Isaiah 43

Ngàmtɨ̀ ghelɨ Isìlæ̀/ Fɨyini fɨ ɨ chfɨ̀nɨ̀ sɨ gàmtɨ ghelɨ Isìlæ̀

¹Bôbo Fɨyini nɨn taŋî/bê sɨ̂ zɨ̀ lvɨ̂yn na, ɨvzɨ̂ a wu n-bom/faytɨ zɨ woyn Jàkôb, ɨvzɨ̂ a wù fàytɨ ghelɨ Isìlæ̀. Wù n-bê na, “Ka yi n-fàyn. Ma yuyn meyn àtu à ki-a, ɨ̀ jàŋ zɨ̀ kɨ̀ izɨyn, yi na ghɨ ghelɨ̀ ghem.

²Mɨ n-nì nà ghɨ ghesɨ̀nà ɨlvɨ ta yi n-jelɨ̀ a jvâ yi sœ̂ kɨ tèyn. Yi n-chwò nà jelɨ̀ antêynɨ̀ mù/jvasɨ mɨtì ma mû kàʼ mɨ bû lì zɨ̀/ma yì kàʼ yi bû leŋ. Yì læ̀ nà toynɨ̂ chwô antêynɨ̀ ɨvɨ̀s wu nyôʼ wì zɨ, ilemi ɨvɨs i læ̀ nyôʼ wì wul sɨ̂ zɨ̀.

³À n-ghɨ mà Bôbo Fɨyini ɨ Fɨyini fifɨ, ɨ Fɨyini fɨ laynɨ fɨ nɨ̀ ghelɨ Isìlæ̀. À bœ̀sɨ̀ mà bœ̀sɨ̀ zɨ̀. Mɨ n-ni-à a ghɨ tɨ yɨ̀ Ijìb ɨ̀ yuyn atu à ki-à. Mɨ n-nì-à a ghɨ tɨm yɨ Kûsh nɨ̀ Sebà ta ka yì bœ/keli mbôynɨ̀.

⁴Mɨ n-nì-à a ghɨ tɨm yɨ tɨlaʼ tɨ litɨ ɨ̀ yuyn atu à ki-a bòm ta iwo ì zɨ-i nɨn to nô a jûŋ sɨ̂ mà, fî koʼnɨ-à, ma kôŋ zɨ̀.

⁵Ka yi n-fàyn, mɨ n-ghɨ ghesɨ̀nà amoʼ. Mɨ n-nì kasî gvî nɨ̀ woyn ghi ghì a ghɨ n-ghɨ abàs ghè a ɨchfɨ̂ iyvɨ i nɨn sal ateyn, ɨ̀ yvɨ̀ŋtɨ̀ zɨ̀ ghî nô ghɨ̀ jɨ̀m a yi n-ghɨ abàs ghè a ɨchfɨ̂ iyvɨ i nɨn sœ ateyn.

⁶Mɨ n-nì kâyn sɨ̂ ghelɨ ghì a ghɨ n-saʼ abàs ikuè na àŋena visi ghelɨ̀ ghem, ɨ̀ kàyn sɨ̂ ɨghî a ghɨ n-saʼ abàs itsɨyn na ka ghɨ fî ghal lèm ghelɨ̀ ghem. Mɨ n-nì kaynà a àŋena visi woyn ghɨ lûmnɨ̀ nɨ̀ mà ghî a ghɨ n-ghɨ a tɨlaʼ tɨ ndyèyn, ɨ̀ vìsi woyn ghɨki nɨ̀ mà ghî a ghɨ n-ghɨ a tɨ̂ghaŋ tɨ mbzɨ.

⁷Àŋena nɨn ghɨ ghelɨ̀ ghem, ma mà fàytɨ àŋena na ghɨ na koʼsɨ̂ mà.

⁸Yì yvɨŋtɨ ɨ̀ gvì nɨ̀ ghelɨ̀ ghem. Àŋena nɨn kelɨ àsɨ mɨtì yeyn, kelɨ ɨ̀tuŋl;i mɨtì yvɨ wi awo.

⁹Yì jaŋtɨ tɨlaʼ nô tɨ̀ jɨ̀m tɨ gvi ɨ̀ yvɨ̀ntɨ̀. Nô Fɨyini fɨ ilaʼ fɨ lifɨ nɨn ghɨ wi a fɨ kàʼ a fɨ feʼtɨ awo kì a kɨ læ̀ jæ gàyn. Nô fɨlifɨ ɨ ghɨ wi a fɨ n-læ fèʼtɨ awo kì a kɨ n-ghɨ sɨ gayn lvɨ̂yn. Àŋena gvi nɨ̀ nchwòsɨ nsaʼ nɨ̀ àŋena sɨ dyèyn na àŋena nɨn kî àwo a jûŋ ta ka ghelɨ ghɨ li yvɨ ɨ̀ bè na, “À n-ghɨ samoʼ.”

¹⁰Bôbo Fɨyini bè na, “Yi n-ghɨ chwòsɨ nsaʼ nɨ̀ mà, ma ma choʼ meyn zɨ̀ sɨ a ghelɨ ghɨ felɨnɨ nɨ̀ mà. Mà nì tèyn ta ka yì na kya fî bimî ìwo zɨ̀ a mɨ n-bê, fì kièli na à n-ghɨ ma Fɨyini. Fɨyini fɨ lifɨ bû tìmi nà ghɨ sɨ baʼsɨ sɨ̀ mà, ghɨ wi sɨ læ̀ sɨ nà ghɨ.

¹¹À n-ghɨ kɨ mà Bòbo Fɨyini, wùl ɨ bu ghɨ wi a wù kàʼ a wù gamtɨ zɨ a bu kɨ mà.

¹²Mɨ n-læ meyn dyeyn baynsɨ àwo kì a ka kɨ gàyn , ɨ gàmtɨ̀ zɨ̀ ɨ jaŋ fèʼtɨ̀. Nô fɨyini fɨ atum antêynɨ̀ nɨ̀ zɨ̀ nɨn bu læ ni awo nâ kèynà a bu mà. Yi n-ghɨ chwò nsaʼ sɨ̂ mà sɨ dyèyn na mɨ n-ghɨ Fɨyini.

¹³Samoʼ mɨ n-ghɨ Fɨyini nô sɨ ɨtuʼ ɨwu asɨ. Nô wùl nɨ̀n ghɨ wi a wù kàʼ a wù fsɨ ngêŋ ŋweyn sɨ a ma awu, ma wùl kàʼ wu bû kfɨ̀nɨ ìwo zɨ̀ a mà nì.

Ghelɨ Isìlæ̀ ɨ leʼ ɨ lù sɨ a Babilòn

¹⁴Bôbo Fɨyini, ɨvzɨ̂ a wù yeyn atu à ki-a, ɨvzɨ̂ a wù n-layn bè na, “Mɨ n-tum sugèyʼsɨ̀ a Babilòn a sɨ gamtɨ ɨ̀ nì a àŋena leʼ nyɨ̀ŋnɨ a ngùʼsɨ ghê a àŋena nɨn koʼsɨ ɨwuyn bòm ɨ̀nseynsɨ tî.

¹⁵À n-ghɨ mà Bôbo Fɨyini, ɨvzɨ̂ a wù fàytɨ Isìlæ̀ ma à ti fòyn vzɨ.

¹⁶À n-ghɨ mà Bôbo Fɨyini, ni-à dzɨ̀ ɨ chwô antêynɨ̀ jvà. Mɨ n-ni-à ghelɨ ɨ dyâŋ a nse iyum antêynɨ̀ jvà ighaʼnɨ.

¹⁷Mɨ n-læ meyn bebsɨ sugèyʼ sɨ tosɨ, a ghɨ sugèyʼsɨ̀ jelɨ̀ atû mɨ̀nchaʼ mɨ̀ ìwòŋ nɨ̀ nyamsɨ kfaŋsɨ. Mɨ n-læ bebsɨ ɨ mèsi kɨ mesɨ àŋena, àŋena kfɨ mæ kɨ ta ilemi ɨvɨ̀s ɨlvɨ ta yi fɨ mæ̀ (nà bu balî wì).

¹⁸Yì lesɨ awo kì a kɨ chwò meyn. Ka yi n-fì kfàʼtɨ̀ àwo ma kɨ chwô meyn.

¹⁹Yì yeyna! Mà weyn nî iwo bula yi timi yeyn(i fɨ-i). Yi sɨ gaynà/yi yeyn gâyn gvî, à ti n-ghɨ na yi n-yeyn wi ma. Mɨ n-ni-à a dzɨsɨ na chwô a nse iyum, jvasɨ ɨ kalì a nse iyum.

²⁰Nyamsɨ ɨtwaʼsɨ nɨn ngvɨmlɨ̂ mà. Nyamsɨ nse iyum nɨ̀ ɨ̀ngêynɨ̀ ɨ ngvɨmlɨ̂ mà bòm ta mɨ n-ni-à mu ɨ fvɨ̂ a nse iyum, jvasɨ ɨ kalì a nse iyum ta ka ghelɨ̀ ghem ghì a mà choʼ na kelɨ mu sɨ nyvɨ.

²¹À n-ghɨ ghelɨ ma à n-læ bom/faytɨ kɨ nô mà nɨ̀ ngêŋ yem ta ka àŋena na koʼsɨ̂ mà.

²²Mɨtì zɨ̀ woyn Jàkôb bu tî lòyn igâmtɨ̀ sɨ̂ mà, ɨ̀ nà koʼsɨ̂ wì ma.

²³Yi bû gvì nɨ̀ njɨ̀sɨ̀ sɨ ifu i nyoʼnɨ-i sɨ̂ mà. Yi bû ngvɨ̀mlɨ mà nɨ̀ tɨ̀fu titɨ. Mɨ n-fu wi ngeʼ sɨ̂ zɨ sɨ nà bê na yì gvi nɨ̀ ìfu i ɨfwo ɨ yɨnɨ-i kèsa sɨ bè na yì gvi nɨ̀ ìleŋ i.

²⁴Yi bû tìmi yuyn ɨfwo ɨ lɨmtɨnɨ sɨ gvi nɨ̀ ɨ̀ŋweyn sɨ̂ mà. Yi bû tìmi sɨ̀ nyam ìfu ɨ̀ gvì nɨ̀ ìso ateyni sɨ̂ mà. Mɨtì yi n-kwo fu kɨ àdɨli sɨ̂ mà nɨ̀ mbɨ sisɨ. Ma bolɨ meyn awo a bɨ-a ghê a yi n-nî.

²⁵Nô mɨ tì, mɨ n-ghɨ Fɨyini fìfɨ̀ a fɨ n-lêsɨ̀ fu mbɨ sisɨ bòm wul ɨ̀ vzɨ̀ a mɨ n-ghɨ ɨ̀ŋweyn. Mà bu fì kfâʼtɨ̀/kelɨ wì mbɨ sisɨ a ma item.

²⁶Yì feʼtɨ læ̂ ìwo zɨ̀ a mà nì bèbsɨ sɨ̂ zɨ̀, gheɨ̀nà saʼ nsaʼ àteyn amoʼ. Yì feʼtɨ iwo ateyn sɨ dyèyn na yi bû bèbsɨ ìwo.

²⁷Ghɨ̀bo ghi ɨ ghɨ asɨ nɨn læ meyn nì mbɨ a ma asɨ, ghelɨ ghɨ tisɨnɨ nɨ̀ zɨ̀ ɨ to nɨ̀ àtu-a sɨ̂ mà.

²⁸Bòm tèyn, mɨ n-bebsɨ̂ ngàŋsɨ ndô mɨyini nɨ̀ zɨ̀. Mɨ n-nì-à a mbàynɨ̀sɨ tɨm yɨ̀ woyn Jàkôb, ɨ̀ nì a ghɨ na wêsɨ/lûʼsɨ̀ ghelɨ Isìlæ̀.