Genesis 39

Josèf ŋêyn wî Botifà

¹À nà n-ghɨ ta ghelɨ Ishmèl lì ndù nɨ̀ Josèf a Ijìb, Botifà ɨ wul ɨ̀ felɨnɨ nɨ̀ fòyn Ijìb ɨ yuyn ŋweyn. Botifà nà n-ghɨ wul ɨ̀ felɨnɨ nɨ̀ fòyn Ijìb, ghɨ àtu a nchìsɨ ntoʼ.

²Bôbo Fɨyini ɨ nà gâmtɨ̀ Josèf wu nî ìfêl i ŋweyn kɨ̀ nô a jûŋ, chî a ndo nɨ̀ bò ìfèl nɨ̀ ŋweyn ɨ wul ɨ̀ Ijìb. ³A nà ghɨ ta bò ìfèl nɨ̀ Josèf yèyn ta Bôbo Fɨyini nɨ̀n gâmtɨ̀ ifêl i ŋweyni ndû kɨ a jûŋ, ⁴wu dyèyn àtem a juŋà sɨ̂ ŋweyn ɨ lì ŋweyn sɨ a wul ɨ̀ felɨnɨ vzɨ̀ a wù n-baʼsɨ sɨ̂ ŋweyn. Botifà nɨ̀n fi meyn lèm Josèf na wù na ghɨ àtu sɨ̂ ghelɨ ghɨ felɨnɨ a ndo nɨ̀ ŋweyn ɨ fi lèm nô mɨ ghà ta wù nà n-kelɨ kɨ̀ awu nɨ̀ Josèf. ⁵À nà n-ghɨ ta Botifà lèm Josèf na wù na kinî ghelɨ ŋweyn nɨ̀ ɨ̀fwo ŋweyn nô ɨ̀ jɨ̀m tì, Bôbo Fɨyini ɨ boysɨ nô mɨ ghà a ndo nɨ̀ Botifà nɨ ɨvzɨ̂ a wu n-ghɨ a gvêynsɨ̀ bòm Josèf. ⁶Botifà nɨn fu adyaʼ na Josèf na kinî ɨ̀fwo ŋweyn nô ì jɨ̀m iwo i nà bu fu wi ngeʼ sɨ̂ ŋweyn a bu kɨ ìwo afo a yɨnɨ-a nɨ̀ ŋweyn. Josèf nà n-ghɨ ɨ̀kuŋ alèʼ àmoʼ fî kelɨ àdyaʼ. ⁷Wî Botifà ɨ yeyn tî ɨ nà sɨ ki ŋweyn nɨ̀ àsɨ a chfɨlɨnɨ-a. A læ nà ghɨ achi a li-a wu bè sɨ̂ ŋweyn na, “Gvi chi nɨ̀ mà.”

⁸Josèf ɨ tuynsɨ ɨ bè na, “Bò ìfèl nɨ̀ ma fu meyn àdyaʼ na mà na kinî nô mɨ ghà ta wù n-kelɨ a ndo afêyn, iwo i bu fu wi ngeʼ sɨ̂ ŋweyn. ⁹Wul nɨ̀n kelɨ wi adyaʼ a ndo afêyn chwô mà. Bò ìfèl nɨ̀ ma fu meyn nô mɨ ghà sɨ̂ mà a bu kɨ và bòm ta wà n-ghɨ wî ŋweyn. Mà ti kàʼ ma mòm ti ìnkì iwo i bzɨ-i têyn asɨ nɨ̀ Fɨyini fɨ̀ a?” ¹⁰Wî Botifà ɨ nà fu kɨ ngeʼ sɨ̂ Josèf mɨchi ɨ̀n jɨ̀m mɨtì wu faŋ tɨ̀ bɨ̀mi sɨ chi nɨ̀ ŋweyn.

¹¹A læ nà ghɨ achi a li-a Josèf ɨ zɨ sɨ ni ifêl i ŋweyn, nô wul ɨ̀ felɨnɨ ɨ̀mòʼ ɨ ghɨ wi a ndo, ¹²wî Botifà ɨ ghal Josèf a ndzɨsɨ ɨ bè na, “Gvi chi nɨ̀ mà.” Mɨtì wu sòysɨ̀ ndzɨsɨ ateyn ɨ leʼ fvɨ̀ ɨ visi sɨ̂ ŋweyn.

¹³A nà ghɨ ta wù yèyn na Josèf leʼ meyn ɨ̀ vìsi ndzɨsɨ awu nɨ̀ ŋweyn, ¹⁴wu jàŋtɨ̀ ghelɨ ghɨ felɨnɨ a ŋweyn a ndo ɨ bè sɨ̂ àŋena na, “Yì yeyn kɨ wul ɨ̀ Hibɨ̀lù wèyn a lûm wom tî gvì nɨ̀ ŋweyn sɨ̂ ghesɨ̀nà teyna. Wù nì zɨ gvì nà kɨŋ sɨ chi nɨ̀ mà sɨ a adyaʼ, ma byal. ¹⁵Ta mà byàl nô mɨ ɨlvɨ gha wù leʼ fvɨ̀ vìsi ndzɨsɨ ŋweyn sèynsɨ̀.”

¹⁶Wu n-bè tî ɨ lèm ndzɨsɨ ateyn nô ta ka lûm ŋweyn ɨ bò ìfèl nɨ̀ Josèf nî kfa. ¹⁷Botifà ɨ ni kfa nô mɨ ɨlvɨ gha, wu bè sɨ̂ ŋweyn na, “Akôs a Hibɨ̀lù kì a wà tî gvì nɨ̀ ànkeyna afêyn tì ni meyn nà kɨŋ sɨ chi nɨ̀ mà sɨ adyaʼ. ¹⁸Ma byal nô mɨ ɨlvɨ gha, wù leʼ ɨ̀ fvɨ̀ ɨ vìsi ndzɨsɨ ŋweyn sèynsɨ̀.”

¹⁹Bò ìfèl nɨ̀ Josèf ɨ yvɨ iwo zɨ̀-ì a wî ŋweyn bè, ɨtoŋ ŋweyn ɨ yaf nô sɨ a ŋaŋ, ²⁰wu bè ghɨ ghal Josèf ɨ ndu fò a ndô nchaʼ ghè a fòyn nà n-fo ghelɨ ateyn. Josèf ɨ faŋ kɨ afu.

A nà ghɨ ta Josèf nɨ̀n ghɨ a nchaʼ, ²¹Bôbo Fɨyini ɨ dyèyn àtem a juŋà sɨ̂ ŋweyn ɨ gàmtɨ̀ wùlɨ̀ vzɨ̂ a wù n-kini ghelɨ ndô nchaʼ ɨ nà kôŋ ŋweyn, ²²ɨ lèm na Josèf na kinî ghelɨ ndô nchaʼ fî tisɨ̂ ìfêl zɨ̀ a ghɨ n-nî afu. ²³Wu n-lèm tî ɨ nà bu kelɨ wi ɨlvɨ kûm nô mɨ ghà ta Josèf nɨ̀n nî bòm ta Bôbo nà n-gâmtɨ̀ ŋweyn, wu nî nô mɨ ghà kɨ̀ a jûŋ.