Isaiah 19

Saʼgha kûm ghelɨ Ijìb

¹Ɨyêyn nɨn ghɨ saʼgha kûm ghelɨ Ijìb.

Yì yeyna, Bôbo Fɨyini nɨn nyɨŋ atû mbàʼsɨ̀ ta wù nyɨŋ a nyâm kfaŋ, wù n-nyɨŋ gvî/ndû a Ijìb. Ɨ̀nfyèʼsɨ ghelɨ Ijìb nɨn chɨŋtɨ̂ fâyn asɨ nɨ̀ ŋweyn. Ghelɨ Ijìb nɨn ghɨ ma ghɨ kfɨ meyn sayn.

²Bôbo Fɨyini bè na, “Mɨ n-nì-à a ghelɨ Ijìb na kasî nû ngeŋsɨ àŋena. Wùl na làlì kêʼ wâynà ŋweyn, wùl ɨ lalì kêʼ wul ɨ vzɨ̀ a ŋêyn ŋweyn nɨn chi baʼsɨ. Ntèʼsɨ na làlì kêʼ ntèʼ sɨ lisɨ, tɨfôyntɨ̀ ɨ lalì kêʼ tɨ̀fôyn tɨ litɨ.

³Ghelɨ Ijìb læ̀ nà (bu kelɨ wi mɨtem ɨnto sɨ nù) Mà læ̀ bebsɨ̂ nô mɨ ghà ta àŋena nɨn baʼtɨ sɨ nì. Àŋena læ̀ nà loyn ìgâmtɨ̀ sɨ̂ mɨyini mɨ̀ àŋena, fyeŋ mɨ̀nyaʼ, bɨf àwo sɨ̂ ghelɨ ghì a ghɨ n-bɨf awo sɨ̂ ghelɨ ghì a ghɨ n-bɨf awo sɨ̂ nkfɨsɨ nsesɨ, bɨf kɨmɨ àwo sɨ̂ ghelɨ ghɨ fɨyntɨnɨ.

⁴Bôbo Fɨyini ɨ Bò Ɨ̀dwaʼ ɨ̀ Jɨ̀m bè na, “Mà læ̀ ni-à a fòyn ɨ bɨ ɨ̀lvì tɨm yɨ ghelɨ Ijìb, nà fu ngeʼ sɨ̂ àŋena. Fòyn ɨ̀lvì læ̀ nà saʼ àŋena, bem kɨ tèyn.

⁵Mû læ̀ yum a jvâ Nây/ ighaʼnɨ. Jvâ Nây læ̀ yuma a nô fɨ̀lêʼnɨ̀ fɨ mu fɨ na bu ghɨ wi ateyn.

⁶Jva sìsɨ̀ a sɨ fvɨ̀ a jvâ Nâyl læ̀ nà lɨ̂m kɨ tèyn sul, a jvasɨ Ijìbsɨ̀ suʼi kàlì kɨ̀ sɨ ilæ sɨ ilæ tèyn ɨ̀ yum mèsì kɨ sɨ̀ jɨ̀m. Ɨyol vzɨ̀ a wu n-ghɨ a mbæ̀ jvà nɨ̀ ɨ̀fwo ɨlvi ta wu lèma afu læ̀ yum nô ɨ̀ jɨ̀m.

⁷Ɨ̀nfùʼ ɨ̀nyvɨtɨnɨ̂ mzɨ̀ a mɨ̀ n-gɨ a mbæ̀ jvà Nâyl baʼsɨ̂ nɨ̀ ɨ̀fwo ɨ yɨnɨ vzɨ̀ a ghɨ tòʼ a mbæ̀/ɨchfɨ jvâ afu læ̀ yum nô ɨ̀n jɨ̀m. Wu læ̀ yuma a afyefa taynsɨ (Nô ɨ̀ jɨ̀m) a alêʼ ateyna faŋ kɨ̀ ayum.

⁸Ghelɨ ghì a ghɨ n-ku sfɨsɨ a jvâ Nâyl læ̀ nà dzɨ-à. Ghelɨ ghì a ghɨ n-ku sfɨsɨ nɨ̀ mɨ̀làm nɨn ɨghî a ghɨ n-ku nɨ̀ nsaʼsɨ læ̀ nà dzɨ̂ nô sɨ a ŋaŋ bòm ta àŋena nɨn kelɨ wi iwo sɨ nà ni-à.

⁹Ghelɨ ghì a ghɨ n-kom nkfɨ̀sɨ læ̀ nà wumi-à(bòm ta ghɨ n-kelɨ wi iwo sɨ nà felà/ni-à). Ghelɨ ghì a ghɨ n-tɨm ndzɨsɨ (fɨfâsɨ̀) læ̀ nà kelɨ wi ifêl sɨ nà felà.

¹⁰Iwo ateyni læ̀ fu ngeʼ sɨ̂ ghelɨ Ijìb ghì a ghɨ n-tɨm ndzɨsɨ nô sɨ a ŋaŋ, ghelɨ ghì a ghɨ n-felɨ̀ ghɨ lâʼ laʼ àŋena na ghɨ kɨ nô a ngeʼ (na kelɨ àfɨm a àŋena mɨ̂tɨ̀m.)

¹¹Ghelɨ ghɨ tisɨnɨ a ntèʼ Zowàn nɨn ghɨ kɨ nô ɨ̀ngù, ghelɨ ghɨ tofɨnɨ ghì a ghɨ n-tebtɨ fòyn Ijìb nɨn tebtɨ̂ ŋweyn na wù na nî àwo kɨ kelɨ wi itof. Àŋena kàʼ ghɨ bû nà ghaŋsɨ̂ ɨ̀wuyn bê sɨ̂ fòyn Ijìb na ndyèynsɨ sɨ àŋenasɨ nɨn ghɨ ghelɨ ghɨ tofɨnɨ fî bê na àŋena nɨn ghɨ woyn tɨ̂fòyn tìtɨ̀ a tɨ nà n-saʼ ɨtuʼ ɨmu.

¹²Fòyn Ijìb, ghelɨ ghɨ tofɨnɨ nɨ̀ và ghi ndû wo lvɨyna? Bæ àŋena gvì fèʼtɨ̀ ìwo zɨ̀ sɨ̂ và a Bôbo Fɨyini ɨ Bò Ɨ̀dwaʼ ɨ̀ Jɨ̀m nɨn baʼtɨ sɨ ni sɨ̂ ghelɨ Ijìb.

¹³Ghelɨ ghɨ tisɨnɨ a Zowàn kasi meyn nà ghɨ kɨ sɨ a ɨ̀ng̀, (Ghelɨ ghɨ tisɨnɨ a Memfìs jɨŋsɨ meyn ngeŋsɨ àŋena). Ghɨ jɨŋsɨ meyn ghelɨ ghɨ tisɨnɨ a Memfìs. Ghelɨ ghɨ tisɨnɨ ɨbwàs ɨ tɨ̂laʼ jɨŋsɨ meyn ghelɨ Ijìb ghɨ jêl a dzɨ sɨ bɨsɨ.

¹⁴Bôbo Fɨyini (ni meyn) tum meyn àyvɨs kɨ nî tɨtof tɨ ghelɨ Ijìbtɨ̀ ɨ jɨŋi. Ghelɨ Ijìb nɨn bu nî wì iwo i juŋi bòm ìwo nâ zɨ̀. Àŋena nɨn jɨŋi meyn kɨ̀ ta wul a mɨ̀lùʼ ku wù woʼtɨ nà nyɨŋ kɨ antêynɨ̀ àwòʼtɨ nâ ghè. ¹⁵Nô wul ɨ̀ Ijìb ɨ̀mòʼ kàʼ wù bû læ̀ fì nì ìwo sɨ gàmtɨ wul ɨlvɨ kèsa à n-ghɨ ghelɨ ghɨ ghaʼnɨ ma ghelɨ ànfɨf a, kèsa à n-ghɨ ghelɨ ghɨ to ma ghelɨ ghɨ bolɨ a.

¹⁶Ɨlvɨ nɨn koʼ gvi-à ta ghelɨ Ijìb na ghɨ kɨ ta ghɨ̀kì (ma ghɨ kàʼ ghɨ bû gàmtɨ̀ ngeŋsɨ àŋena). Àŋena læ̀ nà chɨŋtɨ̂ fâyn nô sɨ a ŋaŋ, ɨlvɨ ta Bôbo Fɨyini ɨ Bò Ɨ̀dwaʼ ɨ̀ Jɨ̀m naysɨ awu a ŋweyn sɨ fu ngeʼ sɨ̂ àŋena. ¹⁷Ghelɨ Judà læ̀ ni-à a ghelɨ Ijìb na fâyn àŋena nô sɨ a ŋaŋ. A læ̀ nà yvɨ mɨ ndà iwo kûm ghelɨ Judà wu nà chɨŋtɨ̂ faynà bòm ìwo zɨ̀ a Bôbo Fɨyini ɨ Bò Ɨ̀dwaʼ nɨn baʼtɨ sɨ ni sɨ̂ àŋena.

¹⁸A læ̀ nà ghɨ ɨtuʼ nâ ghè, ghɨ taŋî ìtaŋi i Hibɨ̀lù a ntèʼsɨ Ijìb sɨ̀ tâyn. Ghelɨ ntèʼsɨ nâ ghì læ̀ chfɨ̂nɨ̀ sɨ nà koʼsɨ Bôbo Fɨyini ɨ Bò Ɨ̀dwaʼ ɨ̀ jɨ̀m. Ghɨ læ̀ nà toŋtɨ̂ ntèʼ î lì antêynɨ̀ ntèʼsɨ nâ ghè na, “Ntèʼ ɨchfɨ iyvɨ.”

¹⁹Abaŋ ifu nɨ̀ Bôbo Fɨyini à læ̀ nà ghɨ kɨ nô itòŋ i Ijìb ɨtuʼ nâ ghè, ɨ̀ bàʼlɨ̀ àtuŋ nɨ̀ ngòʼsɨ̀ ighami nɨ̀ ghelɨ Ijìb sɨ nà koʼsɨ Bôbo Fɨyini ateyn. ²⁰Ɨfwo/ɨlwêʼ nâ wèyn ɨ̀bwò nɨn ghɨ ta nchwæ, fî ghɨ ta nchwò nsaʼ na Bôbo Fɨyini ɨ Bò ɨ̀dwaʼ ɨ̀ jɨ̀m nɨ̀n ghɨ a Ijìb. Ghelɨ Ijìb læ̀ dzɨ̂ sɨ̂ ŋweyn ɨlvɨ ta àŋena nɨn ghɨ a ngeʼ, a wù tum mbæ̀sɨ̀/ngàmtɨ̀ àŋena. ²¹À ti ta Bôbo Fɨyini læ̀ dyêyn ngêŋ ŋweyn sɨ̂ ghelɨ Ijìb. À læ̀ nà ghɨ ɨtuʼ nâ ghè a àŋena kæ keli Bôbo Fɨyini sɨ nà koʼsɨ ŋweyn. Àŋena nà koʼsɨ̂ ŋweyn nɨ̀ tɨ̀fu tɨ nyoʼnɨtɨ baʼsɨ̂ nɨ̀ tɨ̀fu tɨ ɨfwo ɨ yɨnɨ. Àŋena læ̀ nà chfɨ̂nɨ̀ àwo, yɨ mɨ̀kâyn sɨ̂ Bôbo Fɨyini, luynsɨ̂ tɨ̀chfɨ̂nɨ̀ tɨ̀ jɨ̀m. ²²Bôbo Fɨyini læ̀ fu ngeʼ sɨ̂ ghelɨ Ijìb mɨtì ɨ̀ kàsi fvɨ̀sɨ̀ ̀aŋena sɨ a ngeʼ nâ ghè. Ghelɨ Ijìb læ̀ bêynlɨ̀-à ɨ̀ se sɨ samsɨ Bôbo Fɨyini, a wù yvɨ ijêm/idzɨ̂ i àŋena ɨ̀ gàmtɨ̀ àŋena.

²³À læ̀ nà ghɨ ɨtuʼ nâ ghè, dzɨ ìto ɨ lû a Ijìb, ndû a Asilìyà. Ghelɨ Ijìb læ̀ nà ndû a Asilìyà, ghelɨ Asilìyà ɨ ndû a Ijìb. Ghelɨ Ijìb nɨ̀ ghelɨ Asilìyà læ̀ nà koʼsɨ̂ Fɨyini akaʼ àmòʼ. ²⁴Ɨlvɨ nâ wèyn/ateyn læ̀ kfeyna, a Isìlæ̀ na ngaŋtɨ̂ kɨmɨ ta ilaʼ i Ijìb nɨ̀ ìlaʼ i Asilìyà ì. Tɨlaʼ nâ tèyntɨ̀ tɨ̀ tal læ̀ nà ghɨ ìboysɨ sɨ̂ tɨ̀laʼ tɨ mbzɨtɨ nô tɨ̀ jɨ̀m. ²⁵Bôbo Fɨyini ɨ Bò Ɨ̀dwaʼ ɨ̀ jɨ̀m læ̀ boysɨ̂ àŋena bè na, “Njùŋ nɨn ghɨ sɨ̂ ghelɨ Ijìb, ma à ti/ɨ ghelɨ̀ ghem. Njùŋ nɨ̀n ghɨ sɨ̂ ghelɨ Asilìyà ɨ ghelɨ ma à bòm/faytɨ kɨ̀ nô mà, njùŋ nɨ̀n ghɨ sɨ̂ ghelɨ Isìlæ̀ ɨ ghelɨ ghì a mà choʼ na àŋena na ghɨ ghelɨ̀ ghem.”