Genesis 48

Jàkôb ɨ boysɨ Mànasè ŋêyn Eflèm

¹Josèf nɨn læ yɨ mɨkâyn ŋêyn bò ŋweyn tì ɨ chitɨ kɨ têyn ɨ yvɨ na bò ŋweyn nɨn koʼi à ɨ lì woyn ŋweyn ghì ghɨ̀bò ɨ Mànasè ŋêyn Eflèm, ŋêyn àŋena ɨ ndu sɨ toŋtɨ ŋweyn. ²A nà ghɨ ta ghɨ fèʼtɨ̀ sɨ̂ Jàkôb na wâyn ŋweyn Josèf gvi meyn sɨ yeyn ŋweyn, wu tosɨ ɨ làlì ɨ dùʼì a ɨkuyn, ³ɨ toŋtɨ Josèf ɨ bè sɨ̂ ŋweyn na, “Fɨyini ɨ bò ɨ̀dwaʼ ɨ̀ jɨ̀m nɨn læ meyn fvɨ̀ a mɨ ikèʼ a ntèʼ Lûz, a Kenàn ɨ boysɨ mà. ⁴Fɨ n-fvɨ̀ tî ɨ bè sɨ̂ mà na, ‘Mà læ̀ fu woyn sɨ̂ và kɨ̀ sɨ idvɨ̀. Woyn ghya læ̀ lema koʼ sɨ a tɨlaʼ, a mà fi fu kɨ̀mɨ ìlaʼ yèynì sɨ̂ àŋena kɨ̀ samoʼ.’ ”

⁵“Mɨ n-lì woyn ghɨ lûmnɨ̀ nɨ̀ và ghêyn ghɨ̀bò a wà tî bzɨ a Ijìb afêyn jæ ta ka mà gvi têyn kɨ̀ sa ma woyn lvɨ̂yn. Eflèm ŋêyn Mànasè na ghɨ woyn ghem kɨ̀ têyn ta Lubèn ŋêyn Simìyòn nɨn ghɨ sɨ̂ mà.” ⁶Nô mɨ woyn ghɨ̀ kà ta wa n-fì bzɨ a àŋena ibàm na ghɨ wôyn ghya, a àŋena læ̂ kèli ɨ wu àŋena ɨlwêʼ kɨ̀ ibam nɨ̀ woynà àŋena ghɨ lema. ⁷A n-læ nà ghɨ ta mɨ n-kasi kfa sɨ a Badàn ghesɨ̀ nà vâ Lashèl wu kfɨ a dzɨ. Wu n-læ kfɨ kɨ̀ nô a Kenàn kɨ̀ ta ghès jèl gvì bàʼsɨ a Eflàt, ma gvìmì kɨ ŋweyn afu a mbæ̀ dzɨ̀ a Betɨ̀lèhêm. Iwo ateyn i ɨ fu ngeʼ sɨ̂ mà nô sɨ a ŋaŋ. ⁸A nà n-ghɨ ta Isìlæ̀ yèyn woyn Josèf, wu bɨf na, “Ɨghêyn nɨn ghɨ ghɨ̀ ndà?” ⁹Josèf ɨ bè sɨ̂ ŋweyn na, “À n-ghɨ woyn ghì a Fɨyini fɨ̀ fù sɨ̂ ma a ilaʼ afêyn.” Isìlæ̀ ɨ bè na, “Gvi baʼsɨ nɨ̀ àŋena mà boysɨ àŋena.” ¹⁰Josèf ɨ kɨŋtɨ ndu baʼsɨ nɨ̀ woyn ateyn a ŋweyn asɨ, wu toŋtɨ àŋena ɨ baʼnɨ àŋena. A nà n-ghɨ tì ma Jàkôb sɨ ghɨ ma wù dvɨyn meyn nà bu fì faytɨ̂ yeyn wi ɨlwêʼ. ¹¹Isìlæ̀ ɨ bè sɨ̂ Josèf na, “Mɨ n-bu læ nà kya na mà læ̀ fî yeyn và, Fɨyini fɨ nî, ma yeyn và fì yèyn nô woyn ghya.” ¹²Josèf ɨ kæ làysɨ woyn ŋweyn sɨ a ɨbzɨ̀ nɨ̀ bò ŋweyn, ɨ nguʼtɨ a ŋweyn asɨ, ɨ chfɨŋsɨ àtu a ŋweyn a nse. ¹³Wu n-ni tî ɨ gùbtɨ̀ ɨ baʼsɨ nɨ̀ àŋena asɨ nɨ̀ bò ŋweyn ɨ ghal Eflèm nɨ̀ ɨ̀kœ ɨtwo ɨ lèm abàs ɨkœ nɨ̂nkœ̀ nɨ̀ Isìlæ̀ ɨ ghal Mànasè nɨ̀ ɨ̀kœ nɨ̂nkœ̀ ɨ lèm abàs ɨkœ ɨ two nɨ̀ bò ŋweyn. ¹⁴Mɨtì Jàkôb ɨ nàysɨ̀ àwu ɨkœ ɨ two nɨ̀ ŋweyn ɨ lèm atu nɨ̀ Eflèm nô mɨ ta a nà n-ghɨ wayn ɨ̀twelâ ɨ kwo lì àwu ɨkœ nɨ̂nkœ̀ ɨ lèm atu nɨ̀ Mànasè a kwo ghɨ wâyn ɨ̀lwema.

¹⁵Wu n-lèm tî ɨ boysɨ Josèf ɨ bè na,

“Mɨ n-jêm na Fɨyini fìfɨ̀ a ghɨ̀bo ghem

ɨ Abɨ̀làhâm nɨ̀ Yisàk nɨn læ nà koʼsɨ,

ɨ Fɨyini fìfɨ̀ a fɨ tòʼnɨ̀ nɨ̀ mà

sɨ koʼ sɨ chem layn,

¹⁶ɨ nchì zɨ̀ a yì bœ̀sɨ̀ ma sɨ a ngeʼsɨ kɨ sɨ̀ jɨ̀m.

Mɨ n-jêm na Fɨ boysɨ woyn ghèyn.

Mɨ n-jêm na ghɨ læ̂ nà jâŋ àŋena nɨ̀ ɨzɨyn ì yemi,

nɨ̀ ìzɨyn i ghɨ̂bo ghem ɨ Abɨ̀làhâm ŋêyn Yisàk,

na àŋena bzɨ ɨ̀ dvɨ̀

yam ndù a mbzɨ.”

¹⁷Josèf ɨ yeyn ta bò ŋweyn lèm awu ɨkœ ɨ two atu nɨ̀ Eflèm ɨ nà kôŋ wì ɨ ghal awu a bò ŋweyn sɨ chwòsɨ̀ sɨ lèm atu nɨ̀ Mànasè. ¹⁸Josèf nɨ̂n ghal tî ɨ bè sɨ̂ bò ŋweyn na, “Ɨ̀ngaŋ a bà, ɨwêyn nɨ̀n ghɨ wayn ɨlwema, lèm awu ɨkœ ɨ two nɨ̀ và a ŋweyn atu.” ¹⁹Mɨtì bò ŋweyn ɨ tuynsɨ ɨ bè na, “Mɨ n-kya ìwo zɨ̀ a mɨ n-nî a wâyn wom. Wù læ̀ bzɨ̂ kɨmɨ woyn sɨ idvɨ̀ a àŋena lema koʼ sɨ ilaʼ i to i. Nô mɨ ta woyn wâynà ŋweyn læ̀ nà dvɨ chwo ɨ ghɨ ŋweyn, fì kòʼ sɨ a tɨlaʼ.” ²⁰Wu n-taŋi achi nâ ghè tì ɨ boysɨ àŋena bè na,

“Wùl ɨ̀ Isìlæ̀ læ̀ nà se sɨ boysɨ wul, wu jèm ɨ bè na:

‘Mɨ n-jêm na Fɨyini fɨ boysɨ vâ kɨ̀ ta Fɨ n-læ boysɨ Eflèm ŋêyn Mànasè.’ ”

Wu n-bè tî ɨ chwòsɨ̀ Eflèm asɨ nɨ̀ Mànasè.

²¹Jàkôb nɨn læ taŋi tî ɨ bè sɨ̂ Josèf na, “Ɨlvɨ̂ wom tɨmsɨ meyn. Fɨyini fɨ na ghɨ zɨ̂ àŋena amoʼ, læ̀ kàsi lì kfa nɨ̀ zɨ ilaʼ nɨ̀ ghɨ̀bo ghi. ²²Mɨ n-fu kfeynsɨ̂ àlêʼ a nse a juŋà kì sɨ̂ và a mɨ n-læ fsɨ sɨ̂ ghelɨ Amò a Shekèm bòm ta wà n-ghɨ atu sɨ̂ woynà ghya. Mɨ n-læ nù ɨ fsɨ sɨ̂ ghelɨ Amò kɨ̀ nô nɨ̀ fɨ̀nyuè femfɨ nɨ̀ fɨ̀nchya fɨ.”