvɨ̀mì ŋweyn.