Isaiah 50
This book is a draft. It has been translated but has not yet finished checking, and is published here so the community can read and respond to it.
1Bôbo Fɨyini nɨn be meyn na,
“Yì kæ nà kya samoʼ na mɨ n-saŋ meyn nà vzɨ Jèlusalèm. Yì dyeyn læ̂ ŋwàʼlɨ sìsɨ̀ a ghɨ n-nyàʼ na ma saŋ meyn ŋweyn. Mɨ n-bu læ beyʼlɨ zɨ sɨ làʼ ikwo. Wùl nɨ̀n kwo wi ma. Ghɨ n-læ ghaytɨ ndu nɨ̀ zɨ̀ ɨtum bom mbzɨ sisɨ. Ghɨ n-læ sàŋ zɨ bòm àwo a bɨ-a.
2Mɨ n-læ meyn gvì sɨ bœ̀sɨ zɨ ɨ faŋ tɨ̀ yeyn wul. Mɨ n-læ meyn jàŋ, wùl ɨ nà ghɨ wi sɨ fɨ̀ysɨ̀. Yì kfaʼtɨ na ɨkœ wom nɨn tɨmsɨ sɨ gàmtɨ zɨ a? Yi kfaʼtɨ na adyaʼ à kema nɨn kfeynɨ̂ wì sɨ bœ̀sɨ zɨ ma? Mà kàʼ a mà taŋi kɨ̀ taŋi a jvà ìghaʼnɨ yum. Mà kàʼ a mà ni a jvasɨ yum nà ghɨ ta nse iyum, nì a sfɨsɨ kfɨtɨ bòm ɨ̀toŋ mu.
3Mà kàʼ a mà ni a iyvɨ i na fɨ̀m kɨ tèyn tìk. Mà kàʼ a mà ni a iyvɨ i na fɨ̀m kɨ ta fɨ̀ntsɨ.
Wùl ɨ̀ felɨnɨ nɨ Fɨyini fɨ
4Bôbo Fɨyini feʼtɨ meyn ìwo zɨ̀ a ka mà be. Wù ni meyn na mà na se sɨ bè iwo yi nà kfɨmtɨ̂ ghelɨ ghì a ghɨ n-kelɨ adɨli. Bôbo Fɨyini nɨn yêm mà kɨ mɨnchi ɨ̀n jɨ̀m na mà na faytɨ̂ yvɨtɨ̂ ìwo zɨ̀ a wu n-bè nì na mà na yafɨ jeŋ sɨ nà yeʼi iwo kɨ̀ ta wayndà a ndô ŋwàʼlɨ̀.
5Bôbo Fɨyini ɨ Bò Ɨ̀dwaʼ ɨ̀ Jɨ̀m yasi meyn ɨ̀tuŋlɨ wom. Mɨ n-bu læ teyn sɨ nà yvɨnɨ ŋweyn. Ma bû tìmi chàs iwo zɨ̀ a wù yèʼi ma nɨ̀ ìnyeyni.
6Mɨ n-læ nà dyêyn jɨ̂m yem ghɨ nà leŋ nɨ̀ gvàlìsɨ̀. Dyêyn ìdyel ì yemi ghɨ na gufɨ̀ choʼtɨ̂ nyuŋsɨ sɨ ateyn. Ghelɨ nɨn læ meyn nà telɨ̂ mà, chfɨ mɨ̀nchya a ma ikèʼ, ma læ faŋ tɨ̀ lèʼsɨ ikêʼ ì yemi.
7Mɨtì ndisɨ àŋenasɨ kàʼ sɨ bû fù ngeʼ sɨ̂ mà bòm ta Bôbo Fɨyini ɨ Bò Ɨ̀dwaʼ ɨ̀ Jɨ̀m nɨn gâmtɨ̀ mà. Wùl kàʼ wu bû wùmsɨ mà. Ma choʼnɨ meyn sɨ nà to a ma ibɨmi bòm ta mɨ n-kya na ghɨ n-wumsɨ̂ wì ma.
8Wùl ɨ̀ vzɨ̀ a wù n-saʼ fu nsaʼ yem nɨn baʼsɨ̂ sɨ̂ mà. À ti kàʼ a fi nì nô ndà na nsaʼ fe a ma atu a? Ghesɨ̀và timi iti i nsaʼ. À n-ghâm ndà ma a? Wù fvɨ gvì fèʼtɨ ìwo zɨ̀ a mà nì.
9À n-kɨ̂ŋtɨ̀ Bôbo Fɨyini ɨ Bò Ɨ̀dwaʼ ɨ̀ Jɨ̀m kɨ̂ŋtɨ̀ mà. À ti n-ghɨ nô ndà ta wù kàʼ a wù ni a nsaʼ ku ma a? Yì na kya samoʼ na ghelɨ ghì a ghɨ n-choʼ avɨ à kema læ̀ sâytɨ̀ kɨ ta ndzɨsɨ. Àŋena læ̀ nà ghɨ kɨ ta ndzɨsɨ ɨlvɨ ta ɨshweʼshweʼ kfɨl.
10À n-ghɨ ndà a yi antêynɨ̀ a wù n-fâyn Bôbo Fɨyini a? À n-yvɨnɨ̂ ndà wul ɨ̀ felɨnɨ nɨ̀ ŋweyn a? Nô mɨ ndà vzɨ̀ a wù n-kelɨ ibayn, wù n-samsɨ̂ Bôbo Fɨyini, wù na yeʼtɨ̂ kɨ ɨwuyn nɨ̀ Fɨyini fɨ ŋweynfɨ.
11Mɨtì zɨ̀ ghî a yi n-kɨtɨ nkɨsɨ, zɨ̀ ghî a n-kɨŋ lâmsɨ̀ sɨ nà kâʼsɨ̀ ɨlwêʼ ateyn, yì ndu læ̂ kàʼsɨ̀ lâm sìsɨ̀ a yì dyeyntɨ̀. Iyeynì nɨn ghɨ ìwo zɨ̀ a ka mà nî nì sɨ̂ zɨ̀. Mɨ n-nì ni-à a ngeʼ i bemnɨ koli zɨ.