Isaiah 40

Ichfɨ̂nɨ̀ i Fɨyini sɨ̂ ghelɨ ŋweyn.

¹Fɨyini feyfɨ bè na, “Mɨ n-nì kfɨmtɨ̂ ghelɨ̀ ghem. Mɨ n-nì yvɨ̂sɨ̀ mɨ̀tem mɨ̀ àŋena.

²Yì taŋi sɨ̂ ghelɨ Jèlusalèm nɨ̀ àtem a juŋà/nɨ̀ gyà i bol. Yì laʼi sɨ̂ àŋena na àŋena yeyn meyn ngeʼ ɨ̀ kfeyn/ɨlvɨ ngeʼ nɨ̀ àŋena mæ meyn. Yì be sɨ̂ àŋena na mà Bôbo Fɨyini nî meyn àŋena lâʼ mbɨsɨ àŋena fì yòmtɨ.

³Yì yvɨ ta wùl nɨ̀n jâŋ bê a nse iyum na, “Yì faytɨ dzɨ̂ Bôbo/yì nà nàynà. Yì ni mɨdzɨtɨ̂ mɨ̀ ŋweyn na naynà a nse iyum.”

⁴Ghɨ n-kelɨ sɨ kfɨ̀ysɨ̀/luynsɨ nô mɨ àfoŋlɨ à kà, na kfɨynsɨ ghaʼlɨnɨsɨ nɨ̀ sɨ lælɨnɨsɨ seynlɨ sùʼi. Dzɨsɨ ngolinɨsɨ nɨn kelɨ sɨ nà naynà, na ghɨ kfɨysɨ mɨbɨlɨ̂ a dzɨsɨ nô ɨ̀n jɨ̀m ta ka nô ɨ̀lwêʼ ɨ̀ jɨ̀m na ghɨ tɨ̀bal.

⁵Bôbo Fɨyini læ̀ dyêyn ìŋwâʼ i ŋweyn, a ghelɨ ghɨ̀ jɨ̀m yeyn. À n-taŋî/à bè Bôbo Fɨyini.

⁶Wùl nɨ̀n bê meyn sɨ̂ mà na mà byal ɨ̀ tàŋi sô sɨ a ŋaŋ, ma bɨf sɨ̂ ŋweyn na, “Mà byal bè nô na gha? Wu bè na, “Jaŋ bè na ghelɨ ghɨ̀ jɨ̀m nɨn ghɨ kɨ ta afûʼ, ijôf i àŋena i ɨ ghɨ kɨ ta àmbùs.

⁷Ɨ̀nfùʼ nɨ̀n nî mɨ kfɨ, àmbus à ɨ yàlà (Bôbo nɨn tum àfyef a lûm, kɨ nì ɨ̀nfùʼ ɨ kfɨ, àmbùsà ɨ yàlà. Yi n-ghɨ kɨ nô samoʼ na ghelɨ nɨn ghɨ kɨ ɨ̀nfûʼ.

⁸Afuʼà nɨn kfɨ-a, ɨ̀nbùs ɨ yàlà mɨtì iwo i Bôbo Fɨyini ɨ ghɨ ma yi faŋ meyn kɨ̀ samoʼ.

⁹Ɨvzɨ̂ a wù n-gvî nɨ̀ ntum ì jùŋ sɨ̂ Zayòn koʼ tìmi nô atû fɨ̀nchoynchoyn a kfɨyn. Ɨvzɨ̂ a wù n-gvî nɨ̀ ndum ì jùŋ sɨ̂ Jèlusalèm na byal nô nɨ̀ gyà ito fâyn wì afo. Wù jaŋ ɨ̀ làʼì sɨ̂ ntèʼsɨ Judà na, “Fɨyini fɨ àŋena nɨn ghɨ afêyn.

¹⁰Yì yeyna! Bôbo Fɨyini nɨ̀n gvi-à. Wù n-kelɨ àdyaʼ, ghɨ sɨ gvì sɨ nà saʼ kɨ nô nɨ̀ ànkeyna. Wù n-gvî nɨ̀ ɨ̀myaʼtɨ vzɨ̀ a wù yɨ̀ iwòŋ/nɨ̀ ghelɨ ghì a wù bœ̀sɨ̀ iwòŋ/ghɨ sɨ màʼtɨ ghelɨ ŋweyn.

¹¹Bôbo Fɨyini nɨ̀n tôʼnɨ̀ nɨ̀ ghelɨ ŋweyn kɨ̀ ta nchì bzɨsɨ nɨn nî yi nà tôʼnɨ̀ nɨ̀ bzɨsɨ. Wu nì châʼsɨ̀ woyn njɨ̀sɨ̀ ɨ̀ nà tisɨ̂ ndû nɨ̀ njɨ̀ sîsɨ̀ a sɨ bu nyoŋsɨ woyn.

¹²À ti kàʼ a nà kya ndà ta mu nɨ̀n ghɨ a jvâ ito ma wù fèʼ kɨ̀ ital awu a? À ti kàʼ a nà kya ndà ta iyvɨ i nɨn ghɨ ma wù fèʼ kɨ nɨ̀ àwu a? À tìmi fèʼ ndà nsesɨ/abɨ̂l nô sɨ̀ jɨ̀m/à jɨ̀m a mbzɨ a? Wùl bû tìmi nà kya ta ɨfyêʼ ɨ kfɨynsɨ nɨn ghɨ.

¹³Wùl nɨ̀n kya wi ikfâʼtɨ̀ i Bôbo Fɨyini, wùl ɨ kfeynɨ̂ wì sɨ tebtɨ Bôbo Fɨyini/sɨ fèʼtɨ̀ iwo zɨ̀ a Bôbo Fɨyini nɨn kelɨ sɨ nì.

¹⁴Bôbo Fɨyini bû tìmi loyn na wùl ɨ̀ fu itof sɨ̂ ŋweyn/loyn itof sɨ̂ wùl. Wù bû tìmi loyn na wùl ɨ̀ dyeyn dzɨsɨ àti-ati sɨ̂ ŋweyn/ta ka wù na chî kɨ àtì-ati. Wùl ɨ̀ bû tìmi yèʼi ŋweyn nɨ̀ ìtof i, bula wùl ɨ̀ timi yèʼi ŋweyn sɨ nà yeyn keli awo.

¹⁵Samoʼ, Bôbo Fɨyini nɨ̀n ki tɨ̀laʼ tɨ hɨ ta iŋelaŋel i mu a ntòyn mù. Àŋena nɨn hɨ kɨ ta abɨ̂l ɨlvɨ ta ghɨ fèʼ. Wù n-fêʼ ɨ̀tuŋ ngòʼsɨ̀ antêynɨ̀ jvà kɨ ta wù fèʼ àbɨ̂l.

¹⁶Ɨ̀nkàʼ mɨ̀ Lebanòn bu kfèyn sɨ sɨ kwò ɨvɨs ateyn abaŋ ifu, nyamsɨ ɨ kfeyn wi sɨ fu ifu i nyoʼnɨ-i ateyn.

¹⁷Nô tɨ̀laʼ tɨ̀ jɨ̀m tɨ̀ nɨn kfeyn wi afo sɨ̂ Bôbo Fɨyini. Wù n-yeyn tɨ̀laʼ tɨ ateyn tɨ ghɨ ta abɨ̂l/tɨ ghɨ kɨ àlêʼ a yuma, kfeyn wi nô afo.

¹⁸Ghɨ ti kàʼ ghɨ nà fêʼnɨ̀ nô Fɨyini ŋêyn ndà? Nô àlɨŋsɨ/afo a li-a nɨn ghɨ wi a ghɨ kàʼ a ghɨ feʼnɨ Fɨyini nɨ̀ ànkeyna.

¹⁹Wùl ɨ̀ vzɨ̀ a wù n-chufɨfwo nɨn nî wu chuf ànfèʼsɨ̀, ɨvzɨ̂ a wù ntsɨ alâm ɨ lom nɨ̀ àso ɨkwo a baŋnɨ-a, ɨ nyòtɨ̀ nɨ̀ nchaʼ ma ghɨ faytɨ nɨ̀ àso ɨkwo a fɨfâ.

²⁰Wùl ɨ̀ vzɨ̀ a wù n-kelɨ wi ɨkwo sɨ yuyn ɨfwo ateyn nɨn nî wu kini fɨ̀kâʼ fìfɨ̀ a fɨ nto ma fɨ kàʼ fɨ bû bvɨ̀k. Wù n-nî wu kini wul ɨ vzɨ̀ a wù n-chuf ɨfwo wùl àteyn ɨ chuf ànfèʼsɨ̀ ateyn ma kɨ kàʼ kɨ bû fe.

²¹À ti n-ghɨ na yi n-kya wi bula yi timi yvɨ ma? Ba à ti n-ghɨ na ghɨ n-bu læ fèʼtɨ sɨ̂ zɨ̀ nô sɨ a nzɨ̀tɨ ma? À ti n-ghɨ na yi bû yeyn kèli dzɨ zɨ̀ a/ghɨ n-læ faytɨ mbzɨ ateyn ma? a mbɨ nɨn læ zɨ̀tɨ ateyn ma?

²²Fɨyini fɨ nɨn duʼ achɨ a tɨ̂fòyn nɨ̀ ŋweyn iyvɨ atu mbzɨ (wù n-ki suʼsɨ̂ nɨ̀) Ghelɨ ghì a ghɨ n-ghɨ a mbzɨ nɨn ghɨ kɨ ta ingvɨ̀yn. Wù faytɨ meyn ìyvɨ yi na ghɨ kɨ ta abâs afo a ghaŋsɨnɨ-a ɨlvɨ ta ghɨ dyòtɨ̀/ndòtɨ̀ sɨ faytɨ ɨtwo sɨ nà chi ateyn.

²³Wù n-suʼsɨ̂ ghelɨ ghɨ tisɨnɨ ghɨ to sɨ a mɨchɨ nɨ̀ àŋena, nî na ghelɨ ghɨ saʼnɨ a mbzɨ na kfeyn wi afo/iwo.

²⁴Àŋena nɨn ghɨ kɨ ta ɨnkâʼ a ghɨ yel fɨ na/ɨfwo a ghɨ tòʼ wu na bu lemâ lèma, aghaŋ ateyna ɨ bu duʼ tɨ to a nse, Fɨyini fɨ tum àfyef kɨ gvî nèʼsɨ̀ fɨ yum. Afyef ateyn a tâynsɨ̀ ɨ̀fwo ateyn kɨ̀ ta ɨywafà.

²⁵Bôbo Fɨyini ɨ Fɨyini fɨ laynɨfɨ nɨ bɨfɨ na, “Ghɨ ti kàʼ ghɨ fèʼnɨ̀ mà nô nɨ̀ ndà? À ti n-ghɨ nô ndà a wù n-kfeynɨ ta ma a?

²⁶Yì ki kòʼsɨ nɨ̀ ìyvɨ i. Yi n-kfâʼ na ɨfwo nâ wèyn nô ɨ̀ jɨ̀m iyvɨ nɨn ghɨ ma à fàytɨ ndà? À fàytɨ mà Bôbo Fɨyini ɨvzɨ̂ a wù n-tisɨ mɨnjêyn kɨ fɨ̀moʼ fɨ̀mòʼ, kya/jâŋ nô mɨ fɨ̀kà kɨ̀ izɨyn izɨyn, bòm àdyaʼ a bemnɨ-a kì a mɨ n-kelɨ ma nô fɨ̀mòʼfɨ kàʼ fɨ bû lè.

²⁷Zɨ̀ woyn Jàkôb nɨn dzɨ̂ ghà? Bòm ghà ta zɨ̀ ghelɨ Isìlæ̀ nɨn dzɨ̂ bê na, “Bôbo nɨn kya wi ngeʼ zɨ̀ a yì n-ghɨ ateyn a?

²⁸À tì n-ghɨ na yi n-kya wi ma? Ba à ti n-ghɨ na yi bu tìmi yvɨ ma? Bôbo Fɨyini nɨn ghɨ Fɨyini ma fɨ faŋ meyn kɨ̀ samoʼ. À fàytɨ ŋweyn mbzɨ ì jɨ̀m. Wù n-ghɨ Fɨyini lum bolɨ wi, bolî wì. Wù n-kya nô mɨ ghà, fêʼnɨ̀ wì itof i ŋweyn ŋêyn wùl.

²⁹Wù n-fu àdyaʼ sɨ̂ ghelɨ ghì a ghɨ n-boli, kfeynsɨ̂ àdyaʼ sɨ̂ ghelɨ ghɨ bolɨ.

³⁰Nô mɨ ngvaʼ wùl nî yi bol ɨ nà bu kelɨ wi adyaʼ. Adyaʼa nɨn nî kɨ mæ̀ sɨ ɨwùyn nɨ̀ ngvaʼ wùl àŋena boli ɨ felɨ.

³¹Mɨtì ghelɨ ghì a ghɨ n-yeʼtɨ kɨ ɨwùyn nɨ̀ Bôbo Fɨyini ɨ kelî àdyaʼ a fɨ-a. Àŋena læ̀ nà tâyn iyvɨ ta mbuʼ àwùmawum. Àŋena læ̀ nà nyɨŋa, bolɨ wi. Àŋena læ̀ nà jelɨ̀ ndyèynsɨ̀ mɨtì bolî wì.