Leviticus 16

Achi kì a ghɨ nà n-lêsɨ̀ fu mbɨsɨ ghêl ateyn

¹Woyn ghɨ lûmnɨ̀ nɨ̀ Alòyn ghɨ li ghì ghɨ̀ bò nɨ̂n nyòʼ ileŋ sɨ̂ Bôbo Fɨyini isaʼi ɨ dyêyn wì na àŋena nyoʼ ɨ kfɨtɨ tì, Bôbo Fɨyini ɨ taŋi sɨ̂ Mosìs. ²Wu n-bè sɨ̂ Mosìs na, “Bè sɨ̂ wâynà vâ Alòyn na ka wù na kolî mɨ ɨlvɨ gha zɨ̂ alèʼ ghè a kɨ layn ɨ̀ gòʼsɨ̀ ibàm abàs a ndzɨsɨ ghè a kɨ n-ghɨ asɨ antayntayn a mɨ̂kàyn nɨ̀ Bôbo. Alòyn kæ zɨ, a wù kfɨ bòm ta à n-ghɨ àlêʼ kì a mɨ n-fvɨ̂ a mbàʼsɨ̀ ma nà ghɨ ateyn atû àntayntayn a mɨ̂kàyn.

³“Alòyn na se sɨ zɨ alèʼ a laynɨ-a nâ ghè nô mɨ ɨlvɨ gha, wu zɨ nɨ̀ wâyn nyàm mbòloʼ ɨ lûmnɨ̀ sɨ a ifu sɨ loyn ilêsɨ̀ ifu, baʼsɨ̂ nɨ̀ àyaʼa sɨ fu ifu i nyoʼnɨ-i ateyn. ⁴Wù na se sɨ zɨ afu wu sù ɨ̀wuyn, ɨ màʼ ndzɨsɨ ngàŋ ndô Fɨyini sɨ fɨfɨnɨ sɨdyâ sìsɨ̀, ɨ maʼ kɨmɨ ɨsîsɨ̀ a wù n-mâʼ antêynɨ̀ tì, ɨ kul akue awaf atû àteyn, ɨ lɨm abâs afo kì a ghɨ n-lɨm atu tì. Wù n-kelɨ sɨ sù ɨwuyn jæ ta ka wù maʼ ɨfwo nâ wèyn bòm ta à n-ghɨ ndzɨsɨ laynɨsɨ. ⁵Ghelɨ Isìlæ̀ nɨn kelɨ sɨ fu tɨfef tɨ̀ bò na Alòyn zɨ ɨ̀ fu ifu ateyn ta ka Fɨyini fɨ lesɨ fù mbɨsɨ àŋena baʼsɨ̂ nɨ̀ àyaʼa ta ka wù zɨ ɨ̀ fu ifu i nyoʼnɨ-i ateyn.

⁶“Alòyn nɨ̀n kelɨ sɨ fu nyam mbòloʼ ilûmnɨ̀ sɨ a ifu ta ka Fɨyini fɨ̀ lesɨ fù mbɨsɨ ŋweyn ɨ̀ lèsɨ̀ fù mbɨsɨ ghelɨ ndo nɨ̀ ŋweyn. ⁷Wù fu, wu lì tɨ̀fef tìtɨ̀ tɨ̀ bò ɨ gvì nɨ̀ ɨ̀nteyntɨ ɨchfɨ fɨndo nɨ̀ Bôbo Fɨyini. ⁸Wù nî wu tɨm bèyʼ, ɨ yeyn na wu n-fu bzɨ ì kà antêynɨ̀ bzɨsɨ nâ ghè sɨ̀ bò sɨ̂ Bôbo Fɨyini a, ɨ̀ vìsi ì kà na yì lu a. ⁹Alòyn tɨm, wu li gvì nɨ̀ bzɨ zɨ̀ a bèyʼ àteyn dyèyn na à n-kelɨ Bôbo Fɨyini ɨ sɨ sɨ a ifu ta ka Bôbo lesɨ ɨ̀ fu mbɨsɨ ghelɨ Isìlæ̀. ¹⁰Mɨtì ɨ lì ɨzɨ̂ a bèyʼ dyèyn na ghɨ visi yì lu, ɨ ndù nɨ̀ nyeyn asɨ nɨ̀ Bôbo Fɨyini kɨ̀ i to ɨ sòysɨ̀ yì jelɨ̀ ndù a nse iyum ta ka Fɨyini fɨ lesɨ fù mbɨsɨ ghelɨ Isìlæ̀.

¹¹“Alòyn nɨn gvî nɨ̀ nyam mbòloʼ ilûmnɨ̀ ɨ̀ sɨ̀ sɨ a ifu ta ka mà lesɨ fù mbɨsɨ ŋweyn, ɨ̀ lèsɨ̀ fu mbɨsɨ ghelɨ ndo nɨ̀ ŋweyn. ¹²Wù na se sɨ zɨ alèʼ a laynɨ-a nâ ghè wu lì àkaŋ ileŋ ɨ we ɨ̀kfêtɨ̀ ɨvɨ̀s ateyn ma wù lì atû àbaŋ ifu, ɨ myèytɨ̀ ɨ̀wu ɨfwo vzɨ̀ a ghɨ n-nyôʼ wu nà lɨ̂mtɨ̀ foma ɨ̀ bwò ma ghɨ gva meyn wu faytɨ kfɨ. Wù myêytɨ̀ wu zɨ nɨ̀ ìnyeyni ibàm abàs a ndzɨsɨ afî asɨ alèʼ a laynɨ-a. ¹³Wù zɨ, wu nyòʼ ìleŋ ateyn asɨ nɨ̀ Bôbo, fɨleʼ fɨ ateynfɨ koʼ chɨ̀ytɨ nchɨl àntayntayn a mɨ̂kàyn ta ka Alòyn faŋ tɨ̀ yeyn sɨ kfɨ. ¹⁴Wù nî wu lì mɨ̀luŋ mɨ̀ nyàm mbòloʼ i lûmnɨ̀ ɨn lì ɨ mɨ̀sì a nchɨl àntàyntayn a mɨ̂kàyn nâ ghè ɨ fi lì ɨ̀n lì nɨ̀ baŋ àwu ɨ mɨ̀sì a nchɨl antayntayn a mɨ̂kàyn nâ ghè ìngal nsòmbo.

¹⁵“Wù mɨsì, wu sɨ bzɨ zɨ̀ a ghɨ nì fù sɨ a ifu na Fɨyini fɨ̀ lesɨ fù mbɨsɨ ghêl, ɨ lì mɨ̀luŋ mɨ̀ àteyn ɨ zɨ nɨ̀ ɨ̀mêyn ibàm abàs a ndzɨsɨ afî a kɨ n-kɨ̂ŋtɨ àntayntayn a mɨ̂kàyn, ɨ mɨ̀sì asɨ ateyn, ɨ mɨ̀sì ɨ̀n lì a nchɨl àteyn. ¹⁶À ti awo kì a Alòyn nɨn kelɨ sɨ nì ta ka alêʼ kì a kɨ layn gòʼsɨ̀ na kasi layna, a Fɨyini fɨ lesɨ fù awo a bɨ-a nɨ̀ ghelɨ Isìlæ̀. Wù n-kelɨ sɨ ni kɨmɨ tì a fɨndo nɨ̀ Bôbo Fɨyini ghè a fɨ n-ghɨ alèʼ ghè a ghelɨ Isìlæ̀ bɨ̀ ateyn nà nî àwo a bɨ-a. ¹⁷Alòyn na zɨ̂ a fɨndo nɨ̀ Bôbo Fɨyini sɨ fu ifu ta ka Bôbo lesɨ fù mbɨsɨ ŋweyn, ɨ̀ lèsɨ̀ fù mbɨsɨ ghelɨ ndo nɨ̀ ŋweyn, nɨ ɨ sɨ ghelɨ Isìlæ̀sɨ̀, ka wùl nɨ̂n fì zɨ afu, nô ta ka wù nî kàsi ɨ̀ fvɨ̀.

¹⁸“Wù fvɨ̂, wu ndù abaŋ ifu i nyoʼnɨ-i asɨ nɨ̀ Bôbo ɨ fu tɨfu tɨ ateyn afu ta ka abaŋ ateyn a na layna, ɨ lì mɨ̀luŋ mɨ̀ nyàm mbòloʼ mzɨ̀ baʼsɨ̂ nɨ̀ ɨmzɨ̂ mɨ̀ bzɨ ɨ yoʼ a mɨchoʼ ghè a mɨ̀ n-ghɨ atû àbaŋ ifu tì ta ndoŋsɨ nyâm. ¹⁹Wù yoʼ wu li mɨ̀luŋ mɨ̀ àteyn ɨ̀n lì nɨ̀ baŋ àwu ìngal nsòmbo, ɨ mɨ̀sì abaŋ ifu ta ka kɨ layn sɨ awo a bɨ-a ghè a ghelɨ Isìlæ̀ mòm tî.

²⁰“À na ghɨ ta Alòyn fu mèsì tɨ̀fu ta ka alêʼ kì a kɨ layn gòʼsɨ̀, nɨ̀ fɨ̀ndo fɨ Bôbo Fɨyini fɨ̀, kɨ̀mɨ nɨ̀ àbaŋ ifu a na layna, wu li gvì nɨ̀ bzɨ ì lì zɨ̂ asɨ nɨ̀ Bôbo Fɨyini. ²¹Wù gvî, wu lèm ɨ̀wu ɨ ŋweyn atû àteyn ɨ loyn, Fɨyini fɨ lesɨ fù awo a bɨ-a nɨ̀ ghelɨ Isìlæ̀ nô à jɨ̀m, nɨ̀ àtu a tonɨ-a nɨ̀ àŋena sɨ̂ Fɨyini fɨ. Wu n-nî tèyn, a awo a bɨ-a nɨ̀ àŋena nô à jɨ̀mà na sɨ ghɨ kɨ atu nɨ̀ bzɨ nâ ghè. Wù nî wu choʼ wul wù jum ndù nɨ̀ bzɨ àteyn a nse iyum. ²²Bzɨ àteyn nɨn beʼì mbɨsɨ ghelɨ Isìlæ̀ nô sɨ̀ jɨ̀m, a wùl vzɨ̀ a ghɨ nì chòʼ tî soysɨ a yì ndu nɨ̀ nseynsɨ a nse ìyum.

²³“Bzɨ àteyn nɨn lu-à, a Alòyn kæ kasi sɨ zɨ a fɨndo nɨ̀ Bôbo Fɨyini, sɨ choʼtɨ ndzɨ sɨ fɨfâ sìsɨ̀ a wù nì màʼ jæ ta ka wù zɨ alèʼ ghè a kɨ layn gòʼsɨ̀ tî ɨ lèm afu. ²⁴Wù lêm wu sù ɨ̀wuyn ŋweyn alèʼ a laynɨ-a, ɨ maʼ ndzɨ sìsɨ̀ wù lum màʼ ɨ fvɨ̀ ɨ fu ifu i nyoʼnɨ-i nɨ̀ ŋweyn ɨ fi fu ifu i nyoʼnɨ-i nɨ̀ ghelɨ Isìlæ̀ ta ka Fɨyini fɨ lesɨ fù ŋweyn, ɨ̀ lèsɨ̀ fù ghelɨ Isìlæ̀. ²⁵Wù fu ìfu nâ zɨ̀ na Bôbo lesɨ fù mbɨsɨ àŋena, wu nyoʼ kɨmɨ ìso ateyn atû àbaŋ ifu.

²⁶“Wùl vzɨ̀ a wù nì ndù sòysɨ̀ vìsi bzɨ zɨ̀ a yì bèʼì mbɨsɨ ghelɨ Isìlæ̀ a nse ìyum tì nî wu sù ɨ̀wuyn ŋweyn. Wù sû, wu su kɨmɨ ndzɨsɨ ŋweyn jæ ta ka wù kasi gvì alèʼ ghè a ghɨ bɨ̀ ateyn. ²⁷Ghɨ n-kelɨ sɨ li nyam mbòloʼ ì lûmnɨ̀ zɨ̀ nɨ̀ bzɨ zɨ̀ a ghɨ nì fù sɨ ifu na Fɨyini fɨ lesɨ fù mbɨsɨ tî, ɨ̀ lì zɨ̀ nɨ̀ mɨ̀luŋ mɨ̀ àteyn alèʼ ghè a kɨ n-layn kfeynɨ ta ka Fɨyini fɨ lesɨ fù mbɨsɨ ghêl tì sɨ fvɨ nɨ̀ ɨ̀nseynsɨ sɨ a alèʼ ghè a ghɨ bɨ̀ ateyn. Ghɨ fvɨ̂ ghɨ nyòʼ gvɨ àteyn nɨ̀ njwò àteyn baʼsɨ̂ nɨ̀ ɨ̀wâl ateyn nô ɨ̀ jɨ̀m. ²⁸Wùl vzɨ̀ a ka wù nyoʼ ɨfwo nâ vzɨ̀ nɨn kelɨ sɨ sù ɨwuyn ŋweyn nɨ̀ ndzɨsɨ ŋweynsɨ, jæ ta ka wù kasi gvì alèʼ ghè a ghɨ bɨ̀ ateyn.

²⁹“À na ghɨ a mɨchi ìvɨm a njoŋsɨ nsòmbo nô mɨ a bêŋ ì kà, yi nà kelɨ sɨ bam ɨchfɨ̂ nô ghɨ̀ jɨm sɨ faŋ tɨ̀ fèl iwo, kèsa à n-ghɨ wul àtum ta wù n-chi a yi antêynɨ̀ a, kèsa à n-ghɨ wul ɨ̀ Isìlæ̀ a. Isaʼ nâ yèynì ɨ ghɨ sɨ faŋ kɨ faŋ sɨ̂ zɨ̀ kɨ̀ samoʼ. ³⁰Yi na ghɨ tèyn bòm ta à n-ghɨ achi nâ ghàyn ghɨ fu ifu ta ka Fɨyini fɨ lesɨ fù mbɨ̂ sisɨ nô sɨ̀ jɨ̀m, a yì na layna asɨ nɨ̀ Bôbo Fɨyini. ³¹Achi nâ kèynà nɨn ghɨ àchi ɨtuʼ ilaʼ, yi kelɨ sɨ nà bam ɨchfɨ̂ ateyn, a ghɨ ìsaʼ ghɨ sɨ faŋ kɨ samoʼ sɨ̂ zɨ̀. ³²Ngàŋ ndô Fɨyini zɨ̀ a ka ghɨ læ̂ yìsi na yì li alêʼ a bò ŋweyn Alòyn ta ngàŋ ndô Fɨyini ì ngaŋtɨnɨ læ̀ nà fu ìfu nâ yèynì ta ka Fɨyini fɨ lesɨ fù mbɨsɨ ghêl. Wù læ̀ nà mâʼ ndzɨsɨ ngàŋ ndô Fɨyini sɨ fɨfâ sɨ̀, ³³fu tɨ̀fu ta ka alêʼ kì a kɨ layn gòʼsɨ̀ na layna, fɨ̀ndo fɨ Bôbo fɨ layna, abaŋ ifu a layna nɨ̀ ngàŋsɨ ndô Fɨyinisɨ̀ baʼsɨ̂ nɨ̀ ghelɨ Isìlæ̀ nô ghɨ̀ jɨ̀m.

³⁴“Ghɨ n-kelɨ sɨ nà fu ifu ɨlvɨ ɨ̀mòʼ a bêŋ ta ka Bôbo lesɨ fù mbɨsɨ ghelɨ Isìlæ̀ nô sɨ̀ jɨ̀m. Tɨsaʼ nâ tèyntɨ faŋ meyn kɨ̀ sɨ a mɨlvɨ ɨ̀n jɨ̀m.”

Ghɨ n-læ meyn nì nô mɨ ghà ta Bôbo Fɨyini nɨn læ bè sɨ̂ Mosìs.