Genesis 47

Josèf ɨ dyèyn woynà ŋweyn sɨ̂ Fòyn

¹Josèf nɨn læ meyn ndu bè sɨ̂ fòyn na, “Bò wom ŋêyn woynà ghem lu meyn a Kenàn ɨ̀ gvi afêyn. Àŋena gvi meyn nɨ̀ nyamsɨ àŋenasɨ nɨ̀ ɨfwo vzɨ̀ a àŋena tî nà kelɨ a Kenàn nô ɨ̀ jɨ̀m. Àŋena nɨn ghɨ a Goshèn lvɨ̂yn.” ²Wu nà n-ghɨ ma wù choʼtɨ meyn woynà ŋweyn ghɨ̀ tâyn ɨ ndù nɨ̀ àŋena sɨ dyeyn sɨ̂ fòyn. ³Fòyn ɨ bɨf sɨ̂ woynà ŋweyn nâ ghì na, “Atu a ifèl nɨ̀ zɨ̀-a nɨn ghɨ ghà?”

“Àŋena ɨ bè sɨ̂ ŋweyn na, Ghès nɨn mâʼ nyamsɨ kɨ̀ ta ghɨ̀bo ghes nɨn læ nà mâʼ a mbæ̀.” ⁴Àŋena nɨn be meyn kɨmɨ sɨ̂ ŋweyn na, “Ghèsɨ̀ gvì sɨ chitɨ afêyn bòm ta jèŋ nɨn ghɨ a Kenàn bema, nô ɨ̀nfùʼ ɨ bu ghɨ wi na nyam seysɨ na yɨ-a. Ghès nɨn chwotɨ̂ na wà visi ghes ɨ ghelɨ ghɨ felɨnɨ nɨ̀ và na chî a Goshèn.” ⁵Fòyn ɨ bè sɨ̂ Josèf na, “Bò vâ ŋêyn woynà ghya gvi meyn sɨ yeyn vâ. ⁶Ilaʼi Ijìb ì jɨ̀m ì nɨn kelɨ kɨ và. Wà kôŋ nô mɨ àlêʼ à kà wa lèm àŋena ateyn. Bè na àŋena ndu nà chî a Goshèn. Ghɨli na ghɨ a àŋena antêynɨ̀ faytɨ̂ kya sɨ kini nyamsɨ, wa lèm àŋena na tôʼnɨ̀ nɨ̀ nyâm semsɨ.”

⁷Fòyn nɨn tàŋi tî, Josèf ɨ ndu li gvì nɨ̀ bò ŋweyn ɨ dyèyn sɨ̂ ŋweyn. Jàkôb ɨ beyn fòyn. ⁸Fòyn ɨ bɨf sɨ̂ ŋweyn na, “Wà n-ghɨ bèŋsɨ̀ sèʼa?” ⁹Jàkôb ɨ bè sɨ̂ ŋweyn na, “Bèŋ semsɨ a nse afêyn nɨn ghɨ ɨvɨ nɨ̀ bèŋsɨ̀ mɨ̀vɨm ɨ̀n tal, ma jelɨ̀ chwô kɨ iyvɨ. Ma bû chi chèm mɨ ta ghɨ̀bo ghem, mɨtì ma ma yeyn meyn ngeʼ nô sɨ a ŋaŋ.” ¹⁰Wu n-taŋi tî ɨ toŋtɨ fòyn nô mɨ ɨlvɨ gha, ɨ fvɨ lù.

¹¹À ti ta Josèf nɨn læ nì bò ŋweyn ŋêyn woynà ŋweyn ɨ faŋ a Ijìb. Wu n-læ meyn lèm àŋena kɨ̀ nô alèʼ a nse a juŋà ɨ fu ɨfwo sɨ̂ àŋena abàs a Lamesès kɨ̀ ta fòyn Ijìb bè. ¹²Josèf nɨn læ meyn nà yɨsɨ̂ kɨmɨ bò ŋweyn ŋêyn woynà ŋweyn fî yɨsɨ ghelɨ bò ŋweyn kɨ ghɨ̀ jɨ̀m. Wu nà n-fu nô mɨ ɨ̀fwo ɨ yɨnɨ sɨ̂ ndà kɨ̀ ta akôyn a woyn ŋweyna nɨn ghɨ.

Josèf ɨ saʼ Ijìb ta jèŋ ku

¹³Ɨfwo ɨ yɨnɨ nɨn læ meyn mæ̀ abàs nâ ghè nô ɨ̀ jɨ̀m bòm ta jeŋ ateyn nà n-bem nô abɨ. Ghelɨ Ijìb nɨ̀ ghelɨ Kenàn ɨ nà bu fì kelɨ wi nô ŋaŋ sakos. ¹⁴Josèf nɨn læ meyn fsɨtɨ mèsì mɨ̀kwo mɨ̀ ghelɨ Ijìb nɨ̀ ghelɨ Kenàn nô ɨ̀n jɨ̀m, kɨ̀ a ɨfwo ɨ yɨnɨ ta àŋena nɨn yuyn a ijìb ɨ ndù nɨ̀ ɨ̀ŋweyn sɨ̂ fòyn a ntoʼ. ¹⁵A nà ghɨ ta ɨkwo ghelɨ Ijìb nɨ̀ ghelɨ Kenàn mæ̀, ghelɨ Ijìb ɨ ndu bè sɨ̂ Josèf na, “Ghès kàʼ ghɨ bû nà kfɨ ndù nɨ̀ jèŋ a wa asɨ tèyn wa ki kɨ ki. Fu ɨfwo ɨ yɨnɨ sɨ̂ ghès, ɨkwo wesɨ mæ meyn.”

¹⁶“Josèf ɨ bè sɨ̂ àŋena na, ɨkwo ɨ̀ vzɨ na ghɨ ma wu mæ meyn, yi nà gvî fu nyamsɨ sɨ̂ mà, ma fu ɨ̀fwo ɨ yɨnɨ sɨ̂ zɨ̀.” ¹⁷Ta wù bè tî, àŋena ɨ nà sɨ gvì nɨ̀ nyamsɨ mbòloʼsɨ nɨ̀ nyamsɨ kfaŋsɨ nɨ̀ bzɨsɨ, nɨ̀ njàkâysɨ̀ fu sɨ̂ Josèf wu fu ɨ̀fwo ɨ yɨnɨ sɨ̂ àŋena. Josèf nɨn læ meyn fsɨtɨ mèsì nyamsɨ àŋena nô sɨ̀ jɨ̀m a bêŋ nâ ghè kɨ̀ sɨ ɨfwo ɨ yɨnɨ.

¹⁸A nà ghɨ ta bèŋ nâ zɨ̀ chwò, àŋena gvi bè sɨ̂ Josèf na, “Ghès nɨn lèytɨ̀ wì sɨ̂ và a bô, ɨkwo ɨ̀ wes ɨ mæ meyn, nyam seysɨ fî mæ̀, à lùtɨ ɨ̀ faŋ kɨ ghes têyn nɨ̀ gvêyn seysɨ. ¹⁹A ti bè na ghès nɨn kfɨtɨ̂ mesì kɨ nô tèyn ɨ̀ vìsi gvêyn seysɨ wa ki kɨ ki? Lì ghes ɨ baʼsɨ kɨ nɨ̀ gvêyn seysɨ ɨ fu ɨfwo ɨ yɨnɨ sɨ̂ ghès. Fu ngœ̀ sɨ̂ ghès bu tì a gvêyn seysɨ kasi nà ghɨ ta nse ìyum, a ghèsɨ̀ kfɨtɨ.”

²⁰Ta àŋena tàŋi tî, Josèf ɨ yuyn gveynsɨ nô sɨ̀ jɨ̀m a Ijìb a nà sɨ kelɨ kɨ fòyn. Ghelɨ Ijìb nô ghɨ̀ jɨ̀m nɨn læ meyn beyʼlɨ gveynsɨ àŋena bòm ta jèŋ ateyn nɨn læ nà bema. ²¹Josèf nɨn n-læ yuyn tî ɨ nì nô ghelɨ ghɨ̀ jɨ̀m a Ijìb ɨ kasi kɨ ɨkôs sɨ̂ fòyn. ²²Gveyn sìsɨ̀ a Josèf nɨn læ faŋ tɨ̀ yuyn nà n-ghɨ gveynsɨ ngàŋsɨ ndo mɨyini mɨ̀ Ijìb bòm ta fòyn nà n-fu ɨ̀fwo ɨ yɨnɨ sɨ̂ àŋena kɨ̀ mɨlvɨ ɨ̀n jɨ̀m. À ti iwo zɨ̀ a àŋena nɨn bu læ beyʼlɨ gveynsɨ àŋena. ²³Josèf nɨ̀n be meyn sɨ̂ ghelɨ ateyn na, “Lvɨ̂yn ta mà yuyn meyn zɨ̀ bàʼsɨ kɨ nɨ̀ gvêyn sisɨ à na sɨ kelɨ fòyn, yì li læ̂ ngœ̀ yèyn ɨ̀ tòʼ gveynsɨ ateyn. ²⁴Mɨtì yì na tòʼ ɨ̀fwo ɨ yɨnɨ ateyn ɨ̀ læ̀ kfì, yi gwòtɨ̀ ɨlwêʼ ɨ̀ twâyn ɨ fu alêʼ àmòʼ sɨ̂ fòyn. Yi fu, yi lì ɨ̀lwêʼ ɨ̀ kfæ̀ ɨ lèm ɨlvɨ sɨ a ngœ̀ ɨ lèm ɨlvɨ sɨ ɨfwo ɨ yɨnɨ zɨ̂ ghelɨ̀ ghi na yɨ-a.” ²⁵Àŋena ɨ bè sɨ̂ Josèf na, “Wà bœsɨ meyn kɨ̀ nô ghès ɨ̀ dyèyn kɨ̀ nô àtem a juŋà sɨ̂ ghès a bôbo. Ghesɨ̀ na ghɨ ɨ̀kôs sɨ̂ fòyn.” ²⁶Josèf ɨ lèm sɨ isaʼ a Ijìb yi faŋ kɨ faŋ sɨ koʼ sɨ chem layn na nô mɨ ndà na kfì ɨ̀fwo ɨ yɨnɨ a ŋweyn a gvêyn, wu gwòtɨ̀ ɨlwêʼ ɨ̀ twâyn ɨ fu alêʼ àmòʼ sɨ̂ fòyn. A bu kɨ gveynsɨ ngàŋsɨ ndô mɨyini ta fòyn nà n-kelɨ wi iwo ateyn. ²⁷A nà n-ghɨ tì ma ghelɨ Isìlæ̀ baʼlɨ meyn a Ijìb abàs a Goshèn. Àŋena nɨn læ meyn bzɨ woyn kɨ̀ sɨ idvɨ̀, ɨ keli gveynsɨ nɨ̀ ɨ̀fwo kɨ̀ sɨ idvɨ̀. ²⁸Jàkôb nɨn læ chi bèŋ njvàsɨ̀ nsòmbo a Ijìb. Wu n-læ chɨ̀yntɨ chi bèŋ ɨvɨ nɨ̀ bèŋsɨ̀ mɨ̀vɨm ɨ̀n kæ̀ njvàsɨ̀ nsòmbo ɨ kfɨ. ²⁹A nà ghɨ ta Jàkôb yeyn na ɨlvɨ ikfɨ nɨ̀ ŋweyn bàʼsɨ meyn, wu jàŋ wâyn ŋweyn Josèf ɨ bè sɨ̂ ŋweyn na, “Wà na kòŋ kɨ nô mà samoʼ, wa lèm àwu à kya a mɨ ɨbzɨ̀ ɨ chfɨ̀nɨ̀ na wa n-yvɨnɨ mà ɨ̀ nì kɨ iwo zɨ̀ a mà bè. Ka wa n-læ̀ gvɨ̀mì mà a Ijìb. ³⁰Ma læ̂ kfɨ wa ndu gvìmì mà a Kenàn, alèʼ ghè a ghɨ n-læ gvɨ̀mi ghɨ̀bo ghem ateyn.” Josèf ɨ bè sɨ̂ ŋweyn na, “Mà læ̀ ni kɨ ìwo zɨ̀ a wà bè.” ³¹Jàkôb ɨ bè sɨ̂ Josèf na, “Ghesɨ̀và yɨ mɨkâyn na wà læ̀ ni kɨ ta mà bè.” Josèf ɨ yɨ mɨkâyn mɨ̀ ateyn. Wu bèynsɨ̀ ɨ̀wuyn ɨ yeʼtɨ ndù ɨkuyn ɨ fu àyòŋnɨ̀ sɨ̂ Fɨyini fɨ.