Genesis 6

Ghelɨ nà sɨ nî kɨ àwo a bɨ-a

¹Ghelɨ nɨn læ meyn zɨ̀tɨ̀ ɨ nà sɨ dvɨ̂tɨ̀ gvi-à gwôsɨ̀ ndû kɨ tɨghaŋ tɨ mbzɨ tɨ̀ jɨ̀m fî bzɨ̂ kfeynsɨ̂ kɨmɨ woyn ghɨ̂kì. ²Woyn Fɨyini ɨ yeyn woyn ghɨ̂kì nâ ghì nô mɨ ta à bzɨ ghelɨ tî ghɨ joblɨ̀-à ɨ zɨ̀tɨ̀ ɨ nà sɨ lî ghɨli sɨ àŋena ghɨ̂kì. ³Bôbo Fɨyini ɨ yeyn tî ɨ kæ bè na, “Ayvɨs kì a mà fù sɨ̂ ghelɨ sɨ nì na àŋena na chi-à nɨn faŋ wi kɨ faŋ sɨ̂ ghelɨ bòm ta àŋena nɨn ghɨ kɨ ghelɨ, wùl sɨ ateyn læ̀ nà bu fì chî chwô wì bèŋ ɨvɨ nɨ̀ bèŋsɨ̀ mɨ̀vɨm ɨ̀m bò a mbzɨ.”

⁴À nà ghɨ ɨtuʼ nâ ghè sɨ koʼ sɨ ndù asɨ, ìnto i woyn Fɨyini ghɨ li ɨ ghɨ a mbzɨ, a ghɨ woyn ghì a woyn Fɨyini nɨn læ bzɨ ŋêyn ghɨ̀kì ghî a à nà n-ghɨ ghelɨ tî. Àŋena nà n-kelɨ àdyaʼ kɨ bema ghɨ kya àŋena kɨ̀ ɨlwê ɨ̀ jɨ̀m.

⁵Bôbo Fɨyini ɨ yeyn na ghelɨ nɨn kelɨ chwòsɨ̀ mɨ̀tem ɨ̀ mbɨ̂, lum duʼa baʼtɨ̂ kɨ sɨ nì ɨ mbɨ, a dvɨ̂ kɨ àwo a bɨ-a a àŋena ikfàʼtɨ̀. ⁶Bôbo Fɨyini ɨ nà sɨ kumî ɨ̀wuyn na yì tî faytɨ nô sɨ nì gha nɨ̀ wùl a. Iwo ateyn i ɨ nà sɨ fu ngeʼ sɨ̂ ŋweyn nô sɨ a ŋaŋ. ⁷Bôbo Fɨyini ɨ kæ bè na mɨ n-chyeʼsɨ̂ kɨ nô chyeʼsɨ ghelɨ nâ ghèyn a mà tî fàytɨ têyn sɨ atu nse. Mɨ n-chyeʼsɨ̂ àŋena bàʼsɨ kɨmɨ nɨ̀ nyamsɨ, nɨ̀ mɨ̀nyûyn, nô mɨ nɨ̀ àfo a li-a à kà ta kɨ n-jelɨ̀ atu nse. Mɨ n-kumî ɨ̀wuyn ta mà tî fàytɨ ɨfwo nâ wèyn. ⁸Bôbo Fɨyini nà taŋî nô mɨ tì, ki Nuwà wu bu ghɨ kɨ a jûŋ.

Ànkuŋa ɨ gvì ɨtuʼ nɨ̀ Nuwà

⁹Iyeynì nɨn ghɨ ìwo zɨ̀ a yi n-læ gàyn sɨ̂ Nuwà ŋêyn ìsas i ndo nɨ̀ ŋweyni, ghɨ nyàʼ lèm. Nuwà nɨn læ nà ghɨ kɨ nô wul àtì-ati asɨ nɨ̀ Fɨyini fɨ. A lutɨ̂ ghɨ kɨ ŋweyn ɨtuʼ nâ ghè a wù nà kelɨ wi njas, lutɨ̂ sɨ̂ jelɨ̀ kɨ ta Fɨyini fɨ nɨn kɨŋ. ¹⁰Nuwà n-læ nà kelɨ woyn ghɨ lûmnɨ̀ ghɨ̀ tal a ghɨ Shêm nɨ̀ Hâm nɨ̀ Jafèt.

¹¹Fɨyini fɨ ɨ yeyn ta ghelɨ sɨ chî kɨ nchînɨ̀ sɨ bɨsɨ tî a dvɨ̂ kɨ ìnû, ¹²ɨ fi yeyn ta mbzɨ befɨ mèsì, nô mɨ ndà ɨ nà sɨ chî kɨ nchînɨ̀ ìkòŋ nɨ̀ ŋweyn, ¹³wu kæ bè sɨ Nuwà na, “Mɨ mèsì ghelɨ ghèyn a nse afêyn nô ghɨ̀ jɨ̀m bòm ta àŋena sɨ chî kɨ i nù. Mɨ n-bebsɨ̂ àŋena baʼsɨ̂ kɨ nɨ̀ nse ì jɨ̀m. ¹⁴Kini ɨnkâʼ ɨ̀n jùŋ ɨ bayn abaŋ ateyn ɨ teyntɨ àntêynɨ̀ ateyn kɨ̀ ɨlwèʼ ɨlwèʼ. Wà bayn mèsì wa lèytɨ̀ àntêynɨ̀ ateyn nɨ̀ jɨm àteyn nɨ̀ àle a ka mu na zɨ̂ ateyn. ¹⁵Faytɨ yvɨtɨ dzɨ zɨ̀ a ka wà bayn abaŋ nâ kì ateyn, kɨ n-kelɨ sɨ nà dyêf chem ntàmsɨ̀ mɨ̀vɨm ɨ̀n tal njvàsɨ̀ tâyn, ghaʼ chem ntàmsɨ̀ mɨ̀vɨm ɨ̀ bò njvàsɨ̀ bò, sœ̂ chem ntàmsɨ̀ njvàsɨ̀ tal. ¹⁶Wà bayn àbaŋ ateyn wa màʼ tɨ̀kaŋ tɨ̀ tal ɨ fu ayemi kɨ chem àbeʼ a ntàm, ɨ yva. Wà nî wa lèm ɨ̀chfɨ̂ ɨwùyn ateyn. ¹⁷Mɨ n-tum ànkuŋ a nse a kɨ bebsɨ nô mɨ ghà ta kɨ n-zuêsɨ̀. Mɨ n-bebsɨ̂ nô ɨ̀fwo ɨ̀ jɨ̀m a nse afêyn. ¹⁸Mɨtì ghesɨ̀và nɨn yɨ mɨ̀kâyn a wà zɨ abaŋ nâ ghè zɨ̂ wi vâ nɨ̀ woyn ghya nɨ̀ ghɨ̀ki àŋena ɨ̀ leʼ ànkuŋ ateyn. ¹⁹Wà se sɨ zɨ wa lì ɨ̀fwo i zuesɨnɨ kɨ tɨ̀nkì tɨ̀ jɨ̀m, a ki-a nɨ a lûmnɨ̀-à, ta ka ngœ̀sɨ̀ ateynsɨ faŋ sɨ̂ và. ²⁰Wa n-lì tɨ̀nkì tɨ mɨ̂nyùyn, ɨ̀ lì tɨ̀nkì tɨ nyâmsɨ̀ kɨ tɨ̀ jɨ̀m nɨ̀ ngœ̀sɨ tɨ̂nkì tɨ ɨfwo ɨlvɨ vzɨ̀ a wu n-jelɨ̀ atu nse nô ɨ̀ jɨ̀m. Lî nô mɨ ghà kɨ ɨbwo-ɨ̀bwò ta ka wu faŋ tɨ kfɨ̀tɨ. ²¹Li kɨmɨ ɨ̀fwo ɨ yɨnɨ kɨ tɨ̀nkì tɨ̀ jɨ̀m ɨ zɨ nɨ̀ ɨ̀ŋweyn zɨ̂ ghelɨ̀ gha nɨ̀ ɨ̀fwo wèyn na yɨ-a.”

²²Nuwà nɨn læ meyn nì nô àwo à jɨ̀m kɨ̀ ighel ta Fɨyini fɨ bè sɨ̂ ŋweyn.