Judges 15

Samsòn ɨ sɨ̀sɨ̀ ìwo zɨ̀ a ghelɨ Fìlisìyà nì sɨ̂ ŋweyn

¹Ɨtuʼ layn achi a li-a, a mɨ̂chi ghè a ghɨ n-sɨ wît ateyn, Samsòn ɨ lì wâyn bzɨ ɨ ndù sɨ mùtɨ wî ŋweyn. A nà ghɨ ta wù ndù chem, ɨ bè sɨ̂ bò wi nɨ̀ ŋweyn na, “Mɨ n-zɨ chi ghesɨ̀ wî wom.” Mɨtì bò wi nɨ̀ ŋweyn ɨ tuynsɨ na wu n-zɨ̂ wì.

²Wu n-tuynsɨ tî ɨ bè sɨ̂ Samsòn na, “Mà tî nà sɨ kya kɨ na wà n-faytɨ̂ bâyn kɨ nô bayn ŋweyn ɨ̀ lì fù ŋweyn sɨ̂ wul ìjèl nɨ̀ và. Ba wâynà ŋweyn ɨtwelâ nɨn jôf chwô ŋweyn? Kwo lì ŋweyn sɨ a wi nɨ̀ và.”

³Samsòn ɨ bè sɨ̂ àŋena na, “Wùl kàʼ wu bû fì ghàm mà iwo ghè a ka mà ni sɨ̂ ghelɨ Fìlisìyà lvɨ̂yn. Mɨ n-mòm ìwo sɨ̂ àŋena.” ⁴Wu bè tì ɨ fvɨ ndu kutɨ mɨ̀nsòŋnɨ̀ ighɨ ì tal ɨ nà lî kɨ ɨ̀mbò kul ghàŋtɨ̀ ànkùyn ateyn, wu fi kul nkɨsɨ a ànkùyn nâ ghè. ⁵Wù nà n-kul tì, wu dyàyn ɨ̀vɨs ateyn ɨ visi mɨ̀nsòŋnɨ̀ mɨ̀ àteyn ɨ nyɨŋ zɨ a gvêynsɨ̀ nɨ̀ ghelɨ Fìlisìyà. Mɨ̀ zɨ tì mɨ nà nyôʼ ndû kɨ ndu nɨ̀ wît zɨ̀ a yì bu ti a gvêynsɨ̀ fî nyôʼ kɨmɨ ɨ̀tweʼ wît vzɨ̀ a ghɨ sɨ lèm, baʼsɨ̂ nɨ̀ gveynsɨ gɨ̀lêbsɨ̀ nɨ̀ ɨ̀nkàʼ mɨ̀ olìfsɨ̀.

⁶Ghelɨ Fìlisìyà ɨ bɨf na, “À mòm ndà iwo yèynì a?” Ghɨ fèʼtɨ̀ sɨ̂ àŋena na à mòm Samsòn, ɨ lûm wâyn wùl ɨ̀ Timnà bòm ta ghɨ tî lì wî ŋweyn ɨ̀ fù sɨ̂ wul ì jèl nɨ̀ ŋweyn. Àŋena yvɨ tî ɨ koʼ nyòʼ wul ɨ wi àteyn ɨ baʼsɨ nɨ̀ bò ŋweyn. ⁷Samsòn ɨ bè sɨ̂ àŋena na, “Mɨ n-yumsɨ̂ wì ɨwuyn nô ta ka mà sɨsɨ iwo nâ yèynì a yì mòm têyn.” ⁸Ta wù bè tî, ɨ làysɨ̀ ìnû yi bem kɨ tèyn ɨ zuetɨ àŋena nô sɨ idvɨ̀ ɨ lù ɨ kàli ndu zɨ ifò i Etàm ɨ chi koʼ ateyn sɨ aleŋ ɨlvɨ.

Samsòn ɨ tɨm yɨ ghelɨ Fìlisìyà

⁹Ghelɨ Fìlisìyà ɨ koʼ bɨ̀ a Judà ɨ gwòsɨ kɨ têyn ɨ ndu baʼsɨ a ntèʼ Lehì. ¹⁰Ghelɨ Judà ɨ bɨf sɨ̂ àŋena na, “Yi n-gvî sɨ nu ghes bòm ghà?”

“Àŋena ɨ bè na ghès gvì sɨ ghal Samsòn sɨ ni kɨ iwo zɨ̀ sɨ̂ ŋweyn a wù tî nì sɨ̂ ghès.”

¹¹Ghelɨ Judà ɨ lù nkamsɨ̀ tal ɨ kali yeyn samsòn ifò i Etàm ɨ bɨf sɨ̂ ŋweyn na, “Wà n-kya wi na à nsaʼ ghelɨ Fìlisìyà saʼ ghesɨ̀nà â? Bòm ghà ta wà we ghes a ngeʼ a?”

Samsòn ɨ bè na, “Mà nì kɨ iwo zɨ̀ a àŋena tî nì sɨ̂ mà.”

¹²Àŋena bè sɨ̂ ŋweyn na, “Ghèsɨ̀ gvì sɨ kul vâ sɨ ndù sɨ fu sɨ̂ ghelɨ Fìlisìyà.”

Samsòn ɨ bè sɨ̂ àŋena na, “Yì chfɨnɨ na a n-zue wi zɨ zuè ma.”

¹³Àŋena bèynsɨ̀ na, “A n-zue wi ghes vâ. Ghès nɨn kul kɨ kul vâ ndù fu sɨ̂ àŋena. Ghès nɨn zue wi vâ.” Àŋena ɨ taŋi tì ɨ kul ŋweyn nɨ̀ nkfɨ sɨ̀ bò, sɨ ghɨ kɨ sɨ fɨ, ɨ li koʼ nɨ̀ ŋweyn. ¹⁴Àŋena koʼ ɨ nà baʼsɨ̂ ndû kɨ a Lehì tèyn, ghelɨ Fìlisìyà ɨ nà byaytɨ̂ fvɨ ndû sɨ kòynɨ̀ nɨ̀ Samsòn. Ayvɨs a Bôbo Fɨyini à ɨ gvì sɨ̂ ŋweyn ɨ fu adyaʼ a kaynɨ-a sɨ̂ ŋweyn. Nkfɨ̀ sîsɨ̀ a ghɨ nì kùl ŋweyn ateyn ɨ kasi ɨ nà ghɨ kɨ ta ɨswhâʼ ɨ ndzɨsɨ ɨlvɨ ta ghɨ nyòʼ, ɨ yàlà sɨ a ŋweyn akœ. ¹⁵Samsòn ɨ yeyn avɨf agyèʼ nɨ̀ njàkâs ma yì kùʼ kfɨ̀ kɨ̀ kfɨ, ɨ boŋ ɨ leŋ zuetɨ ghelɨ ateyn, nkam.

¹⁶Wu n-zuètɨ tî ɨ kæ bè na,

“Ma li meyn àvɨf agyèʼ nɨ̀ njàkâs,

ɨ̀ zuètɨ njàkâysɨ̀ ateyn,

ɨ̀ kuʼ kɨ̀ ɨlwèʼ ɨlwèʼ.

Ma li meyn àvɨf agyèʼ nɨ̀ njàkâs,

ɨ̀ zuètɨ ghelɨ ateyn nkam.”

¹⁷Wu n-tàŋi mèsi mɨ ɨlvɨ gha ɨ laŋ màʼì àvɨf agyèʼ nɨ̀ njàkâs nâ kì, ghɨ nà sɨ toŋtɨ̂ àlêʼ nâ kì na Lamat Lehì.

¹⁸Ɨtoŋ mu ɨ nà sɨ yumtɨ̂ Samsòn nô sɨ a ŋaŋ wu dzɨ̀ sɨ̂ Bôbo ɨ bè na, “Wà ni meyn wùl ɨ̀ felɨnɨ nɨ̀ và tɨm yɨ̀ nô a dzɨ i kaynɨ. Wa n-visî wì na mà kfɨ lè awu nɨ̀ ghelɨ ghèyn a ghɨ n-kya wi Fɨyini tèyn bòm ɨ̀toŋ mu.” ¹⁹Wu n-jèm tî, Bôbo ɨ nì mu fvɨ̀ a fɨbòʼlɨ fɨ lifɨ a Lehì. Samsòn ɨ nyvɨ ɨ kasi keli àdyaʼ, ɨ kæ fu izɨyn isɨ i lɨmàlɨ̀mà nâ zɨ̀-ì na En Hakò. Isɨ i lɨmàlɨ̀mà nâ zɨ̀-ì bu ghɨ kɨ a Lehì sɨ chem layn.

²⁰Samsòn nɨn læ tisɨ ghelɨ Isìlæ̀ sɨ a bèŋ Mɨ̀vɨ̂m bò ɨtuʼ ghê a ghelɨ Fìlisìyà nà n-saʼ Isìlæ̀ ateyn.