Isaiah 10

Ghɨ læ̀ saʼ ghelɨ awo a bɨ-a

¹Ngeʼ læ̀ nà ghɨ sɨ̂ ghelɨ ghì a ghɨ n-fu tɨsaʼ sɨ̂ ghelɨ tɨ ghɨ wi àtì-ati, ghɨ kɨmɨ sɨ̂ ghelɨ ghì a ghɨ n-fu tɨsaʼ tɨ yeʼtɨ̂ yèʼtɨ ghelɨ.

²Àŋena nɨn nî tèyn sɨ nà saʼ yeʼtɨ ghelɨ ànfɨf, saʼ fyeʼtɨ̂ nsaʼsɨ ghelɨ ghɨ jɨŋnɨ ghì a ghɨ n-ghɨ a àŋena antêynɨ̀. Àŋena nɨn kɨŋ sɨ nà tôʼnɨ̀ wi nɨ̀ ghɨ̀ki nkfɨ, tôʼnɨ̀ wì nɨ̀ woyn nkfɨ ghì a ghɨ n-ghɨ antêynɨ̀ nɨ̀ àŋena.

³Yì læ̀ nî nô ghà ɨlvɨ ta Bôbo Fɨyini gvì sɨ saʼ zɨ a? Yì læ̀ leʼ ndù wo ɨlvɨ ta tɨlaʼ tɨ lù a ndyèyn gvì fù ngeʼ sɨ̂ zɨ̀ a? Yì læ̀ dzɨ̂ sɨ̂ ndà na wù gamtɨ zɨ a? Yì læ̀ lêm wo ighaʼ ì zɨ-i a?

⁴Ghɨ læ̀ faŋ tɨ zue zɨ a ghɨ ghaytɨ ndù nɨ̀ zɨ̀ sɨ a ghelɨ ndô nchaʼ. Nô àfo a læ̀ faŋ wi a yi ilaʼ. Yi læ̀ gâyn nô mɨ tì a Bôbo Fɨyini na bu nyôʼsɨ̀ kɨ ɨ̀toŋ sɨ̂ àŋena, gvɨ̂tɨ̀ kɨ sɨ fì sɨ fu ngeʼ sɨ̂ àŋena.

Fɨyini fɨ nɨn saʼ ghelɨ Asilìyà

⁵Bôbo Fɨyini bê meyn na, “Ngeʼ nɨn ghɨ sɨ̂ ghelɨ Asilìyà, àŋena tî nà ghɨ ta ngàlì zɨ̀ a mɨ n-leŋ ghelɨ̀ ghem ateyn ta mà nyòʼsɨ̀ ɨtoŋ sɨ̂ àŋena.

⁶Mà tî tum sugèyʼsɨ àŋena/Asilìya sɨ ndû kèʼ tɨ̀laʼ tìtɨ̀ a tɨ n-yvɨnɨ wi ma. Mà tî tum na àŋena ndu kèʼ ghelɨ ghì a ghɨ n-nî ɨtôŋ wom yafa. Ghelɨ Asilìyà nɨn tɨm yɨ àŋena lì lù nɨ̀ ɨ̀fwo àŋena sɨ a ɨfwo a ghɨ yɨ iwòŋ, fì jèylɨ̀ àŋena nɨ̀ ɨ̀vɨ kɨ̀ ta ghɨ jèylɨ̀ àchâʼlɨ̀ a dzɨsɨ tosɨ.

⁷Mɨtì fòyn Asilìyà nɨ̀n kfâʼtɨ̀/baʼtɨ̂ ìwo sɨ a nyɨŋ ta wù n-kya wi na à tum ma ŋweyn. Wù n-kfâʼtɨ̀/bâʼtɨ̂ sɨ bebsɨ tɨlaʼ kɨ̀ sɨ idvɨ̀ bê na,

⁸‘Ɨtu sugèyʼsɨ̀ nɨ̀ mà nô ɨ̀ jɨ̀m nɨn ghɨ kɨ tɨ̀fôyn.

⁹Ghesɨ tɨm meyn yɨ ntèʼ Kalnò kɨ̀ ighel ta ghɨ tî tɨm yɨ ntèʼ Kakemìsh, tɨm yɨ ghelɨ ntèʼ Hamàt kɨ̀ ta ghɨ tî tɨm yɨ ntèʼ Albàd, ɨ̀ tɨm yɨ ghelɨ ntèʼ Sàmalìyà kɨ̀ ta ghɨ tɨm yɨ Dàmaskùs.

¹⁰Ma tɨm meyn yɨ tɨlaʼ tɨ koʼsɨ̂ mɨyini. Mɨyini mɨ̀ tɨ̀laʼ nâ mzɨ̀ ɨ to chwô/kelɨ àdyàʼ chwô mɨyini mɨ̀ Jèlusalèm nɨ̀ ɨmzɨ̂ Sàmalìyà.

¹¹Mɨ n-tɨm yɨ ntèʼ Jèlusalèm nɨ̀ mɨyini mzɨ̀ a àŋena nɨn koʼsɨ kɨ̀ ighel ta mà tî tɨm yɨ Sàmalìyà baʼsɨ̂ nɨ̀ mɨyini mɨ̀ àŋena.’”

¹²(Bôbo Fɨyini bè na,) “À læ̀ nà ghɨ ta Bôbo Fɨyini fu mèsi ngeʼ sɨ̂ ghelɨ a kfɨ̂yn Zayòn nɨ̀ ghelɨ Jèlusalèm, a mà kasi fù ngeʼ sɨ̂ fòyn Asilìyà bòm ta wù n-ghaŋsɨ̂ ɨ̀wuyn lêm na yi n-kelɨ àdyaʼ chwô nô mɨ ndà/chwô ghelɨ ghɨ li. ¹³Fòyn Asilìyà nɨ̀ ghaŋsɨ̂ ɨ̀wuyn bè na,

“‘Mà tɨ yɨ̀ tɨlaʼ nâ tèyntɨ̀/nì àwo nâ kèynà bòm ta mɨ n-kelɨ adyaʼ, tofa fî faytɨ̂ kya àwo nò a jûŋ. Ma tɨm meyn yɨ tɨlaʼ, ɨ̀ lì tɨ̀laʼ tɨ àŋena, ɨ̀ lì ɨ̀fwo ɨlwèʼ ghè a àŋena nɨn lêm ɨfwo ateyn. Ma wumsɨ/tɨm meyn yɨ tɨfôyn tɨ àŋena ta fòyn vzɨ̀ a wù n-kelɨ a wu kelɨ àdyaʼ.

¹⁴Ma fsɨ/li meyn ìghaʼ i àŋena kɨ̀ ta wùl ɨ̀ nî wu lì àfo a ndô fɨ̀nyùyn. Ma yvɨŋtɨ meyn tɨ̀laʼ tɨ àŋena kɨ̀ ta wul/bò gvèyn nî wu yvɨ̀ŋtɨ̀ àwum a ŋweyn a gvêyn, nô fɨ̀nyuyn fɨ̀mòʼ fɨ lâysɨ̀ wì tɨwô, nô fɨ̀mòʼfɨ dzɨ̂ wì.

¹⁵Bôbo Fɨyini nɨn bê na, “A njàm tî kàʼ a yì na bê na à nsayn ɨ̀nyeyn fɨkâʼ a ghɨ wi wul ɨ vzɨ̀ a wù n-lâysɨ njàm àteyn a? Afo kì a ghɨ nteyntɨ ɨnkâ ateyn kàʼ kɨ bû nà bê na kɨ n-koʼnɨ̂ chwô wul ɨ vzɨ̀ a wù n-teyntɨ ɨnkâʼ nɨ̀ ankeyna. Mbàŋ àkas kàʼ yì bû nà bê na à n-leŋ/kfɨ̂yn ɨ̀nyeyn afu bula wùl ɨ̀ ghalɨ mbàŋ àteyn, ma mbàŋ zɨ̀ a ghɨ faytɨ nɨ̀ fɨ̀kâʼ fɨ̀ kàʼ yì bû làlì sɨ a nse a bu kɨ na à làysɨ̀ wul ɨ vzɨ̀ a wù n-nyam mbàŋ àteyn.

¹⁶À ti iwo zɨ̀ a Bôbo Fɨyini ɨ bò ɨ̀dwaʼ ɨ̀ jɨ̀m nɨn tum/visi tɨkoʼi a tɨ ku sugèyʼ sɨ tosɨ nɨ̀ fòyn Asilìya (a àŋena na yum ndù kɨ ndu). Mà læ̀ bebsɨ̂ nô mɨ ghà ta kɨ n-nî fòyn Asilìyà ŋêyn sugèyʼsɨ ŋweynsɨ ɨ ghaŋsɨ̂ ɨ̀wuyn kɨ̀ ta mà nyoʼ àŋena nô ghɨ̀ jɨ̀m ɨvɨ̀s, ta wu bali koʼ.

¹⁷Bôbo Fɨyini, ibayn i ghelɨ Isìlæ̀ læ̀ gvî ta ɨvɨs sɨ fu ngeʼ sɨ̂ àŋena. Fɨyini fɨ laynɨfɨ nɨ̀ ghelɨ Isìlæ̀ læ̀ nà ghɨ ta ilwmi ɨvɨ̀s. Wù læ̀ bebsɨ̂ ɨ̀fwô ghelɨ Asilìyà kɨ̀ achi àmòʼ kɨ̀ ta ghɨ nî ghɨ nyòʼ ɨ̀twaʼ sùnjoŋnjoŋsɨ baʼsɨ̂ nɨ̀ àmbyèyn akù a.

¹⁸Bôbo Fɨyini nɨn/læ̀ bebsɨ̂ mɨ̀ku ɨ̀n jùŋ nɨ̀ àŋena baʼsɨ̂ nɨ̀ gveyn sɨ jûŋsɨ̀ nɨ̀ àŋena sìsɨ̀ a ɨfwo ɨ yɨnɨ nɨn koʼ ateyn nô sɨ̀ jɨ̀m kɨ ighel ta ikoʼi nî yi ku wul wu yum ghɨ nà yeyn ɨ̀vɨf a ŋweyn ɨwùyn.

¹⁹Ɨ̀nkâʼ (mzɨ̀ a ka mɨ̀) læ̂ faŋ akù a juŋà nɨ̀ ŋweyn nâ ghè (na) læ̂ kɨ tèyn ma nô mɨ wayndà ɨtwelâ kàʼ a wù taŋ.

Ghelɨ Isìlæ̀ ghì a ghɨ læ̀ faŋ/ghì a ghɨ læ̀ kasi kfa a Isìlæ̀

²⁰À læ̀ nà ghɨ ɨtuʼ nâ ghè, ghelɨ ɨ ghɨ ma ghɨ faŋ kɨ̀ sɨ a ilæ ta ghɨ faŋ a Isìlæ̀. Woyn Jàkôb ghì a ghɨ faŋ tɨ̀ kfɨ̀tɨ læ̀ nà bu yeʼtɨ̂ wì ɨwuyn nɨ̀ fòyn Asilìyà vzɨ̀ a wù tî nà fu ngeʼ sɨ̂ àŋena. Mɨtì àŋena læ̀ nà yeʼtɨ̂ kɨ ɨwuyn nɨ̀ Bôbo Fɨyini ɨ Fɨyini fɨ laynɨ fɨ nɨ̀ ghelɨ Isìlæ̀ na wù gamtɨ àŋena.

²¹Ghelɨ Isìlæ̀ ghì (a ghɨ faŋ tɨ̀ kfɨ) a ghɨ n-bu chi læ̀ kasî kfâ. Woyn Jàkôb ghì a ghɨ faŋ læ̀ kasî bêynsɨ̀ mɨ̀tem mɨ̀ àŋena nà koʼsɨ̂ Bôbo Fɨyini ɨ Fɨyini fɨ ngaŋtɨnɨfɨ nɨ̀ ghelɨ Isìlæ̀.

²²Nô mɨ ta ghelɨ̀ ghya nɨn dvɨ̂ a ghelɨ Isìlæ̀ kɨ̀ ta asese a mbæ̀ jvà, à læ̀ kasî kfâ kɨ àsɨ a ghêl sɨ ilæ. Bôbo Fɨyini sɨ ghɨ ma wù choʼnɨ meyn sɨ bebsɨ ghelɨ ghɨ laynɨ nɨ̀ ŋweyn.

²³Bôbo Fɨyini ɨ Bò Ɨ̀dwaʼ ɨ̀ jɨ̀m læ̀ bebsɨ̂ mesì ghelɨ ŋweyn kɨ̀ ighel ta wù sɨ ghɨ ma wù choʼnɨ meyn. Wù nì bebsɨ̂ ìlaʼ ateyn kɨ ì jɨ̀m.

²⁴À ti iwo zɨ̀ a Bôbo Fɨyini ɨ Bò Ɨdwaʼ ɨ̀ jɨ̀m nɨn bê na, “Ghelɨ̀ ghem ghì a ghɨ n-chi a Zayòn, ka yi n-fì fàyn ghelɨ Asilìyà, ɨ ghelɨ ghì a ghɨ tî nà leŋ zɨ nɨ̀ mbàŋ àkas, nyâblɨ̀ nɨ̀ zɨ̀ kɨ̀ ta ghelɨ Ijìb nɨ̀n læ nì.

²⁵Ɨlvɨ sɨ baʼsɨ̂/kfeyna ta ka mà faŋ tɨ̀ fì tɨ̀ nyòʼsɨ̀ ɨtoŋ sɨ̂ zɨ̀. Mɨtì mɨ n-kwo nyôʼsɨ̀ ɨ̀toŋ sɨ̂ ghelɨ Isìlæ̀ nô sɨ a ŋaŋ ɨ̀ bèbsɨ àŋena.”

²⁶Bôbo Fɨyini ɨ bò ɨ̀dwaʼ ɨ̀ jɨ̀m læ̀ leŋ àŋena nɨ̀ nkuna/ngvàlì ŋweyn kɨ̀ ta wù n-læ nì sɨ̂ ghelɨ Midìyà a kfɨyn Olèb ɨtuʼ ta Gidìyòn tɨm yɨ àŋena. Wu n-lâysɨ̀ mbàŋ ì nyamnɨ nɨ̀ ŋweyn atû mù kɨ̀ ta wù n-læ nì a Ijìb.

²⁷Ɨlvɨ ateyn læ̀ kfeyna a mà fsɨ zɨ sɨ ɨwu nɨ̀ ghelɨ Asilìyà. Mà læ̀ ni-à a adɨli a àŋena na bu ghɨ wi ta abeyʼi a yi awom/mbèʼsɨ. Ghelɨ læ̀ kôytɨ̀ ɨ̀mbuŋì ateyn bòm ta yi læ̀ nà ghɨ ma yi ghaʼlɨ meyn nò sɨ a ŋaŋ.

²⁸Sugèyʼsɨ Àsilìyàsɨ tɨm meyn yɨ Ayàt, àŋena toynɨ chwò dzɨ a Miglòn. Àŋena lem meyn ɨ̀fwoo iwòŋ nɨ̀ àŋena a Mikmàsh.

²⁹Àŋena sɨ ghɨ ma ghɨ dyâŋ meyn àfoŋlɨ a kfɨyn gvì bɨ̀ a kfyn Gebà. Ghelɨ ntèʼ Lamà na sɨ chɨŋtɨ̂ faynà, ma ghelɨ ghì a ghɨ n-ghɨ a ntèʼ nɨ̀ fòyn Sôl a Gibìyà leʼnɨ meyn lù.

³⁰Ghelɨ ntèʼ Galìm, yì na byalɨ dzɨ-à loyn ìgâmtɨ̀. Yì faytɨ yvɨ̀tɨ a ghelɨ Làyishà. Ghelɨ Anatòt yì gamtɨ/yvɨ ghelɨ ntèʼ sɨ lisɨ.

³¹Ghelɨ ntèʼ Madmenà nɨn leʼ ndu kɨ ndu sɨ bœ̀, ghelɨ ntèʼ Gebìm ɨ kɨŋ àlèʼ sɨ lèytɨ̀ ateyn.

³²Sugèyʼ sɨ Asilìyàsɨ̀ nɨn gvì chem a Nôb layn ɨ̀ tìmi afu. Àŋena nɨn fâynsɨ̀ ghelɨ ghì a ghɨ n-chî a kfɨ̂yn Zayòn a kfɨ̂yn Jèlusalèm.

³³Yeyna, Bôbo Fɨyini ɨ Bò Ɨ̀dwaʼ ɨ̀ jɨ̀m ɨ nì zuetɨ̂ sugèyʼ sɨ tosɨ nɨ̀ ghelɨ Asilìyà nɨ̀ àdyaʼ a bemnɨ-a kì a wù n-kelɨ kɨ̀ ta ghɨ n-teyntɨ tɨfas tɨ ɨnkàʼ. Wù læ̀ wumsɨ̂ ghelɨ ghì a ghɨ n-ghaŋsɨ ɨwuyn, baʼsɨ̂ nɨ̀ ghɨli ghɨ ngaŋtɨnɨ a Asilìyà.

³⁴Bôbo Fɨyini læ̀ zuetɨ̂ àŋena antêynɨ̀ kɨ̀ ta ghɨ nì ghɨ gvèytɨ̀ ɨ̀nkâʼ ɨn to antêynɨ̀ àkù nɨ̀ njàm. Wu nì bebsɨ̂ àŋena kɨ̀ ta ghɨ nî ghɨ gvèytɨ̀ ɨ̀nkâʼ ɨ̀n jùŋ akù a Lebanòn.