Isaiah 45

Bôbo Fɨyini ɨ choʼ Sylùs sɨ a wul ɨ̀ felɨnɨ nɨ̀ ŋweyn

¹Bôbo Fɨyini yisi meyn Sylùs sɨ a fòyn. Wù choʼ meyn ŋweyn na wù tɨm yɨ̀ tɨlaʼ. Wù tùm ŋweyn na wù su tɨfôyn. Bôbo Fɨyini ɨ nì choʼtɨ̂ disì àchfɨ̂ a mbàynsɨ ntèʼsɨ sɨ̂ ŋweyn. À n-bê Bôbo Fɨyini sɨ̂ Saylùs.

²Nô mà nɨ̀ ngêŋ yɨ ɨ nì nà ndû a wa asɨ nà bɨ̂ytɨ̀ kfɨynsɨ ghaʼlɨnɨsɨ nɨ sɨ lælɨnɨsɨ. Mɨ n-nì kôytɨ̀ àchfɨ̂ a mbàynsɨ̀ kì a ghɨ fàytɨ nɨ̀ ìdyayn i. Mɨ n-nì kôytɨ̀-à ɨ̀ bebsɨ mèsì kɨ̀ mesi akas kì a ghɨ fàytɨ ateyn ɨ̀ kòytɨ̀ mbàŋsɨ ateyn.

³Mà læ̀ fu ìghaʼ àŋena zɨ̀ a ghɨ n-lêm ɨlwèʼ ghè a ghɨ n-lêm ɨfwo ɨ jûŋ ateyn a nlèytɨ. Mà læ̀ fu ìghaʼ i àŋena zɨ̀ a ghɨ lèytɨ̀ ɨlwèʼ. Wa nì fsɨtɨ̂ ɨ̀fwo nâ wèyn kæ sɨ keli na mɨ n-ghɨ Bôbo Fɨyini, kèli na mɨ n-ghɨ Fɨyini fɨ ghelɨ Isìlæ̀ a mà li vâ na wà na felɨ̀ sɨ̂ mà.

⁴Nô mɨ ta wà n-kya wi ma, ma lem meyn và achɨ a ngaŋtɨnɨ-a na wà na tôʼnɨ̀ nɨ̀ woyn Jàkôb ɨ wul ɨ̀ felɨnɨ nɨ̀ mà. Ma lem meyn và na wà na tôʼnɨ̀ nɨ̀ ghelɨ Isìlæ̀ ɨ ghelɨ̀ ghem ghì a mà chòʼ meyn lèm.

⁵À n-ghɨ mà Bôbo Fɨyini, Fɨyini fɨ lifɨ ɨ bu ghɨ wi. Mɨ n-nì fu àdyaʼ sɨ̂ và nô mɨ ta wà n-kya wi ma, a wà na to.

⁶Mɨ n-nì nî tèyn ta ka ghelɨ keli na Fɨyini fɨ lifɨ nɨn ghɨ wi a bu kɨ mà. Ghelɨ mbzɨ nô ghɨ̀ jɨ̀m kɨ̀ sɨ zɨ̀tɨ̀ abàs ghè a ɨchfɨ̂ iyvɨ nɨn sal ateyn sɨ chem sɨ abàs ghè a ɨchfɨ̂ iyvɨ nɨn sal ateyn sɨ chem abàs ghè a ɨchfɨ̂ iyvɨ i nɨn sœ ateyn læ kelî na mɨ n-ghɨ Bôbo Fɨyini, Fɨyini fɨ lifɨ ɨ ghɨ wi a bu kɨ mà.

⁷A n-læ̀ faytɨ ma wèyn ɨ faytɨ ìbayn nɨ̀ àbe a fɨmnɨ-a. À bòysɨ mà bòysɨ ghelɨ, à fu kɨ̀mɨ mà fù ngeʼ sɨ̂ ghelɨ. À n-nî mà Bôbo Fɨyini nî àwo nâ kèynà.

⁸Iyvɨ i yi suʼsɨ àywòmbaŋ (Iyvɨ i ni ghès kfa nɨ̀ àywòmbaŋ a ɨlwêʼ na neʼà kɨ ta à n-suʼî ìvɨ. Mbàʼsɨ̀, yì suʼsɨ ivɨ a nse, nse yì dzɨsi ɨ̀ fsɨ̀sɨ̀ ìvɨ ateyn ɨ̀nfùʼ fvɨ nà teʼà ghɨ saʼ nsaʼ yes fyeʼtɨ̂ wì iwo ɨ̀ sòysɨ̀ ghès, a ghès bæ. Mà Bôbo Fɨyini, mà læ̀ ni-à a awo nâ kèynà gayn kɨ̀ ta mà fàytɨ meyn.

⁹Ndòyn nɨn ghɨ sɨ̂ wùl ɨ̀ vzɨ̀ a wù n-yôl sɨ̂ wùl ɨ̀ vzɨ̀ a wù fàytɨ ŋweyn. Wùl nɨn ghɨ kɨ ntòyn ta ghɨ bom. A achaʼ a ntòynà ti kàʼ a kɨ bɨ sɨ̂ wùl ɨ̀ vzɨ̀ a wù n-bom ntòynsɨ̀ na, “Wà n-nî ghà a? A ntòyn zɨ̀ a wù fàytɨ (bom) ti kàʼ a yì be sɨ̂ ŋweyn wu bom ghà ta wa bom ma, ma ke kɨ wi ɨlwêʼ vzɨ̀ a ka ghɨ na ghal mà ateyn a.

¹⁰Ndòyn nɨn ghɨ sɨ̂ wàyn vzɨ̂ a wù bɨf sɨ̂ bò ŋweyn na, ‘Wà bzɨ ghà wêyn a?

¹¹Bôbo Fɨyini, ɨ Fɨyini fɨ laynɨ nɨ̀ ghelɨ Isìlæ̀ bè na, “Ka yì fî bɨf awo kì a mɨ n-nì nî sɨ̂ wôyn ghem, kèsa sɨ nà tebtɨ (fêʼtɨ̀ àwo kì a ka mà ni nɨ̀ ɨ̀wu wom.

¹²À n-læ faytɨ ma ɨ faytɨ mbzɨ, ɨ faytɨ wul ɨ̀ mɨ̀sòŋ. À n-læ faytɨ ma faytɨ ìyvɨ nɨ̀ ɨ̀fwo vzɨ̀ a wu n-ghɨ ateyn.

¹³À n-ghɨ mà vzɨ̂ a mɨ n-nî awo kɨ àtì-ati. Mɨ n-nì fu àdyaʼ sɨ̂ Sylùs ɨ̀ nì a awo ŋweyn nô à jɨ̀m na ndû kɨ àtì-ati. Wu læ̀ kasî baʼtɨ̂ ntèʼ yem ɨ Jèlusalèm. Wù læ̀ lî kfâ nɨ̀ ghelɨ nɨ̀ ghelɨ̀ ghem ghì a ghɨ n-ghɨ a tɨtumà a Jèlusalèm. Wù læ̀ nà nî wì awo nâ kèynà na ghɨ laʼ ŋweyn, wù læ̀ nî wi bòm ɨ̀mwaʼtɨ ta ka ghɨ fu sɨ̂ ŋweyn. À bè Bôbo Fɨyini ɨ bò ɨ̀dwaʼ ɨ̀ jɨ̀m.

¹⁴Bôbo Fɨyini nɨ̂n sɨ̂ ghelɨ Isìlæ̀ na ighaʼi ghelɨ Ijìb ì læ̀ nà kelɨ zɨ̀. Ghelɨ mbêyʼlɨ̀ ghì a ghɨ n-ghɨ a Kûsk læ̀ nà felɨ̀ sɨ̂ zɨ̀. Into i ghêl i Sebèyàn læ̀ nà ghɨ ɨ̀kôs ɨ̀ vzɨ. Àŋena læ̀ nà gvî a yi ibàm inòyn inòyn. Àŋena læ̀ nà gvî a yi ibàm nɨ̀ nchaʼsɨ afyeyn ta ghelɨ a ghɨ ghàytɨ iwòŋ. Àŋena læ̀ nà n-gvɨmlɨ̂ zɨ̀ bê na, “Fɨyini nɨn ghɨ zɨ̂ àŋena amoʼ, fɨyini fɨ lifɨ ɨ ghɨ ta ŋweyn.

¹⁵Samoʼ, wà n-ghɨ Fɨyini, ghɨ wi ta mɨyini mɨ̀ tɨ̀laʼ tɨ litɨ. Fɨyini fɨ Isìlæ̀ bœsɨ àŋena (O Fɨyini fɨ bœ̀sɨ ghelɨ Isìlæ̀. Samoʼ wà n-ghɨ Fɨyini, fɨyini fɨ lifɨ ɨ ghɨ wi ta vâ.

¹⁶Ghelɨ ghì nô ghɨ̀ jɨ̀m a ghɨ n-faytɨ ɨ̀nfyèʼsɨ̀ læ̀ wumi-à. Ghɨ læ̀ wumsɨ̂ àŋena nô ghɨ̀ jɨ̀m. Àŋena læ̀ nà jelɨ̀ nɨ̀ ɨ̀tu a nse bòm ìwumi.

¹⁷Mɨtì Bôbo Fɨyini bœsɨ ghelɨ Isìlæ̀. Bôbo Fɨyini læ̀ fu ìbœ̂ zɨ̀ a yi fàŋ meyn samoʼ sɨ̂ àŋena. Ghɨ læ̀ wumsɨ̂ wì zɨ ghelɨ Isìlæ̀. Zɨ̀ læ̀ wumî wì nô ta ka ghɨ̀ læ̂ ghɨ̀.

¹⁸À n-taŋî Bôbo Fɨyini bê na, À n-læ faytɨ ŋweyn iyvɨ. Wù n-ghɨ Fɨyini. À n-ghɨ ŋweyn vzɨ̀ a wu n-faytɨ nse ɨ lèm nô mɨ ghà ta kɨ n-ghɨ ateyn. À n-læ ku ŋweyn mbzɨ. Wù n-læ faytɨ mbzɨ na yì na ghɨ iyum. Wù n-læ faytɨ mbzɨ na ghɨ na chî ateyn. Bôbo Fɨyini nɨ̀n bê na, ‘À n-ghɨ mà Bôbo Fɨyini, fɨyini fɨ lifɨ bu ghɨ wi nô sakos.

¹⁹Mɨ n-bu læ nà taŋî a n-lèytɨ. Mɨ n-bu læ nà taŋî alèʼ a fɨmnɨ-a. Mɨ n-bu læ timi bè na bè sɨ̂ woyn Jàkôb na, ‘Yiì na koʼsɨ̂ mà salû. Bôbo Fɨyini nɨ̀n læ nà bê kɨ samoʼ. Mɨ n-læ nà bê kɨ ìwo zɨ̀ a yi n-ghɨ àtì-ati.

²⁰Yì yvɨŋtɨ akaʼ àmòʼ ɨ̀ gvì bàʼsɨ. Yì yvɨŋtɨ, zɨ̀ ghî a yì bu chi a tɨ̂laʼ tɨ mbzɨ. Ghelɨ ghì a ghɨ n-jelɨ̀ beʼì ɨ̀nfyèʼsɨ̀ nɨn kya wi iwo zɨ̀ a àŋena nɨn nî. Ghelɨ ghì a ghɨ n-koʼsɨ ɨ̀nfyèʼsɨ̀ ma wu kàʼ wu bû gàmtɨ̀ àŋena.

²¹Yì gvi nɨ̀ nsaʼ zɨ̀ iti i nsaʼ. Yì feʼtɨ iwo zɨ̀ a yi n-gâyn lvɨ̂yn. Yì chɨyntɨ kìtɨ̀ ɨ̀ yeyn na à n-læ nà bê ndà iwo nâ yèynì nô sɨ ɨtuʼ a? À n-læ nà fêʼtɨ̀ kɨ Bôbo Fɨyini na yi læ̀ gaynà. Fɨyini fɨ lifɨ nɨn ghɨ wi a bu kɨ mà. Mɨ n-ghɨ Fɨyini nî àwo kɨ àtì-atii, ghɨ mbœ̀sɨ̀. Fɨyini fɨ lifɨ nɨn ghɨ wi a bu kɨ mà.

²²Zɨ̀ ghelɨ ghɨ̀ jɨ̀m a mbzɨ, yì ki kòʼsɨ kɨ̀ sɨ̂ mà. Yì na yeʼtɨ̂ kɨ a ma ɨ̀ nà kelɨ ìbœ̂ bòm ta mɨ n-ghɨ Fɨyini, fɨyini fɨ lifɨ ɨ bu ghɨ wi.

²³Ma yɨ meyn mɨ̀kâyn sɨ a ma ngeŋ. (Ma chfɨnɨ meyn). Ma bê meyn nɨ̀ ɨ̀chfɨ̂ wom samoʼ. Ma bê meyn ìwo yi ghɨ wi sɨ ilæ sɨ kini na, “Nô mɨ ndà læ̀ tɨm àlvɨ a ŋweyn a ma asɨ, a nô mɨ ndà be nɨ̀ ɨchfɨ ŋweyn na mɨ n-ghɨ Fɨyini.”

²⁴Àŋena læ̀ nà bê na wùl kàʼ a wù tɨm yɨ kɨ̀ sɨ izɨyn nɨ̂ Fɨyini fɨ. Awo a juŋa nɨ̀ akî a kɨ n-ghɨ àtì-ati nɨn nî kɨ Bôbo Fɨyini.

²⁵Mɨtì Bôbo Fɨyini læ̀ boysɨ̂ ghelɨ Isìlæ̀. Bôbo Fɨyini læ̀ ni-à a woyn Isìlæ̀ tɨm yɨ nà saŋlɨ-à.