Isaiah 53
This book is a draft. It has been translated but has not yet finished checking, and is published here so the community can read and respond to it.
1Ghelɨ ghì a ghɨ n-taŋi sɨ̂ àŋena nɨn be meyn na, wùl nɨn ghɨ wi a wù bɨ̀mi ntum zɨ̀ a ghès làʼì têyn. Wùl ɨ ghɨ wi a wù n-yeyn adyaʼ a Fɨyini iwoo nâ ghàyn.
2Wùl ɨ̀ felɨnɨ nɨ̀ Fɨyini fɨ tî nà lemâ koʼ a ŋweyn asɨ kɨ̀ têyn ta ntû fɨ̀kàʼ. Wu n-lema kɨ ta ighaŋ i fɨ̂kàʼ ɨlvɨ ta yi fvɨ̀ sɨ a nse. Wu nà n-kelɨ wi ikêʼ i juŋì (Jofɨ̀ wì). Wu nà n-fɨsɨ̂ wì wul, ghelɨ kôŋ wì ŋweyn. Afo nɨn bu læ nà ghɨ a ŋweyn ɨwùyn ta wùl kàʼ a wù na semtɨ-à.
3Ghelɨ na ki ŋweyn nyasî kɨ nyasi ghɨ nà yeyn na wù n-ghɨ àfo sɨ alû. Wù na ghɨ wul ngeʼsɨ kfɨlɨ kɨ kfɨlɨ ŋweyn. Wù na ghɨ wi a wù na kôŋ na isɨ-i ŋêyn ŋweyni koynɨ. Ghèsɨ̀ na chasɨ kɨ chasɨ ŋweyn. Yeyn wi na wù n-ghɨ wul.
4Wu n-yeyn meyn ngeʼ a ghesɨ̀nà alèʼ. Wù n-yvɨ̂ meyn ìyaf (mɨ̀lùmchuŋ) a ghesɨ̀nà alèʼ. Ghesɨ̀nà na kfâʼtɨ̀ na à n-fu Fɨyini fu ngeʼ sɨ̂ ŋweyn ɨ̀ nyàblɨ̀ a wù na kelɨ ɨ̀lwemtɨ a ŋweyn ɨwùyn.
5Ghɨ n-sû meyn ɨ lẁmsɨ ŋweyn bòm mbɨsɨ. Ghɨ n-leŋ meyn ŋweyn bòm àwo a bɨ-a kì a ghesɨ̀nà nɨn nî. Wu n-læ bimi ɨ yeyn ngeʼ nâ yèyn a ghesɨ̀nà alèʼ ta ka ghesɨ̀nà keli ibœ̂. À n-ghɨ bòm ɨ̀lwemtɨ vzɨ̀ a ŋweyn ɨwùyn a ghesɨ̀nà nɨn kelɨ mbôynɨ̀.
6Ghesɨ̀nà nô ghɨ̀ jɨ̀m nɨn lê meyn dzɨ kɨ̀ njɨ̀sɨ nî sɨ lè. Nô mɨ ndà na ndù kɨ a ŋweyn abàs mɨtì Bôbo Fɨyini ɨ nî wu yeyn ngeʼ bòm mbɨsɨ ghesɨ̀nà.
7Ghɨ n-læ meyn nyàblɨ̀ nɨ̀ ŋweyn ɨ sòytɨ̀ ɨ̀wuyn ŋweyn, mɨtì wu faŋ tɨ be iwo. Wu nà n-ghɨ ta wâyn njɨ̀ ɨlvɨ ta ghɨ nyɨ̀ŋsɨ̀ sɨ sɨ, fî ghɨ ta njɨ̀ zɨ̀ a ghɨ n-kɨŋ sɨ kom iwî ateyn, wu faŋ tɨ̀ dzɨ̀. Awo nâ kèynà nà n-gâyn tèyn wu chimi kɨ têyn moŋ.
8Ghɨ n-ghalɨ meyn ŋweyn ɨ ndù ɨ saʼ fyeʼtɨ nsaʼ ŋweyn ɨ zue. Wùl ɨ̀ læ̀ dyêyn wì wâyn ŋweyn alèʼ bòm ta ghɨ n-læ zue bula wù lema kfeyn. Ghɨ n-læ zue ŋweyn kɨ bòm mbɨsɨ ghelɨ ghesɨnà.
9Nô mɨ ta wù n-bu læ timi nì iwo i bzɨ-i, ɨ læ faŋ tɨ̀ lɨ̀sɨ ghelɨ, mɨtì ghɨ zue ŋweyn ŋêyn ghelɨ awo a bɨ-a ɨ gvɨ̀mì ŋweyn isè nɨ̀ wùl ɨ ghaʼnɨ (ɨtwo.)
10Bôbo Fɨyini bè na, à n-læ choʼnɨ ma na wù yeyn ngeʼ ɨ̀ kfɨ. Wu n-kfɨ-a ɨ̀ sù mbɨsɨ ghêl a mà lesɨ fù mbɨsɨ àŋena. Wù læ̀ chî tèyn ɨ̀ yeyn woyn ŋweyn. Iwo zɨ̀ a mà Bôbo Fɨyini bàʼtɨ læ̀ toynɨ̂ kɨ a ŋweyn awu jæ sɨ yam a mbzɨ.
11À læ̀ nà ghɨ ɨlvɨ ta wù yeyn awo kì a kɨ n-gâyn bòm ngeʼ zɨ̀ a wù n-yeyn a wù na jofɨ̀ sɨ̂ ŋweyn. Wù læ̀ yeyn kelî na ngeʼ ŋweyn bû lè salû. Wùl ɨ̀ felɨnɨ nɨ̀ mà, kelɨ wi njas læ̀ fu ngeŋ ŋweyn sɨ kfɨ sɨ su mbɨsɨ ghêl ghɨ dvɨ̂ kɨ tèyn.
12Wù læ̀ kfɨ bòm mbɨsɨ ghêl tì a mà lem ŋweyn a wù na ghɨ wul ɨ̀mòʼ antêynɨ̀ nɨ̀ ghelɨ ghì a ghɨ n-gwo ɨfwo vzɨ̀ a ghɨ n-kfa nɨ̀ ɨ̀ŋweyn ɨtwaʼ iwòŋ. Mà læ̀ nî tèyn bòm ta wu n-fu meyn ngêŋ ŋweyn ɨ kfɨ bòm ghelɨ awo a bɨ-a. Ghɨ n-fu meyn kɨmɨ ngeʼ zɨ̀ sɨ̂ ŋweyn a ghɨ n-fu sɨ̂ ghelɨ awo a bɨ-a, bòm ta wu n-bimi sɨ kfɨ bòm mbɨsɨ ghêl ghɨ dvɨ̂ kɨ tèyn na Fɨyini fɨ lesɨ fù mbɨsɨ àŋena.