Isaiah 42

Ghelɨ ghɨ felɨnɨ nɨ̀ Bôbo Fɨyini

¹Ɨwêyn nɨn ghɨ wul ɨ̀ fèlɨnɨ nɨ̀ mà, ma fu àdyaʼ sɨ̂ ŋweyn. À n-ghɨ ɨvzɨ̂ a mà choʼ, wu ni-à ma saŋlɨ-à. Mɨ n-fu àyvɨs à kema sɨ̂ ŋweyn, a wù na fêʼtɨ̀ àwo a àtì-ati sɨ̂ tɨ̀laʼtɨ.

²Wù læ̀ byal wi sɨ̂ wùl kèsa sɨ taŋi sɨ̂ wùl nɨ̀ gyà ito. Wùl ɨ̀ læ̀ yvɨ wi gyâ ŋweyn afàf.

³Agâŋlɨ̀-à læ̀ kolà wì alèʼ ma à nì ŋweyn. Wù læ̀ nî wì iwo i bzɨ-i nô mɨ sɨ̂ wùl ɨ bol. Wù læ̀ nà nî kɨ àwo kì a kɨ n-ghɨ àtì-ati.

⁴Wù læ̀ nà kelɨ àtem a to-a, bolî wì nô ta ka wù læ nì ghelɨ keli nchînɨ̀ àtì-ati kɨ̀ mbzɨ ì jɨ̀m. Iyeʼi i ŋweyni læ̀ ni-à a ghelɨ tɨlaʼ tɨ ndyèynsɨ/ɨtum na kòŋ kɨ koŋ sɨ nà yvɨtɨ iyeʼi i ŋweyn.

⁵À tàŋi Bôbo Fɨyini, ɨvzɨ̂ a wù fàytɨ iyvɨ ɨ̀ nì yi gwôsɨ̀ ndù. À fàytɨ ŋweyn mbzɨ nô mɨ nɨ̀ ghà ta kɨ n-ghɨ ateyn. À n-nî ŋweyn na ghelɨ na zuêsɨ̀-à, a fu ŋweyn ichi sɨ̂ ghelɨ a mbzɨ.

⁶Mà Bôbo Fɨyini choʼ meyn và na wà dyeyn nchînɨ̀ àtì-ati sɨ̂ ghelɨ. Ma choʼ meyn và na wà ni mɨ̀kàyn mzɨ̀ a mà yɨ ghesɨ̀ ghelɨ Isìlæ̀ na ghɨ ìbayn sɨ̂ tɨ̀laʼtɨ mbzɨ./ghelɨ ɨtum.

⁷Wa n-nì ni-à a ɨ̀nfèf na yeyna, ɨ̀ fvɨ̀sɨ̀ ghelɨ ghì a ghɨ n-ghɨ a ndô nchaʼ. Wa n-nì fvɨsɨ̀ ghelɨ ndô nchaʼ ghɨ duʼ ɨlwèʼ wu fɨ̂m kɨ tèyn tìk.

⁸À n-ghɨ mà Bôbo Fɨyini, Bôbo nɨn ghɨ izɨyn ì yemi. Mɨ n-gwô wì ɨkfɨm wom/ikoʼsɨ ì yemi ghesɨ̀ fɨyini fɨ lifɨ, ghɨ kelɨ wi sɨ nà koʼsɨ fɨyini fɨ lifɨ a bu kɨ mà.

⁹Awo kì a mɨ n-læ bè na kɨ n-læ̀ gaynà sɨ ghɨ ma kɨ gâyn meyn. Mɨ n-fèʼtɨ̀ àwo a fɨ-a kì a kɨ n-gàyn. Mɨ n-jàŋ laʼì-à jæ na kɨ gayn. Mɨ n-fèʼtɨ̀ àwo ateyn sɨ̂ zɨ̀.

Njàŋ ìkòʼsɨ.

¹⁰Yì yem njàŋ ifɨ ɨ̀ kòʼsɨ Bôbo Fɨyini. Yì na koʼsɨ̂ ŋweyn kɨ̀ mbzɨ ì jɨ̀m. Zɨ̀ ghî a yi n-jelɨ̀(a ngùʼsɨ) a jvâ ighaʼnɨ na koʼsɨ̂ ŋweyn. Ɨfwo vzɨ̀ nô ɨ̀ jɨ̀m a wu n-ghɨ a jvâ ighaʼnɨ na koʼsɨ̂ ŋweyn. Zɨ̀ (ghelɨ ɨtum) ghì a yi chi a tɨ̂laʼ ndyèyn ɨ dyefà, yì na koʼsɨ̂ Bôbo Fɨyini.

¹¹Nse iyum nɨ̀ ntèʼ sîsɨ̀ a sɨ n-ghɨ ateyn na koʼsɨ̂ Bôbo gyasɨ ɨ lâytɨ̀-à. Zɨ̀ ghî a yi n-chi a Kedà na koʼsɨ̂ Bôbo. Zɨ̀ ghelɨ Selà na yem njàŋsɨ̀ dyala. Yì timi atû kfɨ̀ynsɨ nà byala, (koʼsɨ̂ Bôbo Fɨyini).

¹²Tɨlaʼ tɨ ɨtum tɨ na koʼsɨ̂ Bôbo Fɨyini. Àŋena na byala koʼsɨ̂ Bôbo Fɨyini a tɨ̂laʼ tɨ ɨtum.

¹³Bôbo Fɨyini læ̀ fvɨ̂ kɨ nô ta sugèyʼ ito, ɨ wul wu kya sɨ tɨm iwòŋ nô a jûŋ, gvɨ̂tɨ̀ sɨ nù.

¹⁴Ma chi mi meyn moŋ sɨ a ndyèyn ìdyà. Ma ti meyn chìmi moŋ ɨ̀ ghal ngêŋ yem. Mɨtì mɨ n-byalɨ lvɨ̂yn kɨ̀ ta wul ɨ wi ɨlvɨ ta wù n-kɨŋ sɨ bzɨ wayn, zuêsɨ̀ nò sɨ ŋaŋ ma azuê a ŋweyna sɨ tɨmsɨ-à.

¹⁵Mɨ n-bebsɨ̂ kfeynsɨ̂ nɨ̀ ɨ̀lwêʼ ɨ koʼnɨ. Mɨ n-ni-à a afûʼ kì a kɨ kòʼ ateyn kfɨ nô à jɨ̀m, a ɨ̀nkàʼ kfɨ nô ɨ̀n jɨ̀m. Mɨ n-ni-à a jvasɨ kasi sɨ a nse iyum ɨ̀ yùmsɨ mɨ̀chɨm.

¹⁶Mɨ n-nì nà tisɨ̂ ɨ̀nfyèf a dzɨsɨ bula àŋena timi nà kya. Mɨ n-nì tôʼnɨ̀ nɨ̀ àŋena a ghɨ chwo a dzɨsɨ bula àŋena timi jèl ateyn. Mɨ n-nì ni-à a abe a fɨmnɨ-a na ghɨ ɨ̀tuʼ ɨ laynɨ sɨ̂ àŋena, ɨ̀ nì a mɨ̀dzɨtɨ̂ mzɨ̀ a mɨ̀ n-bef na nàynà. À ti awo kì a ka mà Bôbo Fɨyini ni. Mɨ n-nì visî wi àŋena.

¹⁷Mɨtì mɨ n-nì bêyn jɨm, ɨ̀ wùmsɨ ghelɨ ghì a ghɨ n-yeʼtɨ ɨwuyn nɨ̀ mɨ̀yini, bê sɨ̂ ɨ̀nfyèʼsɨ̀ na, “Yi n-ghɨ mɨyini.

Atu a tonɨ-a nɨ̀ ghelɨ Isìlæ̀

¹⁸Zɨ̀ ghêyn a yi n-yvɨ wi awo tèyn, yì yvɨtɨ. Zɨ ɨ̀nfyèf, ki a ka yì yeyn.

¹⁹Ànfèfà nɨn ghɨ ndà a bu wul ɨ̀ felɨnɨ nɨ̀ mà a? Wù n-yvɨ wi awo kɨ̀mɨ ta wùl ɨ̀ ntum vzɨ̀ a mà tum. Nô wùl nɨ̀n ghɨ wi a wù fèf ta ɨvzɨ̂ a mà choʼ na wù na felɨ̀ sɨ̂ mà nɨ̀n àtem a ŋweyn à jɨ̀mà. Wùl nɨ̀n ghɨ wi a wù fèf ta wul ɨ̀ felɨnɨ nɨ̀ Bôbo Fɨyini.

²⁰Yi yeyn meyn àwo kɨ dvɨ̂ kɨ tèyn mɨtì lî wì na à n-ghɨ ìwo. Yi gasi meyn ɨ̀tuŋlɨ sɨ nà yvɨ awo mɨtì yvɨ wi nô ìwo.”

²¹Bôbo Fɨyini nɨn ghɨ Fɨyini fɨ laynɨfɨ. Wù ni meyn isaʼ i ŋweyni na to-a fî koʼnɨ-à wu kɨŋ na ghelɨ na ngvɨmlɨ̂ tɨ̀saʼ tɨ ateyn.

²²Mɨtì ghelɨ ghaytɨ meyn ghelɨ ŋweyn ɨ̀ lì lù nɨ̀ ɨ̀fwo àŋena. Ghɨ fotɨ meyn àŋena nô ghɨ jɨ̀m a ndô nchaʼ, ɨ̀ lèm àŋena ɨlwèʼ ɨleytɨnɨ a ndô nchaʼ. Àŋena kasi meyn sɨ ɨfwo a ghɨ yɨ̀ iwòŋ, wùl ɨ ghɨ wi sɨ gàmtɨ àŋena. Ghɨ kumtɨ meyn ɨ̀ lù nɨ̀ àŋena, wùl ɨ ghɨ wi sɨ bè na, “Yì kasi tsɨ̀ynsɨ àŋena ghɨ gvi.”

²³À ti n-ghɨ ndà a yi antêynɨ̀ a ka wù (faytɨ) yvɨ̀tɨ ìwo nâ yèynì a? A ti n-tòʼ yvɨtɨ̂ ndà sɨ nà tôʼnɨ̀ a mɨchɨ ɨ̀n gvinɨ̂ a?

²⁴À nì ndà na mbàynɨ̀ sɨ ghelɨ ndo nɨ̀ Jàkôb ghaytɨ àŋena a? À nì ndà na ghɨ kumtɨ lù nɨ̀ ɨ̀fwo ghelɨ Isìlæ̀ a? À tî nì Bôbo Fɨyini. Ghesɨ̀na bû jèl a dzɨ ghê wù n-kɨŋ na ghɨ na jelɨ̀ ateyn, ɨ̀ faŋ tɨ̀ yvɨ̀nɨ isaʼ i ŋweyn.

²⁵À ti iwo zɨ̀ a wù dyèyn ɨtoŋ ɨ baŋnɨ nɨ̀ ŋweyn sɨ̂ ghesɨ̀nà, ɨ̀ nì ghesɨ̀na yeyn ngeʼ bòm ìwoŋ. Ɨtoŋ ɨ baŋnɨ nɨ̀ ŋweyn nɨn balî atû Isìlæ̀ kɨ̀ ta ɨvɨs ɨlvɨ ta wu n-bali mɨtì ghesɨ̀nà ɨ yeyn kelî wì. Wu n-nyôʼlɨ̀ ghesɨ̀nà mɨtì ghesɨ̀nà ɨ lî wì mɨ na à n-ghɨ ìwo.