Genesis 44

Ghɨ yeyn bom Josèf a bò nɨ̀ Benjamìn

¹A nà n-ghɨ ta Josèf ŋêyn woynà ŋweyn yɨ mèsì, a ni nà ghɨ nɨ̀ntuʼ, Josèf ɨ bè sɨ̂ wul vzɨ̀ a wù n-tisɨ ghelɨ ghɨ felɨnɨ nɨ̀ ŋweyn na, “We ɨfwo ɨ yɨnɨ a bòsɨ̀ nɨ̀ ghelɨ ghèyn wu kfeyn kɨ̀ a àŋena i bèʼì. Wà nî wa kasi we nô mɨ ɨ̀kwo nda kɨ̀ a ŋweyn a bò. ²Wà we wa lì bom yem zɨ̀ a ghɨ fàytɨ nɨ̀ àso ɨkwo a fɨfâ tî ɨ we a bò nɨ̀ àngòʼsɨ̀ a àŋena baʼsɨ̂ nɨ̀ ɨwu ɨŋweyn ɨkwo.” Wul ateyn ɨ ni kɨ iwo zɨ̀ a Josèf bè.

³Ɨtuʼ ɨ bɨs layn, ghɨ tsɨynsɨ woynà Josèf àŋena ɨ lù nɨ̀ njàkâysɨ àŋena. ⁴Àŋena ɨ lù ɨ nà bu duʼ tɨ̀ fvɨ̀ sɨ mèsì ɨ ntèʼ nâ zɨ̀, Josèf ɨ bè sɨ̂ wùl ɨ̀ vzɨ̀ a wù n-tisɨ ghelɨ ghɨ felɨnɨ nɨ̀ ŋweyn na, “Nyɨŋ ghal ghelɨ ghì ɨ bɨf sɨ̂ àŋena na, ‘Bòm ghà ta yì làʼ njùŋ nɨ̀ mbɨ a? ⁵Ɨyêyn nɨ̀n ghɨ bom bò ìfèl nɨ̀ mà zɨ̂ a wù n-nyvɨ ateyn fî yeyn àwo ateyn. Yi mom meyn ìwo yi bem nô abɨ.’”

⁶A nà ghɨ ta wù nyɨŋ kòli àŋena, wu bè kɨ iwo zɨ̀ a Josèf bè na wu be sɨ̂ àŋena. ⁷Mɨtì àŋena bè sɨ̂ ŋweyn na, “Bòm ghà ta wà n-be ìnkì iwo nâ yèynì sɨ̂ ghès a bô? Ghelɨ têyn ta ghes kàʼ ghɨ bû mòm ìnkì iwo tì. ⁸Ba ghèsɨ ti meyn kàsi gvì nɨ̀ ɨ̀kwo vzɨ̀ a ghès nɨn læ yeyn a ghès a bòsɨ̀ tî? Ghès ti kàʼ ghɨ nà choŋ sɨ ni gha nɨ̀ àso ɨkwo nɨ̀ bò ìfèl nɨ̀ và a? ⁹Ghɨ kæ yeyn bom nâ zɨ̀ nô mɨ a bò nɨ̀ ndà a ghès antêynɨ̀ a ghɨ zue wul àteyn, a ghès ghî a ghɨ faŋ na ghɨ ɨ̀kôs ɨ̀ va.”

¹⁰Wùl àteyn ɨ bè na, “Ma yvɨ meyn ìwo zɨ̀ a yì bè. Mà yeyn bom ateyn nô mɨ sɨ ndà a mà li kɨ̀ wul àteyn sɨ a ma akòs ɨ̀ vɨ̀si zɨ̀ a yì lu.”

¹¹Wu n-bè tî, nô mɨ ndà ɨ nyàŋsɨ̀ ɨ suʼsɨ kɨ bò ŋweyn ɨ yàs. ¹²Àŋena nɨn yàytɨ tî, wul ɨ̀ felɨnɨ àteyn ɨ zɨ̀tɨ̀ kɨ nɨ̀ bò wùl ɨlwema ɨ chaʼ kɨ têyn ɨ ndu yeyn a bò nɨ̀ Benjamìn ɨ àngòsɨ̀ a àŋena. ¹³Woynà ŋweyn ɨ yeyn tî ɨ dzɨ̀ ɨ bàytɨ̀ ndzɨsɨ sɨ iwùyn ɨ kasi koʼsɨ bò sɨ àŋena atu njàkâysɨ̀ ɨ kasi ndu a ntèʼ afu.

¹⁴Josèf ɨ nà bu duʼ kɨ a ndo, Judà ŋêyn woynà ŋweyn ɨ zɨ gvi ɨ felɨ a ŋweyn asɨ. ¹⁵Josèf ɨ bɨf sɨ àŋena na, “À ti gha a yì mòm têyn a? Yi n-kya wi na wùl ɨ̀ tèyn ta ma nî wu nà ki kya àwo a leytɨnɨ-a a?”

¹⁶Judà ɨ bè sɨ̂ ŋweyn na, “Ghès nɨn kelɨ wi iwo i li sɨ fì sɨ bè a bô, ghèsɨ̀ kaʼ ghɨ bû làyn nsaʼ. Fɨyini fɨ dyeyn meyn bàynsɨ ìsas ì yesi a ndayn. Ghèsɨ ghɨ̀ jɨ̀m, baʼsɨ̂ nɨ̀ wul ɨ̀ vzɨ̀ a ghɨ yeyn bom ateyn a ŋweyn a bò sɨ ghɨ kɨ ɨ̀kôs lvɨ̂yn sɨ̂ và.” ¹⁷Mɨtì Josèf ɨ bè sɨ̂ ŋweyn na, “Mà kàʼ ma bû nì ìnki iwo tì, a n-faŋ kɨ wul ɨ vzɨ̀ a ghɨ yèyn bom àteyn a ŋweyn a bò sɨ a ma akòs a yì kasi kfa yeyn bò vzɨ kɨ nɨ̀ mbôynɨ̀.”

¹⁸Judà ɨ kɨŋtɨ ndù ɨ baʼsɨ a ŋweyn a ngùŋ ɨ bè na, “Mɨ n-chwotɨ̂ a bô, visi mà be iwo, ka wa n-yàbsɨ ɨ̀toŋ sɨ̂ mà. Mɨ n-kya kɨ nô na wà n-ghɨ kɨmɨ ta fòyn. ¹⁹Wà læ meyn bɨf sɨ̂ ghès na bò wes bu ghɨ a, ɨ̀ bɨf kɨmɨ na ghès nɨn kelɨ wâynì ɨ̂lvɨ̀ a? ²⁰Ghèsɨ bè na bò wes nɨn ghɨ ma wù lema meyn nô a jûŋ, kelɨ wayn ɨ lûmnɨ̀ ɨtwela ɨlvɨ ma wù bzɨ kɨ̀ nô ɨdvɨyn. Lwèmâ wàyn nâ vzɨ̀ ɨ ghɨ ma wù n-læ meyn kfɨ, à faŋ kɨ ŋweyn sɨ̂ nà ŋweyn, bò wes ɨ kôŋ ŋweyn nô a jûŋ.”

²¹“Wa kæ sɨ bè sɨ̂ ghès a bôbo na ghèsɨ̀ koʼ lì kàlì nɨ̀ ŋweyn wà yeyn nɨ̀ ìsɨ ì zæ. ²²Ghèsɨ bè sɨ̂ và a bô na, wayn ateyn kàʼ wu bû lù sɨ a ngùŋ nɨ̀ bò ŋweyn. Wù kæ sɨ lù, a bò ŋweyn kfɨ kɨ̀ kfɨ. ²³Mɨtì wa bè sɨ̂ ghès na, ka isɨ ì zæ fi kù ghes afêyn à bu kɨ na ghèsɨ lì meyn kàlì nɨ̀ àngòʼsɨ̀ à kesa afêyn. ²⁴A nà ghɨ ta ghèsɨ̀ kasi ndù fèʼtɨ̀, iwo zɨ̀ a wà bè sɨ̂ bò wes ɨ wul ɨ̀ felɨnɨ nɨ̀ và, ²⁵wu bè sɨ̂ ghès na, ghèsɨ̀ kasi kàlì yuyn kfèynsɨ ɨfwo ɨ yɨnɨ. ²⁶Mɨtì ghès ɨ bè sɨ̂ ŋweyn na, ghèsɨ̀ kàʼ ghɨ bû fì kàlì afêyn bula àngòʼsɨ̀ à kesa, bòm ta wà tî meyn bè na ka isɨ ì zæ fî ku ghes bula ŋweyn.”

²⁷“Bò wes ɨ wul ɨ̀ fèlɨnɨ nɨ̀ và ɨ bè sɨ̂ ghès na, ‘Yi n-kya na wî wom wèyn nɨ̀n læ bzɨ kɨ woyn sɨ̂ mà ghɨ̀bò, ²⁸ɨ̀mòʼ ɨ ndu lè, ma kya na nyàm nɨ̀n læ meyn ku. Sɨ ɨtuʼ nâ ghè, ma bû tìmi fì yèyn ŋweyn. ²⁹Yì ti kæ lì ndù nɨ ɨweyn nâ wèyn lvɨ̂yn ngeʼ kæ fvɨ̀ kòli ŋweyn a dzɨ, a à na ghɨ na yi ni meyn na advɨyn a wûl tèyn ta ma kfɨ nɨ̀ ìkoynsɨ isuyn i.’”

³⁰“Yi ti n-ghɨ na ghèsɨ̀ kasi ɨ kfa lvɨ̂yn bula wayn nâ wèyn, a bò wom ɨ wul ɨ̀ fèlɨnɨ nɨ̀ và kfɨ kɨ̀ kfɨ. Wù sɨ yeʼtɨ kɨ a ŋweyn. ³¹Wù kæ yeyn na wayn ateyn nɨn ghɨ wi, a à na ghɨ ma ghèsɨ ni meyn na bò wes kfɨ a ŋweyn ɨdvɨyn kɨ̀ nô nɨ̀ ìkoynsɨ isuyn i. ³²Ma ti meyn chfɨ̀nɨ̀ bò wom na mɨ n-tòʼnɨ̀ nɨ̀ wàyn nâ wèyn, a iwo i faŋ tɨ̀ gayn sɨ̂ ŋweyn. Mà tî bè sɨ̂ ŋweyn na mà kæ sɨ faŋ tɨ kasi sɨ kfa nɨ̀ wayn àteyn, wu ghàm mà nô ta ka mà læ̂ kfɨ.

³³“Mɨ n-chwotɨ̂ và a bô na wà visi à kwo faŋ ma afêyn sɨ akòs nɨ̀ và ta ka wàyn nâ wèyn kasi kfa ŋêyn woynà ŋweyn. ³⁴Mà kàʼ ma bû kàsi kfa bula wayn àteyn bòm ta mɨ n-kôŋ wì sɨ yeyn zɨ̀ a ka yì koli bò bòm wayn nâ wèyn.”