Joshua 12

Tɨfôyn tìtɨ̀ a Isìlæ̀ nɨn læ tɨm yɨ

¹Ghelɨ Isìlæ̀ nɨ̂n læ meyn tɨm yɨ tɨfôyn tɨlitɨ injɨyn i jvâ Jodàn tɨ̀ bò ɨ fi ghal fsɨtɨ ɨ̀lwêʼ ɨ àŋena kɨ̀ sɨ zɨ̀tɨ̀ afoŋlɨ a jvâ Alnòn sɨ koʼ sɨ chem abàs a kfɨyn Hemòn baʼsɨ̂ nɨ̀ àbâs a li-a dzɨ a ibàm ibal i Alabà.

²Fòyn ɨ̀mòʼ ateyn nà n-ghɨ Sihòn ɨ fòyn ghelɨ Amò vzɨ̀ a wu na n-chi a Heshbòn saʼa, zɨ̂tɨ̀ a afoŋlɨ a Alowà a ngùŋ Alnòn nɨ̀ àbâs a Gilèd a li-a sɨ chem afoŋlɨ a jvâ Jabòk ighami nɨ̀ ghelɨ Amò. ³Wu nà n-saʼ kɨmɨ àbâs a Alabà a li-a sɨ zɨ̀tɨ̀ ɨluè ɨ Galìlî sɨ chem a jvâ Fɨ̀ngvâŋ Alabà. Wu nà n-saʼ kɨmɨ ɨ̀lwêʼ sɨ zɨ̀tɨ̀ a Bet-Jeshimòt sɨ kàlì sɨ ndù a mbæ̀ kfɨyn Bisgà.

⁴Fòyn vzɨ̂ a àŋena nɨn tɨm yɨ nà n-ghɨ Ôg ɨ fòyn Bashàn, a ghɨ wul ɨ̀ gòʼsɨnɨ anòyn nɨ̀ Lefèm ɨ wul ɨ tonɨ vzɨ̀ a wu nà n-saʼ Ashtalòt nɨ̀ Edlè. ⁵Wu nà n-saʼ koʼ chem a kfɨ̂yn Hemòn, fî dyâŋ chem a Salekà, saʼ kɨmɨ Bashàn nô ì jɨ̀m sɨ ndù sɨ chem ighami nɨ̀ ghelɨ Gehù nɨ̀ ghelɨ Makà nɨ̀ àbâs a Gilèd a li-a sɨ ndù sɨ chem ighami nɨ̀ Sihòn ɨ fòyn Heshbòn.

⁶Mosìs ɨ wul ɨ̀ felɨnɨ nɨ̀ Bôbo Fɨyini ŋêyn ghelɨ Isìlæ̀ nɨn tɨm yɨ tɨfôyn nâ tèyntɨ̀ tɨ̀ bò, Mosìs ɨ gwòtɨ̀ ɨ̀lwêʼ ateyn ɨ fu sɨ̂ ghelɨ Lubèn nɨ̀ ghelɨ Gâd, nɨ̀ ghelɨ ndo nɨ̀ Mànasè ghɨli.

⁷Ɨtêyntɨ̀ nɨn ghɨ tɨ̀fôyn tìtɨ̀ a Joshwà ŋêyn ghelɨ Isìlæ̀ nɨn tɨm yɨ injɨyn i jvâ Jodàn abàs ghè a ɨchfɨ̂-iyvɨ i nɨn sœ ateyn, kɨ̀ sɨ zɨ̀tɨ̀ a Bal-Gâd ibal i Lebanòn sɨ ndù sɨ chem a kfɨ̂yn Halàk sɨ kàli sɨ ndù dzɨ a Edòm. Joshwà nɨ̂n gwòtɨ ɨlwêʼ nâ wèyn sɨ̂ àsas a ndosɨ nɨ̀ ghelɨ Isìlæ̀ na àŋena na kelɨ-a. ⁸Ɨlwêʼ nâ wèyn nà n-ghɨ baʼsɨ̂ kɨmɨ nɨ̀ ìlaʼ i kfɨynsɨ ili, nɨ̀ tɨ̀bal tìtɨ̀ a tɨ nà n-ghɨ isas i kfɨynsɨ nâ ghè, nɨ̀ Alabà nɨ̀ ɨ̀lwêʼ vzɨ̀ a wu nà n-ghɨ ɨwuyn kfɨynsɨ nâ ghè, nɨ̀ nse ìyum nɨ̀ ntèʼ Negèf. Ɨlwêʼ nâ wèyn nà n-kelɨ ghelɨ Hêt nɨ̀ ghelɨ Amò nɨ̀ ghelɨ Kenàn nɨ̀ ghelɨ Belìz nɨ̀ ghelɨ Hîv baʼsɨ̂ nɨ̀ ghelɨ Jebùs. Tɨfôyn nâ tìtɨ̀ a Isìlæ̀ nɨn tɨm yɨ nà n-ghɨ: ⁹Fòyn Jèlikò nɨ̀ fòyn Ây a ngùŋ Betèl, ¹⁰nɨ̀ fòyn Jèlusalèm kɨ̀mɨ nɨ̀ fòyn Heblòn, ¹¹nɨ̀ fòyn Jamùt, kɨ̀mɨ nɨ̀ fòyn Lakìsh, ¹²nɨ̀ fòyn Eglòn nɨ̀ fòyn Gezà, ¹³kɨ̀mɨ nɨ̀ fòyn Debì nɨ̀ fòyn Gedà, ¹⁴nɨ̀ fòyn Homà kɨ̀mɨ nɨ̀ fòyn Alàd, ¹⁵nɨ̀ fòyn Libnà, nɨ̀ fòyn Adulàm ¹⁶kɨ̀mɨ nɨ̀ fòyn Makedà nɨ̀ fòyn Betèl, ¹⁷nɨ̀ fòyn Tabwà kɨ̀mɨ nɨ̀ fòyn Hefà, ¹⁸nɨ̀ fòyn Afèk nɨ̀ fòyn Lashalòn, ¹⁹nɨ̀ fòyn Madòn nɨ̀ fòyn Hazò, ²⁰kɨ̀mɨ nɨ̀ fòyn Shimlòn Melòn nɨ̀ fòyn Akshàf, ²¹nɨ̀ fòyn Tanàk kɨ̀mɨ nɨ̀ fòyn Megidò ²²nɨ̀ fòyn Kedèsh kɨ̀mɨ nɨ̀ fòyn Joknìyàm a Kamèl, ²³nɨ̀ fòyn ntèʼ Nafot Dô kɨ̀mɨ nɨ̀ fòyn Goyìm a Gilgàl, ²⁴baʼsɨ̂ nɨ̀ fòyn Tizà. A nà n-chɨ̂yntɨ̀ ghɨ tɨ̀fôyn mɨ̀vɨm ɨ̀n tal.