Genesis 4

¹Adàm nɨ̀n læ meyn chi nɨ̀ wî ŋweyn Îf, wu timi ɨlvâ ɨ bzɨ wayn ɨ lûmnɨ̀ ɨ fu izɨyn i ŋweyn na Kên ɨ kæ bè na, “Bôbo gamtɨ meyn mà, ma bzɨ wayn ɨ lûmnɨ̀.” ²Îf ɨ fi chitɨ kɨ têyn ɨ bzɨ wâynà Kên ɨ fu izɨyn i ŋweyn na Abèl. Abèl ɨ nà sɨ ghɨ nchì bzɨsɨ, Kên ɨ felɨ̀ gveynsɨ. ³A læ nà ghɨ achi a li-a Kên ɨ kfa nɨ̀ ɨ̀fwo ɨ yɨnɨ ta wù ghayn a gvêyn sɨ fu sɨ̂ Bôbo sɨ ifu. ⁴Abèl ɨ lì nyam sìsɨ̀ a ghɨ bzɨ sɨ asɨ antêynɨ̀ nyàmsɨ̀ nɨ̀ ŋweyn ɨ sɨ ɨ teytɨ ɨ̀lwêʼ ɨ jûŋ vzɨ̀ a wu n-kelɨ iso ateyn ɨ gvì ɨ fu sɨ̂ Bôbo. Bôbo yeyn ifu i Abèl ɨ nà koŋà fî saŋlɨ̂ sɨ̂ ŋweyn. ⁵Mɨtì ɨ tuynsɨ ìfu i Kên baʼsɨ̂ kɨ nɨ̀ ŋweyn. Iwo ateyn i yaf Kên nô sɨ a ŋaŋ, ikêʼ i bef sɨ atu.

⁶Bôbo kæ bɨf sɨ̂ Kên na, “Ɨtoŋ va ti yàf gha, wà bebsɨ ìkêʼ tèyn a? ⁷Wà kæ nì iwo zɨ̀-ì a yi n-ghɨ àtì-ati, a mà na saŋlɨ-à. Wà kæ nì iwo yi ghɨ wi àtì-ati, a wà na kya na mbɨ nɨ̀n ti kɨ a wa ɨchfɨ ndo, gvɨ̂ và, mɨtì wa kelɨ kɨ sɨ to sɨ chwò mbɨ àteyn.”

⁸A læ nà ghɨ achi a li-a, Kên ɨ bè sɨ̂ wâynà ŋweyn Abèl na, “Ghesɨ̀ và seʼ a gvêyn.” Wu bɨmi. Àŋena seʼ chem a gvêyn, wu ghal wâynà ŋweyn Abèl ɨ zue.

⁹Bôbo bɨf sɨ̂ Kên na, “Wâynà vâ Abèl bà?” Kên ɨ bè kɨ na, “Mɨ n-kya wi. Wà n-bɨf tèyn ma ghɨ nchì wâynà wom ma?” ¹⁰Bôbo kæ bè sɨ ŋweyn na, “Wà tî mòm ghà têyn a? Mɨ̀lûŋ mɨ̀ wâynà vâ meyn n-kêʼ a nse ta wa zue, wu dzɨ̂ gvî sɨ̂ mà, bê na mà saʼ fù nsaʼ zɨ sɨ̂ zɨ̀. ¹¹Ma te meyn và ɨ̀ sàŋ và sɨ atû nse ghè a wà tî zue wâynà vâ, mɨ̀lûŋ mɨ̀ ŋweyn suʼ i ateyn tì. ¹²Wà na felɨ̀ àfo a nse nâ ghàyn kɨ bu fì koʼ wi. Wa n-lû lvɨ̂yn ɨ̀ nà bɨm jelɨ̀ kɨ jelɨ a mbzɨ, duʼ wi alêʼ àmòʼ.”

¹³Kên ɨ kæ bè sɨ̂ Bôbo na, “Ngeʼ yèyn a wà fù sɨ̂ mà têyn nɨ̀n n-chwô àdyaʼ. ¹⁴Wà saŋ meyn mà layn sɨ atû nse nâ ghàyn ɨ̀ bè na mà lu sɨ a wa ngùŋ. Mà na bɨm jelɨ̀ leʼlɨ̂ kɨ leʼlɨ lvɨ̂yn a mbzɨ, ma à kòli mɨ ndà ma, a wù zue kɨ̀ zue.”

¹⁵Bôbo bè sɨ̂ ŋweyn na, “Yi n-ghɨ wi tî. À nì mɨ ndà iwo nâ zɨ̀ sɨ̂ và a Kên a mà fu ngeʼ sɨ̂ ŋweyn ìngal nsòmbo chwô ta mà fù sɨ̂ và.” Bôbo ɨ taŋi tì ɨ lèm nchwæ ɨwuyn nɨ̀ Kên na ka wùl læ̂ yèyn ŋweyn ɨ̀ zue. ¹⁶Kên ɨ lù sɨ a ngùŋ nɨ̀ Bôbo ɨ ndù ɨ nà sɨ chî ilaʼ i Nôd, dzɨ abàs ghè ɨchfɨ-iyvɨ i nɨn sal ateyn. ¹⁷Kên ɨ læ chi nɨ̀ wî ŋweyn, wu boŋ wayn ɨ bzɨ ɨ chfɨ̀ ìzɨyn i ŋweyn na Enòk. À nà n-ghɨ tì Kên ɨ bâʼlɨ̀ ntèʼ î lì. A nà sɨ ghɨ ta wù bàʼlɨ̀ mèsì wu chfɨ̀ ìzɨyn i ntèʼ ateyn nɨ̀ wayn ŋweyn Enòk. ¹⁸Enòk nɨ̀n læ nà ghɨ bò Ilàd, Ilàd ɨ ghɨ bò Mèhujàʼêl, Mèhujàʼêl ɨ ghɨ bò Mètushàʼêl, Metushàʼêl ɨ ghɨ bò Lamèk.

¹⁹Lamèk nɨ̀n læ mala ghɨ̀ki ghɨ̀bò, ghɨ toŋtɨ̂ ɨ̀mòʼ na Àda, toŋtɨ̂ ɨlvɨ̀ na Zilà. ²⁰Àda ɨ læ bzɨ Jàbâl, Jàbâl ɨ ghɨ bæ̀ sɨ̂ ghelɨ ghì a ghɨ n-chi a mɨ̂twò, mâʼ nyamsɨ. ²¹Wâynà Jàbâl nà n-ghɨ Jubàl, a ghɨ bæ̀ sɨ̂ ghelɨ ghì a ghɨ n-buʼ tɨluŋ fî toŋ ndoŋsɨ. ²²Zilà nɨ̀n læ meyn boŋ bzɨ wayn ɨ lûmnɨ̀ izɨyn i ŋweyn i ghɨ Tubal-Kên, wu tsɨ àlâm, faytɨ̂ tɨ̀nkì tɨ ɨfwo kɨ̀ sɨ idvɨ̀, faytɨ nɨ̀ ìdyayn i fî faytɨ̂ nɨ̀ ɨ̀kfasɨ. Wu nà n-kelɨ jêmtɨ̀ izɨyn i ŋweyni ɨ ghɨ Namà.

²³Lamèk ɨ læ bè sɨ̂ ghɨ̀ki ŋweyn achi a li-a na,

“Và a Àda nɨ̀ và a Zilà, yì yvɨtɨ,

Yì faytɨ̂ Yvɨ̀tɨ ìwo zɨ̀ a ka mà bè a ghɨ̀kì ghem.

Ma zue meyn wul ta wù lèmsɨ ma,

ɨ wayndà ɨ̂kùŋ ta wù fu alemtɨ sɨ̂ mà.”

²⁴A kæ nà ghɨ ma wùl zuè Kên, a Fɨyini fɨ fu ngeʼ sɨ̂ ŋweyn ìngal nsòmbo chwô ta wù fu sɨ̂ Kên, à na ghɨ ma wùl zuè ma,

a wù fu ngeʼ sɨ̂ ŋweyn ìngal mɨ̀vɨm nsòmbo njvàsɨ̀ nsòmbo chwô ta wù fu sɨ̂ mà.

²⁵Adàm nɨ̀n læ meyn fi chi nɨ̀ wî ŋweyn, wu fi bzɨ wayn ɨ lûmnɨ̀ ɨ chfɨ̀ ìzɨyn i ŋweyn na Sêt, ma wù ti n-bê na, “Fɨyini fɨ fi meyn fu kfèynsɨ wayn sɨ̂ mà alèʼ nɨ̀ Abèl ta Kên tî zue.” ²⁶Sêt ɨ læ boŋ bzɨ wâyn ɨ lûmnɨ̀ ɨ chfɨ̀ ìzɨyn i ŋweyn na, “Enòsh.” À ti ɨtuʼ vzɨ̀ a ghelɨ nɨ̂n læ zɨ̀tɨ sɨ nà koʼsɨ̂ Fɨyini ateyn, toŋtɨ̂ ŋweyn na, “Bôbo.”