Isaiah 27
This book is a draft. It has been translated but has not yet finished checking, and is published here so the community can read and respond to it.
Bôbo Fɨyini nɨn bœ̂sɨ̀/gâmtɨ̀ ghelɨ Isìlæ̀
1Isayà nɨn læ meyn fe bè na,
“À læ̀ nà ghɨ ɨtuʼ nâ ghè, a Bôbo Fɨyini fu ngeʼ sɨ̂ Lèvìyatàn nɨ̀ fɨ̀nyuè fɨ iwòŋ nɨ̀ ŋweyn fɨ, fɨ ghaʼ kɨ tèyn bema fî kelɨ àdyaʼ. Wù læ̀ zue Lèvìyatàn ɨ mbam i bemnɨ nâ zɨ̀ a yi n-goynɨ̂ nyɨn nô sɨ a ŋaŋ tî, chî a jvâ.
2Bôbo Fɨyini læ̀ bê sɨ̂ zɨ̀ ɨtuʼ nâ ghè na,
“Yì na yem njàŋsɨ̀ kûm gvêyn mɨ̀tàm î jùŋ.”
3Mà Bôbo Fɨyini nɨn chî gveyn àteyn. Mɨ n-sfɨ̂s mu ateyn kɨ mɨlvɨ ɨ̀n jɨ̀m. Mɨ n-chî gveyn àteyn nɨ̀nchuè, chî nɨ̀ntuʼ ta ka nô wùl na ghɨ wi ta wù kàʼ a wù fu ngeʼ sɨ̂ gvèyn àteyn.
4Mɨ n-bu nyòʼsɨ̀ wì ɨtoŋ sɨ̂ gvêyn mɨ̀tam àteyn lvɨ̂yn. Afûʼ a bɨ-a baʼsɨ̂ nɨ̀ àmbyèyn akù (ɨ̀twaʼ ɨ sùnjoŋnjoŋsɨ) kæ nà ghɨ ateyn, a mà fvɨ ndù jèylɨ̀ àfûʼ ateyn nô à jɨ̀m, fì nyòʼ àŋena nô ghɨ̀ jɨ̀m.
5Mɨtì ma mbàynɨ̀sɨ ghelɨ̀ ghemsɨ kæ nà kɨ na mà kɨŋtɨ àŋena, a àŋena gvi nì a ghesɨ̀ àŋena na chî nɨ̀ mbônɨ̀, samoʼ, àŋena nɨn gvì-à nà chî nɨ̀ mbôynɨ̀.
6Mɨ̀chi nɨn koʼ gvi-à ta ka ghelɨ Isìlæ̀ na lemâ ta afo a ghɨ tòʼ aghaŋ ateyn a to a nse. Woyn Jàkôb læ̀ yam ndù kɨ ta tɨfyas tɨ ɨnkàʼ a tɨ bùs ɨ̀ kòla mɨ̀tam. Mɨ̀tam mɨ̀ àŋena læ̀ luyn kɨ mbzɨ ì jɨ̀m.
7Bôbo Fɨyini bû fù ngeʼ i bemnɨ sɨ̂ ghelɨ Isìlæ̀ ta wù tî fù sɨ̂ mbàynɨ̀sɨ àŋenasɨ. Wù bû zuètɨ ghelɨ Isìlæ̀ sɨ idvɨ̀ ta wù tî zuètɨ mbàynɨ̀sɨ àŋena.
8Mɨtì, wù tî nì ghɨ ghaytɨ lù nɨ̀ ghelɨ Isìlæ̀ sɨ a àŋena ilaʼ sɨ yeʼi àŋena. Wù tî nì àŋena lû kɨ ta à lì àfyef kì a kɨ lù abàs ghè a ɨchfɨ̂-iyvɨ i nɨn sal ateyn.
9Bôbo Fɨyini tî nì tèyn sɨ lèsɨ̀ sɨ fu mbɨsɨ ghelɨ Isìlæ̀. Wu n-lèsɨ̀ fu (mbɨsɨ) àŋena a awo a bɨ-a nɨ̀ àŋena mæ̀ nô à jɨ̀m. Àŋena nɨn gvâ ngòʼsɨ̀ ɨbwaŋ tɨ̂fu nɨ̀ àŋena kɨ̀ ta ghɨ gvà àfɨ abayn, ɨ̀ kòytɨ̀ ɨ̀tôʼ vzɨ̀ a Ashelà ɨ fɨyini fɨ ki fɨ nɨn ti atu, ɨ̀ bɨ̀ytɨ̀ ɨ̀bwaŋ vzɨ̀ a ghɨ n-nyôʼ ileŋ ateyn.
10Ntèʼ sîsɨ̀ a ghɨ tɨm mbàynsɨ̀ jɨ̀ŋ kàli læ̀ nà ghɨ kɨ sɨ yum, tsɨ kɨ tèyn moŋ, ma ghelɨ leʼ meyn vìsi ndosɨ àŋena, ntèʼsɨ ateynsɨ læ̀ nà ghɨ kɨ (ta nse iyum) ɨtwâʼ nyâmsɨ mbòloʼsɨ yɨ kɨ ateyn, nyɨŋì yvɨ̂tɨ̀-à. Nyamsɨ læ̀ nà kfɨlɨ ɨ̀yol vzɨ̀ a wu n-ghɨ ateyn, fî kam tɨ̀kœ tɨ ɨnkàʼ.
11Tɨkœ tɨ ɨnkàʼ tɨ ateyntɨ yum, ghɨ̀ki gvi boŋtɨ/kumtɨ ɨ ndu nà kwô. Yi n-ghɨ tèyn bòm ta ghelɨ Isìlæ̀ nɨn (kya wi nô ìwo) ghɨ kɨ nô ɨ̀ngù. À ti iwo zɨ̀ a mbom àŋena faŋ tɨ̀ kòynsɨ isuyn sɨ̂ àŋena, fàŋ mɨ tì dyèyn atem a juŋa sɨ̂ àŋena.
12À læ̀ nà ghɨ ɨtuʼ nâ ghè a Bôbo Fɨyini yvɨŋtɨ ghelɨ Isìlæ̀ kɨ fɨ̀moʼ fɨ̀mòʼ kɨ̀ ighel ta wùl nɨ̀n chyeʼ/leʼ wît wu teytɨ fvɨ̀sɨ̀ wît sɨ a ɨywàfà. Wù læ̀ zɨ̂tɨ̀ kɨ a jvâ Yufɨ̀lèt kàlì chem afoŋlɨ a Ijìb, ighami nɨ̀ ghelɨ Ijìb ŋêyn ghelɨ Isìlæ̀. 13À læ̀ nà ghɨ kɨmɨ ɨtuʼ nâ ghè, a ghɨ toŋ isoŋ gyà àteyn ɨ to nô sɨ a ŋaŋ. Ghɨ læ̀ toŋa a ghelɨ Isìlæ̀ ghì a ghɨ n-yeyn ngeʼ/n-jɨ̂ŋ a Asilìyà baʼsɨ̂ nɨ̀ ɨghî a ghɨ n-læ ghaytɨ ndu nɨ̀ àŋena a Ijìb kasi kfa, nà koʼsɨ̂ Bôbo Fɨyini a kfɨyn i laynɨ a Jèlusalèm.