Leviticus 17

Tɨsaʼ kûm mɨ̀luŋ mɨ̀ nyamsɨ ifu

¹Bôbo Fɨyini nɨ̀n be meyn sɨ̂ Mosìs na, ²“Bè sɨ̂ Alòyn ŋêyn woyn ŋweyn baʼsɨ̂ nɨ̀ ghelɨ Isìlæ̀ nô ghɨ̀ jɨ̀m na, ‘Ɨtêyntɨ̀ nɨn ghɨ tɨ̀saʼ tìtɨ̀ a Bôbo Fɨyini fu. ³Wul ɨ̀ Isìlæ̀ na sɨ nyam sɨ a ifu, a ghɨ mbòŋ, kèsa njɨ̀, kèsa bzɨ ndoŋ, alèʼ ghè a ghɨ bɨ̀ ateyn, kèsa wù sɨ̀ abe, ⁴bula wù gvî nɨ̀ ɨ̀nyeyn ɨchfɨ fɨndo nɨ̀ Bôbo sɨ fu ifu ateyn. Wù kæ ni têyn, a à na ghɨ ma wù fe meyn ìsaʼ ta wù sfɨ̀s mɨluŋ mɨ̀ ìfu alèʼ a kɨ lu-à, ghɨ kelɨ sɨ sàŋ sɨ fvɨ̀sɨ ŋweyn sɨ a antêynɨ̀ nɨ̀ ghelɨ Isìlæ̀. ⁵Isaʼ nâ yèynì nɨn ghɨ tèyn ta ka ghelɨ Isìlæ̀ na gvì nɨ̀ tɨ̀fu tìtɨ̀ a àŋena tî nà fu ɨlwèʼ ɨ wulû tî, fu sɨ̂ ngàŋ ndô Fɨyini ɨchfɨ fɨndo nɨ̀ Bôbo Fɨyini lvɨ̂yn sɨ a ifu sɨ nà chî nɨ̀ mbôynɨ̀. ⁶Àŋena na fu-a, ngàŋ ndô Fɨyini ɨ nà kelɨ sɨ li mɨluŋ mɨ̀ àteyn sɨ mɨ̀sì ɨwùyn abaŋ ifu nɨ̀ Bôbo ɨchfɨ fɨndo nɨ̀ Bôbo Fɨyini, sɨ nyòʼ iso ateyn na yi na lɨ̂mtɨ̀ fom sɨ̂ Bôbo Fɨyini.’ ⁷Ghelɨ Isìlæ̀ nɨn kelɨ wi sɨ nà fî fu tɨfu tɨ àŋena sɨ̂ ɨ̀nfyèʼsɨ̀ vzɨ̀ a àŋena nɨn koʼsɨ wu ghɨ ta bzɨsɨ ndoŋ. Isaʼ nâ yèyni faŋ meyn kɨ̀ samoʼ sɨ̂ ghelɨ Isìlæ̀ nɨ̀ ɨ̀jwâŋ vzɨ̀ a wu n-læ̀ koʼ a ibàm.”

⁸“Bè sɨ̂ àŋena na wul ɨ̀ Isìlæ̀ kèsa wul àtum ta wù n-chi ŋêyn àŋena, kæ fu ifu i nyoʼnɨ-i, kèsa tɨfu tɨ litɨ, ⁹bula wù gvî nɨ̀ ìnyeyni a ɨchfɨ fɨndo nɨ̀ Bôbo sɨ a ifu, a ghɨ na kelɨ sɨ sàŋ sɨ fvɨ̀sɨ ŋweyn sɨ a antêynɨ̀ nɨ̀ ghelɨ Isìlæ̀.”

¹⁰“Wul ɨ̀ Isìlæ̀ kèsa wul àtum ta wù n-chi ŋêyn àŋena, kæ sɨ kfɨl njwò nɨ̀ mɨ̀lûŋ ateyn, a Bôbo Fɨyini beyn jɨm sɨ̂ ŋweyn ɨ̀ fvɨ̀sɨ̀ wul àteyn sɨ a antêynɨ̀ nɨ̀ ghelɨ ŋweyn. ¹¹Yi n-ghɨ tèyn bòm ta nô mɨ ghà ta kɨ n-zuêsɨ̀ nɨn chi kɨ bòm mɨ̀luŋ. Ma be meyn na yì na fu mɨ̀luŋ mɨ̀ àteyn abaŋ ifu sɨ̂ mà ta ka mà na lêsɨ̀ fù mbɨ sisɨ. À n-ghɨ mɨ̀luŋ a mɨ̀ n-gâmtɨ̀ na mà lesɨ fù mbɨsɨ ghêl.” ¹²À ti iwo zɨ̀ a mà bè sɨ̂ ghelɨ Isìlæ̀ na, “Ka wùl sɨ̂ zɨ̀, kèsa wul àtum ta wù n-chi a yi antêynɨ̀ nɨ̂n læ̀ kfɨl njwò nɨ̀ mɨ̀lûŋ ateyn.”

¹³“Wul ɨ̀ Isìlæ̀, kèsa wul àtum ta wù n-chi a yi antêynɨ̀ kæ sɨ byem ɨ̀ kù nyam kèsa fɨyuyn ma ghɨ kàʼ a ghɨ kfɨl, a wù na kelɨ sɨ sɨ na mɨ̀lûŋ mɨ̀ àteyn fvɨ, wù chɨytɨ nɨ̀ nsesɨ. ¹⁴Nô mɨ àfo a zuesɨnɨ-a à kà nɨn chî kɨ bòm ta kɨ n-kelɨ mɨluŋ. À ti iwo zɨ̀ a mà bè sɨ̂ ghelɨ Isìlæ̀ na, ka wùl nɨ̂n læ̀ kfɨl njwò àfo a zuesɨnɨ-a bula ghɨ sɨ na mɨ̀luŋ fvɨ bòm ta kɨ n-chi kɨ bòm mɨ̀luŋ. À kæ sɨ kfɨl nô mɨ ndà ɨ njwò, mɨ̀lûŋ ɨ ghɨ ateyn, a ghɨ na kelɨ sɨ sàŋ sɨ fvɨ̀sɨ ŋweyn sɨ a antêynɨ̀ nɨ̀ ghelɨ̀ ghem.”

¹⁵“Nô mɨ wul ɨ̀ Isìlæ̀ ɨ̀ kfà, kèsa wul àtum ta wù n-chi a Isìlæ̀ kæ sɨ kfɨlɨ nyam ma yì kfɨ̀ kfɨ, kèsa à zuè nyam ɨ̀twaʼ, a wù na kelɨ sɨ sù ɨwuyn ŋweyn, ghɨ wi sɨ nà layna nô ta ka ɨtuʼ nî jɨ jæ ta ka wù na sɨ layna. ¹⁶Mɨtì ma wù kæ sɨ faŋ tɨ̀ sù ɨwuyn ŋweyn nɨ̀ ndzɨsɨ ŋweynsɨ, a ghɨ fu ngeʼ sɨ̂ ŋweyn.”