Joshua 15

Ɨlwêʼ vzɨ̀ a Joshwà nɨ̂n fu sɨ̂ ghelɨ isas i ndo nɨ̀ Judà

¹Joshwà nɨn læ fu ɨlwêʼ sɨ̂ ghelɨ isas i ndo nɨ̀ Judà kɨ̀ ɨchfɨ ndo ɨ chfɨ ndo, wu kalì chem a ighami nɨ̀ Edòm, fî kalì ndû chem a nse iyum a Zîn nô abàs itsɨyn.

²Ighami àŋena abàs itsɨyn nà n-zɨ̂tɨ̀ kɨ a ɨchfɨ jvâ fɨ̀ngvaŋ, ³kalì chwô àlêʼ kì a ghɨ n-toŋtɨ na Skobiyon Bâs, kalì chem a Zîn, fî dyâŋ chem a Kadesh Banìyà, dyâŋ ndû a Hezlòn fî kasi koʼ ndû a Adà, ngol ndû chem a Kaka. ⁴Alêʼ ateyn a nà n-lû afu dyâŋ chem a Azmòn kɨ fi ndu chem a afoŋlɨ a Ijìb ɨ kàlì ɨ ndu mæ̀ a jvâ ighaʼnɨ. Alêʼ nâ kèyna nà n-ghɨ ìghami i àŋena abàs itsɨyn.

⁵Jvâ fɨ̀ngvaŋ nà n-lêm ìghami abàs ghè a ɨchfɨ iyvɨ i nɨn sal ateyn ndû chem ɨchfɨ jvâ Jodàn.

Ighami abàs ikuè ɨ zɨ̂tɨ̀ a mbæ̀ jvà ì ghaʼnɨ ndû chem ɨchfɨ jvâ Jodàn, ⁶fî koʼ chem a Bet Hoglà, yi fi dyaŋ koʼ ndù dzɨ a Bet Alabà ɨ fi koʼ ndù dzɨ a alèʼ ghè a ghɨ nà n-toŋtɨ na Ngòʼ Bohàn ma ghɨ chfɨ̀ nɨ̀ wâyn Lubèn ɨ Bohàn. ⁷Ighami ateyn i nà n-lû afu yi ndu chwò afoŋlɨ a Akò ɨ koʼ chem a Debì, ɨ ngol koʼ dzɨ a Gilgàl ta yì n-kêʼnɨ̀ Bas Adumìm abàs itsɨyn afoŋlɨ. Ighami ateyn i nà n-fî ndû chem a jvâ En Shemèsh, ndû fvɨ̂ a En Logèl. ⁸Yi nà n-lû a En Logèl, yi nà koʼ kɨ afoŋlɨ a Ben Hinòm isas i ntèʼ Jebùs abàs itsɨyn ma à ti a Jèlusalèm. Yi nà n-lû afu, yi koʼ ndù atû kfɨ̀yn afî a yi nà n-ghɨ injɨyn afoŋlɨ a Hinòm, alèʼ ghè a afoŋlɨ a Lefemà koʼ gòʼsɨ̀ ateyn abàs ikuè. ⁹Ighami ateyn i nà n-lû atû kfɨ̀yn afu, yi ndù dzɨ a isɨ i lɨmàlɨ̀mà a Neftowà ɨ ndù fvɨ̀ a ntèʼsɨ afî a sɨ nà n-ghɨ a kfɨ̂yn Eflòn, ɨ kàli ndù dzɨ a Balà ma à ti a Kiliyat Jelìm. ¹⁰Yi nà n-lû a Balà, yi fi n-gol ɨ ndù dzɨ a kfɨ̂yn Seyì ɨ koʼ ndù dzɨ a kfɨ̂yn Jelìm abàs ikuè ma à ti a Kesalòn, ɨ fi kàli ndù a Bet Shemèsh, ɨ dyaŋ chem a Timnà. ¹¹Yi nà n-koʼ chem a kfɨ̂yn Eklòn abàs ikuè, fî ngol ndû dzɨ a Shikelòn, chwô dzɨ a kfɨ̂yn Balà, ndû chem a Jabnèl. Ighami ateyn i nɨn læ ndu gòʼsɨ a jvâ ìghaʼnɨ a Mèdìtèlenìyà.

¹²Ighami ateyn i abàs ghè a ɨchfɨ iyvɨ i nɨn sœ ateyn nɨn ghɨ à mbæ̀ jvà ìghaʼnɨ a Mèdìtèlenìyà.

À ti tɨghami tɨ Judà kɨ̀ ɨchfɨ ndo ɨchfɨ ndo.

¹³Joshwà nɨn fu meyn àlêʼ a li-a a Judà sɨ̂ Kalèb ɨ wâyn Jefunè kɨ̀ ighel ta Bôbo Fɨyini nɨn læ bè. Alêʼ ateyn a nà n-ghɨ Kiliyat Abà, ma à ti Heblòn. Abà nà n-ghɨ Bò bò Anàk. ¹⁴Kalèb ɨ saŋ fvɨ̀sɨ̀ woyn Anàk ghɨ̀ tal sɨ afu a ghɨ Sheshày nɨ̀ Ahimàn, nɨ̀ Talmày. ¹⁵Wu n-læ sàŋ ghelɨ Anàk nâ ghèyn nô mɨ ɨlvɨ gha, ɨ ndu kèʼ ghelɨ Debì. Ghɨ nà n-toŋtɨ̂ Debì na Kiliyat Sefà. ¹⁶Kalèb nɨ̀n be meyn na, “A kæ sɨ tɨm yɨ nô mɨ ndà Kiliyat Sefà a mà fu wâyn wom Aksà sɨ̂ ŋweyn sɨ a wi.” ¹⁷Onèl ɨ wâyn Kenàz ɨ wâynà Kalèb ɨ tɨm yɨ ghelɨ Kiliyat Sefà, ɨ ghal fsɨ ntèʼ àteyn nô mɨ ɨlvɨ gha, Kalèb ɨ kæ fu wâyn ŋweyn sɨ̂ ŋweyn sɨ a wi.

¹⁸A nà ghɨ achi a li-a, Onèl ɨ bè sɨ̂ Aksà na wù ndu ɨ̀ bè bò ŋweyn fu gveyn sɨ̂ ŋweyn. A nà ghɨ ta wù ndù ɨ suʼi sɨ a atû njàkâs, bò ŋweyn ɨ Kalèb ɨ bɨf sɨ̂ ŋweyn na, “Wà n-kɨŋ na mà ni gha sɨ̂ và a?”

¹⁹Aksà ɨ bèynsɨ̀ ɨ bè sɨ̂ bò ŋweyn na, “Mɨ n-kɨŋ na wà ni iwo sɨ̂ mà. Wà ti meyn fù gveyn sɨ̂ mà a nse ìyum, mu ghɨ wi afu. Mɨ n-chwotɨ̂ na wà fu gveyn sɨ̂ mà alèʼ jvasɨ ɨ ghɨ ateyn.” Nô mɨ ɨlvɨ gha Kalèb ɨ fu asɨ a lɨmàlɨ̀mà sɨ̂ ŋweyn abàs ikuè, ɨ fi fu abàs itsɨyn a ngùŋ ntèʼ Heblòn.

²⁰Ɨsêynsɨ̀ nɨn ghɨ ntèʼ sîsɨ̀ a Joshwà nɨn læ fu sɨ̂ ìsas i ndo nɨ̀ Judà kɨ̀ ɨchfɨ ndo ɨchfɨ ndo.

²¹Ntèʼsɨ Judà sîsɨ̀ a sɨ n-læ kàli gòʼsɨ̀ abàs itsɨyn a Negèv ighami i ntèʼ Edòm nà n-ghɨ Kabzèl nɨ̀ Edà nɨ̀ Jagù, ²²nɨ̀ Kinà, nɨ̀ Dimonà, nɨ̀ Adadà, ²³nɨ̀ Kedèsh, nɨ̀ Hazò nɨ̀ Itnàn, ²⁴nɨ̀ Zîf, nɨ̀ Telèm, nɨ̀ Belòt, ²⁵nɨ̀ Hazo Hadatà, nɨ̀ Keliyot Hezlòn ma à ti Hazò ²⁶nɨ̀ Amàm, nɨ̀ Shemà, nɨ̀ Moladà ²⁷nɨ̀ Haza Gadà, nɨ̀ Heshmòn, nɨ̀ Bet Belèt, ²⁸nɨ̀ Haza Shuwàl, nɨ̀ Beshebà nɨ̀ Bìzìyotìyà ²⁹nɨ̀ Balà nɨ̀ Îm, nɨ̀ Ezèm ³⁰nɨ̀ Eltolàd nɨ̀ Kesìl, nɨ̀ Homà ³¹nɨ̀ Ziklàg nɨ̀ Madmanà nɨ̀ Sansanà ³²nɨ̀ Lebòt, nɨ̀ Shilìm nɨ̀ Ayìn baʼsɨ̂ nɨ̀ Limòn. Ntèʼ nâ sèynsɨ nà n-chɨ̂yntɨ̀ ghɨ mɨ̀vɨm ɨ̀m bò njvàsɨ̀ bulamòʼ.

³³Ntèʼ sîsɨ̀ a sɨ nà n-ghɨ isas i kfɨyn abàs ghè a ɨchfɨ iyvɨ i nɨn sœ ateyn nà n-ghɨ:

Eshtòl nɨ̀ Zolà nɨ̀ Ashnà ³⁴nɨ Zanùwà nɨ̀ En-Ganìm nɨ̀ Tabùwà nɨ̀ Enàm ³⁵nɨ̀ Jamùt, nɨ̀ Adulàm, nɨ̀ Sokò, nɨ̀ Azekà, ³⁶nɨ̀ Shalèm nɨ̀ Aditèm nɨ̀ Gedelà, ghɨ toŋtɨ̂ kɨmɨ na Gèdelotèm. Ntèʼsɨ ghaʼlɨnɨnsɨ nà n-chɨ̂yntɨ̀ ghɨ njvàsɨ̀ kæ̀ baʼsɨ̂ nɨ̀ ntèʼsɨ telâsɨ̀.

³⁷Joshwà nɨ̀n fu meyn kɨmɨ ntèʼsɨ isas i kfɨynsɨ. Ntèʼsɨ ateynsɨ nà n-ghɨ; Zenàn nɨ̀ Hadashà nɨ̀ Migdal-Gâd ³⁸nɨ̀ Dilèn, nɨ̀ Mizbà nɨ̀ Joktèl ³⁹nɨ̀ Lakìsh nɨ̀ Bozkàt nɨ̀ Eglòn ⁴⁰nɨ̀ Kabòn nɨ̀ Lamàs, nɨ̀ Kitlìsh ⁴¹nɨ̀ Gedelòt nɨ̀ Bet-Dagòn nɨ̀ Namà baʼsɨ̂ nɨ̀ Makedà. Ntèʼsɨ ghaʼlɨnɨsɨ nà n-chɨ̂yntɨ̀ ghɨ njvàsɨ̀ ntufa baʼsɨ̂ nɨ̀ ntèʼsɨ telâsɨ̀.

⁴²Joshwà nɨ̀n fu meyn kɨmɨ ntèʼsɨ antêynɨ̀ ìbàl isas i kfɨynsɨ. Ntèʼsɨ ateynsɨ nà n-ghɨ Libnà nɨ̀ Età nɨ̀ Ashàn ⁴³nɨ̀ Iftà nɨ̀ Ashnà nɨ̀ Nezìb, ⁴⁴nɨ̀ Kelà nɨ̀ Akzìb baʼsɨ̂ nɨ̀ Màleshà. Ntèʼsɨ ghaʼlɨnɨnsɨ nà n-chɨ̂yntɨ̀ ghɨ bulamòʼ baʼsɨ̂ nɨ̀ ntèʼ sɨ telâsɨ̀.

⁴⁵Eklòn nà n-ghɨ kɨmɨ ɨlwèʼ nâ ghè nɨ̀ ɨ̀lwêʼ vzɨ̀ a ghɨ bàʼlɨ̀ jɨ̀ŋ kal a mbæ̀ àteyn, baʼsɨ̂ nɨ̀ ntèʼ sîsɨ̀ a sɨ nà n-ghɨ afu, ⁴⁶a ghɨ injɨyn i Eklòn nɨ̀ ɨ̀lwêʼ vzɨ̀ a wu nà n-baʼsɨ a Ashdòd nô ɨ̀ jɨ̀m nɨ̀ ntèʼsɨ ateynsɨ. ⁴⁷À nà n-ghɨ Ashdòd nɨ̀ ɨ̀lwêʼ vzɨ̀ a ghɨ bàʼlɨ̀ jɨ̀ŋ kal a mbæ̀sɨ ateyn nɨ̀ ntèʼsɨ ateynsɨ, baʼsɨ̂ nɨ̀ Gazà nɨ̀ ɨ̀lwêʼ vzɨ̀ a ghɨ bàʼlɨ̀ afu, nɨ̀ ntèʼsɨ ateynsɨ, ndû kɨ tèyn chem a afoŋlɨ a Ijìb nɨ̀ mbæ̀sɨ jvâ ìghaʼnɨ a Mèdìtèlenìyà.

⁴⁸Tɨlaʼ tìtɨ̀ a tɨ nà n-ghɨ atû kfɨ̀yn nà n-ghɨ;

Shamì nɨ̀ Jatì nɨ̀ Sokò ⁴⁹nɨ̀ Danà nɨ̀ Kiliyat Sanà, ma à ti Debì ⁵⁰nɨ̀ Anàb nɨ̀ Eshtemò, nɨ̀ Anìm, ⁵¹nɨ̀ Goshèn nɨ̀ Holòn baʼsɨ̂ nɨ̀ Gilò. Ntèʼsɨ ghaʼlɨnɨsɨ nà n-chɨ̂yntɨ̀ ghɨ njvà ìmoʼ baʼsɨ̂ nɨ̀ ntèʼsɨ telâsɨ̀.

⁵²Ntèʼ sɨ lisɨ nà n-ghɨ Alàb nɨ̀ Dumà nɨ̀ Eshàn ⁵³nɨ̀ Janìm nɨ̀ Bet Tabùwà nɨ̀ Afekà ⁵⁴nɨ̀ Humtà nɨ̀ Kiliyat Abà ma à ti Heblòn baʼsɨ̂ nɨ̀ Zayò. Ntèʼsɨ ghaʼlɨnɨsɨ nà n-chɨ̂yntɨ̀ ghɨ bulamòʼ nɨ̀ ntèʼsɨ telâsɨ̀.

⁵⁵Ntèʼsɨ lisɨ nà n-ghɨ Mayòn nɨ̀ Kamèl nɨ̀ Zîf nɨ̀ Jutà, ⁵⁶nɨ̀ Jezlèl nɨ̀ Jokdèm nɨ̀ Zanùwà, ⁵⁷nɨ̀ Kayìn nɨ̀ Gibìyà baʼsɨ̂ nɨ̀ Timnà. Ntèʼsɨ ghaʼlɨnɨsɨ nà n-chɨ̂yntɨ̀ ghɨ ìvɨm baʼsɨ̂ nɨ̀ ntèʼsɨ telâsɨ̀. ⁵⁸Sɨ lisɨ nà n-ghɨ Halùl nɨ̀ Bet Zû nɨ̀ Gedò ⁵⁹nɨ̀ Malàt nɨ̀ Bet Anòt baʼsɨ̂ nɨ̀ Eltekòn. Ntèʼsɨ ghaʼlɨnɨsɨ nà chɨ̂yntɨ̀ ghɨ ntufa baʼsɨ̂ nɨ̀ ntèʼsɨ telâsɨ̀.

⁶⁰Ntèʼsɨ lisɨ nà n-ghɨ Kiliyat Bâl ma à ti Kiliyat Jelìm baʼsɨ̂ nɨ̀ Labà. Ntèʼsɨ ghaʼlɨnɨsɨ nà n-chɨ̂yntɨ̀ ghɨ sɨ̀ bò baʼsɨ̂ nɨ̀ ntèʼsɨ telâsɨ̀.

⁶¹Ntèʼ sîsɨ̀ a sɨ nà n-ghɨ a nse ìyum nà n-ghɨ;

Bet Alabà nɨ̀ Midìn nɨ̀ Sekakà ⁶²nɨ̀ Nibshàn, ɨ Ntèʼ Fɨ̀ngvaŋ baʼsɨ̂ nɨ̀ En Gedì. Ntèʼsɨ ghaʼlɨnɨsɨ nà n-chɨ̂yntɨ̀ ghɨ ntufa baʼsɨ̂ nɨ̀ ntèʼsɨ telâsɨ̀.

⁶³Ghelɨ Judà nɨn bu læ saŋ fvɨ̀sɨ ghelɨ Jebùs ghì a ghɨ nà n-chi a Jèlusalèm, àŋena na bu chî kɨ ŋêyn ghelɨ Judà a Jèlusalèm sɨ koʼ sɨ chem layn.