Genesis 45

Josèf ɨ fèʼtɨ̀ ngeŋ ŋweyn sɨ̂ woynà ŋweyn

¹À na n-ghɨ ta Josèf yvɨ iwo zɨ̀ a Judà bè ɨ nà bu fì kya wi sɨ ghal ngêŋ ŋweyn mɨtì ɨ nà kôŋ wì sɨ dzɨ̀ asɨ nɨ̀ ghelɨ ghɨ felɨnɨ nɨ̀ ŋweyn, ɨ kæ sɨ byal sɨ bè na, “Yì fvɨ abe nô ghɨ̀ jɨ̀m!” Ghelɨ ghɨ felɨnɨ ateyn fvɨ̀ nô mɨ ɨlvɨ gha wu kæ sɨ fèʼtɨ̀ ngêŋ ŋweyn sɨ̂ woynà ŋweyn. Wu n-læ fèʼtɨ ngêŋ ŋweyn sɨ̂ woynà ŋweyn, ghɨ kɨ ŋêyn àŋena. ²Ghɨ n-fvɨ̀ tî, wu byal dzɨ̀ nô sa ŋaŋ, ghelɨ Ijìb ghì a ghɨ nà n-ti a be ɨ yvɨ ta wù n-dzɨ̂, nô ghelɨ ghɨ̀ jɨ̀m a ntoʼ ɨ boŋ yvɨ saʼgha àteyn.

³Josèf ɨ bè sɨ̂ woynà ŋweyn na, “À n-ghɨ mà Josèf, Bò wom bu ghɨ a?” Mɨtì achfɨ̂ a woynà ŋweyna ɨ yum bòm ta iwo ateyn i nà n-bem sɨ̂ àŋena na a ti n-ghɨ kɨ nô Josèf a.

⁴Josèf ɨ kæ bè sɨ̂ àŋena na, “Yì kɨŋtɨ gvì tì.” Àŋena kɨŋtɨ ndù, wu bè sɨ̂ àŋena na, “À n-ghɨ mà Josèf ɨ wâynà vzɨ vzɨ̀ a yi n-læ beyʼlɨ sɨ̂ ghelɨ Ijìb tî. ⁵Ka iwo ateyn nɨn fù ngeʼ sɨ̂ zɨ̀. Ka yi n-yàbsɨ ɨ̀toŋ sɨ̂ ngêŋ sisɨ bòm ta yi n-læ beyʼlɨ ma. À n-læ ni kɨ Fɨyini na mà gvi afêyn sɨ asɨ ɨ̀ bœ̀sɨ̀ ghelɨ. ⁶Jeŋ ku meyn ilaʼ afêyn lvɨ̂yn sa bèŋsɨ̀ bò, bèŋsɨ̀ ɨ bu ghɨ sɨ̀ tâyn, wùl ɨ ghɨ wi sɨ fèl afo, ghɨ wi sɨ kfì. ⁷Mɨtì Fɨyini fɨ nɨn læ tum ma afêyn sɨ asɨ nɨ̀ zɨ̀ na mà bœsɨ zɨ baʼsɨ̂ nɨ̀ wôyn ghi, ta ka ghelɨ faŋ kɨ̀ sɨ idvɨ̀.

⁸“À ti n-ghɨ na a n-bu læ nì zɨ̀ na mà gvi afêyn, à n-læ tum Fɨyini ɨ tum ma. Fɨyini fɨ ni meyn ma na ghɨ ta bò fòyn, lèm mà na mà na tisɨ̂ ghelɨ ghɨ felɨnɨ nɨ̀ fòyn fî saʼ ilaʼi Ijìb kɨ ì jɨ̀m. ⁹Yì nyaŋsɨ læ̂ koʼ ɨ̀ ndù bè sɨ̂ bò wom na, wâyn ŋweyn Josèf bè na Fɨyini fɨ ni meyn wù na saʼ Ijìb kɨ ì jɨm, na wù kali gvì yèyn ma, ka wu n-làytɨ. ¹⁰Yì be sɨ̂ ŋweyn na ŋêyn woyn ŋweyn, nɨ̀ woyn woyn ŋweyn bàʼsɨ nɨ̀ nyamsɨ ŋweynsɨ nô mɨ nɨ̀ ghà ɨ̂lvɨ̀ ta wù n-kelɨ, kali ɨ̀ gvì nà chî baʼsɨ̂ sɨ̂ mà abàs a Goshèn. ¹¹Wu n-gvi-à a mà na fu ɨ̀fwo ɨ yɨnɨ sɨ̂ ŋweyn bòm ta jèŋ yêyn na bu ghɨ kɨ ghɨ sa bèŋsɨ̀ tâyn. Ma wù faŋ tɨ̀ gvì afêyn, a ŋêyn ghelɨ ŋweyn nô ghɨ̀ jɨm baʼsɨ̂ nɨ̀ nyamsɨ ŋweynsɨ kfɨ jeŋ.

¹²“Yi yeyn meyn na à n-taŋî kɨ nô mà Josèf sɨ̂ zɨ̀, nô wâynà wom Benjamìn bôŋ yeyn? ¹³Yì ndu ɨ̀ fèʼtɨ̀ nô mɨ ghà vzɨ̂ a yì yeyn, nɨ̀ ìngvɨmlɨ zɨ̀ a ghɨ n-gvɨmlɨ ma a Ijìb sɨ̂ bò wom. Yi fêʼtɨ̀ yi nyaŋsɨ lì gvì nɨ̀ ŋweyn.”

¹⁴Wu n-taŋi tî ɨ baʼnɨ wâynà ŋweyn Benjamìn ɨ nà sɨ dzɨ-à. Benjamìn ɨ boŋ bɨ̀sà nɨ̀ ìdzɨ-ì. ¹⁵Wu fi baʼnɨ ndù kɨ nɨ̀ woynà ŋweyn ghɨli ghì, dzɨ̂ kɨ dzɨ. Sɨ ibàm ateyn àŋena kæ sɨ nà sɨ bêsɨ̀ àwo.

Woynà Josèf ɨ kasi kfa yeyn bò àŋena

¹⁶À nà n-ghɨ ta fòyn yvɨ̀ na woynà Josèf gvi meyn, ŋêyn ghelɨ ghɨ felɨnɨ nɨ̀ ŋweyn ɨ nà saŋlɨ-à. ¹⁷Fòyn ɨ bè sɨ̂ Josèf na wù be woynà ŋweyn we bòsɨ àŋena ɨ̀ kul atû njàkâysɨ̀ ɨ kasî kòʼ a Kenàn, ¹⁸ɨ̀ lì gvì nɨ̀ bò àŋena baʼsɨ̂ nɨ̀ ghelɨ àŋena nô ghɨ̀ jɨ̀m. Wù n-chfɨnɨ meyn sɨ fu nô àlêʼ a nse a juŋà sɨ̂ àŋena na àŋena na felɨ̀-à, dêŋsɨ̀ yɨ kɨ nô yɨ ɨfwo vzɨ̀ a wu n-koʼ ateyn.

¹⁹Wu n-læ meyn be kɨmɨ na Josèf be woynà ŋweyn li mɨ̀nchaʼ ɨ̀n lì a gufɨ̀ nyamsɨ ndù lì gvì nɨ̀ woyn àŋena nɨ̀ ghɨ̀ki àŋena baʼsɨ̂ nɨ̀ bò àŋena a Ijìb. ²⁰Bè na ka àŋena nɨn ki ɨfwo vzɨ̀ a àŋena nɨn visi a ibàm bòm ta ɨfwo ɨ jûŋ nô ɨ̀ jɨ̀m a ijìb na kelɨ kɨ àŋena.

²¹Woyn Isìlæ̀ ɨ ni kɨ ta fòyn bè. Josèf nɨ̀n fu meyn mɨ̀nchaʼ sɨ̂ àŋena baʼsɨ̂ nɨ̀ ɨfwo na àŋena na yɨ ndù a dzɨ kɨ̀ ta fòyn bè. ²²Wu n-læ meyn fu ndzɨsɨ fɨsɨ sɨ̂ woynà ŋweyn nô ghɨ̀ jɨ̀m mɨtì sɨ̂ Benjamìn wu fu ndzɨsɨ sɨ̀ tâyn baʼsɨ̂ nɨ̀ àso ɨkwo a fɨfâ kɨ chem ndù kilùsɨ̀ tal nɨ̀ àbeʼa. ²³Wu n-fù tî ɨ tsɨynsɨ njàkâysɨ̀ sɨ lûmnɨ̀sɨ̀ ìvɨm sɨ̂ bò ŋweyn ma sɨ bèʼì ɨfwo ɨ jûŋ vzɨ̀ a wu n-ghɨ a Ijìb, nɨ̀ njàkâysɨ kisɨ kɨ̀mɨ ìvɨm ma sɨ bèʼì ɨ̀fwo ɨ yɨnɨ nɨ̀ ɨ̀fwo ɨlvɨ vzɨ̀ a wu nà n-ghɨ sɨ gàmtɨ bò ŋweyn a dzɨ ta wù n-kalì a Ijìb. ²⁴Wu n-læ baʼtɨ ɨfwo ateyn nô mɨ ɨlvɨ gha ɨ se sɨ tsɨynsɨ woynà ŋweyn na àŋena lu ɨ bè sɨ̂ àŋena na, “Yi fvɨ̂ ka yî n-yòl a dzɨ.”

²⁵Àŋena ɨ kasi lù sɨ a Ijìb ɨ koʼ a Kenàn ɨ ndu yeyn bò àŋena Jàkôb, ²⁶ɨ bè sɨ̂ ŋweyn na, “Josèf bu ghɨ! Ghès nɨn bê samoʼ, à n-saʼ kɨ nô ŋweyn saʼ Ijìb ì jɨ̀m.” Jàkôb ɨ yvɨ iwo ateyn ɨchfɨ̂ ɨ yum ŋweyn, wu nà bɨmî wì na àŋena nɨn bê samoʼ. ²⁷Mɨtì a nà ghɨ ta àŋena làʼì mèsì tum zɨ̀ a Josèf tum, wù fî yeyn mɨ̀nchaʼ mzɨ̀ a wù tsɨynsɨ na mɨ̀ li kàlì nɨ̀ ŋweyn a Ijìb, wu yeyn na àŋena nɨn bê samoʼ, ɨ kasi yàlì. ²⁸Ta wù yèyn tî ɨ̀ kæ sɨ bè na, “Yi n-ghɨ samoʼ. Wâyn wom Josèf bu ghɨ! Mɨ n-kelɨ sɨ ndù sɨ yeyn ŋweyn jæ ta ka mà kfɨ̀.”