Joshua 13

Ɨlwêʼ vzɨ̀ a ghelɨ Isìlæ̀ nà n-bu duʼ tɨ ghal sɨ fsɨtɨ iwòŋ

¹A nà n-sɨ ghɨ ta Joshwà dvɨ̀yn, Bôbo Fɨyini ɨ bè sɨ̂ ŋweyn na: “Wà sɨ ghɨ ma wà dvɨyn meyn mɨtì ɨlwêʼ ɨ bu ghɨ dvɨ̂ kɨ tèyn sɨ fsɨtɨ.”

²“Ɨlwêʼ vzɨ̀ a wu bu duʼ nɨn ghɨ ɨwêyn têyn, à n-ghɨ ɨ̀lwêʼ ɨ ghelɨ Fìlisìyà nɨ̀ ɨ̀lwêʼ ɨ ghelɨ Geshùl nô ɨ̀ jɨ̀m. ³Kɨ̀ sɨ zɨ̀tɨ̀ abàs a jvâ Shihò injɨyn i Ijìb sɨ koʼ sɨ ndù abàs a Eklòn, a ghɨ kɨ tɨ̀laʼ tɨ Kenàn, a saʼ tɨ̀fôyn tɨ Fìlisìyà tɨ̀ tâyn a Gazà, saʼ a Ashdòd nɨ̀ Ashkelòn, saʼ kɨmɨ Gât nɨ̀ Eklòn a ghɨ ɨ̀lwêʼ ɨ ghelɨ Avà abâs itsɨyn, ⁴a kelɨ ghelɨ Kenàn nô ì jɨ̀m sɨ zɨ̀tɨ̀ a Alà, ilaʼ nɨ̀ ghelɨ Sidòn sɨ ndù sɨ chem a Afèk, abàs nɨ̀ ghelɨ Amò, ⁵nɨ̀ àbâs a ghelɨ Gebàl baʼsɨ̂ nɨ̀ Lebanòn nô ì jɨ̀m abàs ghè a ɨchfɨ̂-iyvɨ i nɨn sal ateyn sɨ zɨ̀tɨ̀ a Bal Gâd isas i kfɨ̂yn Hemòn sɨ chem a Lebo Hamàt.”

⁶“A n-sàŋ kɨ nô mà ghelɨ ghì a ghɨ n-chi abàs a ilaʼ i kfɨ̀ynsɨ afî nô ghɨ̀ jɨ̀m sɨ zɨ̀tɨ̀ a Lebanòn sɨ ndù sɨ chem a Mislefot-Mêm, asɨ nɨ̀ ghelɨ Isìlæ̀. Mɨ n-sàŋ kɨmɨ ghelɨ Sidòn nô ghɨ̀ jɨ̀m. Ka wa n-lèsɨ̀ sɨ gwòtɨ ɨlwêʼ nâ wèyn sɨ̂ ghelɨ Isìlæ̀ kɨ̀ ta mɨ n-læ bè sɨ̂ và na àŋena na kelɨ-a ⁷Gwòtɨ ɨlwêʼ nâ vzɨ̀ sɨ̂ àsas a ndosɨ nɨ̀ ghelɨ Isìlæ̀ kì bulamòʼ nɨ̀ ghelɨ ndo nɨ̀ Mànasè ghɨli àŋena na kelɨ-a”

Ɨlwêʼ vzɨ̀ a Mosìs nɨ̂n læ gwòtɨ a injɨyn i Jodàn

⁸Ghelɨ ndo nɨ̀ Mànasè ghɨli nɨ̀ ghelɨ ndo nɨ̀ Lubèn nɨ̀ ghelɨ ndo nɨ̀ Gâd nà n-sɨ ghɨ ma àŋena keli meyn ɨ̀lwêʼ injɨyn i jvâ Jodàn kɨ̀ ighel ta wùl ɨ̀ fèlɨnɨ nɨ̀ Bôbo Fɨyini ɨ Mosìs nà n-sɨ ghɨ ma wu fu meyn sɨ̂ àŋena.

⁹Ɨlwêʼ ateyn nà n-zɨ̂tɨ̀ kɨ a Alowà, afoŋlɨ a Alnon Gôsh, sɨ zɨ̀tɨ̀ a ntèʼ afî a yi n-ghɨ afoŋlɨ baʼsɨ̂ nɨ̀ ìbal zɨ̀ a yi nà n-ghɨ a atû kfɨyn Medebà, ndû chem a Dibòn, ¹⁰baʼsɨ̂ nɨ̀ ntèʼsɨ fòyn Sihòn vzɨ̀ a wu nà n-saʼ ghelɨ Amò a Heshbòn sɨ ndù sɨ chem ighami nɨ̀ ghelɨ Amòn. ¹¹Ntèʼ Gilèd nà n-ghɨ kɨmɨ ɨlwèʼ nâ ghè nɨ̀ ɨ̀byâs vzɨ̀ a ghelɨ Geshùl nɨ̀ ghelɨ Makà nà n-chi ateyn nɨ̀ kfɨ̂yn Hemòn nô ì jɨ̀m nɨ̀ àbâs a Bashàn nô à jɨ̀m sɨ chem a Salekà, ¹²ma à ti abâs ilaʼ nɨ̀ fòyn Ôg ta wù nà n-saʼ Bashàn nô ì jɨ̀m. Wù nà n-ghɨ ma wù n-saʼ meyn a Ashtalòt nɨ̀ Edlè, ma à faŋ kɨ̀ ŋweyn anòyn nɨ̀ ghelɨ Lefèt. Mosìs nà n-ghɨ ma wù tɨm meyn yɨ àŋena ɨ̀ ghal fsɨ ɨlwêʼ ɨ àŋena. ¹³Mɨtì ghelɨ Isìlæ̀ nɨn bu læ sàŋ ghelɨ Geshùl nɨ̀ ghelɨ Makà. À ti iwo zɨ̀ a àŋena bu chi kɨ ŋêyn ghelɨ Isìlæ̀ sɨ koʼ sɨ chem layn.

¹⁴Mosìs nɨn bu læ fu ɨlwêʼ sɨ̂ ghelɨ isas i ndo nɨ̀ Levì bòm ta tɨfu tɨ nyoʼnɨ tìtɨ̀ a ghɨ nà n-fu sɨ̂ Bôbo Fɨyini, ɨ Fɨyini fɨ ghelɨ Isìlæ̀ nà n-kelɨ àŋena kɨ̀ ighel ta Bôbo nɨn læ chfɨ̀nɨ.

¹⁵Mosìs nɨ̂n fu ɨlwêʼ sɨ̂ ìsas i ndo nɨ̀ Lubèn kɨ̀ ɨchfɨ ɨ ndo ɨchfɨ ndo.

¹⁶Ɨlwêʼ àŋena nâ vzɨ̀ nà n-zɨ̂tɨ̀ a Alowà a mbæ̀ àfòŋlɨ a Alnon Gôsh, fî zɨ̂tɨ̀ a ntèʼ ghê afoŋlɨ baʼsɨ̂ nɨ̀ ibal zɨ̀ a yi n-ghɨ atû kfɨ̂yn Medebà nô ì jɨ̀m, ¹⁷sɨ ndù sɨ chem a Heshbòn nɨ̀ ntèʼ sìsɨ̀ a sɨ n-ghɨ ibal nɨ̀ Dibòn nɨ̀ Bamot Bâl nɨ̀ Bet Bal Môn, ¹⁸nɨ̀ Jahàz, nɨ̀ Kedemòt nɨ̀ Mefàt, ¹⁹nɨ̀ Kìlìyatèm kɨ̀mɨ nɨ̀ Sibmà nɨ̀ Zelet Shahà atû kfɨ̀yn ghê a yì yàʼtɨ afoŋlɨ, ²⁰nɨ̀ Bet Buwà, nɨ̀ kfɨynsɨ Bisgà nɨ̀ Bet-Jeshimòt. ²¹Ntèʼsɨ ateynsɨ nà n-baʼsɨ̂ nɨ̀ ntèʼ sîsɨ̀ a sɨ nà n-ghɨ ibal atû kfɨ̀yn tî, nɨ̀ ìlaʼ i Sihòn. Sihòn nà n-ghɨ fòyn ghelɨ Amò vzɨ̀ a wu n-læ nà saʼ a Heshbòn. Mosìs nɨ̀ tɨm meyn yɨ ŋweyn kɨ̀mɨ nɨ̀ tɨ̀fôyntɨ Midìyàntɨ̀, ɨ Evì nɨ̀ Lekèm nɨ̀ Zûl nɨ̀ Hûl nɨ̀ Lebà. Àŋena nà n-ghɨ ghelɨ Sihòn, chî a ilaʼ afu. ²²Ghelɨ Isìlæ̀ nɨ̀n zue meyn kɨmɨ Balàm ɨ wâyn Buwà vzɨ̀ a wu nà n-fyeŋ fɨnyaʼ. ²³Ighami ghelɨ isas i ndo nɨ̀ Lubèn nà n-ghɨ a mbæ̀ jvà Jodàn. Ntèʼ nâ sèynsɨ nô sɨ̀ jɨ̀m nà n-kelɨ ghelɨ isas i ndo nɨ̀ Lubèn kɨ ɨchfɨ ndo ɨchfɨ ndo.

²⁴Mosìs nɨn fu ɨlweʼ sɨ̂ isas i ndo nɨ̀ Gâd kɨ̀ ɨchfɨ ndo ɨchfɨ ndo.

²⁵Ɨlweʼ àŋena nà n-ghɨ Jazà nɨ̀ ntèʼsɨ Gilèd kɨ sɨ̀ jɨ̀m nɨ̀ àbâs ilaʼ i Amòn a li-a sɨ ndù sɨ chem a Alowà, a ngùŋ Labà, ²⁶fî zɨ̂tɨ̀ a Heshbòn sɨ chem a Lamat Mizbà nɨ̀ Betonìm, zɨ̂tɨ̀ kɨmɨ a Màhanèm ndû chem a Debì, ²⁷chem kɨmɨ afoŋlɨ a Bet-halàm nɨ̀ Bet Nimlà nɨ̀ Sukòt nɨ̀ Zafòn nɨ̀ àbâs ilaʼ nɨ̀ fòyn Sihòn vzɨ̀ a wù nà saʼ a Heshbòn àbâs injɨyn i jvâ Jodàn ili sɨ ndù sɨ chem a mbæ̀ jvà ì ghaʼnɨ a Kinelèt. ²⁸Ntèʼ nâ sèynsɨ̀ nô sɨ̀ jɨ̀m nà n-kelɨ ghelɨ isas i ndo nɨ̀ Gâd kɨ̀ ɨchfɨ ndo ɨchfɨ ndo.

²⁹Mosìs nɨn fu ɨlwêʼ sɨ̂ àbâs isas i ndo nɨ̀ Mànasè a li-a kɨ̀ ɨchfɨ ndo ɨchfɨ ndo.

³⁰Ɨlwêʼ ateyn nà n-zɨ̂tɨ̀ kɨ a Màhanèm baʼsɨ̂ nɨ̀ Bashàn nô ì jɨ̀m nɨ̀ ilaʼ zɨ̀ a fòyn Ôg na n-saʼ nɨ̀ ntèʼsɨ Jayì a Bashàn mɨ̀vɨ̂m ntufa. ³¹Abâs a ntèʼ Gilèd a li-a nà n-ghɨ kɨmɨ ateyn nɨ̀ Ashtalòt nɨ̀ Edlè nɨ̀ ntèʼ sîsɨ̀ a fòyn Ôg nà nsaʼ a Bashàn. Wu n-fu ɨlwêʼ nâ wèyn sɨ̂ woyn Makì, ɨ wâyn Mànasè nɨ̀ woyn Makì ghɨli kɨ ɨchfɨ ndo ɨchfɨ ndo.

³²A ti ɨlweʼ vzɨ a Mosìs nɨn læ fu sɨ̂ ghelɨ Isìlæ̀ ɨtuʼ ta wù nà n-ghɨ a ibal i Mowàb injɨyn i jvâ Jodàn abàs ghè a ɨchfɨ iyvɨ i nɨn sal ateyn a Jèlikò. ³³Mosìs nɨ̀n bû læ fu ɨlwêʼ sɨ̂ ìsas i ndo nɨ̀ Levì bòm ta Bôbo Fɨyini, ɨ Fɨyini fɨ ghelɨ Isìlæ̀ nà n-kelɨ àŋena kɨ̀ ighel ta fɨ nà n-ghɨ ma fɨ n-læ meyn chfɨ̀nɨ.