Jonah 2

Jonà ɨ jèm

¹Jonà nà n-ghɨ ɨlvà nɨ̀ sfɨ̀ tî, jêm kɨ jem sɨ̂ Bôbo Fɨyini fɨ ŋweyn fɨ. ²Wu nà n-jemà bê na,

“À n-gvî nô mɨ ɨlvɨ gha a Bôbo ta mɨ n-ghɨ afɨm ɨ̀ jèm sɨ̂ và wa gàmtɨ̀ mà.

À n-gvî ɨlvɨ ta mɨ n-ghɨ ɨchfɨ̀ nɨ̀ ìkfɨ-i ɨ̀ dzɨ̀ sɨ̂ và wa yvɨ idzɨ̂ ì yemi ɨ gàmtɨ̀ mà.

³Wà n-læ meyn màʼ ɨ suʼsɨ nɨ̀ mà a itòŋ i jvâ ighaʼnɨ, yi sœ̂ nô sɨ a ŋaŋ, mu ɨ jef nɨ̀ mà, ma limi kàli kɨ nô isas i jvâ, mu nà chwô a ma atu.

⁴A nà n-ghɨ tì, ma mà sɨ kfâʼ kɨ na wà saŋ meyn mà sɨ a wa a ngùŋ,

mɨtì bu kelɨ kɨ ìkfâʼtɨ̀ na mà læ̀ yeyn ndo i laynɨ-i nɨ̀ và.”

⁵Mɨ n-læ meyn sœ kàlì a jvâ, mû ɨ kfɨynsɨ mà, ɨ̀nfùʼ lɨm àtu à kema isas i jvâ.

⁶Mɨ n-læ meyn sœ kàlì ɨ̀ yaʼi kɨ̀ nô a ki jvà ighaʼnɨ alèʼ ghè a kfɨynsɨ nɨn zɨ̂tɨ̀ ateyn, dzɨ̀ ɨ bu fì ghɨ wi sɨ fvɨ̀.

Mɨtì wa fvɨ̀sɨ koʼsɨ nɨ̀ mà a Bôbo Fɨyini femfɨ, bula ma kfɨ.

⁷“À n-læ nà ghɨ ta mɨ n-kfɨ ndû, ma kasi kfàʼtɨ̀ a Bôbo na wà n-ghɨ,

ɨ jèm sɨ̂ và wa yvɨ ìjêm ì yemi alèʼ a laynɨ-a nɨ̀ và ɨ bèynsɨ̀ mà.

⁸Ghelɨ ghì a ghɨ n-koʼsɨ mɨyini mɨ̀ àyùŋ-ayuŋ beyn meyn jɨm sɨ ikòŋ ghè a Fɨyini fɨ nɨn kelɨ sɨ̂ àŋena.

⁹Mɨtì sɨ̂ mà, mɨ n-fu ìfu sɨ̂ và ɨ̀ yem njàŋ kòʼsɨ và.

Mɨ n-luynsɨ̂ ìchfɨ̂nɨ̀ ì yemi nâ yèynì sɨ̂ và a Bôbo bòm ta à n-bœ̂sɨ̀ kɨ và ghelɨ.”

¹⁰Ta wù jèm tî, Bôbo Fɨyini ɨ kàyn, sfɨ̀ àteyn ɨ ndu sùʼ Jonà a mbæ̀ jvà.