Judges 14

Ghɨ ndù wi sɨ̂ Samsòn

¹Samsòn nɨ̀n læ meyn kàlì a Timnà achi a li-a, ɨ yeyn waynda ngòyn a ghɨ wâyn wùl ɨ̀ Fìlisìyà, ²ɨ kasi kfa ɨ bè sɨ̂ bò ŋweyn ŋêyn na ŋweyn na, “Ma yeyn meyn waynda ngòyn a Timnà a ghɨ wul ɨ̀ Fìlisìyà. Ndu faytɨ iwo ateyn mà mala ŋweyn.”

³Bò ŋweyn ŋêyn nà ŋweyn ɨ bɨf sɨ̂ ŋweyn na, “Yi ti n-ghɨ na wùl ɨ wi nɨn ghɨ wi a ghesɨ̀nà isas i ndo, ghɨ wi a Isìlæ̀ ta wù n-kfeynɨ̂ sɨ và ma? Wà n-ndû sɨ li wul ɨ wi antêynɨ̀ nɨ̀ ghelɨ Fìlisìyà ghɨ kya wi Fɨyini bòm ghà?”

Mɨtì Samsòn ɨ bè sɨ̂ bò ŋweyn na, “Faytɨ kɨ faytɨ iwo ateyn. À n-ghɨ ɨ vzɨ̂ a wù n-kfeynɨ sɨ̂ mà.” ⁴Wu nà n-bê tì, bò ŋweyn ŋêyn nà ŋweyn ɨ kya wi na à nì Bôbo Fɨyini, kɨŋ sɨ ku ghelɨ Fìlisìyà bòm ta à nà n-saʼ àŋena ghelɨ Isìlæ̀ ɨtuʼ nâ ghè. ⁵Samsòn ɨ lù ŋêyn bò ŋweyn nɨ̀ nà ŋweyn ɨ nà kàlì ndû a Timnà. A nà ghɨ ta àŋena kàlì ɨ nà toynɨ̂ chwô a gvêyn mɨ̀tàm î lì a Timnà, wâyn bzɨ̀kem ɨ̀ lvɨ̀ ɨ fvɨ̀ ɨ lutɨ kɨ Samsòn ɨ nà gvî à, dɨm à. ⁶Ayvɨs a Bôbo ɨ fu adyaʼ a bemnɨ-a sɨ̂ Samsòn wu ghal sàytɨ̀ bzɨ̀kem àteyn kɨ nɨ̀ ɨ̀wu ŋweyn. Wu n-sàs kɨ ta wù sàs wâyn bzɨ, ɨ sàs tì ɨ faŋ tɨ̀ fèʼtɨ sɨ̂ bò ŋweyn kèsa sɨ̂ nà ŋweyn na à ti iwo zɨ̀ a yi gàyn. ⁷Wu n-læ meyn kàli ndu yeyn wul ɨ wi àteyn ŋêyn ŋweyn ɨ taŋi, wu nà kôŋ ŋweyn.

⁸Samsòn ɨ læ kasi ɨ nà sɨ ndû a Timnà sɨ mala wul ɨ wi àteyn, ɨ se sɨ ndù ɨ bɨ̀ ɨ zɨ sɨ ki akfɨ a bzɨ̀kem kì a wù n-læ zue ɨ yeyn ma yvɨsɨ ku meyn ateyn ɨ̀ lèm ɨ̀lû. ⁹Wu yeyn tî, ɨ kàf ɨ̀lû ateyn ɨ nà jelɨ̀ lo ndù-à ɨ ndu fu ɨlvɨ sɨ̂ bò ŋweyn ŋêyn nà ŋweyn, àŋena lo. Wu n-fu mɨtì ɨ faŋ tɨ̀ fèʼtɨ̀ sɨ̂ àŋena na yì yɨ ɨ̀lû ateyn akfɨ a bzɨ̀kem ta yi n-læ zue màʼ.

¹⁰Bò Samsòn ɨ læ kasi ndù sɨ faytɨ sɨ mèsi iwo i wul ɨ wi nɨ̀ Samsòn, Samsòn ɨ jàŋ àyɨ kɨ̀ ta wayn ɨ lûmnɨ̀ nà n-se sɨ mala wu jàŋ. ¹¹Ghelɨ Fìlisìyà nɨ̀n læ yeyn ŋweyn nô mɨ ɨlvɨ gha, ɨ choʼtɨ tɨ̀kuŋ mɨ̀vɨm ɨ̀n tal ta ka tɨ na jelɨ̀ ŋêyn Samsòn.

¹²Samsòn ɨ bè sɨ̂ àŋena na, “Mɨ n-mò ngàyn sɨ̂ zɨ̀, ma wùl kæ fèʼtɨ iwo zɨ̀ a ngàyn àteyn nɨn dyêyn antêynɨ̀ mɨ̀chi mɨ̀ àyɨ ghàyn nsòmbo, a mà fu dàla ìmoʼ ìmòʼ nô mɨ sɨ̂ ndà baʼsɨ̂ nɨ̀ ndzɨsɨ lafɨnɨsɨ sɨ lisɨ. ¹³Yì kæ faŋ tɨ̀ fèʼtɨ sɨ̂ mà, a nô mɨ ndà fu dàla sɨ̂ mà baʼsɨ̂ nɨ̀ ndzɨsɨ lafɨnɨsɨ sɨ lisɨ.”

Àŋena bè sɨ̂ ŋweyn na, “Mo gvi nɨ̀ ngàyn àteyn ghès ɨ̀ yvɨ.”

¹⁴Wu mò ngàyn àteyn na,

“Afo a yɨnɨ-a fvɨ meyn antêynɨ̀ àfo, kɨ yɨ-a,

afo a tofɨnɨ-a fvɨ̂ antêynɨ̀ àfo, kɨ kelɨ àdyaʼ.”

Mɨ̀chi chwò ɨ̀n tal bula àŋena keli ìwo zɨ̀ a ngàyn àteyn nɨ̀n bê.

¹⁵A nà ghɨ a mɨchi ɨ̀n kæ̀, àŋena ndù ɨ taŋi sɨ̂ wî Samsòn ɨ bè na, “Lyàtɨ lûm vâ wèyn wù feʼtɨ iwo zɨ̀ a ngàyn ŋweyn yèyn nɨ̀n bê, bu tì a ghès nyoʼ vâ, baʼsɨ̂ kɨ nɨ̀ ghelɨ ndo nɨ̀ bò vâ ghɨ̀ jɨ̀m. Wà làʼì ghès sɨ gvì sɨ choŋ ɨfwo ɨ̀ wesɨ ma?”

¹⁶Àŋena nɨn tàŋi tî, wî Samsòn ɨ ndù sɨ̂ ŋweyn kɨ nɨ̀ ìdzɨ-i ɨ bè na, “Wà n-bâyn mà têyn sɨ a gha? Wà n-kôŋ wì ma nô sakos. Wà mò ngàyn sɨ̂ ghelɨ̀ ghem ɨ̀ faŋ tɨ̀ fèʼtɨ̀ iwo zɨ̀ a yì n-bê sɨ̂ mà bòm ghà?”

Samsòn ɨ bè sɨ̂ ŋweyn na, “Ma bû fèʼtɨ̀ mɨ sɨ̂ bò wom ŋêyn nà wom, wà na kɨŋ na mà feʼtɨ sɨ̂ và bòm ghà?” ¹⁷Wu faŋ ɨ nà sɨ dzɨ̂ kɨ dzɨ a mɨchi mɨ̀ àyɨ nâ ghàyn nsòmbo. A nà ghɨ achi a goʼsɨnɨ-a ma wù fu meyn chwòsɨ̀ ngeʼ sɨ̂ Samsòn, wu fèʼtɨ̀ ìwo zɨ̀ a ngàyn àteyn nɨ̀n bê. Wùl ɨ wi àteyn ɨ kasi ndù ɨ fèʼtɨ̀ sɨ̂ ghelɨ ŋweyn.

¹⁸A ni nà ghɨ a mbol àbe, ghelɨ ntèʼ Timnà ɨ bè sɨ̂ Samsòn na,

“Afo a kàʼ kɨ bû fì tof chwò ɨ̀lû.

Afo a kàʼ kɨ bû fì to chwò bzɨ̀kem.”

Samsòn ɨ bè sɨ̂ àŋena na,

“Yi ghalɨ meyn wâyn nyàm sɨ adyaʼ na yì juʼ gveyn. Yi nà n-faŋ tɨ̀ ndɨ̀msɨ wî wom na wù feʼtɨ,

ma yi bû kèli ìwo zɨ̀ a ngàyn àteyn nɨ̀n bê.”

¹⁹Ayvɨs a Bôbo Fɨyini ɨ gvì sɨ̂ Samsòn ɨ fu adyaʼ a kaynɨ-a sɨ̂ ŋweyn, wu kàli ndù a ntèʼ Ashkelòn ɨ zuetɨ ghɨ̀lûmnɨ̀ afu mɨ̀vɨm ɨ̀n tal ɨ lì ɨ̀fwo àŋena ɨ fu ndzɨsɨ àŋena sɨ̂ ghelɨ ghì a ghɨ fèʼtɨ̀ iwo zɨ̀ a ngàyn àteyn nɨ̀n bê. Wu kasi kfa a ndo nɨ̀ bò ŋweyn ma ɨtoŋ yafɨ meyn ŋweyn nô sɨ a ŋaŋ. ²⁰Ghɨ lì wî Samsòn ɨ fu sɨ̂ wùl ìjèl nɨ̀ ŋweyn vzɨ̀ a wu nà n-ti baʼsɨ sɨ̂ ŋweyn achi a malâ.