Genesis 42

Woynà Josèf ɨ ndù a Ijìb

¹Jàkôb nɨ̀n læ meyn yvɨ na ɨfwo ɨ yɨnɨ nɨn ghɨ a Ijìb ɨ bɨf sɨ̂ woyn ŋweyn na, “Yì ti sɨ kinɨ̂ kɨ ìwuyn têyn kfâʼ na ɨfwo ɨ yɨnɨ nɨn lù wo na yì na yɨ-a?” ²“Ma yvɨ meyn na ɨfwo ɨ yɨnɨ nɨn ghɨ a Ijìb. Yì kali ndù yuyn gvì nɨ ɨlvɨ bu tì a ghesɨ̀nà nɨ̂n kfɨ̀ jeŋ.”

³Ta wù tàŋi tî, woynà Josèf ɨ lù ìvɨm ɨ kàlì sɨ yuyn ɨfwo ɨ yɨnɨ a Ijìb. ⁴Jàkôb nɨ̀n bû læ visi na Benjamìn ɨ wâynà Josèf ɨtwelâ ndu ŋêyn àŋena bòm ta wù nà n-fâyn na iwo i bzɨ-i kàʼ a yi ndu kòli ŋweyn afu. ⁵Woyn Isìlæ̀ nɨn læ lù ŋêyn ghelɨ Kenàn ghɨ li ta ghɨ nà n-ndû kɨmɨ sɨ yuyn ɨfwo ɨ yɨnɨ a Ijìb bòm ta jeŋ ateyn nà n-ghɨ ma yì ku meyn kɨ̀mɨ a Kenàn.

⁶A nà n-ghɨ tì ma Josèf sɨ saʼ ìlaʼ i Ijìb, a ghɨ kɨmɨ ŋweyn vzɨ̀ a wù n-beyʼlɨ̂ ɨfwo ɨ yɨnɨ sɨ̂ ghelɨ nô ghɨ̀ jɨ̀m. Woynà ŋweyn ndu chem afu ɨ tɨm alvɨ a ŋweyn asɨ ɨ kfɨsɨ àkêʼ a nse. ⁷Josèf nà n-yeyn gvî nɨ̀ woynà ŋweyn têyn ɨ keli kɨ keli, mɨtì ɨ kem nì kɨ na yi n-kya wi àŋena ɨ nà sɨ byatɨ̂ kɨ byatɨ bɨf na, “Yì lù wo a?” Àŋena bè na “Ghèsɨ̀ lu a Kenàn ɨ̀ gvì sɨ yuyn ɨfwo ɨ yɨnɨ afêyn.” ⁸Josèf nɨ̀n læ yeyn keli woynà ŋweyn tì àŋena faŋ tɨ̀ kèli ŋweyn. ⁹Wu kfàʼtɨ̀ jem sìsɨ̀ a sɨ n-læ chɨ ŋweyn kûm woynà ŋweyn tì nô mɨ ɨlvɨ gha ɨ bè sɨ̂ àŋena na, “Yi n-ghɨ tèyn ghɨ gvèsɨ̀ ma yì gvì kɨ̀ sɨ yeyn na à n-boynɨ̂ àbâs à kà sɨ zɨ ateyn ilaʼ afêyn a.” ¹⁰Àŋena bè sɨ̂ ŋweyn na, “Ɨ̀ngaŋ a bô. Ghès nɨn ghɨ kɨ ghelɨ ghɨ felɨnɨ nɨ̀ và ma ghesɨ̀ gvì kɨ̀ sɨ yuyn ɨfwo ɨ yɨnɨ afêyn. ¹¹Ghès nɨn ghɨ tèyn ghɨ kɨ woyn wûl ɨ̀mòʼ. Ghès nɨn ghɨ kɨ ghelɨ ghɨ felɨnɨ nɨ̀ và, taŋî kɨ samoʼ. Ghès nɨn ghɨ wi gvèsɨ̀.” ¹²Josèf ɨ fi bè kɨ sɨ̂ àŋena na, “Ɨ̀ngaŋ, yì gvì kɨ̀ sɨ yeyn na à n-boynɨ̂ àbâs à kà sɨ zɨ a ghès ilaʼ afêyn a.” ¹³Àŋena ɨ bè na, “Bôbo, ghelɨ ghɨ felɨnɨ nɨ̀ và nɨn ghɨ tèyn ma ghɨ n-læ nà ghɨ njvàsɨ̀ bò, a ghɨ kɨ woyn wûl ɨ̀mòʼ, wu chî a Kenàn. Waynà wes ɨ læ kfɨ, àngòʼsɨ̀-à ɨ ghɨ ŋêyn bò wes a ilaʼ.”

¹⁴Josèf ɨ fi bè kɨ sɨ̂ àŋena na, “Ba ma ni meyn bè na yi n-ghɨ gvèsɨ̀! ¹⁵Mɨ n-mòmsɨ̀ zɨ̀ lvɨ̂yn ɨ̀ yeyn na iwo zɨ̀ a yi n-bê nɨn ghɨ samòʼa. Mɨ n-bê sɨ̂ zɨ̀ samoʼ, kâyn ìzɨyn i fòyn na, mɨ n-visî wì na yì lu a bu kɨ na àngòʼsɨ̀ à ki-a nâ kì ɨ gvi meyn afêyn. ¹⁶Yì tum wul ɨ̀mò a yi antêynɨ̀ wù kasi ndù lì gvì nɨ̀ waynà vzɨ. Wu n-se sɨ ndù a mà ghal ɨ̀ lèm ghelɨ ghɨ li ghì a ka ghɨ faŋ afêyn a ndô nchaʼ, a wâynà vzɨ gvi jæ ta ka mà keli na yi n-taŋî samoʼ ma yi n-wam wam a. Yì kæ sɨ faŋ tɨ ni tî, a mà na bè sɨ̂ zɨ̀, kâyn ìzɨyn i fòyn na, yi n-ghɨ gvèsɨ̀.” ¹⁷Wu n-taŋi tî ɨ ghal lèm àŋena nô ghɨ̀ jɨ̀m a ndo nchaʼ sɨ a mɨchɨ ɨ̀n tal.

¹⁸A nà ghɨ ibàm i mɨchi ɨ̀n tal, Josèf ɨ bè sɨ̂ àŋena na, “Yì kæ sɨ ni iwo zɨ̀ a mɨ n-bè, a mà visi zɨ bòm ta mɨ ghɨ tèyn fâyn Fɨyini. ¹⁹Yì kæ nà taŋî samoʼ yi visi waynà vzɨ ɨ̀mòʼ afêyn ɨ li ɨfwo ɨ yɨnɨ ɨ kasi kfa fu sɨ̂ ghelɨ̀ ghi ka jèŋ zue àŋena. ²⁰Mɨtì yi kelɨ sɨ gvì nɨ̀ àngòʼsɨ̀ à ki-a kì sɨ̂ mà ta ka mà keli na yi n-taŋî samoʼ, ɨ̀ vɨ̀si zɨ̀.” Àŋena ɨ bɨmi sɨ ni iwo zɨ̀ a Josèf bè.

²¹Àŋena nɨn bɨmi tî ɨ nà sɨ bê kɨ sa àŋena ngeŋsɨ na, “Ghesɨ̀nà kàʼ a ghɨ na jɨ̀ŋ tèyn bòm ìwo zɨ̀ a ghesɨ̀nà nɨn læ mòm sɨ̂ waynà ghesɨ̀nà. Ghesɨ̀na nɨn læ meyn yeyn dzɨ zɨ̀ a wù nà n-koynsɨ chwotɨ ghesɨ̀na ateyn, mɨtì ɨ faŋ tɨ̀ yvɨ̀tɨ. À ti iwo zɨ̀ a ngeʼ yèyn kòli ghesɨ̀nà têyn.” ²²Lubèn ɨ bè sɨ àŋena na, “Mɨ n-læ meyn bè sɨ̂ zɨ̀ na ka ghɨ n-nì ìwo i bzɨ-i sɨ̂ wàyn nâ vzɨ̀ yi faŋ tɨ̀ yvɨ̀tɨ. Mɨ̀luŋ mɨ̀ ŋweyn mèyn a ghesɨ̀nà atu lvɨ̂yn.” ²³Àŋena nà n-taŋî tì kya wi na Josèf nɨ̀n yvɨ ìwo zɨ̀ a àŋena nɨn bê bòm ta ghɨ nà n-chwôsɨ̀ chwosɨ itaŋi Josèf sɨ̂ àŋena. ²⁴Josèf ɨ lù sɨ àŋena a ngùŋ ɨ ndù nà sɨ dzɨ̀-à, ɨ dzɨ̀ iwo ateyn i bol sɨ a ŋweyn item, wu fi kasi ɨ gvì ɨ taŋi sɨ̂ àŋena ɨ bè ghɨ lì Simìyòn ɨ kul kɨ asɨ nɨ̀ àŋena. ²⁵Wu n-læ nì tî ɨ bè na ghɨ we ɨfwo ɨ yɨnɨ a bòsɨ̀ nɨ̀ woynà ŋweyn, kàsi we nô mɨ ɨ̀kwo nda kɨ̀ a ŋweyn atû bò, fì fu ɨfwo ta ka àŋena fvɨ yɨ a dzɨ. Ghɨ we ɨ mèsì ɨ̀fwo ɨ yɨnɨ ateyn, ²⁶woynà ŋweyn ɨ kul bòsɨ ateyn atû njàkâysɨ̀ nɨ̀ àŋena ɨ lù. ²⁷A nà ghɨ ta àŋena jèl ɨ̀ ndù chem alèʼ a li-a ɨtuʼ jɨ, àŋena timi sɨ chi, wul ɨ yàs bò sɨ fu ɨfwo ɨ yɨnɨ sɨ̂ njàkâs ŋweyn, ɨ kasi yeyn kɨ ɨkwo vzɨ̀ a wù nì yuyn ɨfwo ɨ yɨnɨ ateyn a ŋweyn a bò. ²⁸Wu n-yeyn tî ɨ byal bè sɨ̂ woynà ŋweyn na, “Ghɨ kasi meyn we ɨ̀kwô wom a ma bò, wu wèyn.” Àŋena kfɨ sayn, ɨ nà sɨ bɨf kɨ sɨ àŋena ngeŋsɨ na, “Fɨyini fɨ ti mòm ghà sɨ̂ ghesɨ̀nà teyna?”

²⁹A nà ghɨ ta àŋena kàsi kfa a Kenàn ɨ fèʼtɨ̀ nô mɨ ghà sɨ̂ bò àŋena ta yi gàyn. Àŋena nɨn bè na,

³⁰“Wùl ɨ̀ vzɨ̀ a wù n-saʼ Ijìb ti meyn byàytɨ sɨ̂ ghès nô sa ŋaŋ bè na ghès nɨn ghɨ gvèsɨ̀, ma ghèsɨ̀ gvì sɨ nyaʼtɨ sɨ ki ilaʼ i ŋweyn. ³¹Mɨtì ghèsɨ bê sɨ̂ ŋweyn na ghès nɨn taŋî kɨ samoʼ, ghɨ wi gvèsɨ̀. ³²Ghès nɨn ghɨ kɨ woyn wûl ɨ̀mòʼ, ma ghès nɨn læ nà ghɨ njvàsɨ̀ bò. Waynà wes ɨ læ kfɨ, àngòʼsɨ̀-à ɨ ghɨ ŋêyn bò wes a Kenàn lvɨ̂yn.

³³“Wùl nâ vzɨ̀ a wù n-saʼ ilaʼ i Ijìb bê sɨ̂ ghès na, ‘Mɨ n-mòmsɨ̀ zɨ̀ ɨ̀ yeyn na yi n-taŋî samoʼ a. Yi n-visî wâynà vzɨ ɨ̀mòʼ afêyn ɨ̀ lì ɨ̀fwo ɨ yɨnɨ kàsî kfa ɨ̀ fu sɨ̂ ghelɨ̀ ghi ghì a ghɨ n-kfɨ jeŋ tî. ³⁴Mɨtì yì ndu lì gvì nɨ̀ àngòʼsɨ̀ à ki-a sɨ̂ mà ta ka mà keli na yi n-taŋî samoʼ ghɨ wi gvèsɨ̀. Yi kæ nà ghɨ samoʼ, a mà kasi fu wâynà vzɨ a yì na nî mbêyʼlɨ̀ afêyn kɨ̀ ta yi n-kôŋ.’”

³⁵Àŋena taŋi tì, ɨ se sɨ yàsɨ bòsɨ̀, nô mɨ ìbuʼ ɨkwo nɨ̀ ndà ɨ kasi ghɨ kɨ atû bò nɨ̀ ŋweyn. Ŋêyn ghɨ̀bò àŋena ɨ yeyn tî ɨ kfɨ sayn. ³⁶Jàkôb ɨ bò àŋena ɨ bè na, “Yi n-zuetɨ̂ mesì woyn sɨ a ma awu. Josèf tî meyn ndù, Simìyòn ndû bàʼsɨ, yi na sɨ fì kɨŋ sɨ li Benjamìn lvɨ̂yn. Awo a bɨ-a nâ kèyna nɨn gâyn tèyn a yvɨ kɨ mà ilûm ta bò vzɨ.” ³⁷Jàkôb nɨn taŋi tî, Lubèn ɨ bè sɨ̂ ŋweyn na, “Visi ŋweyn sɨ̂ mà, mɨ ndù kasi gvi nɨ̀ ŋweyn. Ma faŋ tɨ̀ kàsi sɨ gvì nɨ̀ ŋweyn sɨ̂ và, wà kôŋ wa zuetɨ woyn ghɨ lûmnɨ̀ nɨ̀ mà ghêyn ghɨ̀bò.”

³⁸Mɨtì Jàkôb ɨ bè na, “Mà kàʼ ma bû vɨ̀si na zɨ̂ wâyn wom kali afu amoʼ. Wâynà ŋweyn ɨlwema ti meyn kfɨ, à na sɨ ghɨ kɨ ŋweyn. Ngeʼ kæ fvɨ̀ kòli ŋweyn a dzɨ, a na ghɨ na yi ni meyn na advɨyn a wûl tèyn ta ma kfɨ nɨ̀ ìkoynsɨ isuyn i.”