Isaiah 44

Bôbo Fɨyini nɨn ghɨ Fɨyini fìfɨ̀ a fɨ ngâmtɨ̀ ghelɨ ŋweyn.

¹Zɨ̀ woyn Jàkôb yì yvɨtɨ. Zɨ̀ ghelɨ ghɨ felɨnɨ nɨ̀ mà ɨ ghelɨ Isìlæ̀ ghì a mà choʼ. Yì yvɨtɨ.

²Bôbo Fɨyini vzɨ̀ a wù fàytɨ zɨ, ɨ̀ bòm zɨ ɨlvà jæ na ghɨ bzɨ, ɨvzɨ̂ a wù n-gâmtɨ̀ zɨ bè na, “Ka yi n-fàyn a woyn Jàkôb, zɨ̀ ghelɨ ghɨ felɨnɨ nɨ̀ mà, ka yi n-fàyn. Zɨ̀ ghelɨ ghɨ felɨnɨ nɨ̀ mà, ka yi n-fàyn. Zɨ̀ ghelɨ Jeshlùn, ɨghî a mà choʼ, ka yi n-fàyn.

³Mɨ n-fu/fsɨ̀s mu ilaʼ ɨtoŋ mu ɨ yum ghelɨ ateyn. Mɨ n-nì ni-à a jvasɨ na kalì a nse iyum. Mɨ n-nì fu àyvɨs à kema sɨ̂ woyn ghi, ɨ̀ bòysɨ àŋena.

⁴Àŋena nì nà lemâ ta afûʼ a gvêyn. Àŋena nì nà lemâ ta ɨnkâʼ mɨ̀ boblà a mbæ̀ jvà.

⁵Wùl ɨ̀ læ̀ nà bê na, “À n-kelɨ Bôbo Fɨyini kelɨ mà, ɨ̀lvɨ̀ ɨ bê na yi n-ghɨ Jàkôb. Wùl ɨ lvì læ̀ nyâʼ a ŋweyn awu na, “À n-kelɨ Bôbo Fɨyini,” a ɨ̀lvì be na izɨyn ì zɨ-i nɨn ghɨ Isìlæ̀.

À n-ghɨ kɨ Bôbo Fɨyini ɨ Fɨyini a ghɨ wi ɨ̀nfyèʼsɨ̀

⁶Bôbo Fɨyini ɨ fòyn Isìlæ̀, ɨvzɨ̂ a wù yuyn atu a àŋena, ma à ti Bôbo Fɨyini vzɨ̀ a wù ngàŋtɨ chwò bè na, “Mɨ n-ghɨ Fɨyini ɨ fɨ asɨfɨ, ghɨ fɨ goʼsɨnɨfɨ. Nô Fɨyini fɨ lifɨ bu ghɨ wi a bu kɨ mà.

⁷À ti n-ghɨ ndà ta ma a? Wùl ɨ̀ na ghɨ wu fèʼtɨ̀/bè. Àŋena be ɨ̀ fèʼtɨ̀ àwo kì sɨ̂ mà a kɨ gàyn koʼ kɨ̀ sɨ ɨtuʼ ta mà fàytɨ ghelɨ̀ ghem ɨ ghɨ asɨ. Wù feʼtɨ awo kì a kɨ bu ghɨ sɨ jæ gàyn.

⁸Ka yì na chɨŋtɨ̂ faynà. Ba mɨ n-læ meyn jaŋ fèʼtɨ̀ àwo kì sɨ̂ zɨ̀ a kɨ læ̀ jæ gàyn ndyèyn ɨ bu dyefà ta kɨ læ̀ gâyn? Yi n-ghɨ nchwòsɨ nsaʼ sɨ̂ mà. A fɨyini fɨ lifɨ bu ghɨ sɨ baʼsɨ sɨ̂ mà a? Nô ìwu i li-i bu ghɨ wi sɨ baʼsɨ sɨ̂ izɨ-i a mɨ n-kya.

⁹Ghelɨ ghì a ghɨ n-faytɨ ɨ̀nfyèʼsɨ̀ nɨn kfeyn wi afo. Àŋena nɨn kôŋ kɨ ɨ̀fwo ayùŋayuŋ. Ghelɨ ghì a ghɨ n-timi nchwò nsaʼ sɨ̂ ɨ̀nfyèʼsɨ̀ nɨn ghɨ kɨ ta ɨ̀nfyèf, kya wi mɨ ìwo. Àŋena nɨn kêʼ kɨ ta ɨ̀ngù.

¹⁰À ti kàʼ a nà faytɨ nda fɨyini chuf ànfèʼsɨ̀ kɨ kelɨ wi nô ìwo i li sɨ̂ ŋweyn a?

¹¹Iwumi læ̀ ku ghelɨ ghì a ghɨ n-faytɨ ɨ̀nfyèʼsɨ̀. Ghelɨ ghì a ghɨ n-faytɨ ɨ̀nfyèʼsɨ̀ nɨn kfeyn wi nô afo, a bu nkàyn wùl. Àŋena gvi ɨ̀ yvɨ̀ŋtɨ̀ a ngùŋ nɨ̀ Fɨyini fɨ a ka ifâyn i bemnɨ-i ku àŋena, a àŋena kasi kɨ̀ sɨ a ɨngù ma iwumi i ku meyn àŋena.

¹²Wùl ɨ̀ vzɨ̀ a wù n-tsɨ alâm nî wu lì àfo a felɨnɨ-a nɨ̀ ŋweyn ɨ yuʼlɨ ichɨ ɨ leŋ mamtɨ nɨ̀ àbuʼa ɨ faytɨ ànfèʼsɨ̀ ateyn. Jeŋ nî yi nà yafɨ ŋweyn, wu kelɨ wi adyaʼ, nyvɨ wu mu, wu boli.

¹³Wùl ɨ̀ vzɨ̀ a wù n-chuf ɨfwo nɨ̀ ɨ̀nkàʼ nî wu fèʼ àbâŋ a fɨ̂kàʼ ɨ chwæ̀ nɨ̀ àfo a felɨnɨ-a nɨ̀ ŋweyn, ɨ chuf kɨ nà jôf ghɨ kɨ ta wul ɨ lèm alèʼ ghè a ghɨ n-koʼsɨ mɨyini ateyn.

¹⁴Wù n-nî wu gvèytɨ̀ ɨ̀nkâʼ mɨ̀ Sedà, kèsa ɨ teyntɨ tɨ̀nkì tɨ ɨnkàʼ tɨ litɨ mɨ lemâ akù to kɨ tèyn nteŋ, ɨ̀ fàŋ tî/bula tì wu tòʼ ɨ̀gùm ɨvɨ ɨ suʼi ɨ nì mɨ nà lemâ.

¹⁵Wu gvèl fɨ̀kâʼ wu teyntɨ sɨ ɨnkàʼ ɨ nà kwô ɨ̀n lì sɨ yos, kwô ɨ̀n lì sɨ kfè ɨfwo ɨ yɨnɨ. Mɨtì lî kɨmɨ ɨ̀mêyn wu faytɨ ànfèʼsɨ̀ ateyn ɨ nà koʼsɨ-a. Wù n-faytɨ̂ ànfèʼsɨ̀ ateyn wu nà nguʼ koʼsɨ-à.

¹⁶Wu lì ɨ̀nkâʼ ɨ̀n lì wu kwò, kwò wu nyòʼ njwò ateyn ɨ kfɨl, kwò wu kfe ɨ̀fwo ɨ yɨnɨ ateyn ɨ yɨ, ɨ̀ yɨ kul wu nà saŋlɨ-à. Wù n-kwô ɨ̀vɨs ɨ̀ yos, ɨwuyn ŋweyn lûm wu bè na ɨvɨs weyn nɨn jofa.

¹⁷Wu li kɨmɨ àbɨ̂sɨ̀ a fɨ̂kàʼ nâ kì, wu faytɨ ànfèʼsɨ̀ ateyn ɨ nà nguʼtɨ̂ asɨ ateyn koʼsɨ-a. Wù n-se sɨ koʼsɨ wu nà jemà bê na, “Wà n-ghɨ fɨyini femfɨ, gâmtɨ̀ mà.

¹⁸Ghelɨ ghì a ghɨ n-faytɨ ɨ̀nfyèʼsɨ̀ nɨn kelɨ wi itof nô sakos. Fɨyini fɨ chɨytɨ meyn àsɨ a àŋena. Wù chɨ̀ytɨ àsɨ a àŋena ta ka àŋena na yeyn wi ɨlwêʼ. Itof i àŋena sɨ ghɨ ma yi leʼ meyn àŋena na kya wi àwo.

¹⁹Nô wùl sɨ ateyn ɨ kfâʼtɨ̀ wì nâ ghɨ gvel fɨkâʼ tèyntɨ ɨ̀ kwò ɨ̀n lì, ghɨ nyoʼ abayn a kfaŋ ɨ kfètɨ̀ ɨvɨ̀s ateyn, nyôʼ njwò ateyn kfɨla. Ghɨ ti kàʼ ti ghɨ fi lì àntɨ̀mlɨ a li-a sɨ nà faytɨ afo a chaʼnɨnɨ-a ateyn a? Mà kàʼ ma bû nà koʼsɨ̂ àntɨ̀mlɨ a fɨ̂kàʼ

²⁰Wùl ɨ̀ vzɨ̀ a wù n-koʼsɨ ànfèʼsɨ̀ nɨn nyɨŋ ibàm abvɨ, ikfâʼtɨ̀ i àngù zɨ̀ a wù n-kelɨ jɨŋsɨ meyn ŋweyn. Wù kàʼ wu bû fì vìsi/lèʼ sɨ ibàm ateyn. Wù kàʼ wù bû kèli sɨ bè na, “Ànfèʼsɨ̀ kèyn a mɨ n-koʼsɨ têyn nɨn ghɨ wi Fɨyini nò sakos.”

^21WoynJàkôb yì na bêtɨ̀ àwo nâ kèynà, ghelɨ Isìlæ̀ yi n-ghɨ ghelɨ ghɨ flɨnɨ nɨ̀ mà. à n-læ bom ma ɨ bom zɨ na yì na felɨ̀ sɨ̂ mà. Mà læ̀ lêsɨ̀ wì zɨ a ghelɨ Isìlæ̀/ghelɨ Isìlæ̀, mà læ̀ lêsɨ̀ wì zɨ.

²²Ma yesɨ meyn lìsì mbɨ̂ sisɨ sɨ sami kɨ̀ ta mbàʼsɨ̀, ɨ̀ lìsì mbɨ̂ sisɨ sɨ sami kɨ̀ ta ajwô ɨlvɨ ta ivi i nɨn kɨŋ sɨ suʼi. Yì kasi nà koʼsɨ̂ mà bòm ta ma kasi meyn yuyn tèyn zɨ.

²³Ɨfwo vzɨ̀ a wu n-ghɨ iyvɨ, yì na yem njàŋsɨ̀ saŋlɨ-à bòm àwo kì (iwo) zɨ̀ a Bôbo Fɨyini nì. Ɨfwo vzɨ̀ a wu n-ghɨ isas i nse, yì na luʼ nò nɨ̀ gyà i to. Kfɨynsɨ yì na yem njàŋsɨ̀ nò nɨ̀ gyà i to. Ɨ̀nkàʼ nô ɨ̀n jɨ̀m akù, yì na saŋlɨ-a. Bôbo Fɨyini kasi meyn yùyn ghelɨ ndo nɨ̀ Jàkôb. Ghelɨ Isìlæ̀ læ̀ nà koʼsɨ̂ Bôbo Fɨyini.”

²⁴À n-ghɨ mà Bôbo Fɨyini ɨ mbœ̀sɨ̀ zɨ. À n=ghɨ mà vzɨ̀ a mɨ n-bom zɨ. À n-ghɨ mà Bôbo Fɨyini, à n-læ faytɨ ma ɨfwo ɨ̀ jɨ̀m a mbzɨ. Mɨ n-læ faytɨ iyvɨ kɨ̀ ma nìnyɨŋ. Mɨ n-læ faytɨ nse(mbzɨ) kɨ̀ nìnyɨŋ.

²⁵À n-læ nì ma na ànkaŋ a nfèʼtɨ̀ sɨ ànkaŋsɨ keʼ a ndayn. À n-læ nì ma na ghelɨ mɨnyaʼ kasi sɨ ɨ̀ngù. Mɨ n-nî meyn ghelɨ ghɨ tofɨnɨ nà fu ìtebtɨ i bɨ-i sɨ̂ ghelɨ. Itof i àŋena kasi sɨ itof ayùŋ ayuŋ.

²⁶Mɨtì ghelɨ ghɨ felɨnɨ nɨ̀ ma bê ìwo zɨ̀ a mɨ n-nì nî a yi gayn. Ma tum meyn wul na wù feʼtɨ na mà læ̀ nî ìwo ma nì yi kfeyn kɨ ta wù nì bè. Mɨ n-læ meyn bè na ghelɨ læ̀ kasî gvî nà chî a Jèlusalèm. Na ghɨ læ̀ kasî bâʼlɨ̀ ntèʼsɨ Judà sɨ ghaʼlɨnɨsɨ a sɨ kasi nà ghɨ kɨ ta sɨ n-læ nà ghɨ sɨ asɨ.

²⁷Mɨ n-læ bè sɨ̂ jvasɨ ghaʼnɨ na, ‘Yum.’ Mɨ n-nì ni-à a jvâ sisɨ yum.

²⁸Mɨ n-bê meyn sɨ̂ Saylùs na wù na tôʼnɨ̀ nɨ̀ ghelɨ̀ ghem. Saylùs ɨ ghɨ sɨ nì sɨ nà nî nô àwo à jɨ̀m kì a Fɨyini fɨ nɨn kɨŋ na wù na ni-à. Wù læ̀ bê na, “Ghɨ kasi bàʼlɨ̀ Jèlusalèm, ɨ̀ bè na ghɨ we achɨ a ndô Fɨyini.”