Isaiah 7

Nchwæ kû Imanùwèl

¹À n-læ nà ghɨ ta Ahàz ɨ wâyn Jotàn nɨ̀n saʼ Judà, Lezìn ɨ fòyn Alàm ŋêyn Bekà ɨ wâyn Lèmalìyà ɨ fòyn Isìlæ̀ ɨ gi nù/kèʼ Jèlusalèm. Mɨtì ɨ faŋ tɨ̀ tɨm tɨ̀ yɨ àŋena. Jotàm nɨn læ nà ghɨ wâyn Uzìyà.

²Ghelɨ Alàn nɨn tasɨ meyn ìwoŋ ŋêyn ghelɨ ndo nɨ̀ Efɨ̀lèm sɨ gvi sɨ nu Jèlusalèm. A nà ghɨ ta ghelɨ ndo nɨ̀ Devìt ɨ fòyn Judà ŋêyn ghelɨ ŋweyn yvɨ saʼgha àteyn, àŋena nà chɨŋtɨ̂ faynà, mɨ̀tem mɨ̀ àŋena neʼà kɨ̀ ta ɨtu ɨnkàʼ akù ɨlvɨ ta afyefa nɨn chwô. A nà n-ghɨ ta ghelɨ ndo nɨ̀ Devìt yvɨ na ghelɨ Alàm tasɨ meyn ìwoŋ ŋêyn ghelɨ ndo nɨ̀ Efɨ̀lèm, fòyn Ahàz ŋêyn ghelɨ ŋweyn ɨ nà chɨŋtɨ̂ faynà, mɨ̀têm mɨ̀ àŋena ɨ neʼà kɨ ta ɨnkâʼ ɨlvɨ ta afyefa nɨn chwô.

³Bôbo Fɨyini ɨ be sɨ̂ Isayà na, “Zɨ̂ wâyn vâ ɨ Shiya-Jashùb lu ndù kòli fòyn Ahàz achɨ̀m a mu abàs ikuè alèʼ ghè a ghɨ lì mu mɨ̀ na ndû gôʼsɨ̀ ateyn a dzɨ ta yì ndû ibal ghè a ghɨ n-sû ndzɨsɨ ateyn/tasɨ ndzɨsɨ ateyn. ⁴Wà ndû wa bè sɨ̂ ŋweyn na wù na tôʼnɨ̀-à ka wù fî fàyn/ka atem a ŋweyna fî lùm bòm ɨ̀toŋ ɨ yafɨnɨ ɨ bemnɨ nɨ̀ Lesìn ŋêyn Alàm nɨ̀ ɨwu wâyn Lèmalìyà. ⁵Fòyn Alàm ŋêyn ghelɨ Isìlæ̀ baʼsɨ̂ nɨ̀ fòyn àŋena(wâyn Lèmalìyà) nɨn baʼtɨ̂ sɨ bebsɨ ilaʼ ì zæ̂. Àŋena nɨn bê na, ⁶‘Ghesɨ̀nà ndu nù/kèʼ ghelɨ Judà tɨ yɨ ilaʼ ateyn, ɨ̀ gwotɨ̀ à na kelɨ ghesɨ̀nà, ɨ̀ lèm wâyn Tabèl sɨ a fòyn nɨ̀ ghesɨ̀nà.’ ⁷Mɨtì, Bôbo Fɨyini vzɨ̀ a wù n-saʼ mbzɨ ì jɨ̀m bè na, “Àŋena nɨn zɨ̂ wì ilaʼ nâ ghàyn/ iwo i àŋena nɨn kfeyn wi/iwo nâ zɨ̀-ì nɨn gâyn wì.

⁸Bòm ta ghelɨ Alàm nɨn kelɨ wi adyaʼ ta Dàmaskùs ɨ ntèʼ i ghaʼnɨ nɨ̀ àŋena, ghelɨ Dàmaskùs ɨ kelɨ wi adyaʼ ta Lesìn ɨ fòyn àŋena. Mɨtì sɨ̂ ghelɨ Isìlæ̀, à na ghɨ antêynɨ̀ bèsŋsɨ̀ mɨ̀vɨm ntufa njvàsɨ̀ tâyn a ghɨ tɨm yɨ àŋena bèbsɨ ìlaʼ ateyn nô ì jɨ̀m.

⁹Isìlæ̀ kàʼ yi bû nà kelɨ àdyaʼ chwô Sàmalìyà ɨ ntèʼ ighaʼnɨ nɨ̀ àŋena, Sàmalìyà ɨ kelɨ wi adyaʼg ta fòyn àŋena ɨ Bekà ɨ wâyn Lèmalìyà. Wà kæ faŋ tɨ timi sɨ nà to ibimi nɨ̀ và, mà kàʼ ma bù nì na wà na to.

¹⁰Bôbo Fɨyini nɨn fi meyn tum ntum ì lì sɨ̂ fòyn Ahàz ɨ bè na, ¹¹‘Bè sɨ̂ Bôbo Fɨyini ɨ Fɨyini fyafɨ fɨ dyeyn nchwæ sɨ̂ và ta ka wà bimi kèsa yì n-ghɨ iyvɨ ghè a yi ngaŋtɨ chwô ma yì n-ghɨ isas i nse a.’

¹²Mɨtì fòyn Ahàz ɨ tuynsɨ ɨ bè na, ‘Mà kàʼ ma bû mòm Bôbo Fɨyini.’

¹³Isayà ɨ kæ bè na, ‘Zɨ̀ ghelɨ ndo nɨ̀ Devìt yì yvɨtɨ, yì kæ nà môm nô mɨ ghelɨ, yi bu nà kelɨ sɨ bom sɨ mom Bôbo Fɨyinì ɨ Fɨyini femfɨ. ¹⁴Yi ti n-dyêyn na/À ti iwo zɨ̀ a Bôbo Fɨyini nɨ̀ ngêŋ ŋweyn nɨn fu/dyèyn chwæ sɨ̂ zɨ̀, waynda ngòyn (ɨ̀lvɨ̀) bula wu ̀ timi nà kya wul ɨ lûmnɨ̀ nɨn timî ɨlvâ ɨ̀ bzɨ wayn ɨ lûmnɨ̀ a ghɨ chfɨ izɨyn i ŋweyn na Imanùwèl (yi dyêyn na, “Fɨyini fɨ nɨn ghɨ a ghesɨ̀nà antêynɨ̀.) ¹⁵Wàyn nâ wèyn læ̀ nà yɨ kɨ ìgheyn i nyâm ta ghɨ kam yi tabtɨ baʼsɨ̂ nɨ̀ ɨ̀lû sɨ lema sɨ chem ta wù kàʼ a wù na kya sɨ choʼnɨ iwo i juŋì, kya sɨ chas iwo i bzɨ-i. ¹⁶Wàyn nâ wèyn læ̀ se sɨ chem aleŋ sɨ nà kya sɨ choʼnɨ iwo i juŋì, kya sɨ leʼ mbzɨ, tɨlaʼ tɨ tɨ̂fòyn nâ tèyntɨ̀ tɨ̀ bò a wà n-fâyn têyn ɨ ghɨ kɨ ta nse iyum. (ɨ ghɨ kɨ tɨ yum). ¹⁷Bôbo Fɨyini nɨn fu ngeʼ i bemnɨ sɨ̂ zɨ̂ ghelɨ̀ ghya baʼsɨ̂ nɨ̀ ghelɨ ndo nɨ̀ bò vâ, bula yi timi yeyn ìn kì i ngeʼ nâ yèynì sɨ a ɨtuʼ ta ghelɨ ndo nɨ̀ Efɨ̀lèm nɨn læ gvwòsɨ ŋêyn ghelɨ Judà (Leæ fvɨ̀ sɨ a Judà). Wu n-visì-à a fòyn Àsilìyà gvi fù ngeʼ sɨ̂ zɨ̀.

¹⁸Ɨlvɨ nɨn kfeyna/gvi-à ta Bôbo Fɨyini jaŋtɨ sugèyʼsɨ Ijìb nɨ̀ zwæ/ànchès a a àŋena gvi (nù zɨ̀) kɨ̀ ta mɨnjæ̂njæ̀ a mɨ̀ lù alèʼ ghè a jvà Nâyl nɨn fvɨ̂ ateyn, jàŋtɨ̀ sugèyʼ sɨ Asilìya a zwæ a àŋena gvi kɨ̀ ta yvɨsɨ ɨ̀ nù zɨ̀. ¹⁹Àŋena læ̀ gvî kɨ sɨ idvɨ̀ nà ghɨ kɨ ɨlwêʼ ɨ̀ jɨ̀m a Judà. Ghɨ li læ̀ nà chî a mɨ̂fòŋlɨ mɨ sœ̂ kɨ tèyn ghɨli chî a tɨ̂fò, ghɨli chî ɨtwaʼ sùnjoŋnjoŋsɨ, ghɨli chî kɨmɨ ɨlwèʼ ghè a ghɨ n-felɨ̀ gveynsɨ ateyn/ɨtwaʼ ɨ nyâmsɨ̀. ²⁰À læ̀ nà ghɨ ɨtuʼ nâ ghè a Bôbo ni a fòyn Asilìyà lu injɨyn i jvâ Yufɨ̀lèt gvì bèbsɨ ìlaʼ ì zɨ-i nô ì jɨ̀m. Wù læ̀ bebsɨ̂ ɨ̀fwo a yi a gvêynsɨ̀, zuètɨ ghelɨ baʼsɨ̂ nô mɨ nɨ̀ ghà ɨ̂lvì kɨ̀ ta wul ɨ vzɨ̀ a wù n-kom ɨtu nɨn se sɨ kom atu a wûl, wu kom idyel i ŋweyn baʼsɨ̂ nɨ̀ nyuŋ sìsɨ̀ a sɨ n-ghɨ a ŋweyn ɨwùyn/afyeyn ²¹Ɨlvɨ nâ vzɨ̀ læ̀ kfeyna, a nô mɨ wul ɨ vzɨ̀ a wù n-felɨ̀ gveynsɨ kæ nà kelɨ kɨ nyâm mbòloʼ ìmòʼ kèsa bzɨ sɨ̀ bò, ²²nà kelɨ ìgheyn i nyâm ta ghɨ kam (kɨ sɨ idvɨ̀) sɨ nà nyvɨ-a bòm ta nyam nâ sìsɨ̀ læ̀ nà fu ìgheyn i nyâm sɨ̂ àŋena kɨ̀ sɨ idvɨ̀. Ghelɨ ghì a ghɨ n-læ faŋ a Judà/ilaʼ afu læ̀ nà yɨ kɨ ìgheyn i nyâm ta ghɨ kam yi tabtɨ baʼsɨ̂ nɨ̀ ɨ̀lû. ²³À læ̀ nà ghɨ ɨtuʼ nâ ghè, a kôʼ kɨsɨ ɨtwaʼ sùnjoŋnjoŋ baʼsɨ̂ nɨ̀ àmbyèyn aku-a a gveynsɨ afî a ntàŋsɨ gɨ̀lêbsɨ̀ tî nà ghɨ ateyn nkàm nô sɨ idvɨ̀ ma a ghɨ kàʼ ghɨ beʼlɨ sɨ a aso ɨkwo a fɨfâ kɨ dɨlɨ̀ chem ndû kilùsɨ̀ njvà ìmòʼ nɨ̀ àbeʼa. ²⁴Ghelɨ læ̀ nà ndû afu kɨ̀ ma ghɨ seʼ ibyem, ndù nɨ̀ mɨ̀nchya nɨ̀ àwoŋa bòm ta ilaʼ ateyni nɨn ghɨ kɨ ɨ̀twaʼ ɨtwô, ma ɨtwaʼ sùnjoŋnjoŋsɨ nɨ̀ àmbyèyn akù-a chɨytɨ meyn kɨ̀ ɨlwèʼ ɨ̀ jɨ̀m. ²⁵Kfɨyn sìsɨ̀ nô sɨ̀ jɨ̀m a ghɨ tî nà felɨ̀ ɨfwo ɨ yɨnɨ ateyn læ̀ nà ghɨ kɨ ɨ̀twaʼ ɨtwô ma ɨtwaʼ sùnjoŋnjoŋsɨ nɨ̀ àmbyèyn akù-a kôʼ meyn chɨ̀ytɨ. Kfɨynsɨ ateynsɨ læ̀ nà ghɨ ɨ̀lwêʼ/ɨ̀twaʼ vzɨ̀ a nyamsɨ mbòloʼsɨ nɨ̀ bzɨsɨ nɨn yɨ ateyn.