Isaiah 57

¹Ghelɨ ghì a ghɨ n-nî awo àtì-ati nɨn kfɨ-a, wùl ɨ nà kayn wi mbzɨ nâ à gàyn ghà a? Ghelɨ ghì a ghɨ n-yvɨnɨ sɨ̂ Fɨyini fɨ nɨn gvɨ̂tɨ̀ kfɨ-a, ghelɨ nà kya wi iwo zɨ̀ a yi n-gâyn. Fɨyini fɨ nî fɨ lɨsɨ ghelɨ ghì a ghɨ n-yeʼtɨ a ŋweyn ɨwùyn bòm àwo a bɨ-a kì a kɨ n-ghɨ a mbzɨ afêyn.

²Ghelɨ ghì a ghɨ n-nî awo kɨ àtì-ati nɨn kfɨ-a, ghɨ keli mbôynɨ̀. Àŋena nɨn kfɨ-a ghɨ keli ìyvɨ̂tɨ̀.

³Mɨtì zɨ̀ ghî a yi n-ghɨ kɨ ta ghelɨ ghɨ fɨyntɨnɨ, zɨ̀ ghî a yi n-ghɨ ta ghelɨ ghì a ghɨ n-chi nɨ̀ ghɨ̀ki ghêl kèsa nɨ̀ ghɨ̀lum ghêl nɨn ghɨ ta ɨ̀kfàlà. Yì yvɨtɨ iwo zɨ̀ a mɨ n-bê.

⁴Yì kfaʼtɨ na yi n-chyeʼ (wêsɨ̀) ndà. Yi n-kem kem taŋi-à lo ìlemi sɨ̂ ndà. Yi n-ghɨ ghelɨ awo a bɨ-a. Yi n-ghɨ ghelɨ isas i ndo nɨ̀ ghelɨ ànkaŋ.

⁵À n-ghɨ zɨ̀ ghî a yi n-se sɨ nà koʼsɨ mɨyini asa ɨnkàʼ, yi nà chî nɨ̀ ghɨ̀ki, chî nɨ̀ ghɨ̀lûmnɨ̀. Yi ni-à lî kɨmɨ tì nô mɨ isas i fɨ̂kàʼ fɨ̀ kà ta fɨ yvɨ. Yi n-lî kɨmɨ woyn ghi ndû fu sɨ ifu a tɨ̂fyàyn tɨ jvâ, li-à ndû fu sɨ ifu asas a bosɨ.

⁶Yi lêm meyn nà koʼsɨ̂ ɨ̀nfyèʼsɨ̀ a ghɨ ngòʼsɨ̀ sɨ leyn kɨ tèyn tos a tɨ̂fyayn na à n-ghɨ mɨyini mzɨ̂. Yi n-mâʼ mɨ̀lûʼ a nse na à n-ghɨ ìfu sɨ̂ mɨyini mɨ̀ àteyn. Li ɨfwo ɨ yɨnɨ ɨ fu sɨ ifu sɨ̂ ɨ̀mêyn. Yì kfaʼtɨ na mɨ n-saŋlɨ̂ sɨ̂ zɨ̀ kûm àwo nâ kèynà a yi n-môm têyn a?

⁷Yi n-koʼ a kfɨynsɨ sɨ koʼsɨ mɨyini, yi ndu zɨ ɨ̀kfàlà ɨ ndô mɨyini ɨ nà chî nɨ̀ zɨ̀.

⁸Yi ghaŋsɨ meyn ɨ̀nfyèʼsɨ mɨyini nɨ̀ zɨ̀ nâ mèyn ibàm achfɨ̀ a ndosɨ nɨ̀ zɨ̀, ɨ̀ ghàŋsɨ a yi a tɨ̂wùwu. Yi mo meyn mà ɨ Fɨyini, nà koʼsɨ̂ ɨ̀nfyèʼsɨ̀. Yi beyʼlɨ meyn ngêŋ sisɨ sɨ̂ mɨyini mbzɨ̀ a yi n-kôŋ. Yi n-lâʼ àŋena ghɨ chî nɨ̀ zɨ̀.

⁹Yi n-læ nà ndû koʼsɨ̂ Molèk nɨ̀ mɨ̀vɨ̂l mɨ̀ olìfsɨ̀ baʼsɨ̂ nɨ̀ mɨ̀yìsi ɨ̀nlɨmtɨnɨ̂ ɨ̀n jùŋ. Yi n-læ nà tum ghelɨ ghɨ li a ndyèynsɨ̀ sɨ kɨŋ mɨyini. Yi n-læ meyn nà ndû bɨf àwo sɨ̂ nkfɨsɨ nsesɨ.

¹⁰Yi n-læ meyn jèl ndyèyn ɨ bol kɨŋ mɨyini mɨtì ma yì kàʼ yi bû bè na, yi jèl ìjêl i yumi. Yi n-læ meyn kasi keli àdyaʼ ɨ faŋ tɨ̀ kàsi sɨ ibàm ateyn.

¹¹Mɨyini mzɨ̀ a yì tî nà fâyn nô sɨ a ŋaŋ lêsɨ̀ mà, yi bu tî nà fî kfâʼtɨ̀ àwo kì a mà nì sɨ̂ zɨ̀. Yì lèsɨ̀ mà bòm ta mà bu fì fù ngeʼ sɨ̂ zɨ̀ sɨ ɨlvɨ ɨdyâ, yì bu fì ngvɨmlɨ̂ wì ma.

¹²Yi n-kfâʼtɨ̀ na awo kì a yi n-nî nɨn ghɨ àtì-ati. Mɨ n-fèʼtɨ̀ baynsɨ̂ àwo ateyn sɨ̂ zɨ̀ lvɨ̂yn, nô ìwo i ɨ ghɨ wi ateyn sɨ gàmtɨ zɨ.

¹³Ngeʼsɨ koli zɨ̀, yi dzɨ̀ sɨ̂ mɨyini mzɨ̂ mɨ̀ gamtɨ zɨ. À n-ghɨ mɨyini ma afyefa kàʼ a kɨ chwo ɨ̀ tàynsɨ̀ mɨyini ma ghɨ fyef kɨ̀ azuêsɨ̀ a mɨ̀ felɨ. Mɨtì wul ɨ̀ vzɨ̀ a wù n-ghɨ isas i tɨ̂wò nɨ̀ mà læ̀ lî ìlaʼ yèynì (nse yèyn) a à na sɨ kelɨ kɨ nô ŋweyn, nà koʼsɨ̂ mà a kfɨyn i laynɨ nɨ̀ mà.

Bôbo Fɨyini ɨ chfɨ̀nɨ sɨ gàmtɨ ghelɨ ŋweyn

¹⁴Bôbo Fɨyini nɨn læ bè na, “Yì tɨm ndzɨsɨ ɨ̀ lùynsɨ tɨ̀bɨ ɨ̀ lìsì nô mɨ ghà ta kɨ n-tâysɨ̀ na ka ghelɨ̀ ghem kasi gvì sɨ̂ mà.

¹⁵Fɨyini fɨ ngaŋtɨnɨfɨ fìfɨ̀ a fɨ n-ghɨ iyvɨ nɨn ngaŋtɨ̂ chwô. Wù n-ghɨ kɨ mɨlvɨ ɨ̀n jɨ̀m nô ta ka ghɨ̀ læ̂ ghɨ̀. Wù n-bè na, “Mɨ n-ghɨ iyvɨ alèʼ a laynɨ-a fî ghɨ kɨmɨ ghesɨ̀ ghelɨ ghì a ghɨ n-koynsɨ isuyn kûm àwo a bɨ-a kì a àŋena nì men dzɨ̀ sɨ̂ mà. Mɨ n-nì tèyn ta ka àŋena keli nchînɨ̀ ifɨ.

¹⁶Mà læ̀ nà ghâm wì kɨ gham zɨ. Mà læ̀ nà nyôʼsɨ̀ wì ɨtoŋ sɨ̂ zɨ̀ mɨlvɨ ɨ̀n jɨ̀m. Mà læ̀ nà nî wì awo nâ kèynà bòm ta à nì mà na wùl ɨ̀ na chi-à ɨ fu azuê na wù na zuêsɨ̀-à.

¹⁷Mɨ n-læ nyòʼsɨ ɨtoŋ sɨ̂ ghelɨ̀ ghem bòm mbɨ sìsɨ̀ a àŋena na nì. Mɨ n-nyoʼsɨ meyn ɨ fu ngeʼ i bemnɨ sɨ̂ àŋena ɨ bèyn jɨm sɨ̂ àŋena. Mɨtì àŋena na fì to ndû kɨ ndu nɨ̀ àtu-a nî kɨ àwo kì a tɨkfâʼtɨ̀ tɨ àŋena nɨn dyêyn.

¹⁸Mɨ n-kya àwo kì a àŋena nɨn nî nô à jɨ̀m mɨtì ma mɨ n-nì-à a àŋena kasi nà koʼsɨ̂ mà. Mà læ̀ nà tisɨ̂ àŋena nɨ̀ mbôynɨ̀, kfɨmtɨ̂ àŋena ta ka ghelɨ ghì a ghɨ n-dzɨ na saŋlɨ-à, koʼsɨ̂ mà.

¹⁹Mà læ̀ fu mbôynɨ̀ sɨ̂ ghelɨ ghì a ghɨ n-ghɨ a ndyèyn nɨ̀ ɨghî a ghɨ n-baʼsɨ. Mà læ̀ ni-à a àŋena na yem njàŋsɨ̀ koʼsɨ̂ mà. Mà læ̀ ni-à a àŋena na kasî koʼsɨ̂ mà.

²⁰Mɨtì ghelɨ awo a bɨ-a nɨn ghɨ kɨ ta jva ɨlvɨ ta afyef ato-a nɨn nêʼsɨ̀ lâysɨ̀ àchâʼlɨ̀ nɨ̀ ìlɨŋ i a mbæ̀ jvà. Àŋena nɨn kelɨ wi iyvɨ̂tɨ̀ nô sakos.”

²¹Bôbo Fɨyini nɨ̂n bè na, “Mbôynɨ̀ nɨn ghɨ wi sɨ̂ ghelɨ ghì a ghɨ n-nî àwo a bɨ-a. Ghelɨ awo a bɨ-a nɨn læ nà kelɨ wi mbôynɨ̀ nô sakos.