Joshua 17

¹Ɨwêyn nɨn ghɨ ɨ̀lwêʼ ɨlvi vzɨ̀ a ghɨ n-læ fu sɨ̂ ghelɨ isas i ndo nɨ̀ Mànasè ghɨli, ɨ ghelɨ Makì. Makì nà n-ghɨ wayn ɨwû àsɨ nɨ̀ Mànasè, ghɨ bæ̀ sɨ̂ ghelɨ Gilèd. Ghɨ n-læ fu Gilèd nɨ̀ Bashàn sɨ̂ ìsas i ndo nɨ̀ Makì bòm ta àŋena nà n-ghɨ ghelɨ iwòŋ ghɨ to. ²Ghɨ n-fu meyn ɨ̀lweʼ sɨ̂ ghelɨ isas i ndo nɨ̀ Mànasè ghɨli kɨ̀ ɨchfɨ ndo ɨchfɨ ndo. Achfɨ̂ a ndosɨ ateyn a nà n-ghɨ ɨ̀chfɨ ndo nɨ̀ Abìyezà nɨ̀ ɨ̀chfɨ ndo nɨ̀ Helèk kɨ̀mɨ nɨ̀ ɨ wu Aslèl nɨ̀ ɨ̀chfɨ ndo nɨ̀ Shekèm nɨ̀ ɨ̀chfɨ ndo nɨ̀ Hefà kɨ̀mɨ nɨ̀ ɨ wu Shemidà.

³Zèlofehàd ɨ wâyn wâyn Makì nà n-kelɨ wi wayn ɨ lûmnɨ̀, kwo kelɨ kɨ woyn ghɨ̂kì azɨyn a àŋena ɨ ghɨ Malà nɨ̀ Nuwà nɨ̀ Hoglà nɨ̀ Milkà nɨ Tizà. ⁴Ghɨ̀kì nâ ghèyn nɨn lu meyn ɨ ndu yeyn ngàŋ ndô Fɨyini ɨ Elezà ŋêyn Joshwà ɨ wâyn Nûn nɨ̀ ghelɨ ghɨ tisɨnɨ a Isìlæ̀ ɨ bè sɨ̂ àŋena na, “Bôbo nɨn læ meyn bè sɨ̂ Mosìs na wù fu ɨlwêʼ sɨ̂ ghès kɨ̀ ighel ta wù fù sɨ̂ woynà ghes ghɨlûmnɨ.” Joshwà ɨ kæ fu ɨlwêʼ sɨ̂ àŋena abàs nɨ̀ woyn nà bò àŋena kɨ̀ ighel ta Bôbo nɨ̂n læ bè. ⁵À ti dzɨ zɨ̀ a isas i ndo nɨ̀ Mànasè nɨ̂n læ keli ɨlwêʼ ɨlvi ìvɨm sɨ baʼsɨ sɨ̂ Gilèd nɨ̀ Bashàn injɨyn i jvâ Jodàn, ⁶bòm ta woyn Mànasè ghɨki nɨ̀ ghɨ lûmnɨ nɨ̂n chɨ̀yntɨ keli ɨ̀lwêʼ injɨyn i jvâ Jodàn, ghelɨ isas i ndo nɨ̀ mànasè ghɨli ɨ keli Gilèd injɨyn ili.

⁷Ighami ɨlwèʼ nɨ̀ ghelɨ isas i ndo nɨ̀ Mànasè nà n-zɨ̂tɨ̀ a Ashà sɨ chem a Mikmetàt injɨyn i Shekèm, fî kalì ndû a ntèʼ ìlì alèʼ ghè a ghelɨ En Tabùwà nà n-chi ateyn. ⁸Alêʼ kì a kɨ nà n-jɨŋ kal Tabùwà nà n-kelɨ Mànasè mɨtì ntèʼ Tabùwà ighami nɨ̀ Mànasè ɨ ghɨ a kelɨ ghelɨ isas i ndo nɨ̀ Eflèm. ⁹Ighami i Mànasè nà n-lû a isɨ i lɨmà lɨ̀mà a Tabùwà, yi kàlì dzɨ a afoŋlɨ a Kanà ɨ ndu chem a jvâ ìghaʼnɨ Mèdìtèlenìyà. Ntèʼsɨ nà n-ghɨ a mbæ̀ àfoŋlɨ nâ ghàyn, ghɨ antêynɨ̀ àlèʼ nɨ̀ Mànasè mɨtì a kelɨ ìsas i ndo nɨ̀ Eflèm. ¹⁰Yi ti n-ghɨ na ɨlwêʼ vzɨ̀ a wu nà n-ghɨ dzɨ abàs itsɨyn nà n-kelɨ ìsas i ndo nɨ̀ Eflèm, ɨvzɨ̂ a abàs ikuè ɨ kelɨ ghelɨ isas i ndo nɨ̀ Mànasè. Ighami i Mànasè ili nà n-ghɨ jva ìghaʼnɨ, abàs a li-a ndû chem ighami nɨ̀ Ashà abàs ikuè nɨ̀ Isakà abàs injɨyn.

¹¹À nà n-ghɨ ɨlwèʼ ghè a ghɨ n-fù sɨ̂ ghelɨ Ashà nɨ̀ ghelɨ Isakà, Mànasè ɨ kelɨ kɨmɨ Bet Shàn nɨ̀ Iblèm nɨ̀ ghelɨ ghì a ghɨ nà n-chi a Dô nɨ̀ Endò, nɨ̀ ɨghî a ghɨ nà n-chi a Tanàk, nɨ̀ ɨghî a ghɨ nà n-chi a Megidò nɨ̀ ɨghî a ghɨ nà n-chi a Nafòt nɨ̀ ɨ̀lwêʼ vzɨ̀ a wu jɨ̀ŋ kal ntèʼ nâ sèynsɨ̀ sɨ̂ Mànasè.

¹²Ghɨ n-fu mɨtì, ghelɨ Mànasè ɨ nà kelɨ wi adyaʼ sɨ sàŋ sɨ fvɨ̀sɨ ghelɨ Kenàn sɨ a ɨlwèʼ nâ gàyn, ghelɨ Kenàn ɨ to faŋ kɨ faŋ ɨlwèʼ nâ ghàyn. ¹³A nà ghɨ ta ghelɨ Isìlæ̀ dvɨ̀, ɨ̀ nà sɨ kelɨ àdyaʼ, ɨ faŋ tɨ sàŋ tɨ fvɨ̀sɨ ghelɨ Kenàn mɨtì ɨ nà sɨ kfâyntɨ̀ kɨ na ghɨ na fèlɨ̀ àkôs sɨ̂ àŋena.

¹⁴Ghelɨ isas i ndo nɨ̀ Josèf ɨ bɨf sɨ̂ Joshwà na, “Bòm ghà ta wà fu kɨ̀ alêʼ àmòʼ sɨ̂ ghès, ghès ɨ dvɨ̂ tèyn a? Bôbo Fɨyini boysɨ meyn ghès, ɨ̀ nì ghèsɨ na dvɨ̂ ndû kɨ asɨ.”

¹⁵Joshwà ɨ bè sɨ̂ àŋena na, “Yi n-ghɨ samoʼ na yi n-dvɨ-à, Eflèm, ilaʼ i kfɨynsɨ yèynì ɨ læ̂ chwôsɨ̀ sɨ̂ zɨ̀. Yì koʼ ndù akù nɨ̀ ghelɨ Belìz nɨ̀ ghelɨ Lefèm ɨ̀ tem alêʼ afu.”

¹⁶Àŋena bèynsɨ̀ ɨ bè na, “Ilaʼ i kfɨynsɨ nâ zɨ̀-ì nɨn ghaʼ kfeyn wi sɨ̂ ghès. Ghelɨ Kenàn ghì a ghɨ n-chi a tɨ̂bàl afu nô ghɨ̀ jɨ̀m, nɨ̀ ghelɨ Bet Shàn baʼsɨ̂ nɨ̀ ghelɨ ghɨli ghì a ghɨ bàʼlɨ̀ a ngùŋ àteyn nɨ̀ ɨghî a ghɨ n-chi afoŋlɨ a Jezlèl, nɨn kelɨ mɨ̀nchaʼ mɨ̀ ìwòŋ ma ghɨ fàytɨ nɨ̀ àkasa.”

¹⁷Joshwà ɨ bè sɨ̂ ghelɨ isas i ndo nɨ̀ Josèf ma à ti ghelɨ Eflèm nɨ̀ ghelɨ Mànasè na, “Yi n-dvɨ-à, fî to nô a jûŋ. Yì kàʼ yi bû nà kelɨ kɨ àlêʼ nâ kèynà. ¹⁸Yì ndu tem kfèynsɨ àku nâ kì a kfɨyn nô à jɨ̀m à na kelɨ kɨ zɨ̀ nô mɨ ta ghelɨ Kenàn nâ ghì nɨn to adyaʼ fî kelɨ mɨ̀nchaʼ mɨ̀ ìwòŋ ma ghɨ faytɨ nɨ̀ àkasa, yì kàʼ a yì saŋ ɨ̀ fvɨ̀sɨ̀ àŋena sɨ afu.”