Judges 13

Ghɨ bzɨ Samsòn

¹Ghelɨ Isìlæ̀ nɨn fi meyn nì mbɨ asɨ nɨ̀ Bôbo Fɨyini, wu visi ghelɨ Fìlisìyà ɨ tɨm yɨ àŋena iwòŋ ɨ saʼ àŋena sɨ a bèŋsɨ̀ mɨ̀vɨm ɨ̀n kæ̀.

²Wùl nɨn læ meyn nà ghɨ izɨyn i ŋweyn ɨ ghɨ Manòwà, wu kelɨ wi, wu kelɨ wi wayn, bzɨ̂ wì. Manòwà nâ vzɨ̀ nà n-ghɨ wul ìsas i ndo nɨ̀ Dân ma wù lù a ntèʼ Zolà. ³Ɨtuʼ ɨ layn achi a li-a, nchì Fɨyini ɨ fvɨ̀ ikèʼ nɨ̀ wùl ɨwi nâ vzɨ̀ ɨ bè sɨ̂ ŋweyn na, “Yi n-ghɨ samoʼ na wà n-kelɨ wi wayn, bzɨ wì. Mɨtì wa n-timî ɨlvâ ɨ̀ bzɨ wayn ɨ lûmnɨ̀. ⁴Sɨ zɨ̀tɨ lvɨ̂yn sɨ ndù asɨ, ka wa n-fì nyvɨ mɨlûʼ ɨn to. Ka wa n-fì yɨ afo isaʼi dyêyn na kɨ n-layn wi. ⁵Wa chî kɨ tèyn bòm ta wa n-timî ɨlvâ ɨ̀ bzɨ wayn ɨ lûmnɨ̀, a ɨkfêm læ̂ faŋ tɨ̀ chwò a ŋweyn atu bòm ta wù læ̀ fvɨ̂ sɨ a wûl sɨ a nyɨŋ, kelɨ ichfɨ̂nɨ̀ ŋêyn Fɨyini fɨ kɨ̀ sɨ zɨ̀tɨ̀ achi ghè a ghɨ bzɨ ŋweyn ateyn. À n-ghɨ ŋweyn vzɨ̀ a wù læ̀ zɨtɨ̀ sɨ fsɨ ghelɨ Isìlæ̀ sɨ awu nɨ̀ ghelɨ Fìlisìyà.”

⁶Wùl ɨ wi nâ vzɨ̀ ɨ ndu fèʼtɨ̀ sɨ̂ lum ŋweyn ɨ bè na, “Wul ɨ̀ Fɨyini ɨ̀ lvɨ̀ fvɨ̀ a ma ikèʼ ghɨ ta nchì Fɨyini koʼnɨ̂ jofɨ̀ kɨ tèyn. Ma bû nì bɨf na wù lù wo a, wù faŋ mɨ tɨ̀ fèʼtɨ̀ ìzɨyn i ŋweyn sɨ̂ mà. ⁷Wù nì bè sɨ̂ mà na, mɨ n-timî ɨlvâ ɨ̀ bzɨ wayn ɨ lûmnɨ̀. Wù ni meyn bè kɨ̀mɨ na ka mɨ n-fì nyvɨ mɨlûʼ ɨn to, ɨ fì bè kɨ̀mɨ na ka mɨ n-fì yɨ afo isaʼi dyêyn na kɨ n-layn wi, bòm ta wayn àteyn læ̀ fvɨ̂ sɨ a wûl sɨ a nyɨŋ, kelɨ ìchfɨ̂nɨ̀ ŋêyn Fɨyini fɨ̀ kɨ̀ sɨ zɨ̀tɨ̀ achi ghè a ka ghɨ bzɨ ŋweyn ateyn sɨ chem ta ka wù læ̂ kfɨ.”

⁸Manòwà ɨ yvɨ tî ɨ jèm sɨ̂ Bôbo ɨ bè na, “Mɨ n-chwotɨ̂ và a Bôbo. Bè sɨ̂ wùl ɨ̀ Fɨyini vzɨ̀ a wà tî tùm tî na wù fî kàsî gvì sɨ̂ ghès ɨ̀ yèʼi dzɨ zɨ̀ a ka ghɨ nî bzɨ wayn àteyn ɨ̀ lèmsɨ̂ koʼ nɨ̀ ŋweyn ateyn.”

⁹Fɨyini fɨ ɨ yvɨ ijêm i Manòwà ɨ bè nchì Fɨyini àteyn ɨ kasi ndù sɨ̂ wùl ɨ wi nâ vzɨ̀, wu ghɨ a gvêyn kɨ̀ ŋweyn nìnyɨŋ, lûm ŋweyn ɨ ghɨ wi ŋêyn ŋweyn. ¹⁰Wùl ɨ wi àteyn ɨ nyɨŋ kɨ nyɨŋ ɨ ndu bè sɨ̂ lûm ŋweyn na, “Wùl Fɨyini vzɨ̀ a wù tî gvì achi ghè fi meyn gvì.”

¹¹Manòwà ɨ làli kɨ ibàm nɨ̀ wî ŋweyn ɨ ndu yeyn wul àteyn ɨ kæ bɨf nâ, “À n-ghɨ kɨmɨ và vzɨ̀ a wà tî tàŋi sɨ̂ wî wom ma?”

Wùl àteyn ɨ bɨmi ɨ bè na, “À n-ghɨ mà.”

¹²Manòwà ɨ bɨf sɨ̂ ŋweyn na, “Awo nâ kèynà a wà bè têyn læ̀ gayn à a wayn àteyn na lêm tɨ̀saʼ tɨ̀ kà, fî felɨ̀ nô ghà?”

¹³Nchì Fɨyini ɨ bèynsɨ̀ ɨ bè na, “Wî vâ nɨ̀n kelɨ kɨ sɨ nà ni awo kì a mà bè sɨ̂ ŋweyn nô à jɨ̀m. ¹⁴Wî vâ nɨ̀n kelɨ wi sɨ fì sɨ yɨ afo ma ghɨ faytɨ nɨ̀ mɨ̀tam mɨ̀ gɨ̀lebsɨ̀. Wù n-kelɨ wi sɨ fì sɨ nyvɨ mɨlûʼ ɨn to, kelɨ wi sɨ fì sɨ yɨ afo kɨ layn wi ta isaʼi nɨn dyêyn. Wù n-kelɨ sɨ nà ni nô mɨ ghà kɨ̀ ta mà bè sɨ̂ ŋweyn.”

¹⁵Manòwà ɨ bè sɨ̂ nchì Bôbo nâ zɨ̀ na, “Ghès nɨn n-chwotɨ̂ và. Dùʼi ghèsɨ̀ kini wâyn bzɨ ɨ̀ sɨ, fàytɨ wà yɨ.”

¹⁶Nchì Bôbo nâ zɨ̀ ɨ bè sɨ̂ ŋweyn na, “Wà n-ghaytɨ̂ mɨ mà tî, ma mà dùʼì mɨ duʼi ma bû yɨ ɨfwo ɨ yɨnɨ vzɨ̀ a wà kfè. Wà na kelɨ bzɨ, wa sɨ ɨ fu sɨ ifu i nyoʼnɨ-i sɨ̂ Bôbo Fɨyini.” À nà n-ghɨ tì Manòwà ɨ bu duʼ tɨ̀ nà kya na à n-ghɨ nchì Bôbo Fɨyini, ¹⁷ɨ kæ bɨf sɨ̂ nchì Bôbo nâ zɨ̀ na, “Izɨyn ì zæ nɨn ghɨ ndà? Mɨ n-bɨfɨ tèyn ta ka ghèsɨ̀ læ̂ kèli sɨ bemsɨ̂ và ɨlvɨ ta iwo ì zæ kfeyn.”

¹⁸Nchì Bôbo ɨ bɨf sɨ̂ ŋweyn na, “Wà n-bɨf sɨ ni gha nɨ̀ ìzɨyn ì yemi a? Mà fèʼtɨ̀ mɨ feʼtɨ wa bû yvɨ kèli?” ¹⁹Manòwà ɨ lì wâyn bzɨ ɨ baʼsɨ ìfu ɨfwo ɨ yɨnɨ ateyn ɨ ndu fu sɨ ifu sɨ̂ Bôbo Fɨyini atû ngòʼ. Bôbo Fɨyini ɨ nì ìwo ikaynɨ-i kɨ̀ a àŋena asɨ. Achfɨ̂ a àŋena ɨ yum. ²⁰Ilemi ɨvɨ̀s i nɨ̀n læ meyn làli atû àbaŋ ifu nâ ghè ɨ se sɨ koʼ, nchì Bôbo Fɨyini nâ zɨ̀ ɨ koʼ antêynɨ̀ àteyn. Manòwà ŋêyn wî ŋweyn ɨ yeyn tî ɨ fe ɨ kfɨsɨ àkêʼ a àŋena a nse. ²¹A nà ghɨ ta Manòwà ŋêyn wî ŋweyn faŋ tɨ̀ fì tɨ̀ yeyn nchì Bôbo nâ zɨ̀, Manòwà ɨ keli kɨ keli na à nì nà ghɨ nchì Bôbo Fɨyini.

²²Manòwà ɨ kæ be sɨ̂ wî ŋweyn na, “Dzɨ̀ bu ghɨ wi, ghesɨ̀và kfɨ meyn bòm ta ghesɨ̀và yeyn meyn Fɨyini kɨ̀ nô nɨ̀ ìsɨ-i.”

²³Wùl ɨ wi nɨ̀ ŋweyn ɨ bè na, “Bôbo nà n-kɨŋ sɨ zuetɨ ghesɨ̀và ma wù bû nì fsɨ ifu i nyoʼnɨ-i nɨ̀ ìfu ɨfwo ɨ yɨnɨ zɨ̀ a ghesɨ̀và nì fu. Yi nà n-ghɨ tî ma wù bû dyèyn àwo a kaynɨ-a kì a wù dyèyn nɨ akî a wù fèʼtɨ̀ sɨ̂ ghesɨ̀và.”

²⁴Achi a ɨ koʼ kfeyn, wî Manòwà ɨ bzɨ wayn ɨ lûmnɨ̀ ɨ chfɨ̀ ìzɨyn i ŋweyn na Samsòn. Wayn àteyn ɨ lema koʼ, Bôbo Fɨyini ɨ boysɨ ŋweyn. ²⁵Ayvɨs a Bôbo Fɨyini ɨ zɨ̀tɨ̀ ɨ nà tisɨ̂ koʼ nɨ̀ ŋweyn a ŋweyn ifèl wu bu chî kɨ a Màhane Dân, alèʼ ghè a ntèʼ Zolà nɨ̀ ntèʼ Eshtòl nà n-lêm ighami ateyn.