Joshua 18

Ŋwàʼlɨ̀ Joshwà

Joshwà ɨ gwòtɨ̀ ɨ̀lwêʼ vzɨ̀ a wu bɨ̀sɨ sɨ̂ àsas a ndosɨ a li-a

¹A nà n-ghɨ ta ghelɨ Isìlæ̀ ghàl meyn fsɨ ɨlwêʼ à na sɨ saʼ àŋena, àŋena chɨ̀yntɨ̀ a Shilò, ɨ bàʼlɨ̀ fɨ̀ndo fɨ Bôbo Fɨyini. ²À nà n-ghɨ tì asas a ndo nɨ̀ ghelɨ Isìlæ̀ a li-a nsòmbo ɨ ghɨ bula Joshwà fu ɨ̀lwêʼ sɨ̂ àŋena.

³Joshwà ɨ kæ bɨf sɨ̂ woyn Isìlæ̀ na, “Bòm ghà ta yi n-chi kɨ chi fsɨtɨ̂ mesì wì ɨlwêʼ vzɨ̀ a Bôbo Fɨyini, ɨ Fɨyini fɨ ghɨ̀bo ghi nɨ̂n chfɨ̀nɨ sɨ̂ zɨ̀ a? ⁴Yì choʼtɨ ghelɨ ghɨ̀ tal ghɨ̀ tal nô mɨ̀ isas i ndo ì kà, mà tum àŋena ndu ki ɨlwêʼ vzɨ̀ a wu bu duʼ, ɨ̀ fàytɨ nyàʼtɨ̀ ɨ̀ dyèyn tɨ̀ghami tɨ ɨlwèʼ vzɨ̀ a nô mɨ ìsas i ndo ì kà nɨn keli. Àŋena nyâʼ, ghɨ kasi gvì ɨ fu sɨ̂ mà. ⁵Àŋena nɨn gwòtɨ̀ ɨ̀lwêʼ ateyn ɨbyâs nsòmbo, a isas i ndo nɨ̀ Judà faŋ kɨ̀ a àŋena alèʼ abàs itsɨyn, a isas i ndo nɨ̀ Josèf faŋ abàs ikuè. ⁶Ghelɨ ateyn nyâʼ, ghɨ faytɨ dyèyn tɨ̀ghami ɨbyàs ghè nsòmbo a wu faŋ ɨ gvi fu sɨ̂ mà ta ka mà tɨm bèyʼ asɨ nɨ̀ Bôbo Fɨyini, ɨ Fɨyini fɨ ghesɨ̀nà, ɨ̀ yeyn na mɨ n-fu àlêʼ à kà sɨ̂ ìsas i ndo ì kà a. ⁷Mɨ n-se sɨ gwòtɨ̀ ɨ̀ faŋ tɨ̀ fu alêʼ sɨ̂ ghelɨ isas i ndo nɨ̀ Levì bòm ta iyi àŋena nɨn ghɨ sɨ nà felɨ sɨ a ngàŋsɨ ndo nɨ̀ Bôbo Fɨyini. Asas a ndo nɨ̀ Gâd, nɨ̀ Lubèn nɨ̀ àbâs isas i ndo nɨ̀ Mànasè a li-a sɨ ghɨ ma àŋena keli meyn ɨ wu àŋena ɨlwêʼ injɨyn i jvâ Jodàn ili kɨ̀ ighel ta Mosìs ɨ wul ɨ̀ felɨnɨ nɨ̀ Bôbo nɨn læ gwòtɨ ɨ fu sɨ̂ àŋena.”

⁸A nà ghɨ ta àŋena sɨ lû sɨ ndù sɨ gwòtɨ ɨlwêʼ ateyn, Joshwà ɨ bè sɨ̂ àŋena na, “Yì ndu ki ɨlwêʼ ateyn ɨ̀ faytɨ nyàʼ ɨ̀ fèʼtɨ̀ ìwo zɨ̀ a yì yeyn. Yi nyâʼ, yi kasi gvì ɨ dyèyn sɨ̂ mà ta ka mà tɨm bèyʼ a Shilò asɨ nɨ̀ Bôbo Fɨyini ɨ̀ yeyn na à n-kelɨ ndà alêʼ à kà a.” ⁹Ghelɨ ateyn ɨ lù ɨ jèl ɨlwèʼ nâ ghè nô ɨ̀ jɨ̀m ɨ nyàʼ ntèʼsɨ nô sɨ̀ jɨ̀m, nɨ̀ dzɨ zɨ̀ a àŋena gwòtɨ̀ ateyn ɨbyâs nsòmbo, ɨ kasi kfa ndu yeyn Joshwà alèʼ ghè a àŋena bɨ̀ ateyn a Shilò. ¹⁰Joshwà ɨ kæ tɨm bèyʼ sɨ̂ àŋena asɨ nɨ̀ Bôbo Fɨyini a Shilò, sɨ gwòtɨ̀ ɨ̀lwêʼ ateyn sɨ̂ àsas a ndo a Isìlæ̀ nâ kì nsòmbo.

Joshwà ɨ fu ɨlwêʼ sɨ̂ ghelɨ isas i ndo nɨ̀ Benjamìn

¹¹Joshwà nɨn læ tɨm bèyʼ tì, ɨ fu alêʼ a kɨ asɨ-a sɨ̂ ghelɨ isas i ndo nɨ̀ Benjamìn kɨ̀ ɨchfɨ ndo ɨchfɨ ndo. Alêʼ a àŋena nà n-ghɨ antêynɨ̀ antêynɨ̀ nɨ̀ woyn Judà nɨ̀ woyn Josèf.

¹²Ighami àŋena abàs ikuè nà n-zɨ̂tɨ̀ a jvâ Jodàn, yi ndu chwò dzɨ abàs ikuè a Jèlikò ɨ dyaŋ ndù dzɨ a ilaʼ i kfɨynsɨ ndû fvɨ̂ a nse ìyum a Bet-Avèn. ¹³Ighami ateyn i nà n-lû afu, yi kàli ndù dzɨ a ntèʼ Lûz ma à ti Betèl, ɨ fi kàli ndù dzɨ a Atalot Adà atû kfɨ̀yn abàs itsɨyn a Bet Holòn.

¹⁴Yi na n-lû a kfɨyn afî a yì kèʼnɨ Bet Holòn abàs itsɨyn yi kàlì ɨ dyaŋ fvɨ̀ dzɨ a Kiliyat Bâl ma à ti Kiliyat Jelìm ɨ ntèʼ ghelɨ Judà.

¹⁵Ighami nâ yèynì abàs itsɨyn nà n-zɨ̂tɨ̀ a ngùŋ Kiliyat Jelìm yi ndu chem a isɨ i lɨmà lɨ̀mà a Neftowà, ¹⁶yi fi kàli ndù isas i kfɨyn afî a yi nà n-keʼnɨ̀ nɨ̀ afoŋlɨ a Ben Hinòm atû afoŋlɨ a Lefèm, ɨ nà kàli kɨ afoŋlɨ a Hinòm ɨwuyn ntèʼ Jebùs, ɨ ndu chem a En logèl. ¹⁷Yi nà n-lû sɨ afu yi ngol koʼ a En Shemèsh ɨ ndu chem a Gelilòt ta yì kèʼnɨ̀ Adumim Bâs, ɨ kàli chem a ngòʼ Bohàn ma ghɨ chfɨ̀ nɨ̀ wâyn Lubèn ɨ Bohàn. ¹⁸Ighami ateyn i nà n-lû afu, yi nà kalì kɨ ɨ̀wuyn Bet Alabà tèyn ndû chem a Alabà. ¹⁹Lù afu, yi koʼ ɨwuyn Bet Hoglà ɨ koʼ fvɨ̀ a jvâ Fɨ̀ngvaŋ, ɨchfɨ jvâ Jodàn abàs itsɨyn. Iyeyn nâ yèyni nà n-ghɨ ìghami abàs itsɨyn.

²⁰Jvâ Jodàn nà n-ghɨ ìghami abàs a li-a.

Tɨghami nâ tèyntɨ nà n-dyêyn ɨ̀lwêʼ vzɨ̀ a ghelɨ isas i ndo nɨ̀ Benjamìn nɨ̂n kèli kɨ̀ ɨchfɨ ndo ɨ chfɨ ndo.

²¹Ɨwêyn nɨn ghɨ ɨlwêʼ vzɨ̀ a ghelɨ isas i ndo nɨ̀ Benjamìn nɨn læ keli, kɨ̀ ɨchfɨ ndo ɨchfɨ ndo;

À nà n-ghɨ Jèlikò nɨ̀ Bet Hoglà nɨ̀ Emek Kezìz, ²²nɨ̀ Bet Alabà nɨ̀ Zemalèm, nɨ̀ Betèl ²³nɨ̀ Avìm, nɨ̀ Balà nɨ̀ Oflà, ²⁴nɨ̀ Kefà Amonì nɨ̀ Ofnì baʼsɨ̂ nɨ̀ Gebà. Ntèʼsɨ ghaʼlɨnɨsɨ nà n-chɨ̂yntɨ̀ ghɨ njvàsɨ̀ bò nɨ̀ ntèʼsɨ telâsɨ̀.

²⁵Ghɨ n-fu meyn kɨmɨ ntèʼsɨ Gibìyòn nɨ̀ Lamà nɨ̀ Belòt ²⁶nɨ̀ Mizbà nɨ̀ Kefilà nɨ̀ Mozà ²⁷nɨ̀ Lekèm, nɨ̀ Ilbèl nɨ̀ Talalà ²⁸nɨ̀ Zelà nɨ̀ Hælèf nɨ̀ ntèʼ zɨ̀ a ghelɨ Jebùs na n-chi ateyn, ma à ti Jèlusalèm, nɨ̀ Gibìyà baʼsɨ̂ nɨ̀ Kilìyàt. Ntèʼsɨ ghaʼlɨnɨsɨ nà n-chɨ̂yntɨ̀ ghɨ njvàsɨ̀ kæ̀ nɨ̀ ntèʼsɨ telâsɨ̀.

À ti ɨlwèʼ vzɨ̀ a ghɨ n-læ fu sɨ̂ ghelɨ isas i ndo nɨ̀ Benjamìn kɨ̀ ɨchfɨ ndo ɨchfɨ ndo.