Isaiah 58
This book is a draft. It has been translated but has not yet finished checking, and is published here so the community can read and respond to it.
Dzɨ ì jùŋ zɨ̀ a wùl kàʼ a wù bam ɨchfɨ̂ ateyn
1Bôbo Fɨyini nɨ̂n bè na, “Yì byal, yì byal nɨ̀ gyà ito. Yì byal nɨ̀ ghyà ito tèyn ta yi n-toŋ ìsoŋ. Yì feʼtɨ awo a bɨ-a kì a ghelɨ̀ ghem nɨn nî. Yì feʼtɨ bàynsɨ mbɨ sìsɨ̀ a ghelɨ ndo nɨ̀ Jàkôb nì àŋena yvɨ.
2Àŋena nɨn koʼsɨ̂ mà kɨ̀ mɨchi ɨ̀n jɨ̀m (kɨ̀ achi nɨ̀ àchi-a) kêʼ tèyn ta àŋena nɨn kôŋ (kɨŋ) sɨ nà kya tɨsaʼ temtɨ. Ghɨ tèyn ta ghelɨ ghì a ghɨ n-nî awo àtì-ati.
3Àŋena nɨn bɨf sɨ̂ Bôbo Fɨyini na, “Bòm ghà ta ghès nɨn bam ɨchfɨ̂ wa yeyn wi a? Àŋena nɨn bɨf sɨ̂ Bôbo Fɨyini na, ghès nɨn yɨ wi yi kêʼ na wà n-kya wi ta ghɨ̀ ghà?” Bôbo Fɨyini ɨ bè sɨ̂ àŋena na, “Yi n-se sɨ bam ɨchfɨ̂ nô mɨ achi à kà, yi nà nî kɨ àwo kì a yi n-kôŋ Yi ni-à bam ɨ̀chfɨ̂ fu ngeʼ sɨ̂ ghelɨ ghɨ felɨnɨ nɨ̀ zɨ̀.
4Yi n-ni-à bam ɨ̀chfɨ̂ ɨ̀ se sɨ mèsì yi nà yolɨ̀-à fî nu-à. Yi n-se sɨ bam ɨchfɨ̂, wùl ɨ nà bɨytɨ̂ kɨ fɨ̀nkàm leŋ a wùl ɨ̀lvɨ̀ a buʼ buʼ sɨ atu. Yì kæ sɨ nà bam ɨ̀chfɨ̂ a dzɨ nâ ghàyn, ma bû læ̀ yvɨ ijêm ì zɨ-i nô sakos.
5A iyeynì ti n-ghɨ ìnkì ibam ɨchfɨ̀ zɨ̀ a mɨ n-kɨn na yì na bam a? A mà ti n-kɨn na yì na yisî achi a fɨ̂blɨ-à sɨ a jeŋ fu ngeʼ sɨ̀ ngêŋ sisɨ a? A mà ti kàʼ ma nà saŋlɨ̂ bòm ɨ̀tu wèyn a yi n-chfɨŋsɨ têyn ta ɨnfûʼ a mbæ̀ jvà a? A mà ti kàʼ a mà na saŋlɨ̂ kûm ìnyɨŋì yèynì nɨ̀ fɨ̀ntsɨ fèynfɨ̀ a yi n-mâʼ, fuʼ àbvɨ a yi ɨwùyn teyn a? A ti ìnkì ibam ɨchfɨ̀ i li ta ka yì na kɨŋ na Bôbo Fɨyini na saŋlɨ̂ kûm ìnyeyni a?”
6Awo kì a mɨ n-kɨŋ na ghelɨ ghì a ghɨ n-bam ɨchfɨ̂ na ni-à nɨn ghɨ na, Àŋena na sôysɨ̀ nchaʼ sìsɨ̀ a àŋena kul ghelɨ ateyn bula ghɨ jas ìwo. Àŋena yaytɨ nkfɨ̀ sîsɨ̀ a àŋena kul tɨ̀msɨ ghelɨ nɨ̀ ɨ̀nseynsɨ, sùʼsɨ àdɨli kì a ghɨ n-koʼsɨ a àŋena atu ti. Mɨ n-kɨŋ na àŋena na gâmtɨ̀ ghelɨ ghì a ghɨ n-nyâblɨ̀ nɨ̀ àŋena ɨ̀ tùynsɨ àwo kì a ghelɨ nɨn nî kɨ fu ngeʼ sɨ̂ ghelɨ ghɨ li.
7Mɨ n-kɨŋ na yì na gwôtɨ̀ ɨ̀fwo ɨ yɨnɨ nɨ̀ zɨ̀, fu ghelɨ ghì a ghɨ n-kelɨ wi. Yì na fu àlêʼ a chinɨ-a sɨ̂ ghelɨ ànfɨf ghì a ghɨ n-kelɨ wi alêʼ sɨ chi. Yi yeyn wwul wu jelɨ̀ nɨ̀ ìsas i yumi, yi màʼ ndzɨsɨ a ŋweyn ɨwùyn. Ka yi n-lèʼ sɨ nà gamtɨ woynà ghi.
8Yi kæ nà nî awo nâ kèynà, a mà dyeyn atem a juŋà nɨ̀ mà sɨ̂ zɨ̀. A ikôŋ ì yemi na bayn sɨ̂ zɨ̀ ta ɨchfɨ̂ iyvɨ i salɨnɨ-i, a ngeʼsɨ mæ. Yi n-nî têyn, a awo a juŋà kì a yi n-nî na kêʼ a ndyayn, (a ghelɨ na yeyna). Yi n-nî têyn, a Fɨyini fɨ na kɨ̂ŋtɨ̀ zɨ̀ nô mɨ wo ta yi n-ghɨ.
9Yì kæ nà fu wi ngeʼ sɨ̂ ghelɨ ghɨ li, bê wì awo a bɨ-a kûm wul sɨ a ànkaŋ, taŋî wì awo a bɨ-a kûm wul bula wù jas ìwo, a yì na jemà Bôbo Fɨyini ɨ bêynsɨ̀ wì ijêm ì zɨ-i. Yi dzɨ̂ na wù gamtɨ zɨ, wu yvɨ ɨ gàmtɨ zɨ̀.
10Yì kæ fu ɨfwo ɨ yɨnɨ nɨ̀ zɨ̀ sɨ̂ ghelɨ ghì a ghɨ n-kelɨ wi afo sɨ yɨ, gàmtɨ̀ ghelɨ ghì a ghɨ n-yeyn ngeʼ, a yì na ghɨ ta ibayn ɨlvɨ ta abe-a nɨn fɨ̂m, a abe a fɨmnɨ-a kì a kɨ jɨ̀ŋ kàli zɨ bayn kɨ̀ ta nto chuè.
11Yì kæ nà nî têyn, a mà Bôbo Fɨyini na tisɨ̂ zɨ̀ kɨ̀ mɨlvɨ ɨ̀n jɨ̀m. Mà na fu nô mɨ ghà ta yi n-kɨŋ (n-kôŋ), ni-à yi nà ghɨ ɨwuyn ɨtwo, ni-à yi nà ghɨ ta gvêyn mbàs ɨlvɨ ta ghɨ fàytɨ sfɨ̀ytɨ̀ nɨ̀ mu. Ghɨ ta isɨ i lɨmàlɨ̀mà mu lum yum wi sɨ ateyn.
12Ghelɨ ghi læ̀ kasî bâʼlɨ̀ ntèʼ sìsɨ̀ a sɨ tî nà ghɨ kɨ sɨ yum ghelɨ bu chî wì ateyn. Àŋena læ̀ kasî wê wì achɨ kì a ghɨ n-we ɨtuʼ mu. Ghɨ læ̀ nà toŋtɨ̂ zɨ̀ na ghelɨ ghì a ghɨ n-kàsi bàʼlɨ ɨzɨ mbàynsɨ̀ vzɨ̀ a wu n-bɨytɨ, fî toŋtɨ̂ zɨ̀ na ghelɨ ghì a ghɨ n-kasi faytɨ dzɨsɨ a ntèʼsɨ na ghelɨ na chî ateyn.
13Bôbo Fɨyini bè na, “Yì kæ lèm achi ɨtuʼ ilaʼ nɨ̀ mà kɨ na ghɨ nɨ̀ ì layni ta isaʼi nɨn dyèyn, nà nî wì awo kì a yi n-nî yi nà ni-à a mɨchɨ ɨ̀n lì. Yì kæ nà ngvɨmlɨ̂ mà nɨ̀ ìsaŋlɨ-i achi nâ ghàyn, lî na à n-ghɨ àchi sɨ nà koʼsɨ Bôbo Fɨyini ateyn, nî wì ta yi n-kôŋ kèsa taŋî wì itaŋi i ayùŋayuŋ.
14Yì kæ nà nî awo nâ kèynà, a yì na saŋlɨ-à bòm ta yi n-felɨ̀ sɨ̂ mà Bôbo Fɨyini. A mà ni a mbzɨ ì jɨ̀m na ngvɨmlɨ̂ zɨ̀. A mà kasi fù ilaʼ zɨ̀ sɨ̂ zɨ̀ a mɨ n-fu sɨ̂ bò bò vzɨ ɨ Jàkôb.” À bè mà Bôbo Fɨyini.