Leviticus 24
Ifu i nyoʼnɨ-i
Tɨsaʼ kûm Lâm sìsɨ̀ a sɨ n-ghɨ alèʼ a laynɨ-a
1Bôbo Fɨyini nɨ̀n be meyn sɨ̂ Mosìs na, 2“Bè sɨ̂ ghelɨ Isìlæ̀ na àŋena gvi nɨ̀ mɨ̀vɨl mɨ̀ olìfsɨ̀ ɨ̀n jùŋ ghɨ wê a lâmsɨ̀ a fɨndo nɨ̀ Bôbo, ta ka sɨ na balî kɨ mɨlvɨ ɨ̀n jɨ̀m. 3Alòyn nɨn kelɨ sɨ nà dyâyn lâmsɨ ateyn kɨ mɨchi ɨ̀n jɨ̀m aleŋ ɨ̀lvɨ ikfa sɨ chem ta ka ɨtuʼ layn ibàm abàs a ndzɨsɨ ghè a ghɨ ghaŋsɨ kɨ na kɨ̂ŋtɨ̀ àntayntayn a mɨ̂kàyn nɨ̀ Bôbo Fɨyini. Isaʼ nâ yèyni faŋ meyn kɨ̀ samoʼ nô mɨ sɨ̂ àjâŋ à kà ta kɨ læ̀ koʼ ibàm. 4Wù n-kelɨ sɨ nà dyâyn lâm nâ sèynsɨ̀ na sɨ na bayn asɨ nɨ̀ Bôbo Fɨyini kɨ̀ mɨlvɨ ɨ̀n jɨ̀m atû àfo ghè a ghɨ n-tomtɨ lâmsɨ̀ ateyn ma ghɨ fàytɨ nɨ̀ àso ɨkwo a baŋnɨ-a kɨ kelɨ wi ilɨŋ.
5“Lam abayn nɨ̀ ɨnkfɨ̂ŋ ma ghɨ gva meyn mɨ̀ faytɨ̂ kfɨ, ɨ kef tɨghef njvàsɨ̀ bò, nô mɨ ìghef abayn ì kà ɨ ghɨ ma ghɨ lì ìfûʼ i ɨnkfɨ̀ŋ ɨ̀ gwòtɨ̀ ɨlwêʼ ìvɨm ɨ̀ lì ɨlwêʼ ɨ̀ bwò ɨ̀ làm ateyn. 6Wà lam, wa lèm tɨ̀ghef tɨ abayn nâ tìtɨ̀ a mbaŋi sɨ̀ bò atû àbaŋ ghè a ghɨ fàytɨ nɨ̀ àso ɨkwo a baŋnɨ-a kɨ kelɨ wi ilɨŋ tî asɨ nɨ̀ Bôbo, nô mɨ mbaŋi ì kà ɨ kelɨ tɨ̀ghef tɨ abayn ntufa. 7Lèm ileŋ yi kelɨ wi ilɨŋ nô mɨ a mbaŋi ì kà sɨ dyèyn na ifu ateyn nô ì jɨ̀m nɨn kelɨ Bôbo Fɨyini. Ifu ateyn nɨn lî àlêʼ abayn, a ghɨ ìfu ghɨ nyôʼ nyoʼ sɨ̂ Bôbo Fɨyini. 8Ngàŋ ndô Fɨyini nɨn kelɨ sɨ nà lêm abayn nâ kèynà asɨ nɨ̀ Bôbo Fɨyini kɨ̀ mɨchi mɨ̀ ɨ̀tuʼ ilaʼ ɨ̀n jɨ̀m alèʼ nɨ̀ ghelɨ Isìlæ̀. À n-ghɨ mɨ̀kâyn ma mɨ̀ faŋ meyn kɨ̀ samoʼ. 9Tɨghef tɨ abayn nâ tèyn tɨ̀ nɨn kelɨ Alòyn ŋêyn woyn ŋweyn a ghɨ àbâs ifu kì a kɨ layn gòʼsɨ̀, àŋena kelɨ sɨ yɨ kɨ alèʼ a laynɨ-a bòm ta à n-ghɨ ìfu zɨ̀ a yi n-layn kfeynɨ antêynɨ̀ ìfu ghè a ghɨ nyòʼ nyoʼ sɨ̂ Bôbo Fɨyini.”
Tɨsaʼ kûm sɨ nà yvɨnɨ Fɨyini nɨ̀ ɨ̀fwo vzɨ̀ a wù fàytɨ.
10Wùl ɨ̀ lvɨ̀ nɨn læ meyn nà nû wul ɨ̀ Isìlæ̀ alèʼ ghè a àŋena bɨ̀ ateyn, bò ŋweyn ɨ ghɨ wul ɨ̀ Ijìb nà ŋweyn ɨ ghɨ wul ɨ̀ Isìlæ̀. 11Àŋena se sɨ nu tî, wâyn wùl ɨ̀ Isìlæ̀ nâ vzɨ̀ ɨ bɨm telɨ kɨ telɨ Bôbo Fɨyini, ghɨ ghal ɨ ndù nɨ̀ ŋweyn sɨ̂ Mosìs. Izɨyn i nà ŋweyn i nà n-ghɨ Shelomìt ɨ wâyn Diblì ɨ wul ɨ̀ Dân. 12Ghɨ n-dù ɨ lèm ŋweyn sugèyʼsɨ̀ ɨ nà chi-à sɨ chem ta ka Bôbo Fɨyini dyeyn iwo zɨ̀ a ka ghɨ ni nɨ̀ ŋweyn.
13Bôbo Fɨyini ɨ kæ be sɨ̂ Mosìs na, 14“Li fvɨ nɨ̀ wùl nâ wèyn sɨ a alèʼ ghè a ghelɨ Isìlæ̀ bɨ̀ ateyn. Wà fvɨ̂, nô mɨ ndà ta wù nì yvɨ̀ ta wù n-telɨ ma ɨ lèm àwu a ŋweyn atu sɨ dyèyn na wù ni meyn mbɨ. Ghɨ lêm, ghelɨ Isìlæ̀ nô ghɨ̀ jɨ̀m ɨ tɨmlɨ zue ŋweyn nɨ̀ ngòʼsɨ̀. 15Bè sɨ̂ ghelɨ Isìlæ̀ na, ‘À kæ te nô mɨ ndà Fɨyini, a ghɨ fu ngeʼ sɨ̂ ŋweyn. 16À kæ te nô mɨ ndà Bôbo Fɨyini, a ghelɨ Isìlæ̀ nô ghɨ̀ jɨ̀m tɨmlɨ ɨ̀ zuè ŋweyn nɨ̀ ngòʼsɨ. Wùl kæ te Fɨyini a ghɨ mɨ wul ɨ̀ Isìlæ̀ kèsa wul ɨ̀ gvinɨ, a ghɨ na kelɨ sɨ zue ŋweyn.’”
17“À kæ zue nô mɨ ndà wul a ghɨ na kelɨ sɨ zue ŋweyn. 18Wùl kæ zue nyâm wùl, a wù na kelɨ sɨ laʼ nyam ateyn kɨ nɨ̀ nyàm i to. 19Wùl kæ lemsɨ wâynà ŋweyn, kèsa wù lèmsɨ ŋweyn nô mɨ a dzɨ ì kà, a ghɨ lemsɨ ŋweyn kɨ̀mɨ a dzɨ nâ ghè. 20Wùl ɨ̀ kæ kòl avɨf a wûl, ghɨ boŋ kòl a kɨ ŋweyn a, ɨ̀ zue isɨ i wûl, ghɨ boŋ zue iyi i ŋweyni, ɨ̀ chòʼ isoŋ i wûl, ghɨ boŋ choʼ iyi i ŋweyni. Wùl kæ lemsɨ wâynà ŋweyn nô mɨ a dzɨ ì kà a ghɨ boŋ lèmsɨ kɨ̀mɨ ŋweyn tì. 21Wùl kæ zue nyam a wù na kelɨ sɨ làʼ, mɨtì ma wùl kæ zue wul, a ghɨ na kelɨ sɨ zue ŋweyn. 22Tɨsaʼ nâ tèyntɨ̀ nɨn ghɨ kɨ sɨ̂ ghelɨ ghɨ̀ jɨ̀m, ɨ zɨ ghelɨ Isìlæ̀, baʼsɨ̂ nɨ̀ ghelɨ ɨtum ghì a ghɨ n-ghɨ a yi antêynɨ̀. À n-ghɨ mà Bôbo Fɨyini ɨ Fɨyini fifɨ.”
23Mosìs nɨn fu mèsi tɨsaʼ nâ tèyntɨ̀ sɨ̂ ghelɨ Isìlæ̀, àŋena kæ lì sɨ fvɨ̀ nɨ̀ wul ɨ̀ vzɨ̀ a wù tèlɨ Fɨyini tì sɨ alèʼ ghè a ghɨ bɨ̀ ateyn sɨ tɨmlɨ sɨ zue nɨ̀ ngòʼsɨ̀. Ghelɨ Isìlæ̀ nɨn nî kɨ ta Bôbo Fɨyini nɨ̂n be sɨ̂ Mosìs.