Isaiah 28

Nfàsì-nfàsì sɨ̂ ghelɨ ghɨ tisɨnɨ a Sàmalìyà/Ngeʼ nɨn ghɨ sɨ̂ ghelɨ Efɨ̀lèm

¹Ngeʼ i ghaʼnɨ nɨn ghɨ sɨ̂ Sàmalìyà iŋwâʼ i àŋena i nɨn mæ̂ ndû kɨ ta ɨìnbùs vzɨ̀ a wu n-ghɨ ɨfol ɨtu nɨ̀ ghelɨ ghɨ tisɨnɨ ghì a mɨ̀lùʼ ku. Ɨtu àŋena vzɨ̀ a ghɨ n-ghaŋsɨ ɨwuyn ateyn nɨn ghɨ ma ghɨ yisi meyn nɨ̀ àyisi a lɨmtɨnɨ-a, mɨtì àŋena nɨn nyɨŋ afu ma mɨ̀lùʼ ku meyn.

²Yì yeyna, Bôbo Fɨyini nɨn kelɨ wul wu kelɨ àdyaʼ, fî to nô sɨ a ŋaŋ. Wùl àteyn nɨn ghɨ tèyn ta afyef a to-a a kɨ n-chwô, ghɨ ta awœ ɨlvɨ ta kɨ n-suʼi. Wùl àteyn nɨn ghɨ ta ànkuŋ a ivɨ i sùʼi kɨ fvɨ̂, ghɨ sɨ chɨytɨ ilaʼ ateyn.

³Ghɨ nì jêylɨ̀ ìŋwâʼ (i ghelɨ ghɨ tisɨnɨ) baʼsɨ̂ nɨ̀ ìghaŋsɨ i ɨwùyn nɨ̀ ghelɨ ghɨ tisɨnɨ ghì a ghɨ n-nyvɨ chwôsɨ̀ mɨlûʼ nɨ̀ ɨ̀vɨ.

⁴Ntèʼsɨ ateynsɨ nɨn ghɨ atu ìbàl ɨfwo ɨ yɨnɨ koʼ ateyn kɨ̀ sɨ idvɨ̀ mɨtì iŋwâʼ i àŋena i ɨ ghɨ sɨ yàla kɨ ta ɨ̀mbùs. À na yeyn nô mɨ nda wu saʼ kɨ ta ghɨ nî ghɨ kœ̀tɨ kfɨl mɨtam mɨ̀ gɨ̀lêbsɨ̀ mzɨ̀ a mɨ̀ bàŋ sɨ asɨ jæ ta ka ɨlvɨ vzɨ̀ a ghɨ n-kfî gɨ̀lêbsɨ̀ nî kfeyn.

⁵À læ̀ nà ghɨ ɨtuʼ nâ ghè, Bôbo Fɨyini ɨ Bò Ɨ̀dwaʼ ɨ̀ Jɨ̀m ɨ ghɨ ta afol a tɨ̂fòyn a ŋwaʼnɨ-a sɨ̂ ghelɨ ŋweyn ghì a ghɨ faŋ, ghɨ ta ɨ̀mbùs ɨ jûŋ.

⁶Wù læ̀ gâmtɨ̀ ghelɨ ghɨ tisɨnɨ ghì a ghɨ n-saʼ nsaʼsɨ a ghɨ na saʼ fu nsaʼsɨ ghêl kɨ àtì-ati, fu àdyaʼ nɨ̀ àtem a tô sɨ̂ ghelɨ ghì a ghɨ n-chi achfɨ̂ a mbàyn.

⁷Nô mɨ ngàŋsɨ ndô Fɨyini ŋêyn nfèʼtɨ̀ sɨ ghaʼnɨsɨ nyvɨ̂ meyn chwòsɨ̀ mɨ̀lûʼ nà yeŋnɨ̂ kɨ yeŋnɨ, mɨ̀lùʼ ɨnto ni meyn tɨtof tɨ àŋena tɨ jɨŋi. Àŋena nɨn yeŋnɨ̂ jelɨ̀ kɨ jelɨ ma à nì mɨ̀lûʼ ɨnto, mɨ̀lùʼ ku meyn àŋena. Nfèʼtɨ̀ sɨ ghaʼnɨsɨ bu yeyn wi awo kì a Fɨyini fɨ ngèʼtɨ sɨ̂ àŋena a jem. Ngàŋsɨ ndô Fɨyinisɨ ɨ bu saʼ wi nsaʼ sɨ ghêl a jûŋ.

⁸Ɨbwaŋ vzɨ̀ a àŋena nɨn duʼì nyvɨ mɨ̀lûʼ ateyn nô ɨ̀ jɨ̀m nɨn ghɨ ma à luyn kɨ aghoʼtɨ ateeyn, nô àlêʼ a juŋà bu ghɨ wi ateyn.

⁹Àŋena nɨn bɨfɨ na, “Bôbo Fɨyini nɨn mômsɨ̀/kɨŋ sɨ yeʼi nda? Wù n-fêʼtɨ̀ baynsɨ̂ ìwo i ŋweyn sɨ̂ ghɨ̀ ndà? Iwo zɨ̀ a wù n-yeʼi nɨn kfeynɨ̂ kɨ sɨ̂ woyn ghì a ghɨ kùʼtɨ̀ teyn kɨ̀ teyn àŋena sɨ igheyn. Yi n-kfeynɨ̂ kɨ sɨ̂ woyn ghɨ bolɨ.

¹⁰Wù n-yeʼî ghès kɨ̀ a mbaŋi a mbaŋi, tôs nô mɨ ghà kɨ̀ isɨ isɨ. Wù n-yeʼî nô àwo à jɨ̀m, yeʼî kɨ sɨ ilæ sɨ ilæ.

¹¹Mɨ n-fêʼtɨ̀ sɨ̂ zɨ̀ samoʼ na Bôbo Fɨyni læ̀ ni-à a ghelɨ ɨtum, taŋî tɨ̀ taŋi tɨ lûtɨ̀ gvì yèʼi àŋena/dyêyn ìwo sɨ̂ àŋena.

¹²Bôbo Fɨyini ti meyn bè sɨ̂ ghelɨ nâ ghì na, “Alêʼ kèynà nɨn ghɨ àlêʼ a yvɨtɨnɨ-a na ghelɨ ghì a ghɨ bol yvɨtɨ, fì bè na à n-ghɨ àlêʼ kì a ghɨ kfɨ̀mtɨ ghelɨ ateyn mɨtì àŋena faŋ tɨ̀ yvɨ̀tɨ.

¹³À ti iwo zɨ̀ a iwo i Fɨ̂yini nɨn/læ̀ nà ghɨ kɨ sɨ̂ àŋena ta itaŋi i woynda. Ghɨ yeʼî kɨ a mbaŋi a mbaŋi tâs kɨ isɨ isɨ, yeʼî àwo kɨ̀ sɨ idvɨ̀. Ghɨ læ̀ nî tèyn ta ka àŋena se sɨ ndù asɨ kàsi bèynlɨ̀ fe atam, a mbàynɨ̀sɨ̀ fu ngeʼ sɨ̂ àŋena, ɨ ghaytɨ lù nɨ̀ àŋena.

¹⁴Bòm tèyn, zɨ̀ ghelɨ ghɨ tisɨnɨ ghì a Jèlusalèm, ɨ zɨ ghì a chêsɨ̀ àwo tì, yì faytɨ yvɨ̀tɨ ìwo zɨ̀ a Bôbo Fɨyini nɨn bê (sɨ̂ zɨ̀).

¹⁵Yi n-ghaŋsɨ̂ ɨ̀wuyn bê na, “Ghèsɨ yɨ meyn mɨ̀kâyn ghesɨ̀ ìkfɨ-i(na ghès nɨn kfɨtɨ̂ wì ɨ̀ yɨ̀nɨ̀ ghesɨ̀ ìse-ì (na ghɨ n-gvɨ̀mì wì ghes). Yi bê na à kæ chwò nô mɨ ìnkì afyef ato-a à kà, kɨ bû fù ngeʼ sɨ̂ ghès (kɨ bû kùm ghès) bòm ta ghèsɨ wam meyn ànkaŋ kɨ na kɨ̂ŋtɨ̀ ghès.”

¹⁶À ti iwo zɨ̀ a Bôbo Fɨyini ɨ Bò Ɨ̀dwaʼ ɨ̀ jɨ̀m bè na, “Yì yeyna! Mɨ n-tom ngòʼ ìbzɨ i ndo a Zayòn yi to kɨ tèyn a ghɨ ngòʼ sɨ a nyɨŋ ghɨ sɨ nì na achɨ a ndo nâ kì na faytɨ̂ to, ma afo-a kàʼ kɨ bû læ̀ nèʼsɨ̀.

^17Nkfɨ̀zɨ̂ a ka mà na bâʼlɨ̀ ateyn nɨn ghɨ sɨ na saʼ fyeʼtɨ̂ wì iwo, ɨfyêʼ vzɨ̀ a mɨ n-felɨ̀ ateyn ɨ ghɨ nchînɨ̀ àtì-ati. Awœ/afyef ato-a ɨ nì bebsɨ̂ ànkaŋ kì a yi n-lêytɨ̀ ateyn, a ànkuŋa fvɨ chɨ̀ytɨ ɨ̀lwêʼ vzɨ̀ a yi n-lêytɨ̀ ateyn.

¹⁸Mɨ n-bebsɨ̂ mɨ̀kâyn mzɨ̀ a zɨ̀ yɨ zɨ̂ ìkfɨ-i na yi n-kfɨtɨ̂ wì, ɨ̀ bèbsɨ ìyɨnɨ zɨ̀ a yi n-yɨnɨ zɨ̂ ìse-ì na ghɨ n-gvɨ̀mì wì zɨ tî. A nì nà ghɨ ta afyef ato-a chwo lì zɨ̀ kɨ̀ ta ànkuŋ.

¹⁹Ànkuŋ/Afyef ato-a nâ kèynà na se sɨ chwo nô mɨ ɨlvɨ gha, kɨ fu ngeʼ sɨ̂ zɨ̀. Kɨ kàʼ a kɨ na chwô nô mɨ achi à kà, ma kɨ kàʼ a kɨ chwo nô mɨ ɨlvɨ gha kèsa à n-ghɨ nɨ̀nchuè ma à n-ghɨ nɨ̀ntuʼ a.” Yì kæ yvɨ keli iwo zɨ̀ a ntum Fɨyini nâ yèyn nɨ̀n bê, a yì na fâyn nô sɨ a ŋaŋ.

²⁰Yi n-kya ngàyn zɨ̀ a ghɨ n-mô bê na, “Ɨkuyn vzɨ̀ a yi n-nyɨŋ ateyn nɨn tɨmsɨ̂ chwôsɨ̀-à, ma yì kàʼ yi bû nàytɨ̀ ìfyeyn ì zɨ-i ateyn, ndzɨsɨ chɨytɨnɨ nɨ̀ zɨ̀ sɨ læ̂ chwôsɨ̀-à ma sɨ kàʼ sɨ bû chɨ̀ytɨ ɨ̀wuyn vzɨ ɨ̀ jɨ̀m.

²¹Bôbo Fɨyini nɨn nî kɨ ìwo zɨ̀ a wù n-læ nì a kfɨ̂yn Belazìm. Ɨtoŋ ŋweyn nɨn yafɨ kɨ ta wu n-læ yaf sɨ̂ ghelɨ Amò afoŋlɨ a/ibal i Gibìyòn. Wù n-gvî sɨ ni iwo zɨ̀ a wù lèm meyn na wu n-nì-à. Wu n-gvî nî ìfêl i ɨchfɨ̀ i yumnɨ-i nɨ̀ ŋweyn.

²²Ka yi n-fì wèsɨ̀ mà kûm nfàsì nfàsì zɨ̀ a mɨ n-fu sɨ̂ zɨ̀, a bu tì, a ngeʼ zɨ̀ a ka yì koli zɨ̀ chwô nà bem kɨ tèyn. Bôbo Fɨyini ɨ Bò Ɨ̀dwaʼ ɨ̀ Jɨ̀m feʼtɨ meyn bàynsɨ (sɨ̂ mà) na wù n-kelɨ sɨ bebsɨ ilaʼ yèynì nô ì jɨ̀m.

²³Yì faytɨ yvɨ̀tɨ ìwo zɨ̀ a mɨ n-bê. Yì faytɨ yvɨ̀tɨ ìwo zɨ̀ a mɨ n-bê sɨ̂ zɨ̀.

²⁴Wùl ɨ̀ vzɨ̀ a wù n-felɨ̀ gveynsɨ, ni-à felɨ̀ gveyn sɨ/tòʼ. Wù n-nî wù bû faŋ/làŋa nà felɨ̀ ndû kɨ ndu nɨ̀ gvèyn (ghɨ wi sɨ tòʼ afo ateyn.

²⁵Wù n-felɨ mesì gveyn nô mɨ ɨlvɨ gha, wu, màʼ mbàs dîlsɨ̀ baʼsɨ̂ nɨ̀ kumìnsɨ̀ ateyn ɨ tòʼ wît abàs a li-a ɨ tòʼ àsaŋ a balì kɨ̀mɨ nɨ̀ ɨ̀fwo ɨlvɨ, tô;nô mɨ ghà kɨ̀ alèʼ(ateyn) sɨ a nyɨŋ.

²⁶Wùl ɨ̀ gvèynsɨ̀ nɨn kya ìwo zɨ̀ a wù n-kelɨ sɨ nì bòm ta Fɨyini fɨ yeʼi meyn ŋweyn wù na kya ìwo zɨ̀ a wù n-kelɨ sɨ nì.

²⁷Wùl ɨ̀ gvèynsɨ̀ lum leŋ/chyeʼ wi dilìsɨ̀ nɨ̀ àmbuʼ a dɨlɨnɨ-a, leŋ wi kumìnsɨ̀ nɨ̀ àkal a fɨ̂nchaʼa ɨlvɨ ta fɨ n-nyɨŋ chwô atu àteyn. Ghɨ n-leŋ dilìsɨ̀ nɨ̀ àmbùlà ma ghɨ faytɨ nɨ̀ mbàŋ àkas, leŋ kumìnsɨ̀ nɨ̀ fɨkâʼfɨ/àmbùlà kɨ ghâynsɨ̀ kɨ tèyn.

²⁸Wu n-se sɨ lam abayn, gvâ ɨ̀nkfɨ̂ŋ mɨ kfeyn wu visi. Ghɨ nî ghɨ bû faŋ nà gvâ ndû kɨ ndu. Wù n-leŋ mɨ àsaŋ nɨ̀ fɨ̀nchaʼfɨ ta wù nî fɨ nyɨŋ chwò atu àteyn, ma kɨ kàʼ kɨ bû kfɨ nà ghɨ ta ɨnkfɨ̂ŋ.

²⁹Itof nâ yèynì nô ì jɨ̀m nɨn ghɨ ma à fu kɨ̀mɨ Bôbo Fɨyini ɨ Bò Ɨ̀dwaʼ ɨ̀ jɨ̀m sɨ̂ ghelɨ gvêynsɨ̀. Wù n-faytɨ̂ kya sɨ tebtɨ ghelɨ nô a jûŋ. Wù n-kelɨ ìtof i kaynɨ-i.