Isaiah 60

Jèlusalèm læ̀ nà kelɨ ìŋwâʼ i Fɨyini

¹Jèlusalèm yì lali ɨ̀ dyèyn sɨ̂ wùl mɨ̀sòŋ ta Fɨyini fɨ bœ̀sɨ̀ meyn zɨ̀. Ibayni gvi meyn sɨ̂ zɨ̀, iŋwâʼ i Bôbo Fɨyini nɨn ghɨ a yi atu.

²Samoʼ abe a fɨmnɨ-a chɨyntɨ meyn mbzɨ. Abe a fɨmnɨ-a chɨytɨ meyn tɨ̀laʼ tɨ̀ jɨ̀m a mbzɨ. Mɨtì Bôbo Fɨyini bœ̀sɨ̀ zɨ̀ na ghelɨ yeyn ibayn i ŋweyn (ighaʼ i ŋweyn) a yi ɨwùyn.

³Tɨlaʼ tɨ ɨtumtɨ læ̀ nà gvi-à, koʼsɨ̂ Bôbo Fɨyini fifɨ. Tɨfôyntɨ̀ læ̀ nà gvî kɨmɨ gvi sɨ yeyn ibayn zɨ̀ a Bôbo Fɨyini fù sɨ̂ zɨ̀.

⁴Ghelɨ Isìlæ̀, yì laysɨ asɨ à ki-a ɨ̀ ki. Yì yeyn ta wôyn ghi yvɨ̀ŋtɨ̀ kàsi nà ndù sɨ a àŋena ilaʼ. Woyn ghi ghɨ lûmnɨ̀ lû sɨ ɨlwèʼ ɨ ndyèynsɨ̀ kasî gvî sɨ yeyn zɨ. Ghɨ bala meyn woyn ghi ghɨki nà gvî nɨ̀ àŋena.

⁵Àŋena læ̀ kasî gvi-à a yì kæ sɨ nà saŋlɨ-à. Yì læ̀ yeyn àŋena nà saŋlɨ̂ nô sɨ a ŋaŋ. Àŋena læ̀ beyʼì ìghaʼ ɨ̀ tum a ghɨ gvi fù sɨ̂ zɨ̀. Àŋena læ̀ beʼì-à ɨ̀ dyàŋ jva ighaʼnɨ nɨ̀ inyeyni ɨ̀ fù sɨ̂ zɨ̀.

⁶Ghɨ læ̀ beʼì ìghaʼ inòyn i kàmêlsɨ̀ ɨ gvì nɨ̀ ìnyeyni. Ghɨ læ̀ gvî nɨ̀ ɨ̀nseynsɨ a sɨ luyn ilaʼ iì zɨ-i. Mbèʼìnkùm nâ yèyn læ̀ nà lû a Midìyàn, ghɨli lû a Efà. Ghelɨ ghɨ jɨ̀m ghì a ghɨ n-læ lù a Shebà læ̀ gvi-à. Àŋena læ̀ nà gvî kelɨ àso ɨkwo a baŋnɨ-a nɨ̀ ìleŋi. Àŋen læ̀ nà gvî fêʼtɨ̀ sɨ̂ zɨ̀ awo a kaynɨ-a kì a Bôbo Fɨyini nì.

⁷Ghelɨ Kadàl læ̀ lî njɨ̀sɨ àŋena nɨ̀ bzɨsɨ gvì nɨ̀ ɨ̀nseynsɨ ɨ̀ fù sɨ̂ zɨ̀. Yi læ̀ nà lî ɨ̀ywaʼ vzɨ̀ a ghelɨ Nebayòt læ̀ nà gvî nɨ̀ ɨ̀ŋweyn, fu ìfu ateyn. Yi læ̀ nà fu ìfu ateyn sɨ̂ mà Bôbo Fɨyini ma fsɨ nɨ̀ ìsaŋlɨ-i. Mà læ̀ ni-à a ghelɨ na ngvɨmlɨ̂ ndô yem.

⁸À ti n-ghɨ ghɨ̀ ndà a ghɨ n-suʼi gvî têyn ta mbàʼsɨ̀ a? À n-ghɨ ghɨ̀ ndà ghêyn a ghɨ n-tâyn antêynɨ̀ mbàʼsɨ̀ ta ɨ̀lwàlàtoto kasî ndû a ndosɨ nɨ̀ ɨ̀ŋweyn a?

⁹À n-ghɨ ngùʼ sɨ ghaʼlɨnɨsɨ ta sɨ lù a Tashìsh ta àŋena nɨn gvî sɨ yeyn ma. Àŋena nɨn gvì nɨ̀ woyn ghi ghì a ghɨ tî nà ghɨ a tɨ̂laʼ a ndyèyn. Àŋena nɨn gvì kelɨ àso ɨkwo a fɨfâ nɨ̀ àso ɨkwo a baŋnɨ-a sɨ fu sɨ ifu sɨ̂ Bôbo Fɨyini ɨ Fɨyini fifɨ, ɨ Fɨyini fɨ laynɨfɨ nɨ̀ ghelɨ Isìlæ̀. Àŋena nɨn gvì nɨ̀ ɨ̀fwo nâ wèyn bòm ta Bôbo Fɨyini fù meyn achɨ a ngaŋtɨnɨ-a sɨ̂ zɨ̀ tɨlaʼ tɨ ɨtumtɨ na ngvɨmlɨ̂ zɨ̀.

¹⁰Ghelɨ ghɨ gvinɨ ghì a ghɨ n-chi a yi antêynɨ̀ læ̀ kasî bâʼlɨ̀ mbàyn ntèʼ ighaʼnɨ nɨ̀ zɨ̀ a Jèlusalèm. Tɨfôyn tɨ àŋena læ̀ nà felɨ̀ sɨ̂ zɨ̀. Nô mɨ ta mɨ n-læ nyòʼsɨ ɨtoŋ ɨ fu ngeʼ sɨ̂ zɨ̀. Mà læ̀ bu fì nyôʼsɨ̀ wì ɨtoŋ sɨ̂ zɨ̀. Mɨ n-nì koynsɨ̂ ìsuyn ɨ̀ kàsi lì zɨ̀.

¹¹Achfɨ̂ a mbàynsɨ̀ nɨ̀ zɨ̀ a læ̀ nà ghɨ kɨ àzɨ̀ azɨ. Wùl læ̀ kɨ̂ŋ wi nɨ̀nchuè, ɨ̀ læ̀ faŋ tɨ̀ kɨŋ nɨ̀ntuʼ. Achfɨ̂ a mbàynsɨ̀ ateyna læ̀ nà ghɨ kɨ àzɨ̀ azɨ ta ka ghelɨ ɨtum na gvì kelî sɨ zɨ nɨ̀ ìghaʼ i àŋena sɨ fu sɨ̂ zɨ̀. Ghɨ læ̀ nà gvî nɨ̀ ìghaʼ ateyn kɨ̀ inòyn inòyn, tɨfôyn tɨ àŋenatɨ ɨ ghɨ kɨmɨ anòyn.

¹²Àŋena nɨn lelɨ sɨ læ̀ sɨ nà gvi-à bòm ta nô mɨ ìlaʼ ì ka zɨ̂ a yi læ̀ leʼ sɨ nà felɨ̀ sɨ̂ zɨ̀ ghɨ læ̀ bebsɨ̂ kɨ bebsɨ. Ghɨ læ̀ bebsɨ̂ mesì kɨ mesi tɨlaʼ tɨ ateyn.

¹³Jèlusalèm, ghɨ læ̀ gvî nɨ̀ ìghaʼ i Lebanòn ì a yi ilaʼ. Ghɨ læ̀ gvî nɨ̀ ɨ̀nkàʼ mɨ̀ àgùm nɨ̀ ɨ̀nkàʼ mɨ Bayn nɨ̀ ɨmzɨ fîl ɨ̀ fù sɨ̂ zɨ̀. Yi læ̀ nà bâʼlɨ̀ ndô yem nɨ̀ ɨ̀mêyn ta ka alêʼ kì a ghɨ n-koʼsɨ ma ateyn na jofà, a mà ni a iŋwâʼ ì yemi na ghɨ alèʼ ghè a ghɨ n-koʼsɨ ma ateyn.

¹⁴Woyn ghelɨ ghì a ghɨ n-læ tɨm yɨ zɨ na nyâblɨ̀ nɨ̀ zɨ̀ læ̂ gvì nguʼ a yi asɨ. Ghelɨ ghì a ghɨ n-chasɨ zɨ læ̀ gvî nguʼ a yi ɨvɨ̀. Àŋena læ̀ nà toŋtɨ̂ ntèʼ zɨ na, “Ntèʼ ighaʼnɨ nɨ̀ Bôbo Fɨyini.” Aŋena læ̀ nà toŋtɨ̂ na Zayòn nɨn ghɨ ntèʼ Fɨyini fɨ laynɨfɨ nɨ̀ ghelɨ Isìlæ̀.

¹⁵Jèlusalèm nô mɨ ta ghɨ tɨm yɨ̀ zɨ, wùl na bu fì ghɨ wi ateyn (afu), ghelɨ chyeʼ wêsɨ̀ zɨ̀ fî bâyn zɨ̀, wùl ɨ bu fì chwô wì dzɨ a yi a ntèʼ. Mɨ n-nì ni-à a ghelɨ na ngvɨmlɨ̂ zɨ̀. Ntèʼ zɨ læ̀ nà ghɨ àlêʼ ghelɨ ɨ saŋlɨ̂ kɨ saŋlɨ ateyn, nô mɨ àjàŋ à kà.

¹⁶Yi læ̀ nà yɨ ɨ̀fwo ɨ jûŋ vzɨ̀ a wu n-koʼ a tɨ̂laʼ tɨ lûtɨ̀. Tɨfôyn tɨ ɨtum tɨ na fu ɨ̀fwo sɨ̂ zɨ̀ kɨ̀ sɨ idvɨ̀. Yi læ̀ gâyn tì a yì keli na à n-ghɨ mà Bôbo Fɨyini ghɨ mbœ̀sɨ̀ zɨ̀ ɨ̀ yuyn tèyn zɨ sɨ a ngeʼ ɨ ma vzɨ̀ a mɨ n-kelɨ adyaʼ a bemnɨ-a isas i ndo nɨ̀ Jàkôb.

¹⁷Mà læ̀ ni-à a tɨlaʼ tɨ ɨtum na fu àso ɨkwo a baŋnɨ-a sɨ̂ zɨ̀ a ghɨ wi idyayn. Mà læ̀ ni-à a àŋena visi akas ɨkwo ɨ̀ fu aso ɨkwo a fɨfâ. Mà læ̀ fî ni-à a àŋena visi ɨnkâʼ ɨ̀ kwo gvì nɨ̀ ìdyayn i, ɨ̀ vìsi ngòʼsɨ̀ ɨ̀ gvì nɨ̀ àkasa. Mà læ̀ ni-a a ghelɨ ghì a ghɨ n-tisɨ zɨ na saʼ zɨ̀ fyeʼtɨ̂ wì iwo. Yì læ̀ nà chî nɨ̀ mbôynɨ̀ (kelɨ mbôynɨ̀).

¹⁸Ghɨ læ̀ bu fì fu wi ngeʼ sɨ̂ zɨ̀ (ngeʼ læ̀ nà bu fì ghɨ wi a yi ilaʼ) Ghɨ bu fì bebsɨ̂ wì tɨghami titɨ. Mà læ̀ bœ̂sɨ̀ zɨ̀ a yì na ghɨ ta ghelɨ antêynɨ̀ mbàyn ntèʼ ighaʼnɨ. Nô mɨ ndà vzɨ̂ a wù læ̀ zɨ ɨchfɨ mbàyn nâ ghàyn læ̀ nà luʼa koʼsɨ̂ mà.

¹⁹Yi læ̀ nà bu fì chî wì chue kèsa njoŋ na yì na bayna fu ìbayn sɨ̂ zɨ̀ bòm ta Bôbo Fɨyini ɨ nì nà ghɨ ìbayn ì zɨ-i ma yi faŋ meyn kɨ̀ samoʼ. Fɨyini fifɨ læ̀ nà fu ìbayn sɨ̂ zɨ̀.

²⁰Ɨchfɨ̂ iyvɨ nɨ̀ zɨ̀ læ̀ bu fì sœ̂ wì, a njoŋ zɨ læ̂ faŋ tɨ̀ fì tɨ kfɨ(lɨma). Bôbo Fɨyini ɨ nì nà ghɨ ìbayn ì zɨ-i ma yi faŋ meyn kɨ̀ samoʼ, a ngeʼ sisɨ mæ kɨ sɨ̀ jɨ̀m.

²¹Ghelɨ ghɨ̀ jɨ̀m a Isìlæ̀ læ̀ nà nî àwo àtì-ati. Àŋena læ̀ fsɨ ìlaʼ ateyn nà kelî na à n-ghɨ ìlaʼ ì zɨ-i nô ta ka ghɨ̀ læ̂ ghɨ̀. Àŋena nɨn ghɨ ntu fɨ̀kàʼ ta mà yel. Àŋean nɨn ghɨ ma à bòm ma bom àŋena.

²²Isas i ndo zɨ̀ a yi læ gòʼsɨ̀ a yi antêynɨ̀ læ̀ nà ghɨ ghelɨ nkam, a isas i ndo ilænɨ-i a yi antêynɨ̀ na ghɨ ìlaʼ i ghaʼnɨ-i. À n-ghɨ mà Bôbo Fɨyini, ɨlvɨ ateyn læ̀ kfeyna a mà ni a yi nyaŋsɨ gàyn kɨ̀ gayn.