Jonah 1

Jonà ɨ chas gyâ Bôbo Fɨyini

¹À n-læ meyn nà ghɨ achi a li-a Bôbo Fɨyini ɨ taŋi sɨ̂ Jonà ɨ wâyn Amìtây ɨ bè na, ²“Lu kɨ lvɨ̂yn ɨ ndù a ntèʼ ighaʼnɨ ghè a ghɨ n-toŋtɨ na Ninivè tì ɨ fèʼtɨ̀ sɨ̂ àŋena na ma yeyn meyn àwo a bɨ-a kì a àŋena nɨn môm.” ³Ta Bôbo tàŋi tî, Jonà ɨ nà sɨ leʼ ŋweyn ɨ kwo lù ɨ nà ndû dzɨ a Tashìsh. A nà ghɨ ta wù kàlì chem a Jobà ɨ yeyn ngùʼ ighaʼnɨ ìlì, yi ndû a Tashìsh. Wu làʼ ɨ zɨ ateyn ɨ lù ŋêyn ghelɨ ngùʼ nâ ghì, kfâʼ kɨ na yi n-leʼ Bôbo. ⁴Bôbo Fɨyini ɨ tum afyef ato a li-a, kɨ nà chwô a jvâ ighaʼnɨ nâ ghê a ngùʼ nâ zɨ̀ nà n-jelɨ̀ ateyn, kɨ nèʼ ngùʼ àteyn nô sɨ a ŋaŋ, yi nà sɨ kɨŋ sɨ sàʼtɨ̀. ⁵Ghelɨ ghì a ghɨ nà n-ghɨ a ngùʼ afu nô ghɨ̀ jɨ̀m ɨ nà sɨ fâyn nô sɨ a ŋaŋ. Nô mɨ ndà ɨ nà sɨ dzɨ̂ kɨ sɨ̂ fɨyini fɨ ŋweyn fɨ na fɨ gamtɨ. Àŋena nà n-jêm tì fvɨsɨ̀ ɨ̀fwo sɨ a ngùʼ mâʼ a jvâ ta ka yì nyaŋsɨ. Ghɨ nà n-luŋlɨ̂ mɨtì ma Jonà ni meyn zɨ ndù nô antêynɨ̀ ngùʼ ɨ̀ nyìŋì afu, mbuni sɨ bemnɨ sɨ lisɨ ku ŋweyn. ⁶Wùlɨ̀ vzɨ̀ a wu nà n-tisɨ ngùʼ àteyn ɨ ndu bɨf sɨ̂ ŋweyn na, “Wà n-bunî ghà? Làli ɨ jèm sɨ̂ fɨyini fyafɨ, lvɨ fɨli a fɨ yvɨ ɨ̀ gàmtɨ̀ ghesɨ̀nà a ghesɨ̀nà faŋ tɨ̀ kfɨ̀tɨ.” ⁷Ghelɨ ghì a ghɨ nà n-ghɨ a ngùʼ afu ɨ be kɨ sɨ a àŋena ngeŋsɨ na, “Yì gvi ghesɨ̀nà maʼ njòʼ ɨ̀ yèyn nâ à kwò ndà nkfɨm nâ yèyn sɨ̂ ghesɨ̀nà a.” Àŋena màʼ, yi fvɨ̀ na à n-ghɨ Jonà. ⁸Yi n-kù ŋweyn tì, àŋena bè sɨ̂ ŋweyn na, “Fèʼtɨ sɨ̂ ghès na à kwò ndà nkfɨm yèyn a? Wà n-ghɨ ma wà lù wo, felɨ̀ nô ghà? Wà n-ghɨ wul ìlaʼ ì kà, chi nô wo?” ⁹Jonà ɨ bèynsɨ̀ na, “Mɨ n-ghɨ wul ɨ̀ Hibɨ̀lù, koʼsɨ̂ Bôbo Fɨyini vzɨ̀ a wù n-ghɨ iyvɨ, ɨvzɨ̂ a wù fàytɨ jva ìghaʼnɨ nɨ̀ nse.”

¹⁰Ta wù tàŋi tî, ghelɨ ateyn ɨ kfɨ sayn ɨ kæ bɨf sɨ̂ ŋweyn na, “À ti gha a wà mòm teyn a?” Àŋena nà n-kya kɨ nô na wù n-leʼ Bôbo bòm ta à nà n-ghɨ tì ma wù ni meyn fèʼtɨ̀ sɨ̂ àŋena.

¹¹À nà n-ghɨ tì afyef ateyn a to ndû kɨ asɨ, àŋena kæ bɨf sɨ̂ Jonà na, “Ghès ti kàʼ a ghɨ ni nô ghà nɨ̀ và lvɨ̂yn ta ka afyef nâ kèynà mæ a?”

¹²Jonà ɨ bè na, “Yì maʼ ma a jvâ, a ka afyef ateyn a bol. Mɨ n-kya na ngeʼ nâ yèyn a yi atu nɨn ghɨ ma à gvì kɨ̀ nô mà nɨ̀ ɨ̀nyeyn.”

¹³Jonà nɨn tàŋi tî, ghelɨ ateyn ɨ nà kwo mômsɨ̀ kɨ na ngùʼ àteyn fvɨ ɨ̀ chèm a mbæ̀ jvà mɨtì yi to ghaʼ àŋena bòm ta afyef ateyn a nà n-to ndû kɨ asɨ. ¹⁴Àŋena nà sɨ jemà, chwotɨ̂ Bôbo bê na, “Ghès nɨn kya na iwo yèynì nɨn ngâyn tèyn a nî và a Bôbo. Ghès nɨn chwotɨ̂ na ka wa n-zuètɨ ghès bòm ta ghès nɨn zue wul wèyn kɨ̀ sɨ a lû. Wà nì kɨ iwo zɨ̀ a yi n-kfeynɨ sɨ̂ và a Bôbo.” ¹⁵Ta àŋena jèm tî ɨ chàʼsɨ màʼ ɨ suʼsɨ nɨ̀ Jonà a jvâ, nô mɨ ɨlvɨ gha, afyef ateyn a teyna kɨ̀ teyna, jvà àteyn bôŋ bol. ¹⁶Yi n-gàyn tî nô mɨ ɨlvɨ gha, ghelɨ nâ ghì ɨ nà sɨ fâyn Bôbo Fɨyini nô sɨ a ŋaŋ, ɨ fu ifu sɨ̂ Bôbo, ɨ chfɨ̀nɨ̀ na àŋena na koʼsɨ̂ ŋweyn.

¹⁷Ghɨ n-màʼ Jonà tì, Bôbo Fɨyini ɨ nì sfɨ ìghaʼnɨ ìlì ɨ mzɨ̀ ŋweyn wu chi ɨlvà nɨ̀ ɨ̀nyeyn sɨ a mɨ̂chi ɨ̀n tal.