Joshua 14

Joshwà ɨ gwòtɨ̀ ɨ̀lwêʼ injɨyn i jvâ Jodàn

¹Ɨwêyn nɨn ghɨ ɨ̀lwêʼ vzɨ̀ a Elezà ɨ ngàŋ ndô Fɨyini ŋêyn Joshwà ɨ wâyn Nûn nɨ̀ ghelɨ ghì a ghɨ n-tisɨ asas a ndosɨ a Isìlæ̀ nɨn fu sɨ̂ ghelɨ Isìlæ̀. ²Ghɨ n-læ se sɨ fu ɨlwêʼ nâ wèyn sɨ̂ àsas a ndo bulamòʼ nɨ̀ ghelɨ isas i ndo nɨ̀ Mànasè ghɨli tî, ma ghɨ tɨm bèyʼ, kɨ̀ ighel ta Bôbo Fɨyini nɨn læ bè sɨ̂ Mosìs. ³Mosìs nɨ̀n fu meyn ɨ̀lwêʼ sɨ̂ asas a ndo à bò nɨ̀ ghelɨ isas i ndo nɨ̀ Mànasè ghɨli injɨyn i jvâ Jodàn, mɨtì ɨ faŋ tɨ̀ fu afo sɨ̂ ghelɨ isas i ndo nɨ̀ Levì. ⁴À nà n-ghɨ tì ma woyn Josèf ɨ Mànasè ŋêyn Eflèm gwosɨ meyn nà sɨ ghɨ àsas a ndo à bò. Ghelɨ isas i ndo nɨ̀ Levì nɨn bu læ keli nô àlêʼ, a bu kɨ ntèʼ sîsɨ̀ a àŋena na n-chî ateyn, nɨ̀ ɨ̀twaʼ sɨ nà yɨsɨ nyamsɨ àŋena ateyn. ⁵Ghelɨ Isìlæ̀ nɨ̂n gwòtɨ ɨlwêʼ ateyn kɨ ighel ta Bôbo Fɨyini nɨn læ bè sɨ̂ Mosìs.

Joshwà ɨ fu ntèʼ Heblòn sɨ̂ Kalèb

⁶Kalèb ɨ wâyn Jefunè ɨ wul ɨ̀ Kenìz ŋêyn ghelɨ Judà nɨ̀n læ meyn ndù ɨ yeyn Joshwà a Gilgàl, Kalèb ɨ bè sɨ̂ Joshwà na, “Wà n-kya ìwo zɨ̀ a Bôbo Fɨyini nɨ̀n læ bè sɨ̂ Mosìs ɨ wul ɨ̀ felɨnɨ nɨ̀ Fɨyini fɨ a Kadesh Banìyà kum ghesɨ̀và. ⁷Mɨ nà n-bu ghɨ kɨ bèŋ mɨ̀vɨm ɨ̀n kæ̀, Mosìs ɨ wul ɨ̀ felɨnɨ nɨ̀ Bôbo Fɨyini ɨ tum ma, ma lù a Kadesh Banìyà ɨ̀ gvì ɨ nyaʼtɨ ki ɨlwêʼ wèyn, ɨ kasi ndù ɨ fèʼtɨ kɨ iwo zɨ̀ sɨ̂ ŋweyn a mà yeyn. ⁸Ghelɨ ghì a ghesɨ̀ àŋena nɨ̂n ndù amoʼ ɨ kwo nì ghelɨ nà faynà, mɨtì ma nà jelɨ̀ kɨ a dzɨsɨ nɨ̀ Bôbo Fɨyini nɨ̀ àtem à kema à jɨ̀mà. ⁹Mosìs ɨ kæ chfɨ̀nɨ sɨ̂ mà achi nâ ghè na, ‘Alêʼ nâ kèynà a wà jèl ateyn tèyn nɨn kelɨ và nɨ̀ ghelɨ isas i ndo nɨ̀ và kɨ̀ samoʼ bòm ta wà faŋ meyn nà jelɨ̀ kɨ a dzɨsɨ nɨ̀ Bôbo Fɨyini kɨ nɨ̀ àtem à kya à jɨ̀mà.’”

¹⁰Bôbo Fɨyini na sɨ ghɨ lvɨ̂yn ma wù lem meyn mà kɨ̀ ta wu n-læ chfɨ̀nɨ sɨ a bèŋ mɨ̀vɨm ɨ̀n kæ̀ njvàsɨ̀ tâyn sɨ a ɨtuʼ ta wu n-bè iwo nâ yèynì sɨ̂ Mosìs ɨtuʼ ta ghelɨ Isìlæ̀ nà n-jɨ̂ŋ kal a nse ìyum, ma na sɨ ghɨ bèŋ mɨ̀vɨ̂m nfama njvàsɨ̀ tâyn lvɨ̂yn. ¹¹Mà bu to kɨ ta mɨ nà n-to ɨtuʼ ta Mosìs nɨ̂n læ tùm ma, ma mà kàʼ a ma seʼ iwoŋ, fì nì nô àwo à kema à jɨ̀m kɨ̀ ighel ta mɨ nà n-nî ɨtuʼ nâ ghè. ¹²Fu læ̂ ìlaʼ yèynì a yi n-ghɨ atû kfɨ̀yn têyn sɨ̂ mà lvɨ̂yn kɨ̀ ta Bôbo Fɨyini nɨ̂n læ chfɨ̀nɨ sɨ̂ mà ɨtuʼ nâ ghè. Nô và nɨ̂n læ meyn yvɨ ɨtuʼ nâ ghè na ghelɨ Anàk nà n-ghɨ afu, ntèʼsɨ àŋenasɨ ɨ ghaʼlɨ-à, kelɨ mbàynsɨ̀. Mɨtì Bôbo Fɨyini nɨn gàmtɨ̀ mà, a mà tɨm yɨ àŋena kɨ ighel ta wu n-læ bè. ¹³Wu n-taŋi tî, Joshwà ɨ jèm na Fɨyini fɨ boysɨ Kalèb ɨ wâyn Jefunè, ɨ fu Heblòn sɨ̂ ŋweyn a nà kelɨ kɨ nô ŋweyn. ¹⁴Sɨ zɨtɨ̀ ɨtuʼ nâ ghè sɨ koʼ sɨ chem layn, Heblòn na sɨ ghɨ kɨ àlêʼ a Kalèb ɨ wâyn Jefunè ɨ wul ɨ̀ kenìz bòm ta wu nà n-jelɨ̀ a dzɨsɨ nɨ̀ Bôbo Fɨyini, ɨ Fɨyini fɨ ghelɨ Isìlæ̀ kɨ nɨ̀ àtem a ŋweyn à jɨ̀mà. ¹⁵Ghɨ n-læ na toŋtɨ̂ Heblòn na Kiliyat Abà, ma ghɨ chfɨ̀ nɨ̀ wul ɨ̀ tonɨ Anàk ɨ̀lvì izɨyn i ŋweyni ɨ ghɨ Abà.

Ghɨ n-chfɨ̀ tî, iwoŋ i mæ kɨ mæ sɨ a Heblòn.