Isaiah 33

Saʼgha kûm ghelɨ Asilìyà

¹Ghelɨ ghì a ghɨ n-fu ngeʼ sɨ̂ ghelɨ, ngeʼ, ighaʼnɨ nɨn ghɨ sɨ̂ zɨ̀ wùl ɨ̀ bû fù ngeʼ sɨ̂ zɨ̀. Zɨ̀ ghî a yi n-lɨsɨ ghelɨ tî, ngeʼ ighaʼnɨ nɨn ghɨ sɨ̂ zɨ̀, nô wùl bû lɨ̀sɨ zɨ̀. À læ̀ nà ghɨ ta yi n-bu fu wi ngeʼ sɨ̂ ghelɨ, a ghɨ fu ngeʼ sɨ̂ zɨ̀. À læ̀ nà ghɨ ta yì faŋ tɨ̀ fì tɨ̀ lɨ̀sɨ ghelɨ, a ghɨ lɨsɨ zɨ.

²Bôbo Fɨyini, ghès nɨn chwotɨ̂ na wà dyeyn atem a juŋà sɨ̂ ghès. Ghès nɨn yeʼtɨ̂/chîtɨ̀ kɨ và na wà gamtɨ ghes. Ghès nɨn chwotɨ̂ na wà na fu ghès nɨ̀ àdyaʼa kɨ̀ mɨchɨ ɨ̀n jɨ̀m, gâmtɨ̀ ghès ɨlvɨ ta (ngeʼ kòli ghes) ghès nɨn ghɨ a ngeʼ.

³Ghelɨ tɨ̂laʼ tɨ litɨ nɨn yvɨ ta wà byal nô mɨ ɨlvɨ gha a àŋena leʼ nyɨ̀ŋnɨ. Àŋena nɨn yeyn (ta wà dyèyn) adyaʼ a bemnɨ-a nɨ̀ và, a àŋena gwosɨ nyɨ̀ŋnɨ.

⁴Àŋena nɨn nyɨŋnɨ̂ nô mɨ ɨlvɨ gha, a ghelɨ̀ ghem zɨ kùmtɨ ɨ̀fwo àŋena kɨ̀ ta ngumisɨ nî sɨ kfɨl bebsɨ ɨ̀fwo ɨ yɨnɨ a gvêyn. Ghelɨ nî ghɨ kumtɨ ɨ̀fwo ateyn kɨ̀ ta nseŋ ngumisɨ nɨn zɨ a gvêyn kɨ̀ sɨ a fɨ̂lêŋnɨ̀ fɨ ɨlvɨ têyn, sɨ bebsɨ ɨ̀fwo.

⁵Bôbo Fɨyini nɨn ghɨ Fɨyini fìfɨ̀ a fɨ ngàŋtɨ chwò. Wù n-ghɨ alèʼ a ngaŋtɨnɨ-a nɨ̀ ŋweyn iyvɨ. Wu n-nì-à a ghelɨ Zayòn na nî kɨ àwo kì a kɨ n-ghɨ àtì-ati, saʼ fyeʼtɨ̂ wì nsaʼsɨ ghêl, kɨ̀ ta isaʼ i Fɨyini nɨn bê.

⁶Wù læ̀ ni-a a yì na to kɨ tèyn nteŋ nô mɨ ɨlvɨ ta a n-gâyn nô mɨ ghà sɨ̂ zɨ̀. Wù n-kɨ̂ŋtɨ̀ ghelɨ ŋweyn, fu ìtof sɨ̂ àŋena, ni-à àŋena yeyn kelî àwo. yì na fâyn/ngvɨmlɨ̂ Bôbo Fɨyini ta ka wù na nî àwo nâ kèynà sɨ̂ zɨ̀.

⁷Yì yeyna, sugèyʼ sɨ tosɨ (a Judà) nɨn luŋlɨ̂ dzɨ̂ a dzɨsɨ na ghɨ ngàmtɨ̀ àŋena. Ghelɨ ghì a ghɨ n-tum na ghɨ ndu chwòtɨ mbàynɨ̀sɨ̀ na ghɨ na chî nɨ̀ mbôynɨ̀ ɨ koynsɨ dzɨ̀ nô sɨ a ŋaŋ.

⁸Dzɨ sɨ to;si nɨ̀ àŋena nɨn ghɨ kɨ sɨ yum, nô wùl ɨ bu jelɨ̀ wì ateyn. Àŋena chasɨ meyn mɨ̀kâyn mzɨ̀ a ghɨ tî yɨ sɨ nà chi nɨ̀ mbôynɨ̀, àŋena bu ngvɨmlɨ̂ wì nô wul.

⁹Nse Isìlæ̀ yum meyn tèyn, ɨ̀ kàʼtɨ. Ɨ̀nkàʼ (mɨ̀ Sedà) kfɨ meyn akù a Lebanòn kɨ na sɨ (ghɨ kɨ ayum) yuma. Ibal i Shalòn zɨ̀ a ɨfwo ɨ yɨnɨ nɨn koʼ ateyn nɨn/sɨ ghɨ kɨ ta nse iyum (Alabà). Tɨfvɨtɨ nɨn yalà sɨ ɨnkàʼ a Bashàn ɨ̀ yàlà sɨ ɨnkàʼ a kfɨ̂yn kamèl.

¹⁰Bôbo Fɨyini nɨn bê sɨ̂ tɨ̀laʼ tɨ litɨ lvɨ̂yn na, “Mɨ ndyèyn àdyaʼ à kema sɨ̂ zɨ̀ lvɨ̂yn. Mɨ n-dyèyn sɨ̂ zɨ̀ lvɨ̂yn na mɨ n-ghɨ Fɨyini fɨ ngaŋtɨnɨ fɨ, kelɨ àdyaʼ.

¹¹Awo kì a yi n-baʼtɨ nɨn (gâmtɨ̀ wì zɨ̀) ghɨ kɨ ta ɨywafa, awo kì a yi n-kfâʼtɨ̀ ɨ ghɨ kɨ ta afûʼ ayum/ɨwi. Awo kì a yi n-nî nɨn ghɨ ta ɨvɨs a ghɨ nyòʼ sɨ bebsɨ zɨ.”

¹²Ghɨ læ̀ nyôʼ ghelɨ tɨ̂laʼ nâ ghì a ghɨ fɨ kɨ̀ ta ɨvɨs a ghɨ nyòʼ sɨ cheli mɨghi ateyn. Àŋena læ̀ fɨ kɨ ta ɨtwaʼ sùnjoŋnjoŋsɨ a ghɨ tem kwò ɨ̀vɨs ateyn.

¹³Zɨ̀ ghî a yi n-chi a tɨ̂laʼ nô a ndyèyn, yì yvɨtɨ awo kì a mà nì. Zɨ̀ ghî a yi n-chi baʼsɨ (a Isìlæ̀) yì na kya na mɨ n-kelɨ àdyaʼ.

¹⁴Ghelɨ ghɨ bɨ ghì a ghɨ n-chi a Zayòn nɨn fâyn nô sɨ a ŋaŋ, ghelɨ mɨ̂tèm ɨnbɨ ɨ/nɨn chɨŋtɨ̂ faynà. (Àŋena nɨn bɨf kɨ sɨ a àŋena ngeŋsɨ na, “À n-ghɨ ndà a ghesɨ̀nà antêynɨ̀ a wù kàʼ a wù faŋ (a ghɨ) ŋêyn Bôbo Fɨyini, wù n-balî ta ɨvɨs, nyôʼ kɨ ɨ̀fwo ɨ̀ jɨ̀m a? A wùl a ghesɨ̀nà antêynɨ̀ tî kàʼ a wù faŋ ŋêyn Bôbo Fɨyini vzɨ̀ a ɨvɨsɨ nɨn bali abaŋ ifu nɨ̀ ŋweyn kɨ mɨlvɨ ɨ̀n jɨ̀m a?). Àŋena nɨn bê na, “Nsaʼ Bôbo Fɨyini nɨn ghɨ ta ɨvɨs a wu n-nyôʼ kɨ mɨlvɨ ɨ̀n jɨ̀m. A wùl sɨ̂ ghesɨ̀nà kàʼ a wù bœ a ìnkì i ɨvɨ̀s nâ ghàyn a?

¹⁵Wùl ɨ̀ vzɨ̀ wù kàʼ a wù bœ nɨn ghɨ wul ɨ vzɨ̀ a wù n-taŋi kɨ samoʼ nî kɨ àwo kì a kɨ n-ghɨ àtì-ati. À n-ghɨ wul ɨ vzɨ̀ a wù leʼ na wù na ghal fsɨ wi afo a wûl sɨ adyaʼ, nî wì iwo bòm ta ghɨ n-yuyntɨ ŋweyn nɨ̀ ɨ̀kwo. À nn-ghɨ wul ɨ vzɨ̀ a wù n-chɨ̂yntɨ̀ wì ŋêyn ghelɨ ghì a ghɨ n-kulɨ mɨ̀nàŋ sɨ nà zue ghelɨ, chɨ̂yntɨ̀ wì ŋêyn ghelɨ ghì a ghɨ n-nî awo a bɨ-a a li-a.

¹⁶Ghelɨ ghì a ghɨ n-nî awo nâ kèynà læ̀ nà chî/ghɨ alèʼ a ngaŋtɨnɨ-a, ɨlwêʼ ɨ leytɨnɨ nɨ̀ àŋena læ̀ nà ghɨ tɨ̀wu a kfɨynsɨ. Àŋena læ̀ nà wutɨ̂ wì afo sɨ yɨ, wutɨ̂ wì mu nô sakos.

¹⁷Yi læ̀ yeyn fòyn vzɨ a wù n-saʼ (ɨ̀ yeyn iŋwâʼ i ŋweyn) n-ŋwaʼà. Yì læ̀ yeyn ŋweyn wu saʼ ìlaʼ yi ghɨ nô a ndyèyn.

¹⁸Yi læ̀ kasî kfâʼtɨ̀ ɨ̀tuʼ vzɨ̀ a yì tî nà fâyn nô sɨ a ŋaŋ tî, yì na bɨfɨ na, “Atu a sugèyʼsɨ̀ a bemnɨ-a nɨ̀ ghelɨ Asilìyà kì ba a kɨ ba? Atu a sugèyʼ nɨ̀ àŋena kì ba a kɨ tî nà fsɨtɨ ɨkwo ɨ tâks sɨ̂ ghès a? Atu a sugèyʼsɨ̀ kì ba a kɨ tî nà taŋ/lêm akôyn ɨbwaŋ nchì nɨ̀ ghès a?

¹⁹Yi læ̀ nà bu yeyn wi ghelɨ ghɨ bɨ ghì a ghɨ tî nà fu ngeʼ sɨ̂ zɨ̀ tî. À n-ghɨ ghelɨ ɨtum, yi kya/yvɨ wi tɨtaŋi tɨ àŋena, ghɨ wêsɨ̀ zɨ̀.

²⁰Yì na (ki koʼsɨ̂) yeʼtɨ̂ kɨ a Zayòn ɨ ntèʼ zɨ̀ a ghesɨ̀nà nɨn yvɨ̂ŋtɨ̀ àteyn, yɨ mɨ̀chi mɨ̀ àyɨ ɨ̀nghaʼnɨ̂ nɨ̀ ghesɨ̀nà. Samoʼ Jèlusalèm læ̀ nà ghɨ àlêʼ a mbôynɨ̀, yì læ̀ nà ghɨ ta ɨtwo a ghɨ yɨ̀s mɨchoʼ/mɨkfɨ̂s mɨ̀ àteyn faytɨ zɨ̀ a nse ma wùl ɨ̀ kàʼ wu bû nèʼsɨ̀, kèsa sɨ teyn mɨ̀ nkfɨ̀ sɨ̂sɨ̀ a ghɨ kul ɨtwo nâ vzɨ̀ ateyn.

²¹Samoʼ, Bôbo Fɨyini læ̀ dyêyn àdyaʼ a ŋweyn nɨ̀ ìŋwâʼ i ŋweyni sɨ̂ ghesɨ̀nà afu. Jèlusalèm læ̀ nà ghɨ ta alêʼ jvasɨ tosɨ ɨ ghɨ ateyn nɨ̀ jvasɨ ghaʼnɨsɨ, ngùʼsɨ iwòŋsɨ ɨ jelɨ̀ wì a jvâsɨ̀ nâ ghè, ngùʼsɨ ghaʼlɨnɨsɨ sìsɨ̀ a sɨ bèʼi ɨfwo baʼsɨ̂ nɨ̀ ngùʼ sìsɨ̀ a sɨ bèʼì ghelɨ ɨ jelɨ wì ateyn.

²²Yi læ̀ nà ghɨ tèyn bòm ta Bôbo Fɨyini nɨ̀n saʼ nsaʼsɨ ghesɨ̀nà. Wù n-ghɨ wul ɨ tisɨnɨ nɨ̀ ghesɨ̀nà, ghɨ fòyn ghesɨ̀nà. À n-ghɨ ŋweyn vzɨ̀ a wu nì bœ̂sɨ̀ ghesɨ̀nà.

²³Ghɨ teytɨ meyn nkfɨ̀sɨ sɨ a yi a ngùʼsɨ. Mbàŋ sìsɨ̀ a ghɨ ghàŋsɨ ndzɨ ìwoŋ nɨ̀ àŋena ateyn felɨ meyn, ndzɨ ìwoŋ nɨ̀ àŋena na bu ghaŋlɨ̂ wì iyvɨ. Ghèsɨ nì ghwôtɨ̀ ìghaʼ/ɨfwo ɨ jûŋ nɨ̀ àŋena nò ɨ̀ jɨ̀m, a nô mɨ ghelɨ ghɨ lvɨŋnɨ læ̂ nà kelɨ ɨwu àŋena ɨfwo nâ ghè a ghɨ yɨ̀ iwòŋ lì.

²⁴Nô wùl ɨ̀mòʼ ta wù n-chi a Zayòn læ̀ nà bu dzɨ̀ wì na yi n-koʼi-à. Bôbo Fɨyini læ̀ lêsɨ̀ fu mbɨsɨ ghelɨ ghì a ghɨ n-chi afu.