Genesis 5

Woyn woyn Adàm

¹Akeynà nɨn ghɨ àzɨyn a woyn woyn Adàm ta ghɨ n-læ nyàʼ. Fɨyini fɨ nɨn læ faytɨ ghelɨ ɨ nì na àŋena na fɨsɨ̂ ŋweyn.

²Fɨyini fɨ nɨn læ meyn faytɨ wùl ɨ lûmnɨ̀ ɨ fi faytɨ wul ɨ wi. Sɨ ibàm ateyn wu boysɨ àŋena ɨ toŋtɨ àŋena na, “Ghelɨ.”

³À nà n-ghɨ ta Adàm lèma meyn ɨ̀ nà sɨ ghɨ bèŋ ɨvɨ nɨ̀ bèŋsɨ̀ mɨ̀vɨm ɨ̀n tal (130), wu bzɨ wayn ɨ lûmnɨ̀ wu fɨsɨ̂ ŋweyn ɨ chfɨ̀ ìzɨyn i ŋweyn na Sêt. ⁴Adàm nɨ̀n læ bzɨ Sêt tì ɨ fi chi kfeynsɨ bèŋsɨ̀ ighɨ nfama (800) ɨ fi bzɨ woyn ghɨ lûmnɨ̀ ghɨ li nɨ̀ woyn ghɨ̂ki ɨ kfɨ. ⁵Yi ti ndyêyn na Adàm nɨ̀n læ chɨ̀yntɨ chi bèŋ ighɨ bulamòʼ nɨ̀ bèŋsɨ̀ mɨ̀vɨm ɨ̀n tal (930).

⁶A nà n-ghɨ ta Sêt lèma ɨ̀ nà sɨ ghɨ bèŋ ɨvɨ nɨ̀ bèŋsɨ̀ tâyn (105), wu bzɨ Enòsh. ⁷Sêt nɨ̀n læ bzɨ Enòsh tì ɨ chi kfeynsɨ bèŋ ighɨ nfama nɨ̀ bèŋsɨ̀ nsòmbo (807), ɨ fi bzɨ woyn ghɨ lûmnɨ̀ ghɨ li nɨ̀ woyn ghɨ̂ki ɨ kfɨ. ⁸Yi ti ndyêyn na Sêt nɨ̀n læ chɨ̀yntɨ chi bèŋ ighɨ bulamòʼ nɨ̀ bèŋsɨ̀ njvàsɨ̀ bò (912) jæ na wù kfɨ.

⁹À nà n-ghɨ ta Enòsh lèma nà sɨ ghɨ bèŋ mɨ̀vɨm bulamòʼ (90), wu bzɨ Kenàn. ¹⁰Enòsh nɨ̀n læ bzɨ Kenàn tì ɨ fi chi kfeynsɨ bèŋ ighɨ nfama nɨ̀ bèŋsɨ̀ njvàsɨ̀ tâyn (815), ɨ fi bzɨ woyn ghɨ lûmnɨ̀ ghɨ li nɨ̀ woyn ghɨ̂ki ɨ kfɨ. ¹¹Yi ti n-dyêyn na Enòsh nɨ̀n læ chɨ̀yntɨ chi bèŋ ighɨ bulamòʼ nɨ̀ bèŋsɨ̀ tâyn (905), jæ na wù kfɨ.

¹²À nà n-ghɨ ta Kenàn lèma nà sɨ ghɨ bèŋsɨ̀ mɨ̀vɨm nsòmbo (70), wu bzɨ Màhalalèl. ¹³Kenàn nɨ̀n læ bzɨ Màhalalèl tì ɨ chi kfeynsɨ bèŋ ighɨ nfama nɨ̀ bèŋsɨ̀ mɨ̀vɨm ɨ̀n kæ̀ (840), ɨ fi bzɨ woyn ghɨ lûmnɨ̀ ghɨ li nɨ̀ woyn ghɨ̂ki. ¹⁴Yi ti n-dyêyn na Kenàn nɨ̀n læ chɨ̀yntɨ chi bèŋ ighɨ bulamòʼ nɨ̀ bèŋsɨ̀ ìvɨm (910), jæ na wù kfɨ.

¹⁵À nà n-ghɨ ta Màhalalèl lèma nà sɨ ghɨ bèŋ mɨ̀vɨm ntufa njvàsɨ̀ tâyn (65), wu bzɨ Jalèt. ¹⁶Màhalalèl nɨ̀n læ bzɨ Jalèt tì ɨ chi kfeynsɨ bèŋ ighɨ nfama nɨ̀ bèŋsɨ̀ mɨ̀vɨm ɨ̀n tal (830), ɨ fi bzɨ woyn ghɨ lûmnɨ̀ ghɨ li nɨ̀ woyn ghɨ̂ki ɨ kfɨ. ¹⁷Yi ti ndyêyn na Màhalalèl nɨ̀n læ chɨ̀yntɨ chi bèŋ ighɨ nfama nɨ̀ bèŋsɨ̀ mɨ̀vɨm bulamòʼ njvàsɨ̀ tâyn (895), jæ na wù kfɨ.

¹⁸À nà n-ghɨ ta Jalèt lèma nà sɨ ghɨ bèŋ ɨvɨ nɨ̀ bèŋsɨ̀ mɨ̀vɨm ntufa njvàsɨ̀ bò (162), wu bzɨ Enòk. ¹⁹Jalèt nɨ̀n læ bzɨ Enòk tì ɨ chi kfeynsɨ bèŋsɨ̀ ighɨ nfama (800), ɨ fi bzɨ woyn ghɨ lûmnɨ̀ ghɨ li nɨ̀ woyn ghɨ̂ki ɨ kfɨ. ²⁰Yi ti n-dyêyn na Jalèt nɨ̀n læ chɨ̀yntɨ chi bèŋ ighɨ bulamòʼ nɨ̀ bèŋsɨ̀ mɨ̀vɨm ntufa njvàsɨ̀ bò (962), jæ na wù kfɨ.

²¹À nà n-ghɨ ta Enòk lèma nà sɨ ghɨ bèŋsɨ̀ mɨ̀vɨm ntufa njvàsɨ̀ tâyn (65), wu bzɨ Mètuselà. ²²Enòk nɨ̀n læ bzɨ Mètuselà tì ɨ fi chi kfeynsɨ bèŋsɨ̀ ighɨ ì tal (300), jelɨ̀ kɨ ta Fɨyini fɨ nɨn kɨŋ ɨ fi bzɨ woyn ghɨ lûmnɨ̀ ghɨ li nɨ̀ woyn ghɨ̂ki ɨ kfɨ. ²³Yi ti n-dyêyn na Enòk nɨ̀n læ chɨ̀yntɨ chi bèŋ ighɨ ì tal nɨ̀ bèŋsɨ̀ mɨ̀vɨm ntufa njvàsɨ̀ tâyn (365). ²⁴Enòk nɨ̀n læ nà jelɨ̀ kɨ ta Fɨyini fɨ nɨn kɨŋ, ghɨ læ gvɨ̀tɨ kɨŋ kɨ ŋweyn moŋ ma Fɨyini fɨ li meyn ŋweyn.

²⁵À nà n-ghɨ ta Mètuselà lèma ɨ̀ nà sɨ ghɨ bèŋ ɨvɨ nɨ̀ bèŋsɨ̀ mɨ̀vɨm nfama njvàsɨ̀ nsòmbo (187), wu bzɨ Lamèk. ²⁶Enòk nɨ̀n læ bzɨ Lamèk tì ɨ fi chi kfeynsɨ bèŋ ighɨ nsòmbo nɨ̀ bèŋsɨ̀ mɨ̀vɨm nfama njvàsɨ̀ bò (782), ɨ fi bzɨ woyn ghɨ lûmnɨ̀ ghɨ li nɨ̀ woyn ghɨ̂ki ɨ kfɨ. ²⁷Yi ti n-dyêyn na Mètuselà nɨ̀n læ chɨ̀yntɨ chi bèŋ ighɨ bulamòʼ nɨ̀ bèŋsɨ̀ mɨ̀vɨm ntufa njvàsɨ̀ bulamòʼ (969), jæ na wù kfɨ.

²⁸À nà n-ghɨ ta Lamèk lèma ɨ̀ nà sɨ ghɨ bèŋ ɨvɨ nɨ̀ bèŋsɨ̀ mɨ̀vɨm nfama njvàsɨ̀ bò (182), wu bzɨ wayn ɨ lûmnɨ̀, ²⁹ɨ chfɨ̀ ìzɨyn i ŋweyn na Nuwà ɨ kæ bè na, “Wàyn nâ wèyn læ̀ kfɨmtɨ̂ ghesɨ̀nà antêynɨ̀ nchuʼ afî a ghesɨ̀nà nɨn chuʼ bòm nse zɨ̀ a Bôbo nɨ̀n læ te ɨ fu na ghesɨ̀nà na felà.” ³⁰Lamèk nɨ̀n læ bzɨ Nuwà tì ɨ chi kfeynsɨ bèŋ ighɨ ì tâyn nɨ̀ bèŋsɨ̀ mɨ̀vɨm bulamòʼ njvàsɨ̀ tâyn (595), ɨ fi bzɨ woyn ghɨ lûmnɨ̀ ghɨ li nɨ̀ woyn ghɨ̂ki. ³¹Yi ti n-dyêyn na Lamèk nɨ̀n læ chɨ̀yntɨ chi bèŋ ighɨ nsòmbo nɨ̀ bèŋsɨ̀ mɨ̀vɨm nsòmbo njvàsɨ̀ nsòmbo (777), jæ na wù kfɨ.

³²Nuwà nɨ̀n læ meyn lema ɨ nà sɨ ghɨ bèŋsɨ̀ ighɨ ì tâyn (500), ɨ bzɨ Shêm nɨ̀ Hâm nɨ̀ Jafèt.