Genesis 38

Judà ŋêyn Tamà

¹À nà n-ghɨ ta ghɨ bèyʼlɨ Josèf, Judà ɨ lù ɨ visi woynà ŋweyn ɨ ndu nà chî ŋêyn Hilà ɨ̂lvɨ̀, a ghɨ wul ɨ̀ Adulàm. ²Judà nɨ̂n ndù afu tî ɨ yeyn wâyn wul ɨ̀ Kenàn, izɨyn i bò ŋweyn ɨ ghɨ Shuwà ɨ lì sɨ a wi ɨ chi nɨ̀ ŋweyn. ³Wu timi ɨlvâ ɨ bzɨ wayn ɨ̀ lûmnɨ̀. Judà ɨ chfɨ̀ ìzɨyn i ŋweyn na Êl. ⁴Wu fi timi ɨlvâ ɨ bzɨ wayn ɨ̀ lûmnɨ̀ ɨ̂lvɨ̀ ɨ chfɨ̀ ìzɨyn i ŋweyn na Onàn. ⁵Wù n-fi meyn bzɨ kfeynsɨ wayn ɨ̀ lûmnɨ̀ a Kezìb ɨ chfɨ̀ ìzɨyn i ŋweyn na Shelà.

⁶À nà n-ghɨ ta El ɨ wayn ɨ̀lwema nɨ̀ Judà lèma, Judà ndù wi sɨ̂ ŋweyn izɨyn i ŋweyni ghɨ Tamà. ⁷Mɨtì Êl ɨ chi nchînɨ̀ ibɨ asɨ nɨ̀ Bôbo Fɨyini, Bôbo nì wu kfɨ.

⁸Judà ɨ kæ be sɨ̂ Onàn, ma à ti ànkùmtɨ a wayn nɨ̀ ŋweyn na, “Chi nɨ̀ wî wâynà vâ ɨ bzɨ woyn sɨ̂ ŋweyn. À ti ta nchînɨ̀ ìlaʼ nɨn dyêyn.” ⁹Mɨtì Onàn ɨ nà kya na wù kæ bzɨ wayn ŋêyn Tamà a à na ghɨ wâyn El, a ghɨ wi ɨwû ŋweyn, ɨ nà se sɨ chi nɨ̀ wî waynà ŋweyn wu nà kwo sfɨ̀s kɨ mu mɨ̀ wàyn a nse ta ka wù faŋ tɨ̀ bzɨ wayn sɨ̂ wâynà ŋweyn. ¹⁰Bôbo Fɨyini ɨ yeyn ìwo zɨ̀ a Onàn nɨ̀n nî a ghɨ ìwo i bzɨ-i ɨ nì wu boŋ kfɨ.

¹¹Judà ɨ kæ bè sɨ̂ wî wâyn ŋweyn Tamà na, “Kasi ndu wa chî a yi abe wâyn wom Shelà læ̂ lèma ɨ̀ kfèyn ɨ̀ lì và sɨ a wi.” Wu n-bè têyn ta wù n-fâyn na Shelà kàʼ a wù boŋ kfɨ kɨ̀ ta woynà ŋweyn. Tamà ɨ kasi kfa sɨ abe nɨ̀ bò ŋweyn.

¹²A læ nà ghɨ ibàm i bèŋsɨ̀, wî Judà ɨ wâyn Shuwà ɨ kfɨ. A nà ghɨ ta Judà dzɨ̀ meyn mèsì ìkfɨ i wî ŋweyn, wu koʼ a Timnà alèʼ ghè a ghɨ nà n-kom iwî i njɨ̀sɨ̀ nɨ̀ ŋweyn ateyn. Wu n-kòʼ ŋêyn sûyn ŋweyn Hilà ɨ wul ɨ̀ Adulàm vzɨ̀.

¹³Tamà ɨ yvɨ na bò lum nɨ̀ ŋweyn nɨn ndû a Timnà sɨ kom iwî i njɨ̀sɨ̀ nɨ̀ ŋweyn, ¹⁴ɨ choʼ lèm fɨ̀ntsɨ fɨ ŋweyn ɨ maʼ ndzɨsɨ lûsɨ̀ ɨ chɨl ikêʼ i ŋweyn nɨ̀ àbâs a ndzɨsɨ-a ɨ ndu dùʼì afàf a Enèm a dzɨ̂ Timnà. Wu n-nì tî bòm ta wù nà n-kya na Shelà lema meyn kfèyn sɨ ndu wi mɨtì bò ŋweyn faŋ tɨ̀ vìsi na wù li ŋweyn sɨ a wi.

¹⁵Judà ɨ se sɨ chwò ɨ yeyn Tamà ɨ nà kfâʼ na à n-ghɨ wùl ɨ wi ɨ̀jelɨnɨ bòm ta wu nà n-ghɨ ma wù chɨytɨ meyn ìkêʼ i ŋweyn. ¹⁶Wu faŋ tɨ̀ kèli na à n-ghɨ wî wâyn ŋweyn ɨ ndu baʼsɨ sɨ̂ ŋweyn ɨ bè na, “Gvi mà chi nɨ̀ và lvɨ̂yn.” Wu bɨf sɨ̂ Judà na, “Wà ti kæ chi nɨ̀ mà a wà fu gha sɨ̂ mà a?”

¹⁷Judà ɨ bè na, “Mɨ n-ndû lî wâyn bzɨ antêynɨ̀ bzɨsɨ nɨ̀ mà ɨ̀ tùm sɨ̂ và.” Tamà ɨ fi be kɨ na, “Wa n-fu àfo a mà ghal lèm ɨ nà chîtɨ̀-à.”

¹⁸Judà ɨ kæ bɨf sɨ̂ ŋweyn na, “Mà fu lèm ghà sɨ̂ và a?” Tamà ɨ bè na, “Fu fɨ̀nchaʼ fìfɨ̀ a wà chwæ̀ ngêŋ zyâ ateyn nɨ̀ nkfɨ̀ zɨ̂ a wà chfɨŋ fɨ̀nchaʼ nâ fìfɨ̀ ateyn ɨ fu kɨmɨ mbàŋ zɨ̀ a wa awu.” Judà ɨ fu ɨfwo ateyn sɨ̂ Tamà ɨ chi nɨ̀ ŋweyn wu timi ɨlvâ. ¹⁹A nà ghɨ ta Tamà lù, ɨ choʼ afo kì a wù nì chɨl ikêʼ i ŋweyn ateyn ɨ kasi màʼ fɨ̀ntsɨ fɨ ŋweyn.

²⁰Judà ɨ ndu tum sûyn ŋweyn ɨ wul ɨ̀ Adulàm vzɨ̀ nɨ̀ wâyn bzɨ na wù ndu ɨ̀ fù sɨ̂ wùl ɨ wi vzɨ̀ ɨ̀ kàsi fsɨ ɨfwo ŋweyn vzɨ̀ a wù nì ghal lèm tì. Mɨtì wu ndù ɨ faŋ tɨ̀ yèyn wùl ɨ wi àteyn. ²¹Wu n-faŋ tɨ̀ yèyn tî ɨ bɨf sɨ̂ ghɨ̀lûmnɨ̀ ghì a ghɨ n-chi afu na, “Wùl ɨ wi ɨ̀ jelɨnɨ vzɨ̀ bà a wù nì nà duʼ afàf a Enèm tì à?” Àŋena bè sɨ̂ ŋweyn na, “Wul ɨ wi ɨ̀ jelɨnɨ bû tìmi nà ghɨ afêyn.”

²²Ta àŋena bè tî, sûyn Judà nâ zɨ̀ ɨ kasi ndu bè sɨ̂ ŋweyn na, “Ma bû ndù yèyn wùl ɨ wi nâ vzɨ̀, ghɨ̀lûmnɨ̀ ghì a ghɨ n-chi afu bê na, Wul ɨ wi ɨ̀ jelɨnɨ bû tìmi nà ghɨ afu.”

²³Judà ɨ bè na, “Wù keli læ̂ ndù nɨ̀ ɨ̀fwo nâ vzɨ̀ a mà nì fu lèm sɨ̂ ŋweyn. Ghesɨ̀và vìsi ndù bu tì a ghelɨ na chyeʼ ghesɨ̀và. Ba ma tum meyn wâyn bzɨ na wà ndu ɨ̀ fù sɨ̂ ŋweyn wà ndû ɨ̀ faŋ tɨ̀ yèyn ŋweyn?”

²⁴A nà ghɨ ibàm i njoŋ sɨ̀ tal, wu yvɨ na Tamà ɨ wî wâyn ŋweyn kasi meyn sɨ a wùl ɨ wi ɨ̀ jelɨnɨ ɨ̀ bòŋ wayn. Wu bè na, “Yì li ŋweyn ɨ̀ fvɨ̀ gvì nyòʼ abe.”

²⁵Àŋena se sɨ fvɨ̀ nɨ̀ Tamà wu tum wul nɨ̀ ɨ̀fwo vzɨ̀ a wu tî ghal lèm na wù kasî ndu fù sɨ̂ Judà ɨ̀ bè na, “Ɨfwo wèyn nɨn kelɨ wul vzɨ̀ a wù tî bòŋsɨ ma. Faytɨ ki fɨ̀nchaʼ fèynfɨ̀ nɨ̀ nkfɨ̀ àteyn baʼsɨ̂ nɨ̀ mbàŋ ì nyamnɨ yèyn ɨ yeyn na wa n-kelî wul vzɨ̀ a wù n-kelɨ a.”

²⁶Wu ndu fu, Judà ɨ yeyn keli na à n-ghɨ ɨ̀fwo ŋweyn ɨ bè na, “Tamà bû bèbsɨ ìwo, à kwo nì bèbsɨ mà bòm ta ma bu tî bè na wâyn wom Shelà li ŋweyn sɨ a wi ta mɨ n-chfɨ̀nɨ.” Wu n-bè tî ɨ faŋ tɨ̀ fì tɨ̀ chi nɨ̀ Tamà.

²⁷Ɨlvɨ kfeyn ta ka Tamà bzɨ wu keli na à n-ghɨ ɨ̀mbwâʼsɨ̀ ɨ lûmnɨ̀ a ŋweyn ɨlvà. ²⁸Wu se sɨ bzɨ ɨ̀mòʼ ɨ fvɨ̀sɨ̀ àwu a ŋweyn, wul vzɨ̀ a wù n-bzɨsɨ ɨ ghal ɨ kul nɨ̀ àmbyèyn a baŋnɨ-a ɨ bè na, “À gvì ɨwêyn sɨ a asɨ.” ²⁹Mɨtì wayn ateyn ɨ kasi zɨsɨ àwu a ŋweyn, wâynà ŋweyn ɨ fvɨ̀ sɨ a asɨ. Wul àteyn ɨ bè na, “Ema! Wà jèlɨ̀ ti ɨ̀ tèynɨ ɨ̀ gvì sɨ a asɨ-a?” Ghɨ chfɨ̀ ìzɨyn i wayn àteyn na Bèlêz. ³⁰Wu n-gvɨ̀ tî wâynà ŋweyn vzɨ̀ a wù na n-sɨ kelɨ àmbyèyn a baŋnɨ-a kì a ŋweyn ɨkœ ɨ kæ gvì. Judà ɨ chfɨ̀ ìzɨyn i ŋweyn na Zelà.