Isaiah 34

Fɨyini fɨ læ̀ saʼ tɨ̀laʼ tɨ mbzɨ

¹Zɨ̀ ghelɨ tɨlaʼ tɨ mbzɨ nô ghɨ̀ jɨ̀m, yì kɨŋtɨ gvì ɨ̀ yvɨ̀tɨ.

Yì toʼ yvɨ̀tɨ.

Nô mɨ ghà ta kɨ n-ghɨ a mbzɨ yvɨtɨ.

Nô mɨ ghà ta kɨ n-chi atû nse toʼ yvɨ̀tɨ.

²Bôbo Fɨyini nyoʼsɨ meyn ɨ̀toŋ sɨ̂ ghelɨ tɨlaʼ tɨ mbzɨ nô ghɨ̀ jɨ̀m.

Wù nyoʼsɨ meyn ɨ̀toŋ nô sɨ a ŋaŋ sɨ̂ ìnôyn i sùgèyʼsɨ̀ nɨ̀ àŋena nô ì jɨ̀m.

Wu n-bebsɨ̂ mesì kɨ mesi àŋena.

Bôbo nɨn ni-à a ghɨ zuetɨ àŋena nô ghɨ̀ jɨ̀m iwòŋ.

³Ghɨ læ̀ nà zue wul sɨ ateyn, mâʼ kɨ maʼ.

Tɨgvɨyn tɨ ghêltɨ̀ læ̀ fœ̂ ɨlwèʼ nà lɨ̂m kɨ tèyn nsul.

Mɨ̀luŋ mɨ̀ àŋena læ̀ nà kalì a kfɨynsɨ kɨ̀ ta jvasɨ.

⁴Mɨ̀njèyn læ̀ yalà sɨ ɨyvɨ nô ɨ̀n jɨ̀m.

Ghɨ læ̀ buʼnɨ̂ ìyvɨ kɨ̀ ta ghɨ bùʼnɨ ŋwàʼlɨ̀ sɨ lèm.

Mɨ̀njèyn læ̀ chemlɨ̂ sɨ iyvɨ nô ɨ̀n jɨ̀m,

kɨ̀ ta tɨfvɨ tɨ fɨ̂kàʼ fɨ mɨtàm ɨlvɨ ta tɨ yum.

Mɨ̀ læ̀ chemlɨ̂ kɨ ta fîksɨ̀ ɨlvɨ ta sɨ yum

⁵Mà Bôbo Fɨyini læ̀ bebsɨ̂ mesì nô mɨ ghà ta kɨ n-ghɨ iyvɨ,

ɨ̀ sùʼi kàlì gvì a Edòm ɨ̀ saʼ bèbsɨ ghelɨ ateyn,

ɨ ghelɨ ghì a mà lèm na mɨ n-bebsɨ kɨ ghɨ̀ jɨ̀m.

⁶Fɨ̀nyuè fɨ Bôbofɨ læ̀ nà bâŋ kɨ mɨ̀luŋ nɨ̀ ìso i,

a ghɨ mɨ̀luŋ mɨ̀ njɨ̀sɨ̀ nɨ̀ ɨmzɨ̂ bzɨsɨ ndoŋ.

À læ̀ nà ghɨ ìso ma yi fvɨ̀ a nfyeŋsɨ akɨŋ nɨ̀ ɨ̀ywaʼɨ.

Bôbo nɨn kelɨ ìfu sɨ fu a Boslà.

Wù n-kelɨ nyamsɨ sɨ sɨ a Edòm sɨ dvɨ̂ kɨ tèyn.

⁷Ghelɨ læ̀ nà kfɨtɨ-à, nô mɨ ɨghî a ghɨ n-to ta mbòŋsɨ̀ ɨ kfɨtɨ-à,

ɨghî a ghɨ n-kelɨ adyaʼ ta nyamsɨ mbòloʼ sɨ lûmnɨ̀sɨ̀ ɨ kfɨtɨ-à.

Fɨluŋfɨ læ̀ bâŋ kɨ ɨlwêʼ ɨ̀ jɨ̀m a àŋena ilaʼ.

Nse læ̀ nà sayn kɨ tèyn woŋ, a ghɨ ìso ma yi fvɨ̀ a ghelɨ ɨwùyn.

⁸Achi a nɨn gvi-à ta ka Bôbo Fɨyini sɨsɨ mbɨ sìsɨ̀ a àŋena nì.

Bèŋ î lì læ̀ gvi-à, a Bôbo ni a awo a bɨ-a kì a àŋena nì sɨ̂ Zayòn kasi ku àŋena.

⁹Jvasɨ Edòmsɨ̀ læ̀ kasi-à nà tâŋ kɨ ta achaʼ a ntòynsɨ̀,

Abɨlà læ̀ nà lalì a Edòm lûm kɨ ta mɨkâyn.

Nse Edòm læ̀ nà lûm kɨ ta ale ɨlvɨ ta ghɨ n-buŋsɨ nɨ̀ ɨ̀vɨsɨ.

¹⁰Ɨvɨs ateyn læ̀ nà balî nɨ̀nchuè balî nɨ̀ntuʼ, lɨmâ wì.

Fɨleʼ fɨ ateynfɨ læ̀ nà dvɨs kɨ dvɨs sɨ a mɨlvɨ ɨ̀n jɨ̀m.

Ajaŋà læ̀ nà koʼ kɨ tèyn kɨ læ chwò,

wul ɨ bu tom wi avɨ afu.

¹¹À læ̀ nà sɨ chî kɨ ɨ̀ngêynɨ̀ nɨ̀ ɨ̀ŋòʼingumi baʼsɨ̂ nɨ̀ nyamsɨ ɨtwaʼ sɨ lisɨ ilaʼ nâ ghè.

Bôbo Fɨyini læ̀ bebsɨ̂ Edòm ɨ̀ chèm aleŋ a li-a a ghɨ na mô kɨ nô sɨ a ngàyn.

Ilaʼi læ̀ nà befa, ghɨ fêʼnɨ̀ kɨ nɨ̀ Edòm.

¹²Fòyn læ̀ bu fì koʼ wi a Edòm bòm ta ilaʼi læ̀ nà bu ghɨ wi sɨ saʼ.

Ghelɨ ghɨ tisɨnɨ læ̀ mæ̂ sɨ afu nô ghɨ̀ jɨ̀m.

¹³Ɨtwaʼ ɨ sùnjoŋnjoŋsɨ læ̀ koʼa ɨ̀ chɨ̀ytɨ ntoʼ Edòm.

Ntàŋsɨ àlàm nsesɨ nɨ̀ àmbyèyn akù-a læ̀ koʼ chɨytɨ̂ ntèʼ sɨ tosɨ nɨ̀ àŋena.

À læ̀ nà sɨ chî kɨ bɨsɨ ɨtwaʼ nɨ̀ ɨ̀ngêynɨ̀ afu.

¹⁴Bɨsɨ ɨtwaʼsɨ nɨ̀ nyamsɨ nse iyum sɨ lisɨ læ̀ nà chwônɨ̀ kɨ afu tèyn,

ghɨ duʼa yvɨ kɨ ta mɨ̀chuê nɨ̀n ndzɨ̂nɨ̀, jâŋtɨ̀ ɨ̂n lì.

Ɨtuʼ læ̀ nà jɨ-a, ɨvɨ̂ŋ ɨ ywo a nyâmsɨ̀ ɨ ni ndu yvɨ̀tɨ kɨ afu.

À læ̀ nà ghɨ kɨ nô àlêʼ a yvɨtɨnɨ-a nɨ̀ àŋena.

¹⁵Ɨ̀ngêynɨ̀ læ̀ nà bâʼlɨ kɨ ndosɨ àŋena afu, lêm àwum,

kê woyn, fî tôʼnɨ̀ nɨ̀ àŋena kɨ̀ afu.

Ɨwumawum læ̀ nà boŋ ndu yvɨ̂ŋtɨ̀ kɨ afu,

nô mɨ alûmnɨ̀ à kà ɨ chɨ̂yntɨ̀ kɨ ŋweyn aki-a.

¹⁶Yì jàŋ a ŋwàʼlɨ̀ nɨ̀ Bôbo Fɨyini a yì yeyn ta wù bè afu na,

“Nô àfo àmòʼ antêynɨ̀ ɨ̀fwo nâ ghàyn læ̀ lê wì.

Nô mɨ alûmnɨ̀ à kà læ̀ nà jelɨ̀ kɨ ŋêyn aki-a.

Yi læ̀ nà ghɨ kɨ tèyn bòm ta à fu ŋweyn isaʼ nâ yèynì,

Ayvɨs a ŋweyn a ɨ ghɨ sɨ læ̀ sɨ yvɨ̀ŋtɨ ɨfwo nâ wèyn.”

¹⁷Bôbo Fɨyini feʼ meyn ɨ̀lwêʼ a Edòm,

ɨ̀ gwôtɨ̀ sɨ̂ ɨ̀fwo nâ wèyn, nô mɨ à kà na kelɨ àlêʼ a ŋweyn.

À læ̀ nà kelɨ kɨ ɨ̀fwo nâ weyn kelɨ Edòm nô ta ka ghɨ̀ læ̂ ghɨ̀,

a koʼ nô mɨ àjâŋ à kà, kɨ nà chî kɨ afu.