Isaiah 52
This book is a draft. It has been translated but has not yet finished checking, and is published here so the community can read and respond to it.
2Ghelɨ Jèlusalèm, yì lali ɨ̀ yàysɨ̀ àbɨ̂l sɨ a yi ɨwùyn. Yì lali dùʼì a yi achɨ a tɨ̂fòyn zɨ̂ ghelɨ Jèlusalèm ghì a ghɨ n-ghàytɨ ɨ lù nɨ̀ zɨ̀. Yì soysɨ (choʼtɨ) nchaʼ sìsɨ̀ a sɨ n-ghɨ a yi mzɨ̀. Waynda ngòyn Zayòn soysɨ nchaʼ sìsɨ̀ a ghɨ n-ghal vâ ɨtwo iwoŋ ɨ kul vâ nɨ̀ ɨ̀nseynsɨ.
3Bôbo Fɨyini nɨn bê na, “Yi n-læ beyʼlɨ zɨ a ghɨ wi sɨ kwo. Yi n-ghɨ sɨ kasi sɨ yuyn zɨ kɨ̀ salû bula yi lâʼ ɨ̀kwo.
4Bôbo Fɨyini ɨ bò mbzɨ nɨn bê na, “Ghelɨ̀ ghem nɨn læ ndù a Ijìb sɨ asɨ sɨ ndù sɨ (nà chî afu) sɨ bɨ̀ afu, a nà ghɨ ta àŋena nɨn ghɨ afu, ghelɨ Àsilìyà ɨ ghaytɨ àŋena ɨ nà nyâblɨ nɨ̀ àŋena.
5Bôbo Fɨyini kæ sɨ bè na, “Mɨtì lvɨ̂yn, ghelɨ Babilòn fi meyn lì àŋena sɨ ɨkòs bula ghɨ lâʼ àfu. Ghelɨ ghì a ghɨ ghàytɨ lù nɨ̀ àŋena nɨn nyâblɨ̀ nɨ̀ àŋena (lî wì na mɨ n-ghɨ afu), wêsɨ̀ mà kɨ̀ mɨchi ɨ̀n jɨ̀m.
6Mɨtì mɨ n-nì ni-à a ghelɨ̀ ghem yeyn kèli wul ɨ vzɨ̀ a mɨ n-ghɨ ɨ̀ŋweyn. Mɨ n-nì fvɨsɨ̀ àŋena sɨ a ngeʼ achi nâ ghè a àŋena keli na mɨ n-ghɨ Fɨyini fìfɨ̀ a fɨ n-taŋi sɨ̂ àŋena.
7Yi n-jôf nô sɨ a ŋaŋ sɨ yeyn wul ɨ̀ ntum wu kalì gvî a kfɨyn. Yi n-jôf nô sɨ a ŋaŋ sɨ yeyn wul wu gvî nɨ̀ ntum ì jùŋ, ɨ wul ɨ̀ ntum wu gvî nɨ̀ mbôynɨ̀, ɨ wul wu gvî nɨ̀ ntum ì jùŋ, ɨ wul ɨ̀ ntum wu fêʼtɨ̀ sɨ̂ ghelɨ Zayòn na Fɨyini fɨ bœsɨ meyn àŋena, wu bê sɨ̂ ghelɨ Zayòn na à sɨ saʼ kɨ Fɨyini fɨ àŋena ta fòyn.
8Yì faytɨ yvɨ̀tɨ . Ghelɨ ghì a ghɨ n-chi ilaʼ ì zɨ-i nì nà byal nô nɨ̀ gyasɨ tosɨ. Àŋena ɨ nì nà chɨ̂yntɨ̀ yem nô ghɨ̀ jɨ̀m saŋlɨ-a. Bôbo Fɨyini ɨ nì se sɨ kasi sɨ kfa nɨ̀ ghelɨ ŋweyn a Zayòn a àŋena yeyn. (Àŋena nì yeyn ta Bôbo Fɨyini nɨn kasi gvî a Zayòn).
9Zɨ̀ ghelɨ Zayòn ghì a ghɨ bèbsɨ meyn ìlaʼ ì zɨ-i, yì chɨyntɨ nà yem njàŋsɨ̀ nɨ̀ gyasɨ tosɨ saŋlɨ-à. Yì na yema saŋlɨ-à bòm ta Bôbo Fɨyini koynsɨ meyn ìsuyn sɨ̂ ghelɨ ŋweyn. Bôbo Fɨyini kasi meyn yuyn tèyn ghelɨ ŋweyn (Jèlusalèm).
10Bôbo Fɨyini ɨ nì dyêyn àdyaʼ a kaynɨ-a nɨ̀ ŋweyna sɨ̂ tɨ̀laʼ tɨ mbzɨ nô tɨ̀ jɨ̀m. Ghelɨ tɨghaŋ tɨ mbzɨ nô tɨ̀ jɨ̀m ɨ nì yeyn ta Fɨyini fɨ bœ̀sɨ ghelɨ ŋweyn.
11Yì lali lù sɨ a Babilòn. Yì lali lù ɨ zɨ ghì a yi n-beʼì ɨfwo ndô Fɨyini. Yì fvɨ sɨ afu ɨ̀ lèm ngêŋ sisɨ na layn ta isaʼi nɨn dyêyn. Yi se sɨ fvɨ̀, ka yi n-kùm àfo afu kɨ layn wi ta isaʼi nɨn dyêyn.
12Mɨtì ka yì na luŋ luŋ kèsa sɨ nà leʼ leʼ sɨ lù bòm ta Bôbo Fɨyini ɨ nì chem a yi asɨ, Fɨyini fɨ ghelɨ Isìlæ̀ na ghɨ kɨ̂ŋtɨ̀ zɨ̀ kɨ̀ ɨbyâs ɨ̀ jɨ̀m.
Ngeʼsɨ ghelɨ ghɨ felɨnɨ nɨ̀ Fɨyinifɨ
13Bôbo Fɨyini nɨn be meyn na, “Wùl ɨ̀ felɨnɨ nɨ̀ mà na lêm àwu nô mɨ a gha kɨ nà ndû kɨ nɨ̀ àsɨ-a. Mɨ n-nì ngvɨmlɨ̂ ŋweyn ɨ̀ lẁm ŋweyn achɨ a ngaŋtɨnɨ-a.
14Mɨtì ndvɨ̀ ghèl na yeyn ŋweyn achfɨ̂ a àŋena ɨ yum (a iwo ateyni na fu ngeʼ sɨ̂ àŋena kûm ŋweyn.) Ghɨ na monɨ̂ ŋweyn bòm ta ɨwuyn na ghɨ kɨ ɨlwemtɨ, wu bu fì fɨsɨ̂ wì wul. Wù na bu fì fɨsɨ̂ wì wul ɨ̀ mɨ̀sòŋ.
15Wu læ̀ nà fɨsɨ̂ wul ɨ̀ mɨ̀sòŋ tî, a tɨlaʼ tɨ dvɨnɨtɨ na ghɨ nɨ̀ ì kayni. Tɨfôyn tɨ̀ læ̀ yeyn ŋweyn a achfɨ̂ a àŋena yum. Yi n-ghɨ tèyn bòm ta awo kì a ghɨ bû tìmi fèʼtɨ̀ sɨ̂ àŋena, àŋena læ̀ yeyna. Fî ghɨ bòm ta awo kì a àŋena bû tìmi yvɨ a àŋena keli.