Isaiah 51
This book is a draft. It has been translated but has not yet finished checking, and is published here so the community can read and respond to it.
Ghelɨ Jelusalèm keli meyn ìbœ̂ zɨ̀ a yi læ̀ mæ̂ wi.
1Bôbo Fɨyini nɨn bê na, “Yì yvɨtɨ iwo zɨ̀ a mɨ n-bê. Zɨ̀ ghî a yi n-kɨŋ sɨ keli ibœ̂, yì yvɨtɨ. Zɨ̀ ghî a yi n-kɨŋ na mà gamtɨ zɨ, yì kfaʼtɨ iwu zɨ̀ a yì fvɨ̀ ateyn. Yì kfaʼtɨ ɨlweŋ vzɨ̀ a yì fvɨ̀ ateyn.
2Yì betɨ Abɨ̀làhâm ŋêyn Selà ghì a yi n-ghɨ woyn àŋena. Mɨ n-læ jàŋ Abɨ̀làhâm, wu kelɨ wi wayn, mɨtì ma boysɨ ŋweyn nɨ̀ woyn. Mɨ n-nî meyn woyn ŋweyn ɨ nà ghɨ ghɨ taŋ lê ɨ̀tu.
3Samoʼ Bôbo Fɨyini ɨ læ fi koynsɨ ìsuyn sɨ̂ ghelɨ Jèlusalèm. Wù n-læ dyèyn ɨ yvɨ̀sɨ̀ mɨ̀tem mɨ̀ ghelɨ ghì a ghɨ n-chi ɨlwèʼ ghè a ghɨ bèbsɨ meyn. Nô mɨ ta nse àŋena sɨ ghɨ kɨ ta nse iyum, yì læ̀ kasî nà ghɨ kɨ ta mbàyn Idɨ̀n. Yì læ̀ nà ghɨ kɨ ta gvêyn Bôbo Fɨyini. Ghelɨ Jèlusalèm læ̀ nà yvɨ dyala, saŋlɨ-à. Àŋena læ̀ nà fu àyòŋnɨ̀ sɨ̂ Bôbo Fɨyini. Àŋena læ̀ nà yem njàŋsɨ̀ koʼsɨ̂ ŋweyn.
4Yì yvɨtɨ a ghelɨ̀ ghem. Yì toʼ yvɨ̀tɨ ìwo zɨ̀ a mɨ n-bê sɨ̂ zɨ̀. Mɨ nì fu ìsaʼ ì yemi sɨ̂ zɨ̀. Ghɨ nì yeʼî tɨ̀laʼ tɨ mbzɨ nɨ̀ ìwo ì yemi. Iwo ì yemi læ̀ gvî nɨ̀ ìbayn i sɨ̂ àŋena.
5Àŋena nì se sɨ yeyn ibayn ì yemi mɨ ɨlvɨ gha, a nà ghɨ ma ɨlvɨ vzɨ̀ a ka mà tɨm yɨ mbàynɨ̀sɨ àŋenasɨ ateyn kfeyn meyn. A mà nyaŋsɨ gvì bœ̀sɨ̀ àŋena. À læ̀ nà saʼ kɨ nô mà tɨlaʼ tɨ mbzɨ. Tɨlaʼ tìtɨ̀ a tɨ n-ghɨ a (ndyèynsɨ̀) mbæ̀sɨ jvâ ighaʼnɨ læ̀ nà chîtɨ̀ kɨ mà. Àŋena læ̀ nà chîtɨ̀ kɨ mà na mà gvi bœ̀sɨ̀ àŋena.
6Yì ki iyvɨ, kì nse. Iyvɨ i læ̀ samî kɨ ta fɨleʼ. A nse bol nà ghɨ kɨ ta ɨshwâʼ ɨ ndzɨsɨ. Ghelɨ læ̀ nà kfɨtɨ̂ kɨ ta mɨlvɨ. Mɨtì ibœ̂sɨ̀ zɨ̀ a ka mà ni fù sɨ̂ zɨ̀ ɨ læ̀ faŋ kɨ samoʼ. Mà læ̀ tɨm yɨ kɨ samoʼ.
7Yì yvɨtɨ iwo zɨ̀ a mɨ n-bê. Zɨ̀ ghî a yi n-kya awo kì a kɨ n-ghɨ àtì-ati, yì faytɨ yvɨ̀tɨ, zɨ̀ ghî a yi n-yvɨnɨ isaʼ ì yemi, ghelɨ se sɨ taŋi kûm zɨ̀, ka yi n-fàyn. Ka yi n-fàyn ndi sìsɨ̀ a ghɨ n-telɨ zɨ nɨ̀ ɨ̀nseynsɨ.
8Ka yi n-fàyn bòm ta ɨsweʼshweʼ nɨn kfɨl àŋena kɨ̀ ta wu kfɨ̀l ndzɨsɨ. Tɨ̀wòŋawoŋtɨ nɨ mèsì àŋena ta tɨ mèsì àmbyèyn. Mɨtì a mà faŋ nà nî kɨ àwo àtì-ati nô ta ka ghɨ̀ læ̂ ghɨ̀. Mà læ̀ nà bœ̂sɨ̀ zɨ̀ kɨ̀ ajâŋ nɨ̀ àjaŋà.”
9Bôbo Fɨyini làli ɨ gàmtɨ̀ ghès. Làli a Bôbo Fɨyini ɨ gàmtɨ̀ ghès nɨ̀ àdyaʼ à kya. Làli ɨ dyèyn àdyaʼ à kya a Bôbo. Làli ɨ gàmtɨ̀ ghès ta wà nà n-gâmtɨ̀ ɨtuʼ ɨmu. À n-læ tèyntɨ vâ ɨ teyntɨ nyam ibɨ zɨ̀ a ghɨ n-toŋtɨ na Lohàb tì. À n-læ chuʼ vâ ɨnyeyn nɨ̀ ìwoŋ i yi toynɨ ɨ fvɨ̀ àbàs a li-a.
10À n-læ nî vâ jvà ighaʼnɨ ɨ yum. Wà n-læ nì mu yum sɨ ɨlwèʼ ghè a wu n-sœ. Wà n-læ meyn faytɨ àvɨ a dzɨ a ki jvà, ta ka ghelɨ ghì a wà fvɨ̀sɨ̀ sɨ a ndo àkòs dyaŋ.
11Ghelɨ ghì a Bôbo Fɨyini bœsɨ meyn àŋena læ kàsi ndù a Jèlusalèm. Àŋena læ̀ nà zɨ̂ a Zayòn yem njàŋsɨ̀. Àŋena læ̀ nà yɨ njùŋ zɨ̀ a yì fàŋ meyn samoʼ. Wùl sɨ̂ àŋena læ̀ nà bu koynsɨ̂ kêʼ wì keʼ. Ànsuma læ̀ nà bu fì ghɨ wi a àŋena ɨchfɨ̀.
12Bôbo Fɨyini nɨ̀n bè na, “A mà vzɨ̀ a mɨ n-fu adyaʼ sɨ̂ zɨ̀. Bòm ghà ta yi n-fâyn nkàyn wùl ɨ̀ mɨ̀sòŋ ti n-ghɨ ghà? Wùl wu ghɨ sɨ chitɨ kɨ ta ɨnfûʼ sɨ yoblɨ.
13Wùl mɨ̀sòŋ ti n-ghɨ nô ghà sɨ nì na yì lesɨ Bôbo Fɨyini vzɨ̀ a wu n-fàytɨ zɨ a? À n-læ faytɨ ŋweyn iyvɨ ɨ we àchi kì a wu n-fàytɨ nse atu àteyn. Bòm ghà ta yì lum fàyn kɨ fayn mbàynɨ̀ sisɨ a? Ɨtoŋ yafɨnɨ nɨ̀ mbàynɨ̀ sisɨ nɨn kelɨ wi iwo sɨ ni sɨ̂ zɨ̀.
14Ghelɨ ghì a ghɨ n-ghɨ a ndô nchaʼsɨ ghɨ kɨ sɨ fvɨ̀. Àŋena nì kfɨtɨ̂ wì achaʼ. Àŋena nì nà bu fì wo wi afo sɨ yɨ.
15Àŋena nì wo wi afo bòm ta mɨ n-ghɨ Bôbo Fɨyini ɨ Fɨyini fifɨ. À nì mà na jva ìghaʼnɨ na làlì kasî suʼi a(ku-à) À n-ghɨ mà Bôbo Fɨyini ɨ Bò Ɨ̀dwaʼ ɨ̀ Jɨ̀m. (Izɨyn ì yemi nɨn ghɨ Bôbo Fɨyini ɨ Bò Ɨ̀dwaʼ ɨ̀ jɨ̀m.)
16Ma laʼi meyn ntum zɨ̀ a mɨ n-kɨŋ na ghelɨ yvɨ sɨ̂ và. Ma kɨŋtɨ meyn và kɨ̀ ighel ta wùl ɨ̀ kɨ̀ŋtɨ̀ àfo nɨ̀ àwu a ŋweyna. À n-læ faytɨ ma iyvɨ ɨ lèm a ìnyeyni alèʼ. À n-læ faytɨ ma achɨ a nse. À n-læ bè bè ma sɨ̂ zɨ̀ ghelɨ Isìlæ̀ na yi n-ghɨ ghelɨ̀ ghem.
Ngeʼsɨ ghelɨ Jèlusalèm sɨ mæ̀
17Ghelɨ Jèlusalèm, yì lali iyvɨ. Yì lali iyvɨ, yì lali iyvɨ. Yi nyvɨ meyn a bom ghè a Bôbo Fɨyini fù sɨ̂ zɨ̀ ɨtoŋ baŋnɨ nɨ̀ ŋweyn. Yi nyvɨ meyn tèyn bàʼsɨ nɨ̀ ìsas i mɨ̂lùʼì. Yi nyvɨ meyn yì na sɨ jelɨ̀ yeŋnɨ̂ kɨ yeŋnɨ.
18Antêynɨ̀ nɨ̀ woyn ghi ghì a yi n-læ bzɨ nô ghɨ̀ jɨ̀m. Wul ɨ̀ bà antêynɨ̀ nɨ̀ àŋena ta wù kàʼ a wù na tisɨ̂ zɨ̀ a? Woyn ghì a yì lì nô ghɨ̀ jɨ̀m wùl nɨ̀n ghɨ wi ateyn nô ɨ̀mòʼ a ka wù læ gàmtɨ̀ zɨ̀. 19Ngeʼsɨ fe meyn a yi atu sɨ̀ bò. Wùl nɨ̀n ghɨ wi nô sakos sɨ kfɨmtɨ zɨ. Jeŋ kû meyn zɨ̀, iwoŋ i tɨmnɨ-i faŋ kɨ̀ faŋ a yi ilaʼ. Ghɨ bebsɨ meyn ìlaʼ ì zɨ-i, wùl ɨ ghɨ wi sɨ nì na mɨ̀têm mzɨ̂ yvɨtɨ.
20Ghelɨ̀ ghi nɨn ghɨ ma ghɨ bolɨ meyn ɨ̀ fèlɨ nà nyɨŋ a mbæ̀sɨ dzɨ. Àŋena nɨn nyɨŋ kelɨ wi ngàmtɨ̀ kɨ̀ ta fɨchuue ɨlvɨ ta ghɨ lem fɨ̀làm fɨ zɨ ateyn. Bôbo Fɨyini nyoʼsɨ meyn ɨ̀toŋ nô sɨ a ŋaŋ ɨ̀ nyàblɨ̀ nɨ̀ zɨ̀. Fɨyini fɨ maʼ meyn ngeʼ a yi atu.
21Mɨn-chwotɨ̂ na yì yvɨtɨ a ghelɨ Jèlusalèm ghì a ghɨ n-yeyn ngeʼ nyɨŋa a ghɨ wi na yi nyɨŋ ta yì nyvɨ mɨlûʼ ɨnto bula yi nyvɨ.
22Bôbo Fɨyini ɨ Fɨyini fifɨ fì a fɨ n-saʼ fu nsaʼ sisɨ nɨn bê na, “Mɨ n-fsɨ bôm ngeʼ nâ yèyn sɨ a yi awu. Ngeʼ àteyn ni meyn yi na jɨ̀ŋ nô sɨ a ŋaŋ. À n-ghɨ ngeʼ ma mɨ n-fu ta ɨtoŋ wom bàŋ kûm zɨ̀. Yì læ̀ bu fì nyvɨ wi bôm ngeʼ nâ yèyn.
23Mɨ n-nì wê bom àteyn ɨwu nɨ̀ ghelɨ ghì a ghɨ n-nyâblɨ̀ nɨ̀ zɨ̀. À na nyvɨ àŋena ghì a ghɨ kàyn na yì na nyɨŋì kfɨsɨ̂ àkêʼ a nse. Àŋena na koʼ jelɨ̀ chwô a yi atu. Yì nyɨŋi kfɨ̀sɨ àkêʼ jem sisɨ na ghɨ dzɨ sɨ̂ àŋena. Jem sisɨ na ghɨ ìsɨ i dzɨ zɨ̀ a ghelɨ nɨn jelɨ̀ ateyn.”